Şabran Rayon Mərkəzi Xəstəxanası

25/01/2026

1953-cü ildən etibarən hər il yanvarın sonuncu bazar günü Ümumdünya Cüzam Xəstələrinə Yardım Günü kimi qeyd edilir.

Həmin günün qeyd olunmasında məqsəd problemə yalnız tibb işçilərinin deyil, həm də geniş ictimaiyyətin, inzibati idarəetmə orqanlarının, ictimai təşkilatların, işgüzar dairələrin, xeyriyyəçiliklə məşğul olan fondların, dini icmaların və ayrı-ayrı şəxslərin diqqətini cəlb etməkdir.

Cüzam xəstəliyini ilk dəfə 1873-cü ildə norveçli həkim Herhard Hanzen aşkar edib. Xəstəlik nəticəsində ən çox dəri, yuxarı tənəffüs yolları və periferik sinirlər zədələnir. Həmin toxumalarda xarakterik iltihab ocaqları olan qranulomalar əmələ gəlir.

23/01/2026

TƏBİB və İcbari Tibbi Sığorta üzrə Dövlət Agentliyinin təşəbbüsü ilə tibb müəssisələrində həssas əhali qrupuna daxil olan vətəndaşların maarifləndirilməsi məqsədilə Brayl əlifbası ilə xüsusi təlimat kitabçaları hazırlanıb.

Bu təşəbbüs çərçivəsində Şabran Rayon Mərkəzi Xəstəxanasında da vətəndaşların məlumatlandırılması məqsədilə maarifləndirici kitabçalar təqdim olunub. Görmə məhdudiyyəti olan şəxslərin rahat istifadəsi üçün nəzərdə tutulan kitabçalar xəstəxananın vətəndaşların daha çox istifadə etdiyi və sıx toplaşdığı ərazilərdə yerləşdirilib.

Görülən bu işlər həssas əhali qrupuna daxil olan vətəndaşların tibbi xidmətlər, hüquq və imkanlar barədə məlumatlılığının artırılmasına, eləcə də əlçatanlığın təmin olunmasına xidmət edir.

22/01/2026

Şabran Rayon Mərkəzi Xəstəxanasında 2025-ci il ərzində 1000-dən çox müharibə iştirakçısı və şəhid ailəsi üzvlərinə tibbi xidmət göstərilib

Vətən müharibəsi zamanı xəsarət almış şəxslərin və şəhid olmuş vətəndaşlarımızın birinci dərəcəli qohumlarının ehtiyac olduğu təqdirdə tibbi xidmətlərdən vaxtında yararlanması, müvafiq dövlət qurumları ilə birlikdə qeyd olunan əhali qrupuna əlaqəli şəkildə və çevik xidmətin göstərilməsi, həmçinin qurumlar arasında əlaqələndirilmənin dinamikasını təmin etmək məqsədiylə Şabran Rayon Mərkəzi Xəstəxanasında Müharibə iştirakçıları ilə iş bölməsi fəaliyyət göstərir.

Fəaliyyətin tamlığı və operativliyinin təmin edilməsi məqsədilə Şabran Rayon Mərkəzi Xəstəxanasında müharibə iştirakçıları və şəhid ailələri ilə iş üzrə 1 nəfər koordinator çalışır.

Koordinatorun əsas vəzifəsi tibb müəssisəsinə müraciət edən müharibə iştirakçıları və şəhid ailə üzvlərinin müraciət istiqamətinə uyğun olaraq növbəsiz şəkildə qeydiyyata alınması, ixtisaslı həkim müayinəsinə aparılması, həkim təyinatı əsasında instrumental və laborator müayinələrdən növbəsiz keçirilməsinin təmin edilməsi, alınacaq tibbi xidmətin dövlət tibb müəssisələrində olmadığı halda müqaviləli özəl tibb müəssisələrinə İcbari Tibbi Sığorta üzrə Xidmətlər Zərfi çərçivəsində göndərişlə təmin olunmasına dəstək göstərilməsi, şəhid ailələri və əlilliyi olan müharibə iştirakçılarının dərman təminatının aparılması üçün YAŞAT fonduna təqdim olunacaq sənədlərin hazırlanmasına dəstək göstərilməsindən ibarətdir.

