29/12/2025
2025-ci il ölkəmizin transplantologiya sahəsində əsl dönüş ili kimi tariximizə həkk olundu. Bu ildən etibarən meyit donordan orqan transplantasiyasının icrasına başlanılması insanlarımız üçün yeni bir həyatın və ümidin başlanğıcı oldu.
Mərkəzi Klinika olaraq regionda ilk dəfə ürək transplantasiyası əməliyyatını uğurla həyata keçirməkdən və bu tarixi missiyanın bir parçası olmaqdan qürur duyuruq. Bu uğur yalnız tibbi bir nailiyyət deyil, peşəkar komandamızın fədakarlığı və dövlətimizin bu sahəyə göstərdiyi diqqətin təzahürüdür.
Hər uğurlu əməliyyatın arxasında bir həyat hekayəsi, hər nailiyyətin arxasında isə böyük bir əmək dayanır. İnanırıq ki, növbəti illərdə səhiyyəmizin inkişafında daha böyük uğurlara birgə imza atacaq, daha çox insana şəfa bəxş edəcəyik. ✨
Birlikdə daha sağlam və parlaq gələcəyə! 🙌🩺
2025: Transplantasiyada dönüş ili
2025-ci il Azərbaycan səhiyyəsi üçün transplantasiya sahəsində əlamətdar il kimi yadda qaldı. Fevral ayında ilk dəfə olaraq meyit donordan orqan transplantasiyası uğurla həyata keçirildi. Bu tarixi nailiyyət donor ailəsinin humanist mövqeyi, prosesin düzgün və operativ koordinasiyası, eləcə də yüksək ixtisaslı tibbi heyətin peşəkarlığı sayəsində əldə edildi. Bu mühüm addım ölkəmizin transplantasiya tarixində yeni mərhələnin əsasını qoydu və sonrakı aylarda bu istiqamətdə əməliyyatların davam etdirilməsinə zəmin yaratdı. Nəticədə, onlarla ağır xəstə sağlam həyata qovuşdu.
2025-ci ilin oktyabr ayında isə regionda ilk dəfə ürək transplantasiyası icra olundu. Belə mürəkkəb və yüksək riskli əməliyyatın uğurla gerçəkləşməsi Azərbaycan səhiyyəsinin elmi-texniki potensialının, tibbi infrastrukturunun və kadr hazırlığı səviyyəsinin müasir beynəlxalq standartlara cavab verdiyinin sübutu oldu.
Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinin (ODTKM) fəaliyyəti il ərzində intensiv və sistemli şəkildə davam etdirildi. Mərkəz tərəfindən çoxsaylı maarifləndirici tədbirlər və seminarlar təşkil olundu, yerli və beynəlxalq konfranslarda məruzələr təqdim edildi, ictimaiyyətin orqan donorluğuna münasibətinin formalaşdırılması istiqamətində mühüm işlər görüldü. Eyni zamanda, beynəlxalq əməkdaşlıq əlaqələri genişləndirildi, TürkTransplant layihəsi çərçivəsində qarşılıqlı təcrübə mübadiləsi həyata keçirildi.
Vahid İnformasiya Sisteminin yaradılması prosesi tam başa çatdırıldı və sistem istifadəyə verildi. Koordinasiya Mərkəzinin əməkdaşları tərəfindən bölgələrin bu sistemə qoşulmasının təmin edilməsi məqsədilə regionlara səfərlər edildi, yerli səhiyyə müəssisələrinin əməkdaşları üçün təlimlər təşkil olundu.
Ölümdən sonra orqan donorluğuna münasibətdə müsbət dinamika müşahidə olundu. Cəmiyyətin bu sahədə məlumatlılıq səviyyəsi artdı, ölümdən sonra donor olmaq üçün qeydiyyatdan keçənlərin sayı əhəmiyyətli dərəcədə yüksəldi. Bu, cəmiyyətdə humanizm dəyərlərinin və sosial məsuliyyət hissinin gücləndiyinin göstəricisidir.
Bütün bu uğurlar göstərir ki, Azərbaycan səhiyyəsi transplantasiya sahəsində dayanıqlı inkişaf yolundadır. İnsan həyatının xilasına yönəlmiş, ictimai əhəmiyyət daşıyan orqan donorluğu sahəsində əldə olunan nailiyyətlər həm ölkədə, həm də regionda nümunəvi təcrübə kimi diqqət çəkir.
Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzi növbəti ildə də düzgün və operativ koordinasiyanı təmin etmək, donor bazasını genişləndirmək, əməliyyatların keyfiyyətini artırmaq və orqan donorluğu barədə maarifləndirməni gücləndirmək istiqamətində fəaliyyətini davam etdirəcək.
