Yeni Klinika

17/07/2025

Yeni Klinikada icbari tibbi sığortanın Xidmətlər Zərfi çərçivəsində daha bir canlıdan-canlıya böyrək transplantasiyası əməliyyatı uğurla icra olunub.

4 ildir xroniki böyrək çatışmazlığından əziyyət çəkən pasiyentə bacısından alınan böyrək köçürülüb.

Əməliyyat yüksək peşəkarlıqla və beynəlxalq standartlara uyğun şəkildə həyata keçirilib.

Yeni Klinikada icbari tibbi sığortanın Xidmətlər Zərfi çərçivəsində daha bir canlıdan-canlıya böyrək transplantasiyası əməliyyatı uğurla icra olunub. 4 ildi...

17/07/2025

Yeni Klinikada növbəti böyrək transplantasiyası əməliyyatı icra olunub

Yeni Klinikada icbari tibbi sığortanın Xidmətlər Zərfi çərçivəsində növbəti canlıdan-canlıya böyrək transplantasiyası əməliyyatı həyata keçirilib.

4 ildir xroniki böyrək çatışmazlığından əziyyət çəkən və mütəmadi hemodializ müalicəsi alan 20 yaşlı qadın pasiyentə 31 yaşlı bacısından böyrək köçürülüb.

Əməliyyat tibb müəssisəsinin direktor müavini, Cərrahiyyə və transplantasiya mərkəzinin rəhbəri Eldar Əhmədovun rəhbərliyi, ümumi cərrahlar Lalə İsmayılova, Günay Allahverdiyeva və anestezioloq Mayıl Sədiyevin iştirakı ilə icra olunub.

Laparoskopik (qapalı) üsulla baş tutan donorun əməliyyatından və böyrək transplantasiyasından sonra hər iki şəxsin vəziyyəti qənaətbəxş qiymətləndirilib.

Hazırda evə buraxılan resipiyent və donorun ambulator müalicələri həkim nefroloqlar Cəbrayıl Cəbrayılov, Nərmin Ömərli eləcə də transplantasiya üzrə koordinator İntizar Məmmədovanın təqibi ilə davam etdirilir.

Qeyd edək ki, funksiyasını itirmiş böyrəyin sağlam donor orqanı ilə əvəz edilməsi ölkəmizdə artıq icbari tibbi sığorta çərçivəsində tam şəkildə qarşılanır. Bu da vətəndaşlar üçün həyati əhəmiyyətli olan transplantasiya əməliyyatlarının əlçatanlığını artırır.

16/07/2025

Ozaki texnikası ilə kombinə edilmiş mürəkkəb əməliyyat uğurla icra olunub

Yeni Klinika komandası icbari tibbi sığortanın Xidmətlər Zərfi çərçivəsində, ürək-damar cərrahiyyəsi sahəsində yüksək texniki çətinlik dərəcəsinə malik olan Ozaki texnikası ilə aorta qapağının rekonstruksiyası və eyni zamanda qalxan aortanın süni damar ilə əvəzlənməsi əməliyyatını uğurla icra edib.

Belə ki, görmənin birtərəfli itməsi, kəskin nəfəs darlığı və sinə ağrısı şikayətləri ilə Yeni Klinikaya müraciət edən 65 yaşlı pasiyentə aparılan müayinələr nəticəsində aorta qapağının daralması (aortal stenoz) və qalxan aortanın genişlənməsi diaqnozu qoyulub.

Əməliyyat ürək-damar cərrahları Uzm.Dr.Elgin Hacızadə və Dr.Cavid İbrahimovun iştirakı ilə uğurla icra olunub. Prosedur zamanı pasiyentin kalsifikasiyaya uğramış aorta qapağı çıxarılıb və onun əvəzinə xəstənin öz toxumasından hazırlanmış bioloji və funksional təbii qapaq implantasiya edilib. Əlavə olaraq, qalxan aorta hissəsi süni damarla əvəz olunub.

Əməliyyatdan sonra pasiyent bir gün Reanimasiya şöbəsində, daha sonra isə altı gün müddətində stasionar şəraitdə həkim nəzarətində saxlanılıb. Ümumi vəziyyəti stabilləşdikdən sonra evə yazılıb.

