Bərdə Rayon Mərkəzi Xəstəxanası

12/03/2026

Bərdə Rayon Mərkəzi Xəstəxanasında “Tənəffüs yolu infeksiyaları zamanı antibakterial müalicə” mövzusunda təlim keçirilib.

Təlimdə Səhiyyə Nazirliyinin Eksperti həmçinin Bakı Sağlamlıq Mərkəzinin Terapevtik xidmətlər üzrə müavini Zakir Quliyev, tibb müəssisəsinin direktoru Vüsal Məmmədov, müavinlər və müxtəlif ixtisasdan olan həkimlər iştirak edib.

Təlimin keçirilməsində məqsəd həkimlərin nəzəri və praktiki biliklərinin artırılması, klinik protokollara və sübutlara əsaslanan müalicə yanaşmalarının tətbiqinin gücləndirilməsi, antibiotiklərə davamlılığın azaldılması, eyni zamanda pasiyent təhlükəsizliyinin və tibbi xidmətin keyfiyyətinin yüksəldilməsi olub.

Təlim zamanı iştirakçıları maraqlandıran suallar cavablandırılıb.

10/03/2026

Uşaqların sağlamlığının qorunması, normal fiziki inkişafın təmin edilməsi və xəstəliyin ilkin mərhələdə aşkar edilməsi məqsədilə Bərdə Rayon Mərkəzi Xəstəxanasının 6 ixtisasdan (pediatr, stomatoloq, nevroloq, oftalmoloq, otorinolarinqoloq, psixoloq) olan həkim qrupu tərəfindən Bərdə rayon Hacallı kənd Q.Novruzov adına 2 nömrəli tam orta məktəbində uşaqların icbari dispanserizasiyası keçirilib.

Fəaliyyət çərçivəsində Hacallı kənd tam orta məktəbində 190 uşaqdan 4-ü dispanser qeydiyyatına alınaraq müayinə və müalicə üçün müşahidəyə götürülüb.

10/03/2026

Bu gün Yel çərşənbəsidir! 🍃

Qədim inanclara görə, Yel çərşənbəsində əsməyə başlayan külək qışın son izlərini aparır, təbiəti dirçəldir.🌱 Xalq arasında bu gün “Küləkli çərşənbə”, “Badi çərşənbə” və “Nəfəs çərşənbə”si kimi də tanınır. 🌬️

Bu gündən etibarən əsən külək torpağı canlandırır, od alovlanır, su hərəkətə gəlir, baharın nəfəsi daha çox hiss olunur.

Yel çərşənbəsi evinizə bərəkət, qəlbinizə ümid və sevinc gətirsin!

08/03/2026

Bərdə Rayon Mərkəzi Xəstəxanasında 8 Mart-Beynəlxalq Qadınlar Günü müasibətilə tədbir keçirilib.

Tədbirdə tibb müəssisəsinin direktoru Vüsal Məmmədov, müavinlər, şəhid ailələri, müxtəlif ixtisasdan olan həkimlər, baş və böyük tibb bacıları iştirak edib.

Tədbir zamanı Vüsal Məmmədov çıxış edərək bildirib ki, Azərbaycan qadınları hər zaman cəmiyyətimizin mənəvi dayağı olmuş, daim ülvi amallarla yaşamışlar. Çoxəsrklik mədəni-mənəvi sərvətlərimizin günümüzədək layiqincə qorunub saxlanılmasında nəcib və gözəl analarımızın misilsiz xidməti vardır. Onlar öz güclü iradələri, vətənpərvərlik və fədakarlıqları ilə yurdumuzun mübarizə salnmasində silinməz izlər qoymuşdurlar. Azərbaycan qadınlarının dünyanln bir sıra qabaqcıl ölkələrinin qadınlarındam daha əvvəl seçib-seçilməl hüququ qazanmaları yeni dövr tariximizin əlamətdae faktlarındandır. Mədəniyyət, elm, təhsil və səhiyyənin ən müxtəlif istiqamətləri üzrə müsəlman şərqinin qadınları arasında ilk addımları atmaları onların yüksək yaradıcı potensialının nəticəsidir.

