Mərkəzi Neftçilər Xəstəxanası

03/02/2026

Beynəlxalq elmi platformada növbəti uğurumuz

Mərkəzi Neftçilər Xəstəxanasının Hemodializ şöbəsinin müdiri, tibb üzrə fəlsəfə doktoru Mirhaşim Calalov və şöbənin rezidenti Billurə Dəmirovanın elmi işi Orta Şərq Orqan Transplantasiyası Cəmiyyətinin (MESOT) rəsmi elmi jurnalı “Experimental and Clinical Transplantation”-da dərc olunub.

“Nutritional Status of Hemodialysis Patients in the Azerbaijan Republic: A Retrospective Analysis” (“Azərbaycan Respublikasında hemodializ xəstələrinin qidalanma vəziyyəti: retrospektiv təhlil”) adlı elmi tezis jurnalda yayımlanıb.

Bu nəşr ölkəmizdə hemodializ sahəsində aparılan elmi araşdırmaların beynəlxalq səviyyədə tanınmasının və Azərbaycan tibb elminin qlobal elmi mühitə inteqrasiyasının növbəti göstəricisidir.

Həkimlərimizi təbrik edir, elmi fəaliyyətlərində davamlı uğurlar arzulayırıq!

Qeyd edək ki, MESOT 1987-ci ildə yaradılmış, Yaxın Şərq və ətraf regionlarda orqan transplantasiyası sahəsində elmi tədqiqatları, təhsili və əməkdaşlığı təşviq edən beynəlxalq qeyri-kommersiya elmi təşkilatdır. 29-dan çox ölkəni birləşdirən cəmiyyət etik standartları təşviq edir və mütəmadi beynəlxalq konqreslər keçirir. Son konqres 04–07 noyabr 2025-ci ildə Ankarada baş tutub.

03/02/2026

Mərkəzi Neftçilər Xəstəxanasında növbəti seminar keçirilib

Həkimlərimiz endokrinoloq Aysel Cəfərova və ümumi cərrahiyyə uzmanı, Cərrahiyyə və orqan transplantasiyası şöbəsinin müdiri Elmir Əsgərov “Qalxanabənzər vəzi xərçənglərinə müasir yanaşma” mövzusunda seminar keçiriblər.

Seminar zamanı komanda yanaşması, müasir diaqnostika və müalicə protokolları, eləcə də erkən mərhələdə aşkarlamanın faydaları geniş müzakirə olunub. Bu yanaşma və həkimlərin birlikdə tətbiq etdiyi müasir protokollar xəstələrə daha effektiv müalicə təmin edir.

Seminarın sonunda iştirakçıların sualları cavablandırılıb və ətraflı müzakirələr aparılıb.

02/02/2026

Mərkəzi Neftçilər Xəstəxanasında 2025-ci il üzrə 1.6 milyona yaxın tibbi xidmət göstərilib

2025-ci il ərzində Mərkəzi Neftçilər Xəstəxanası tibbi xidmətlərin həcmi və spektri üzrə fəaliyyətini əhəmiyyətli şəkildə genişləndirib.

Hesabat dövründə:
• 132 394 müraciət sayı,
• 1 596 840 xidmət sayı,
• 740 693 laborator xidmət,
• 21 597 cərrahi əməliyyat icra olunub.

Qeyd edək ki, xəstəxanamızda göstərilən bütün tibbi xidmətlər icbari tibbi sığortanın Xidmətlər Zərfi çərçivəsində həyata keçirilib.

Xəstəxana 2026-cı ildə xidmətlərin keyfiyyətinin və əlçatanlığının daha da artırılmasını hədəfləyir.

23/01/2026

TƏBİB-in təşkilatçılığı ilə Mərkəzi Neftçilər Xəstəxanasında pre-ekspertiza təlimi keçirilib

TƏBİB-in təşkilatçılığı ilə Mərkəzi Neftçilər Xəstəxanasında tibbi sığorta fəaliyyətinə həsr olunmuş maarifləndirici tədbir keçirilib.

