İctimai Səhiyyə və İslahatlar Mərkəzi

11/05/2026

10/05/2026

10 may – Azərbaycan xalqının Ümummilli Lideri, Ulu Öndər Heydər Əliyevin doğum günüdür

Ulu öndərin səhiyyə işçilərinin fəaliyyətinə verdiyi qiymət bizim həyat devizimizə çevrilib:
“Səhiyyə bizim üçün əziz, qiymətli bir sahədir və onun inkişafı üçün lazımi tədbirlər görüləcəkdir”.

08/05/2026

Ümummilli Lider Heydər Əliyevin anadan olmasının 103-cü ildönümünə həsr edilmiş sərgi və tədbir keçirilib

Səhiyyə Nazirliyinin İctimai Səhiyyə və İslahatlar Mərkəzində (İSİM) Azərbaycan xalqının Ümummilli Lideri, görkəmli siyasi və dövlət xadimi Heydər Əliyevin anadan olmasının 103-cü ildönümünə həsr olunmuş fotosərgi və tədbir təşkil edilib. Sərgidə ulu öndər Heydər Əliyevin səhiyyə və tibb müəssisələrinə ziyarətlərini, səhiyyə işçiləri ilə görüşlərini əks etdirən 50-yə yaxın foto nümayiş olunub.
“Azərbaycan xalqının ümummilli lideri Heydər Əliyev və səhiyyə” adlı sərginin açılışında Ulu Öndərin portreti önünə gül dəstələri qoyulub, müxtəlif dövrlərdəki fəaliyyətini canlandıran fotomateriallar maraqla izlənilib.
Tədbir Azərbaycan Respublikasının Dövlət Himni ilə başlayıb. Ulu Öndər Heydər Əliyevin və Azərbaycanın ərazi bütövlüyü ilə suverenliyi uğrunda canından keçmiş şəhidlərimizin əziz xatirəsi bir dəqiqəlik sükutla yad olunub.
İSİM-in direktoru Səbinə Babazadə açılış nitqi ilə çıxış edərək bildirib ki, Ulu Öndərin bilavasitə rəhbərliyi ilə ölkənin səhiyyə sistemində ardıcıl və məqsədyönlü islahatlar aparılıb, xəstəliklərin yayılmasının qarşısını almaq üçün milli proqramlar işlənib hazırlanıb. O, Heydər Əliyevin rəhbərliyi dövründə səhiyyənin müasir tələblər səviyyəsində yenilənməsinə və əhalinin sağlamlığının qorunmasına xidmət edən 15-dən çox qanun qəbul olunduğunu və bu qanunların hər birinin ölkəmizdə səhiyyə sisteminin inkişafında müstəsna rol oynadığını vurğulayıb.
Yeni Azərbaycan Partiyasının (YAP) Yasamal rayon təşkilatının sədri Bəxtiyar Nəbiyev Heydər Əliyevin Azərbaycan dövlətçiliyinin təşəkkülü, xilası və inkişafı prosesindəki əvəzsiz xidmətlərindən söz açıb. Natiq vurğulayıb ki, Ulu Öndərin uzaqgörən siyasəti nəticəsində ölkəmiz parçalanmaq təhlükəsindən xilas edilərək dinamik yüksəliş yoluna qədəm qoyub. O, Heydər Əliyevin siyasi irsinin əsl dövlət idarəçiliyi məktəbinə çevrildiyini və bu irsin gələcək nəsillər üçün böyük əhəmiyyət kəsb etdiyini diqqətə çatdırıb.
Əməkdar incəsənət xadimi, “Şərəf” və “Şöhrət” ordenli, “Heydər Əliyevin 100 illiyi” yubiley medalı təltifçisi, şair Baba Vəziroğlu Ulu Öndərin zəngin irsinin xalqımızın tarixində dərin izlər buraxdığını bildirib. O, dahi rəhbərin Azərbaycan ədəbiyyatı və mədəniyyətinin inkişafındakı əvəzsiz rolundan söz açaraq, sənət adamlarına göstərdiyi xüsusi qayğını vurğulayıb. Baba Vəziroğlunun Ulu Öndərlə birlikdə Şuşada Vaqif türbəsinin açılışında iştirakı ilə bağlı xatirələri maraqla qarşılanıb, “Sən elə bir zirvəsən!..” nəğməsinin yaranma tarixçəsi və səsləndirdiyi “Cənab Ali Baş Komandan” şeiri iştirakçıları duyğulandırıb.
Əməkdar jurnalist, “Ulduz” jurnalının baş redaktoru, şair Qulu Ağsəs çıxış edərək, Ulu Öndərin gənc nəslin yaradıcılığına hər zaman böyük həssaslıqla yanaşdığını vurğulayıb. Natiq xüsusi olaraq qeyd edib ki, müstəqilliyimizin ağır sınaqlardan keçdiyi illərdə Azərbaycan Yazıçılar Birliyinin ədəbi orqanlarının nəşrinin dayandırılmaması, onların birbaşa dövlət himayəsinə götürülməsi məhz Heydər Əliyevin ədəbiyyata verdiyi qiymətin və qətiyyətli iradəsinin nəticəsi idi. O, Ulu Öndərin Səməd Vurğunun “Azərbaycan” şeirini çox sevdiyini xatırladaraq bildirib ki, bu şeir onun dilində sadəcə bədii mətn deyil, bir vətən andı idi və bu mənada, Heydər Əliyevin adı tariximizin yaddaşına həm dahi siyasətçi, həm də milli-mənəvi dəyərləri uca tutan bir dövlət xadimi kimi həkk olunub.
Tədbirin rəsmi hissəsində Yeni Azərbaycan Partiyasının sıralarına yeni qəbul olan İSİM əməkdaşlarına üzvlük vəsiqələri təqdim edilib və yeni üzv olan Şəhla Kazımovanın ürək sözləri dinlənilib.
İştirakçılar Ulu Öndərin şərəfli ömür yolunu əks etdirən videomaterialı izləyib, Ümummilli Lider Heydər Əliyevin əziz xatirəsini dərin hörmət və ehtiramla yad ediblər.