Qeyd edək ki, peşəkar və təcrübəli cərrahi komanda tərəfindən icra edilən əməliyyatda hər iki prosedurun eyni anda icra edilməsi həm texniki baxımdan mürəkkəb, həm də pasiyent üçün ciddi risklər daşıyır.

Məlumat üçün bildirək ki, Ozaki metodu yapon ürək cərrahı Prof. Şiqeyuki Ozaki tərəfindən hazırlanaraq standartlaşdırılıb. Yalnız yüksək ixtisaslaşmış mərkəzlərdə tətbiq olunan bu texnika aorta qapaq xəstəliklərinin müalicəsində mexaniki və bioprotez qapaqlara effektiv alternativ sayılır. Onun əsas üstünlüyü orqanizmə yad materialın yerləşdirilməməsi, təbii qapaq kimi funksional olması və pasiyentin ömürlük qan durulducu dərmanlardan azad qalmasıdır.

14/07/2025

Yeni Klinikanın invaziv kardioloqu Tural Sadıqov CBC Sport telekanalında yayımlanan "Ay Həkim" verilişinin qonağı olub.

Veriliş zamanı dünyada ölüm səbəbləri arasında ilk sıralarda yer alan kardioloji xəstəliklər müzakirə edilib.

Dr. Tural Sadıqov ürək xəstəliklərinə səbəb olan əsas risk faktorlarını, onların vaxtında aşkarlanmasının və profilaktikanın əhəmiyyətini ətraflı izah edib.

Müsahibəni tam şəkildə izləmək üçün linkə keçid edin:

CBC Sport – Azərbaycanın HD yayıma çıxan ilk idman telekanalı!🏆 Futboldan basketbola, “Formula 1”dən cüdo və şahmata qədər – yerli və beynəlxalq idmanın nəb...

11/07/2025

10/07/2025

Bexterev xəstəliyi olan pasiyentdə mürəkkəb anesteziya proseduru uğurla icrа olundu

Yeni Klinikada ankilozlaşdırıcı spondilit (Bexterev xəstəliyi) diaqnozu ilə müraciət edən və ciddi servikal hərəkətsizlik səbəbilə hava yolunun idarə olunmasında yüksək risk daşıyan pasiyentə ümumi anesteziya öncəsi oyanıq vəziyyətdə transnazal fiberoptik intubasiya uğurla icra edilib.

Belə ki, ümumi cərrah Möhsüm Əsgərovun rəhbərliyi ilə aparılan öd kisəsinin qapalı (laparoskopik) cərrahi yolla çıxarılması (xolesistektomiya) əməliyyatı zamanı anesteziologiya komandası mürəkkəb klinik vəziyyəti peşəkar şəkildə idarə edib.

Qeyd edək ki, ankilozlaşdırıcı spondilit – onurğa və oynaq sistemini təsir edən, servikal hərəkətliliyi ciddi şəkildə məhdudlaşdıran və bu səbəbdən traxeal intubasiya zamanı standart üsulların tətbiqini təhlükəli edən proqressiv revmatoloji xəstəlikdir. Bu kimi hallarda baş-boyun mövqeyinin dəyişdirilməsi mümkün olmadığından, hava yolu idarəsində xüsusi yanaşmalar tələb olunur.

Əməliyyatxana bölməsinin müdiri, anestezioloq-reanimatoloq Lalə Əliyeva, pulmonoloq Səidə Mehdiyeva və peşəkar anesteziologiya komandası tərəfindən həyata keçirilən prosedur zamanı pasiyent minimal sedasiya altında saxlanılıb, nazofarengeal, orofarengeal və laringeal sahələrə topikal anesteziya tətbiq olunub. Ardınca fleksibl fiberoptik bronxoskop vasitəsilə traxeaya təhlükəsiz şəkildə endotrakeal boru yerləşdirilərək hava yolu tam nəzarətə götürülüb.

Prosedur zamanı hipoksemi, hemodinamik qeyri-sabitlik və digər ağırlaşmalar müşahidə edilməyib.
Həm anesteziya, həm də cərrahi müdaxilə mərhələləri təhlükəsiz şəkildə tamamlanaraq pasiyent uğurla bərpa mərhələsinə keçid edib.