Təlimdə TƏBİB-in Tibbi sığorta departamentinin Sığorta işinin təşkili şöbəsi böyük məsləhətçisi Nigar Aslanova və həmin şöbənin mütəxəssisləri Aygün Bilalova və Xanım İldırımova təqdimatla çıxış edib.

Tədbirin məqsədi icbari tibbi sığorta çərçivəsində göstərilən tibbi xidmətlərin düzgün təşkili, qeydiyyat və təqdimat proseslərinin təkmilləşdirilməsi, tibbi və statistik məlumatların dəqiqliyinin artırılması olub.

Təlim zamanı tibbi xidmətlərin kodlaşdırılması və uyğunluğunun yoxlanılması, diaqnozların düzgün təsnifatı, ambulator və stasionar xidmətlərin tariflərə uyğunluğu, artıq və təkrar təqdim edilmiş xidmətlərin qarşısının alınması, həmçinin maliyyə və statistik nəzarət mexanizmləri ilə bağlı ümumi mövzular müzakirə edilib.

Sonda iştirakçıları maraqlandıran sualları cavablandırılıb, praktiki tövsiyələr verilib.

22/01/2026

Mərkəzi Neftçilər Xəstəxanasının həkim-hematoloqu Elvira Quliyeva Baku TV-nin “BakuMed” verilişində çıxış edərək halsızlıq, başgicəllənmə əlamətləri və anemiyanın yaratdığı təhlükələr barədə ətraflı məlumat verib. Həkim veriliş zamanı bu simptomların səbəbləri, vaxtında müraciətin əhəmiyyəti və profilaktik yanaşmalar haqqında vacib tövsiyələr səsləndirib.

Verilişin tam buraxılışını link vasitəsilə izləyə bilərsiniz:

Bizi WhatsApp-da izləyin https://whatsapp.com/channel/0029VaAm2De3gvWVyPJ5zu1Ehttps://t.me/bakutvxeberhttps://x.com/bakutvofficialhttps://www.instagram.com/b...

22/01/2026

Mərkəzi Neftçilər Xəstəxanasında əməkdaşlar üçün maarifləndirici təlim keçirilib.

Təlimin məqsədi tibbi xidmətlərin keyfiyyətinin artırılması olub.

Təlim zamanı laboratoriyada preanalitik mərhələdə yaranan problemlər və onların həlli yolları mövzusunda Laboratoriya şöbəsinin həkimi Göyçək Həsənova çıxış edib.

Təlimin davamında IPIN həkimi infeksionist Süleyman Kamilov tövsiyələr və çatışmazlıqlardan danışıb, təhlükəsiz inyeksiya qaydaları və tibbi tullantıların düzgün idarə olunması mövzusu isə tibb bacısı Gülbahar Gülmalıyeva tərəfindən ətraflı izah edilib.

Təsərrüfat bölməsinin müdiri Esmira Bayramova isə sanitariya və təmizlik normaları barədə çıxış edib.

Təlimdə böyük tibb bacıları, orta tibb işçiləri və təsərrüfat bacıları iştirak edib, iştirakçıların sualları cavablandırılıb.

Bu tip təlimlər xəstəxanada beynəlxalq standartlara uyğun tibbi xidmətlərin təşkili baxımından mühüm əhəmiyyət daşıyır.

19/01/2026

Şəhidlərimizin xatirəsi qəlbimizdə əbədi yaşayacaq.

15/01/2026

🔴 16 yanvar tarixində DOST TV ilə ortaq yayımda “Sığorta vaxtı”nı izləməyi unutmayın.

Mövzu: “Respirator virusların icbari tibbi sığorta ilə müayinə və müalicəsi”

📌 Mövzu ilə bağlı suallarınızı şərh bölməsində qeyd edə bilərsiniz.

09/01/2026

Bu gün Azərbaycan səhiyyəsinin dəyərli simalarından biri, Əməkdar həkim, tibb elmləri doktoru Fəxrəddin Gülmirzə oğlu Cavadovun anım günüdür.