Həmçinin koordinator tərəfindən müəyyən vaxt intervalı gözlənilməklə Vətən müharibəsi iştirakçıları və şəhid ailə üzvlərinə mütəmadi zənglər olunması və bu zənglərə əsasən tibbi xidmətə ehtiyacı olanların vaxtında müayinə və müalicə prosedurlarına cəlb olunması təmin edilib.

Belə ki, koordinator tərəfindən 2025-ci il ərzində Vətən müharibəsində xəsarət alanlara 1129, şəhid ailələrinə 850 zəng olunmuşdur.

Həmçinin 2025-ci il ərzində tibb müəssisəsində ümumilikdə 987 Vətən müharibəsi iştirakçısına,445 şəhid ailə üzvünə tibbi xidmət göstərilib.

22/01/2026

Əlilliyin təyinatı üçün hansı hallarda göndəriş verilməlidir?

Cavab: Azərbaycan Respublikası Nazirlər Kabinetinin 2020-ci il 16 yanvar tarixli 12 nömrəli Qərarı ilə təsdiqlənmiş Əlilliyin qiymətləndirilməsi məqsədilə tibbi-sosial ekspertiza müayinəsinə göndərişlərin verilməsi qaydasına əsasən göndəriş verilməsi üçün aşağıdakı 5 əsas müəyyən edilib:

- Şəxsin eyni xəstəliklə son 6 (altı) ay müddətində fasiləsiz və ya son 12 (on iki) ay müddətində fasilələrlə ümumilikdə 6 (altı) aydan çox ambulator və ya stasionar müalicədə olmasına baxmayaraq, orqanizmin pozulmuş funksiyalarının bərpa olunmaması və şəxsin cəmiyyətin həyatında tam və səmərəli iştirakına mane olan sabit fiziki, psixi, əqli və ya hissiyyat pozuntularının olması;

- Şəxsdə əqli pozuntuların və anatomik çatışmazlıqların, dərmanlara davamlı vərəm formalarının, lll, IV mərhələ onkoloji xəstəliklərin, V mərhələ xroniki böyrək xəstəliyi həmçinin 12 nömrəli qərarın 1 nömrəli əlavəsində qeyd olunan diğər xəstəliklərin olması (göndəriş 1-ci bənddə göstərilən müddət gözlənilmədən verilir);

- Əlillik müddətinin bitməsindən sonra qeyd olunan pozuntuların, çatışmazlıqların və xəstəliklərin 12 nömrəli qərarın 2 nömrəli əlavəsində qeyd olunan müalicə müddətləri nəzərə alınmaqla davam etməsi;

- Peşə əmək qabiliyyətinin itirilməsi dərəcəsinin müəyyən edilməsi;

- Əlilliyi olan şəxsin sağlamlıq vəziyyətində olan dəyişikliklə bağlı (azalma, artırılma, ləğv edilmə) Komissiyanın rəyinə əsasən tibbi-sosial ekspertiza müayinəsinə zərurət yaranması.

20/01/2026

20 Yanvar 2026-cı il tarixində Şabran rayonunda 20 Yanvar faciəsinin 36-cı ildönümünə həsr olunmuş anım tədbiri keçirilib.

Tədbirdə Şabran Rayon Mərkəzi Xəstəxanasının rəhbərliyi və işçi kollektivi də iştirak edib.

Tədbir iştirakçıları anım mərasimi çərçivəsində 20 Yanvar şəhidlərinin əziz xatirəsi dərin ehtiramla yad edib, xalqımızın tarixində silinməz iz qoymuş bu faciənin unudulmamasının, gələcək nəsillərə çatdırılmasının vacibliyini bir daha qeyd edərək şəhidlərin xatirəsinə hörmətlərini ifadə ediblər.

