12/09/2023
فيلم
بالعربي: الحقيقة اللي مش هتعجبك
(آبي) منتجة برنامج تلفزيوني، البرنامج بيقع ونسب المشاهدة ف الحضيض والقناة بتفكر تقفل البرنامج.
صاحب القناة قرر انه عشان ينقذ البرنامج هيجيب (مايك) يقدم فقرة فيه.
(مايك) مقدم برامج مش مشهور اوي، برنامجه الاصلي كان متمحور حوالين العلاقات بين الرجالة والستات، مع نصايحه الشخصية واستقبال مكالمات المشاهدين الغاضبة..
فجأة آبي بتلاقي نفسها مضطرة تتعامل مع مايك بكل سخافته وغروره وميزوچينيته اللي بيمثلوا كل حاجة بتكرهها..
مع الوقت العلاقة بين آبي ومايك بتتغير نسبيا، هو بيديها نصايح ف العلاقات والنصايح دي بتثبت فعاليتها. وهي بخبرتها كمنتجة بتسهم في انه يبقى مشهور اكتر ومعروف لدرجة انه بيجيله عروض من قنوات اكبر بفلوس اكتر..
لكن.. ماذا كان القدر يخبيء لآبي ومايك؟.. هذا ما ستعرفه عندما تشاهد الفيلم...
قصة الفيلم بتطرح -بقصد او بدون قصد- اسئلة كتيرة افتكر ان من الطبيعي تيجي ف دماغ اي حد بيفكر.. زي مثلا:
- هو الانسان كائن بيتصرف بغريزته ولا بعقله المجرد؟ هل الانجذاب للشكل او الجسم او نبرة الصوت معناه انه حيوان؟ ولا هل الانجذاب للرومانسية والمشاعر معناه انه طري واهبل؟ ولا الانجذاب للعقل وطريقة التفكير معناه انه انه صخرة مبتحسش؟ ولا حسابات العقل والمنطق بدون انجذاب جسدي ولا شعوري ولا فكري معناه انه روبوت او مكنة؟
- هل الانسان فعلا جزء من باقي الحيوانات وميفرقش كتير عنهم غير انه بيلبس بدلة وبيفرح بصوت الفلوس اللي طالعة من ال ATM. ولا هو مخلوق في طبقة منفصلة تماما عن باقي الكائنات وفي فرق شاسع بينه وبينهم ف التفكير والتصرف؟
- هل الاحسن ف العلاقات الاجتماعية ان الواحد يتظاهر بصفات مش فيه عشان يوصل لانه يكون محبوب او حتى مقبول؟ ولا الاحسن انه يكون نفسه حتى لو دة معناه انه يكون وحيد دايما؟
- هل الانسان بيتغير فعلا؟ هل الشخصية العقلانية ممكن بسبب موقف ما ممكن تتحول عاطفية؟ وهل الشخصية اللي عندها مباديء ممكن بسبب موقف ما ممكن تتخلى عن او تتجاهل مبادئها؟
- هل الحب الرومانسي ينفع يبقى منفصل عن الحب الجسدي وعن الحب الفكري؟ ولا هم لوكشة واحدة؟ وهل لو حاجة فيهم مش موجودة دة يتصنف حب ولا لأ؟
- ليه الافكار والتصنيفات والتفضيلات الجنسية بيتم شيطنتها والتكتيم عليها واعتبارها عيب وحرام وكخ وقلة ادب، مهما كانت حاجات طبيعية ومشتركة بين كل البشر؟ وليه لازم دايما لازم الحاجات دي تكون مستخبية وفي الضلمة -حتى لو كانت شرعية وقانونية-؟ وليه دايما لازم الادب والاحترام بصورته المجتمعية هو اللي لازم يكون ظاهر، واي حاجة تانية تتدفن في اللا شعور وتطلع على هيئة عقد وقرف ومعاداة للاخر واضطهاد للمختلف؟
- لأي درجة ممكن الواحد يتنازل عن حاجات مؤمن بيها لمجرد انه اعجب بشخص تاني بيقول/بيعمل عكس الحاجات دي؟ فين الحد الفاصل بين قبول الاخر زي ما هو وبين الدفاع عن المباديء والتضحية حتى بعلاقة رائعة عشان يكون الواحد متسق مع نفسه واللي مؤمن بيه؟
- هل فعلا في شخص نقدر نقول انه فاهم الدنيا فعلا؟ او بيتصرف مظبوط ع طول طبقا لمنهجه الفكري؟ هل في اسلوب واحد للحياة هو اللي المفروض نشاور عليه ونبجله ونطمح له ونضربله تعظيم سلام ونرمي كل الاساليب الاخرى في الحمام ونشد عليها السيفون؟
طبعا انا شخصيا عارف اجابات كل الاسئلة دي، بس مش هقولهالكو 😎
الفيلم لطيف حقيقي وكوميدي -ومش معقد زي البوست 🙄-، وجيلنا غالبا بيحب الممثلين دول (كاثرين هايجل، چيرارد باتلر) فهيعجبه الفيلم..
ياخد ٨ نجوم من ١٠ ⭐⭐⭐⭐⭐⭐⭐⭐
باقي مناقشات الافلام ع هاشتاج