09/07/2025

Dünya üzrə tibbi texnologiyalar sahəsində tanınmış İsveçrə şirkəti “Storz Medical” tərəfindən Azərbaycan Respublikasında rəsmi referans mərkəz olaraq sertifikatlaşdırılan Yeni Klinika / Yeni Robotik Reabilitasiya Mərkəzi

09/07/2025

Yeni Klinika / Yeni Robotik Reabilitasiya Mərkəzi “Storz Medical” tərəfindən Azərbaycanda rəsmi referans mərkəzi statusunu aldı

Yeni Klinikada fəaliyyət göstərən Yeni Robotik Reabilitasiya Mərkəzi dünya üzrə tibbi texnologiyalar sahəsində tanınmış İsveçrə şirkəti “Storz Medical” tərəfindən Azərbaycan Respublikasında rəsmi referans mərkəz olaraq sertifikatlaşdırılıb.

Belə ki, Yeni Robotik Reabilitasiya Mərkəzi referans mərkəz statusu çərçivəsində, “Modylıth Slx F-2”, “Neurolıth Duolıth” və “Magnetolıth” cihazlar üzrə peşəkar klinik qiymətləndirmə və tətbiq təcrübəsi təqdim edəcək.

Bu status həmçinin qlobal tibb ictimaiyyəti ilə əhəmiyyətli klinik nəticələrin paylaşılmasına, qabaqcıl tibbi texnologiyalar mövzusunda beynəlxalq konfrans və təlimlərin təşkilinə həmçinin reabilitasiya və şok dalğa terapiyasının inkişafına töhfə verəcək elmi araşdırmaların həyata keçirilməsinə şərait yaradır. Bununla yanaşı, müraciətlər əsasında digər ölkələrin mütəxəssislərinə təlimlərin keçirilməsi və onların beynəlxalq standartlara uyğun sertifikatla təmin olunması da mümkün olacaq.

Referans xəstəxana statusu çərçivəsində Yeni Klinikanın peşəkar heyəti “Storz Medıcal” avadanlıqlarının klinik qiymətləndirilməsi və tətbiqi sahəsində ekspert qismində çıxış edəcək ki, bu da Azərbaycanın reabilitasiya sahəsində beynəlxalq miqyasda tanınmasına və mövqeyinin güclənməsinə mühüm töhfə verəcək.

Qeyd edək ki, TƏBİB-in İcraçı direktorunun müşaviri, Yeni Klinikanın direktor müavini, Somatika və Yeni Robotik Reabilitasiya Mərkəzinin rəhbəri Dr. Pərvin Əkbərov, dünya miqyasında sahəsi üzrə ekspert olaraq təyin edilib. Bu da mərkəzin reabilitasiya tibbində innovasiya və mükəmməlliyə sadiqliyi daha da gücləndir. Belə ki, Dr. Pərvin Əkbərovun rəhbərliyi ilə müraciət edən ölkələrin mütəxəssislərinə yüksək səviyyəli təlimlərin keçirilməsi və beynəlxalq səviyyədə tanınan sertifikatların təqdim edilməsi imkanı daha da genişlənəcək.

Məlumat üçün bildirək ki, 1987-ci ildə təsis olunan “Storz Medical” innovativ şok dalğa texnologiyası üzrə dünyanın aparıcı tibbi cihaz istehsalçılarından biridir. Şirkətin əsas məqsədi – elmi nailiyyətləri qabaqcıl texnologiyalarla birləşdirərək pasiyentlərin sağlamlığını və həyat keyfiyyətini yaxşılaşdırmaqdır. Hazırladığı cihazlar urologiya, ortopediya, nevrologiya, kardiologiya və dermatologiya sahələrində geniş tətbiq olunur.

08/07/2025

Sizin Təbibinizdə sosial media izləyicilərimizin suallarını bu dəfə Yeni Klinikanın həkim-qastroenteroloqu Röyalə Mehdizadə cavablandırıb.

– Yoğun bağırsaq polipləri xərçəngə çevrilə bilərmi?
– Qaraciyər testləri niyə yüksək çıxır?
– Hepatit B daşıyıcısı olmaq xəstəlik sayılırmı?
– Mədə xorası diaqnozu varsa, hər dəfə endoskopiya vacibdirmi?
– Ümumiyyətlə, qastroskopiya kimlərə lazımdır?

