İlqar Yusubov

24/03/2025

05/09/2024

Gedibdi, gəlməyib o vaxtdan bəri
Deyirlər orada qeheri yoxdu.
Burda ondan sonra nələr dəyişib
Atamın çox şeydən xəbəri yoxdu .

Yaxşı bələd idim onda vərdişə
Mərd idi dövrana, vaxta , gərdişə .
Deyirlər gecədir orda həmişə
Orda gecələrin səhəri yoxdu .

Bəzən uşaq idi məntək uşaqla,
Qaçardım üstünə - məni qucaqla.
Ata, yanındaca mənə yer saxla,
Özün də qayıtma, təhəri yoxdu .

Gəlmir acı sözü, yoxdu bal sözü
Ağır kəlmələri, qaya, sal sözü
Ata, çox gəzirəm ağsaqqal sözü
Sənsiz nəsihətin təpəri yoxdu

Dünya dövr eyləyir vaxtın üstündə
Bir ömür çarpışdım baxtın üstündə
Anam da qocalıb taxtın üstündə
Gördüyün gülyanaq o pəri yoxdu

Qarışıb möhnətdən halı İlqarın
Ürəkdə çarpazdı xalı İlqarın,
Yenə havalanıb dəli İlqarın
Coşan xəyalının sipəri yoxdu .

Hörmətlə :İlqar Həkim !

03/11/2022

19/05/2022