08/05/2026

İş yerləri və müəssisələrdə “Hədəf 130/80” layihəsi çərçivəsində tibbi müayinə aksiyaları keçirilib

Səhiyyə Nazirliyinin İctimai Səhiyyə və İslahatlar Mərkəzi (İSİM), Azərbaycan Kardiologiya Cəmiyyəti (AKC) və “Servier Azərbaycan” şirkətinin birgə təşkilatçılığı ilə həyata keçirilən “Hədəf 130/80” layihəsi çərçivəsində əhali arasında tibbi müayinə aksiyaları davam etdirilir.
Layihənin növbəti mərhələsində Azərbaycan Dövlət Su Ehtiyatları Agentliyi, “Azəriqaz” İstehsalat Birliyi, “Azərişıq” ASC, Azərbaycan Respublikasının Dövlət Statistika Komitəsi və İctimai Televiziya və Radio Yayımları Şirkətinin (İTV) əməkdaşları peşəkar tibb heyəti tərəfindən müayinə olunublar.
Aksiya çərçivəsində qurum əməkdaşlarının arterial təzyiqi ölçülüb, ürək-damar sisteminin ümumi vəziyyəti qiymətləndirilib. Müayinə olunan şəxslərə hipertoniya ilə mübarizə, arterial təzyiqə nəzarət və sağlam həyat tərzi ilə bağlı fərdi tibbi məsləhətlər verilib, İSİM tərəfindən hazırlanmış maarifləndirici materiallar paylanılıb.
Qeyd edək ki, aksiyanın əsas məqsədi iş yerlərində arterial hipertoniyanın vaxtında aşkar edilməsi, ürək-damar xəstəliklərinin profilaktikasına riayət olunmasını təşviq etməkdir.

