07/11/2025
Səhiyyə Nazirliyi Elmi-Tədqiqat Ağciyər Xəstəlikləri İnstitutunda 8 Noyabr – Zəfər Günü ilə əlaqədar tədbir keçirilib.
Tədbirdə əvvəlcə Azərbaycan Respublikasının Dövlət Himni səsləndirilib. Sonra Vətən uğrunda qəhrəmancasına vuruşaraq şəhidlik zirvəsinə ucalan qəhrəmanlarımızın xatirəsi bir dəqiqəlik sükutla yad edilib.
Tədbiri giriş sözü ilə açan İnstitutun direktoru t.ü.f.d İradə Axundova iştirakçıları salamlayaraq, hər kəsi Zəfər Günü münasibətilə təbrik edib. 2020-ci ilin sentyabrın 27-dən başlayan, 44 gün davam edən və işğal altındakı ərazilərimizin qaytarılması ilə nəticələnən Vətən Müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrildiyini bildirib.
Çıxışına davam edən İradə Axundova 2023-cü ilin sentyabr ayında lokal xarakterli antiterror əməliyyatı ilə ərazi bütövlüyümüzün, suverenliyimizin bərpa edilməsini, Xankəndində, Xocalıda, Xocavənddə və Ağdərədə dövlət bayrağımızın qaldırılmasının qürurverici bir an olduğunu, xalqımızın müzəffər Ali Baş Komandan İlham Əliyevin ətrafında dəmir yumruq kimi birləşməsinin artıq dövlətimizin bir rəmzinə çevrildiyini tədbir iştirakçılarının diqqətinə çatdırıb.
İnstitutun Mülki müdafiə qərərgah rəisi, 1-ci Qarabağ müharibəsi qazisi Qəhrəman Qasımov çıxış edərək, 8 Noyabr tarixinin Zəfər Günü kimi təntənəli səkildə qeyd edilməsindən, hərbçilərimizin qəhrəmanlığından danışıb. Qeyd edib ki, 44 gün davam edən və işğal altında olan ərazilərimizin azad edilməsi ilə nəticələnən Vətən müharibəsi tariximizin ən parlaq səhifəsidir.
İnstitutun şöbə müdiri Afaq Hüseynova çıxış edərək, şəhid ailələrinin üzvlərini və qaziləri Zəfər bayramı münasibətilə təbrik edib, bu Zəfəri bizə yaşadan, öz canından keçən şəhidlərimizə Allahdan rəhmət, qazilərimizə isə şəfa diləyib.
Sonda videoçarx nümayiş olunub.