20/01/2026

Vətənimizin azadlığı uğrunda canlarından keçən şəhidlərimizin əziz xatirəsini qürur və ehtiramla anırıq!

20/01/2026

19/01/2026

19/01/2026

20 Yanvar – faciəsinin 36-cı ildönümü münasibətilə Şabran Rayon Mərkəzi Xəstəxanasında anım tədbiri keçirilib.

Tədbirdə xəstəxananın rəhbərliyi, həkim və orta tibb işçiləri iştirak edib.

Tədbiri giriş sözü ilə açan xəstəxananın direktoru Səxavət Cəbrayılov çıxışında 20 Yanvar gecəsi baş verən hadisələrdən danışmış, xalqımızın azadlıq və müstəqillik uğrunda göstərdiyi qəhrəmanlığı, şəhidlərin fədakarlığını və milli birlik ruhunu vurğulamışdır.

Tədbir çərçivəsində şəhidlərin xatirəsi bir dəqiqəlik sükutla yad edilib.

Daha sonra Yap Şabran Rayon Təşkilatı, “Heydər Əliyev prospekti 97” (Rayon Mərkəzi Xəstəxanası) Ərazi Partiya Təşkilatının sədri Kəmalə Süleymanova 20 Yanvar hadisələrinin tarixi əhəmiyyəti, xalqımızın qəhrəmanlığı və milli birlik ruhu haqqında məruzə çıxışı etmişdir. Məruzədə şəhidlərin göstərdiyi fədakarlıq və igidlik xüsusi vurğulanmış, azadlıq mübarizəsinin gələcək nəsillərə örnək olduğu qeyd edilmişdir.

Hadisə şahidi olaraq tədbirdə iştirak edən mama-ginekoloq Roza Poladova və Laboratoriya şöbə müdiri Kifayət Vidadiyeva öz xatirələrini bölüşmüş, həmin günün dəhşətlərini və xalqımızın mübariz ruhunu əks etdirən fikirlər səsləndirmişlər. Onlar 20 Yanvarın Azərbaycan tarixində əbədi iz qoyduğunu, azadlıq uğrunda mübarizənin hər zaman xatırlanmalı olduğunu vurğulamışlar.

20 Yanvar – xalqımızın azadlıq və müstəqillik uğrunda göstərdiyi qəhrəmanlığın simvoludur. Şabran Rayon Mərkəzi Xəstəxanası olaraq biz şəhidlərimizi ehtiramla xatırlayır, onların fədakarlığını gələcək nəsillərə çatdırmağa davam edirik.

18/01/2026

13/01/2026

Şabran Rayon Mərkəzi Xəstəxanasında mülki müdafiə sahəsində işlərin təşkili və əməkdaşların fövqəladə hallara hazırlıq səviyyəsinin yüksəldilməsi məqsədilə mütəmadi olaraq maarifləndirici tədbirlər, təlimlər və praktiki məşğələlər keçirilir.

Tədbir çərçivəsində mülki müdafiə üzrə mütəxəssis Mübariz Nəsirov və əməyin mühafizəsi üzrə mütəxəssis Balabəyov Baxış çıxış edərək əməkdaşlara fövqəladə hallarda düzgün davranış qaydaları, təhlükəsizlik tədbirlərinin görülməsi, əməyin mühafizəsi normalarına riayət olunması və ilkin tibbi yardımın göstərilməsi barədə ətraflı məlumat veriblər. Keçirilən təlimlər tibb işçilərinin bilik və bacarıqlarının artırılmasına, fövqəladə vəziyyətlər zamanı koordinasiyalı və çevik fəaliyyətin təmin olunmasına, eləcə də mümkün risklərin qarşısının vaxtında alınmasına xidmət edir.