08/05/2026

Beynəlxalq Talassemiya Gününə həsr olunmuş ictimai maarifləndirmə tədbiri keçirilib

Səhiyyə Nazirliyi İctimai Səhiyyə və İslahatlar Mərkəzində (İSİM) 8 May – Beynəlxalq Talassemiya Gününə həsr olunmuş ictimai maarifləndirmə tədbiri təşkil edilib. Tədbirin əsas məqsədi talassemiya ilə mübarizədə ictimaiyyətin məlumatlılıq səviyyəsini artırmaq, donorluq mədəniyyətini təşviq etmək və bu sahədə beynəlxalq təcrübəni bölüşmək olub.
Tədbiri giriş sözü ilə açan İSİM-in baş direktoru Səbinə Babazadə irsi xəstəliklərlə, o cümlədən talassemiya ilə mübarizənin Azərbaycanda dövlət səhiyyə siyasətinin daim diqqətdə saxladığı əsas istiqamətlərdən biri olduğunu vurğulayıb. O bildirib ki, ölkəmizdə uğurla həyata keçirilən milli proqramlar və nikahdan əvvəl icbari müayinələr bu xəstəliyin yayılmasının qarşısının alınmasında mühüm rol oynayır.
Milli Məclisin deputatı, Səhiyyə komitəsinin üzvü Pərvanə Vəliyeva çıxış edərək talassemiya xəstəliyindən əziyyət çəkən şəxslərin hüquqi bazasının təkmilləşdirilməsi və onlara göstərilən dövlət qayğısının qanunvericilik aspektlərinə toxunub. O, ictimai maarifləndirmənin xəstəliyin profilaktikasında əvəzsiz vasitə olduğunu diqqətə çatdırıb.
Milli Hematologiya və Transfuziologiya Mərkəzinin Talassemiya bölməsinin baş həkimi Səhər İsmayılova xəstəliyin müasir müalicə üsulları və mərkəzdə pasiyentlər üçün yaradılan şərait barədə ətraflı məlumat verib. Qan Donorları Assosiasiyasının sədri Fuad Əsgərov isə çıxışında qan donorluğunun həyati əhəmiyyətini vurğulayaraq, cəmiyyəti bu xeyirxah aksiyalarda daha fəal iştirak etməyə səsləyib.
Respublika Qan Bankının icraçı direktorunun müavini Afət Zeynalova ölkədə qan ehtiyatının formalaşdırılması və bankın fəaliyyət prinsipləri barədə danışıb. Azərbaycan Talassemiya Federasiyasının İdarə Heyətinin üzvü Şahanə Hacıyeva federasiyanın xəstələr və onların ailələri ilə apardığı sosial işlərdən, vətəndaş cəmiyyəti institutlarının bu prosesdəki rolundan söz açıb.
Tədbirdə qonaq qismində iştirak edən Rumıniya Qan Donorları Assosiasiyasının sədri, “Donorium” sisteminin müəllifi Dragos Mutascu rəqəmsal texnologiyaların qan donorluğu sahəsində tətbiqi ilə bağlı beynəlxalq təcrübəni iştirakçıların diqqətinə çatdırıb. Tanınmış jurnalist və yazıçı Orhan Çinar isə mövzuya humanist prizmadan yanaşaraq, medianın talassemiya ilə mübarizədəki maarifləndirici funksiyasının önəmini vurğulayıb.
Sonda mövzu ətrafında geniş ictimai müzakirələr aparılıb, iştirakçıların sualları mütəxəssislər tərəfindən cavablandırılıb. Yekunda iştirakçılara İSİM tərəfindən hazırlanmış maarifləndirici materiallar təqdim olunub.

08/05/2026

Bakı Avrasiya Kollecində maarifləndirici təlim keçirilib

Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Bakı Avrasiya Kollecinin müəllim və tələbə heyəti üçün sağlamlıq hüquqları və zərərli vərdişlərin profilaktikası mövzularında tədbir təşkil olunub.
Tədbirdə İSİM-in İctimai sağlamlıq şöbəsinin müdiri Tofiq Musayev və baş hüquq məsləhətçisi Rüstəm Məmmədov geniş təqdimatla çıxış ediblər. Çıxışlarda ənənəvi risk faktorları ilə yanaşı, müasir dövrdə sağlamlığa təsir edən digər amillər barədə də ətraflı məlumat verilib. Diqqətə çatdırılıb ki, reallaşdırılan bütün ictimai sağlamlıq təşəbbüslərinin məqsədi ölkədə dayanıqlı sosial-iqtisadi artıma nail olmaq, əhalinin ümumi rifahını yüksəltmək və daha sağlam gələcək formalaşdırmaqdır.
Tədbir zamanı mövzu ətrafında fikir mübadiləsi aparılıb və beynəlxalq təcrübə müzakirə edilib. Yekunda iştirakçıları maraqlandıran suallar cavablandırılıb, onlara İSİM tərəfindən hazırlanmış maarifləndirici çap materialları təqdim olunub.