Bu və digər suallarınızın cavabını birbaşa mütəxəssisdən ətraflı şəkildə videomuzdan öyrənə bilərsiniz.

07/07/2025

TƏBİB Akademiyasında tələbələrin istehsalat təcrübəsi yekunlaşıb

Yeni Klinika nəzdində fəaliyyət göstərən TƏBİB Akademiyasında 2 nömrəli Bakı Baza Tibb Kollecinin tələbələri üçün təşkil olunmuş 4 aylıq istehsalat təcrübə proqramı başa çatıb.

Təcrübə proqramının yekununa həsr olunan görüşdə TƏBİB Akademiyasının müdiri Tural Xaspolad və Yeni Klinikanın baş tibb bacısı Sevinc Namazova çıxış edərək tələbələri təbrik edib, onların gələcək peşəkar fəaliyyətlərində uğurlar arzulayıblar. Çıxışlar zamanı qeyd olunub ki, tələbələr təcrübə müddətində qazandıqları bilik və bacarıqları daha da inkişaf etdirmək üçün TƏBİB Akademiyasının təşkil etdiyi təlim və seminarlarla bu prosesi davam etdirə bilərlər.

Görüş zamanı tələbələr təcrübə dövrü ilə bağlı təəssüratlarını bölüşərək, bu müddət ərzində qazandıqları bilik və bacarıqların onların gələcək peşə həyatında mühüm rol oynayacağını vurğulayıblar.

Qeyd edək ki, istehsalat təcrübəsində ümumilikdə 49 tələbə iştirak edib. Onlardan 26 nəfəri tibb bacısı, 22 nəfəri mamalıq işi, 1 nəfəri isə laboratoriya-diaqnostika ixtisası üzrə təhsil alır.

Təcrübə proqramının nümunəvi şəkildə təşkilinə görə Yeni Klinikanın baş tibb bacısı Sevinc Namazova, Akademiyanın əməkdaşları Fidan Səmədova və Fariz Ramazanlı təşəkkürnamə ilə təltif ediliblər.

Məlumat üçün bildirək ki, Akademiyada tibb kolleci tələbələrinin bilik və bacarıqlarının artırılması üçün davamlı olaraq həm nəzəri, həm də praktiki təlimlər həyata keçirilir.

04/07/2025

TƏBİB-in icraçı direktoru Vüqar Qurbanov "QəbuldASAN' da

04/07/2025

Yeni Klinika mütəxəssisləri – fizioterapevt-reabilitoloq Fatimə Mehtizadə və loqoped Nərmin Rüstəmova Polşanın Varşava şəhərində keçirilən EFNR-ESO-SAP-E Beynəlxalq Reabilitasiya Kursunda iştirak ediblər.

European Stroke Organization (ESO) və European Federation of Neurorehabilitation (EFNR) tərəfindən təşkil edilən kurs insult sonrası reabilitasiya sahəsində ən son elmi yeniliklərin və klinik təcrübələrin paylaşılmasına həsr olunub. Tədbirdə afaziya, disfagiya, motor pozuntular və koqnitiv funksiyaların bərpası mövzularında interaktiv təlimlər və müzakirələr aparılıb.

Yeni Klinikanın mütəxəssislərinin bu cür nüfuzlu beynəlxalq platformalarda iştirakı, klinikamızın reabilitasiya xidmətlərinin elmi əsaslarla inkişaf etdirilməsi və beynəlxalq müalicə protokollarının yerli praktikalara inteqrasiyası baxımından əhəmiyyətli addımdır.

Eyni zamanda bu kimi nüfuzlu beynəlxalq kurslarda iştirakımız, pasiyentlərimizə göstərilən xidmətin keyfiyyətinin artırılmasına, müalicə prosesində multidisiplinar yanaşmanın tətbiqinə, dünya standartlarına uyğun müasir reabilitasiya metodlarının və hər bir pasiyentin fərdi ehtiyaclarına uyğun kompleks yanaşmaların həyata keçirilməsinə verdiyimiz önəmin göstəricisidir.