1951-ci ildə Bakı şəhərində anadan olan Fəxrəddin Cavadov 1974-cü ildə Azərbaycan Dövlət Tibb İnstitutunu bitirib, 1985-ci ildə namizədlik, 2008-ci ildə isə doktorluq dissertasiyasını müdafiə edib.

O, müxtəlif tibb müəssisələrində məsul vəzifələrdə çalışmış, 2000-ci ildən ömrünün sonunadək Mərkəzi Neftçilər Xəstəxanasının baş həkimi kimi fəaliyyət göstərərək səhiyyəmizin inkişafına, xəstəxananın formalaşmasına və kadr potensialının güclənməsinə mühüm töhfələr verib.

Uzunmüddətli və səmərəli xidmətlərinə görə “Tərəqqi” və digər medallarla təltif edilib, “Azərbaycan Respublikasının Əməkdar həkimi” fəxri adına layiq görülüb.

Fəxrəddin Cavadov 9 yanvar 2009-cu ildə vəfat edib.
Onun əziz xatirəsini dərin hörmət və ehtiramla yad edirik.

Allah rəhmət eləsin.

08/01/2026

QRİP və soyuqdəymənin fərqi nədir?

Qış mövsümündə ən çox qarışdırılan anlayışlardan biri qrip və soyuqdəymədir. Hər ikisi tənəffüs yollarını zədələsə də, gedişatı və fəsadları baxımından eyni deyil.

Soyuqdəymə adətən tədricən başlayır və yüngül əlamətlərlə müşayiət olunur: burun axması, asqırma, boğazda qıcıqlanma və yüngül halsızlıq. Çox vaxt yüksək hərarət olmur və insan gündəlik fəaliyyətini davam etdirə bilir.

Qrip isə qəfil başlayır və orqanizmi daha ağır vəziyyətə salır. Yüksək hərarət, şiddətli baş və əzələ ağrıları, güclü halsızlıq, quru öskürək və titrətmə qrip üçün xarakterik əlamətlərdir. Bu xəstəlik xüsusilə uşaqlarda, yaşlılarda, hamilələrdə və xroniki xəstəliyi olan şəxslərdə ciddi ağırlaşmalara səbəb ola bilər.

Ən vacib fərq ondadır ki, soyuqdəymə əsasən narahatlıq yaradır, qrip isə vaxtında müalicə olunmadıqda sağlamlıq üçün real riskə çevrilə bilər. Əgər hərarət bir neçə gündən çox davam edirsə, nəfəs darlığı yaranırsa və ya ümumi vəziyyət getdikcə pisləşirsə, mütləq həkimə müraciət edilməlidir.

Sağlam qalmaq üçün sadə, lakin effektiv addımlar vacibdir:
- şəxsi gigiyenaya diqqət etmək
- qapalı məkanları tez-tez havalandırmaq
- immuniteti gücləndirmək
- ilk əlamətlərdə özünü müalicə etmədən mütəxəssisə müraciət etmək.

Yüngül görünən simptomları ciddiyə alın. Doğru diaqnoz sağlamlığın qorunmasının ilk addımıdır.

07/01/2026

Artıq valideynlər 18 yaşdan kiçik övladlarının laborator analiz nəticələrini birbaşa “mygov” üzərindən rəqəmsal formada əldə edə bilərlər.

“mygov” rəqəmsal hökumət platforması vətəndaşlara aid məlumat və sənədlərə rahat çıxış imkanı yaratmaq məqsədilə daha bir yenilik təqdim edir. Artıq valideynlər 18 yaşdan kiçik övladlarının laborator analiz nəticələrini birbaşa “mygov” üzərindən rəqəmsal formada əldə edə bilərlər.

Bu inteqrasiya İnnovasiya və Rəqəmsal İnkişaf Agentliyinin (İRİA) İcbari Tibbi Sığorta üzrə Dövlət Agentliyi və TƏBİB ilə əməkdaşlığı nəticəsində həyata keçirilib.

Ətraflı: 🔗 https://tabib.gov.az/media/xeberler/917

31/12/2025

Bütün həmvətənlərimizi ürəkdən təbrik edir, sağlamlıq və firavanlıq dolu bir il arzulayırıq.