Daha sonra tibb müəssisəsinin rəhbərliyi tərəfindən tədbir iştirakçılarına hədiyyələr təqdim olunub.

06/03/2026

Bərdə Rayon Mərkəzi Xəstəxanasında silsilə təlimlər təşkil olunub

“İnformasiya təhlükəsizliyi və əsas qaydaları” mövzusunda təlim keçirilib.

Təlimdə tibb müəssisəsinin İnformasiya texnologiyaları şöbəsinin müdiri Süleyman Məmmədov, Xəstə xidmətləri şöbəsinin müdiri Könül Qurbanova və şöbənin digər əməkdaşları iştirak edib.

Təlim kompüterə və ya şəbəkəyə icazəsiz müdaxilə, kənar şəxslərə anydesk bağlantısı yaratmaq, sistemin iş qabiliyyətinin pozulması, məxfiliyin pozulması, informasiya təhlükəsizliyi, informasiya idarəetmə sisteminin effektiv istifadəsi və s. mövzuları əhatə edib.

Eyni zamanda “Mavi kod”mövzusunda təlim keçirilib.

Təlimdə Keyfiyyətə nəzarətin idarə olunması üzrə mütəxəssis Yeganə Hüseynova, 1-ci Təcili tibbi yardım şöbəsinin müdiri Vüsal Atayev, baş və böyük tibb bacıları iştirak edib.

Təlimin əsas məqsədi həyati təhlükə yaradan halların vaxtında müəyyənləşdirilməsi, ilkin tibbi yardımın düzgün göstərilməsi, bu istiqamətdə bilik və bacarıqların artırılması olub. Bu təlimin təşkili eyni zamanda tibb müəssisəsində “Mavi kod” komandasının yaradılması və effektiv fəaliyyət göstərməsi istiqamətində atılan mühüm addımlardan biridir. Mavi kod sistemi tibb müəssisəsi daxilində baş verən klinik vəziyyətlərdə dərhal tibbi müdaxilənin təmin olunması üçün formalaşdırılan xüsusi komanda modelidir.

Təlimlər zamanı iştirakçıları maraqlandıran suallar cavablandırılıb.

05/03/2026

10 fevralda 44 günlük Vətən müharibəsinin şəhidi Qəşəm İbrahimlinin anası Gülçöhrə İsayeva Bərdə Rayon Mərkəzi Xəstəxanasına müraciət edib və ona zəruri tibbi yardımlar göstərilib. Hazırda vəziyyəti stabildir.

G.İsayeva yaradılmış şəraitə görə başda xəstəxana rəhbərliyi olmaqla həkim-cərrah Eldar Əhmədov və həkim-cərrah Zöhrab Eyvazova təşəkkürünü bildirib.

03/03/2026

Od çərşənbəniz mübarək! 🔥

Novruz ərəfəsində qeyd olunan Od çərşənbəsi xalqımızın qədim ənənələrini yaşadan xüsusi günlərdəndir. Od və günəş həyatın, işığın və dirçəlişin rəmzi hesab olunur.

Bu gün qalanılan tonqal yenilənməni və mənəvi saflaşmanı simvolizə edir.

🔥

02/03/2026

02/03/2026

“Tibbi tullantıların idarə olunması” mövzusunda təlimlər keçirilib.

Təlimdə tibb müəssisəsinin Keyfiyyətə nəzarətin idarə olunması üzrə mütəxəssisi Yeganə Hüseynova, baş tibb bacısı Zərif Teymurova, Doğum evinin baş maması Dilşad Hacıyeva, böyük tibb bacıları, kənd həkim və kənd tibb məntəqələrinin müdirləri və təsərrüfat bacıları iştirak edib.