08/05/2026

8 May – Beynəlxalq Talassemiya Günüdür

Talassemiya irsi qan xəstəliyidir və valideynlərdən uşağa gen vasitəsilə keçir. Xəstəliyin ağır formalarına, əksər hallarda, qan qohumluğu olan nikahlarda təsadüf edilir.
Buna görə də 1 iyun 2015-ci ildən etibarən Azərbaycanda nikaha daxil olmaq istəyənlərin icbari tibbi müayinəsi tətbiq olunur və müayinədən keçən şəxslərin hər birinə müvafiq tibbi-genetik tövsiyələr verilir. Bununla yanaşı, 1 iyul 2025-ci il tarixdən ölkəmizdə qohum nikahları rəsmən qadağan olunub.
Elmi araşdırmalar göstərir ki, yaxın qohumlar arasında bağlanan nikahlar nəticəsində doğulan uşaqlarda genetik xəstəliklərin üzə çıxma riski olduqca yüksəkdir. Məhz bu səbəbdən bir sıra ölkələrin qanunvericiliyində qohum nikahları ilə bağlı analoji qadağalar tətbiq edilir.

06/05/2026

Zərərli vərdişlərə yox deyək!

05/05/2026

5 may – Beynəlxalq Həkim-Mama Günüdür

Niderlandda 1987-ci ildə keçirilən konfransda Həkim-Mama Beynəlxalq Assosiasiyası bu günün qeyd olunması ideyası ilə çıxış edib. Beynəlxalq Həkim-Mama Günü yalnız 1992-ci ildə rəsmi status qazanıb. Hazırda dünyanın 50-dən artıq ölkəsində bu gün qeyd edilir və əsas məqsəd həkim-mamaların fəaliyyəti haqqında əhalini məlumatlandırmaqdan ibarətdir.
Həkim-mamalar dünyaya uşaq gətirən hər bir qadın üçün tibb işçisi olmaqla yanaşı, həm də psixoloq və mənəvi dəstəkçi rolu oynayır. Onların peşəkarlığı və qayğısı sayəsində hər il milyonlarla ana övladını sağlam şəkildə qucağına alır. Bu şərəfli peşə sahiblərini təbrik edir, çətin və məsuliyyətli işlərində uğurlar arzulayırıq!

05/05/2026

5 may – Ümumdünya Astma Günüdür

Hər il may ayının ilk çərşənbə axşamı qeyd olunan Ümumdünya Astma Günü bu il mayın 5-nə təsadüf edir. Günün keçirilməsində əsas məqsəd cəmiyyətin diqqətini bu problemə cəlb etmək, əhalini xəstəliyin ilkin əlamətləri və müalicə üsulları haqqında daha geniş maarifləndirməkdir.
Günün yaranma tarixi 1993-cü ildə ABŞ-ın Milli Ürək, Ağciyər və Qan İnstitutu, Milli Sağlamlıq İnstitutları və Ümumdünya Səhiyyə Təşkilatının dəstəyi ilə “Bronxial astmanın müalicəsi və profilaktikası üzrə qlobal strategiya”nı müəyyənləşdirən işçi qrupunun yaradılması ilə bağlıdır. 1998-ci ildə Barselonada keçirilən və dünya mütəxəssislərinin astma problemlərinə həsr olunan ilk görüşündə isə bu günün təsis edilməsi 35 ölkə tərəfindən dəstəklənib.
Astmanın inkişafında ən başlıca risk faktorları allergenlərdir. Risk amillərini azaltmaq astmanın qarşısını almağa və ya gedişatını yüngülləşdirməyə kömək edir.