Təlim təhlükəli maddələrin təsnifləşdirilməsi, deşici-kəsici alət yaralanmaları, təhlükəli və tibbi tullantıların azaldılması, Təhlükəli tullantılar, təhlükə simvolları, tibbi tullantıların toplanması, müvəqqəti saxlanması və daşınması sisteminin təşkili, tibb müəssisəsində istehsal olunan tibbi tullantıların azaldılması, tullantıların idarə olunmasına dair qüvvədə olan qanunvericilik aktları, sosial-iqtisadi aspektləri, tibbi tullantıların idarə olunmasına dair tələblər və s. mövzuları əhatə edib.

Təlimlər zamanı iştirakçıları maraqlandıran suallar cavablandırılıb.

27/02/2026

1 Mart Ümumdünya Mülki Müdafiə günü münasibətilə Bərdə Rayon Mərkəzi Xəstəxanasında maarifləndirici tədbir keçirilib.

Tədbirdə tibb müəssisəsinin Keyfiyyətə nəzarətin idarə olunması üzrə mütəxəssis Yeganə Hüseynova, Dəstək xidmətləri şöbəsinin müdiri Amil Abbasov, Mülki müdafiə üzrə mütəxəssis Ruslan Abbasov, Əməyin mühafizəsi bölməsinin müdiri Cəlal Quliyev, Əməyin mühafizəsi üzrə mühəndis Aslan İskəndərov və müxtəlif ixtisasdan olan tibb personalı iştirak edib.

Tədbirin keçirilməsində məqsəd mülki müdafiə və fövqəladə hallardan mühafizə sahəsində əhalinin hazırlığının və maarifləndirilməsinin təmin edilməsi, ictimaiyyətin diqqətini fövqəladə hallardan qorunma və mülki müdafiənin təşkili məsələlərinə yönəldilməsi olub. Tədbirdə fövqəladə hadisələr zamanı davranış qaydaları, fövqəladə hallarda qorunma ilə bağlı mövcud imkanlar, ətraf mühit və təhlükəsizlik məsələləri ilə bağlı məsələlərə toxunulub.

Cəlal Quliyev çıxış edərək mülki müdafiə işinin təşkilinin ciddi məsələ olduğunu və böyük məsuliyyət tələb etdiyini nəzərə alaraq müəssisə rəhbərlərindən və digər məsul şəxslərdən müəssisə və təşkilatlarda bu məsələyə diqqəti artırmağı, fəaliyyətlərini əvvəlcədən tərtib edilmiş və təsdiq olunmuş tədbirlər planına uyğun qurmalarını tövsiyyə edib. Ruslan Abbasov çıxış edərək bu günün əhəmiyyətindən və mülki müdafiənin məqsədindən bəhs edərək bildirib ki, Beynəlxalq Mülki Müdafiə Təşkilatının qərarı ilə 1972-ci ildən etibarən hər il 1 mart bu təşkilata üzv olan ölkələrdə “Ümumdünya Mülki Müdafiə Günü” kimi qeyd edilir. Azərbaycan da 1993-cü ildən bu nüfuzlu beynəlxalq təşkilatın üzvüdür. Nəzərə çatdırılıb ki, Ümumdünya Mülki Müdafiə Gününün hər il qeyd olunmasında əsas məqsəd ictimaiyyətin diqqətinin mülki müdafiə işinin təşkili məsələlərinə cəlb etməkdir. Daha sonra tədbir iştirakçılarına yanğın söndürmə balonundan istifadə qaydaları haqqında ətraflı məlumat verilib.

26/02/2026

Bərdə Rayon Mərkəzi Xəstəxanasında saat 17:00-da Xocalı soyqırımı qurbanlarının xatirəsi bir dəqiqəlik sükutla yad edilib

Bəşəriyyət tarixində ən qanlı cinayət ötən əsrin sonlarında Azərbaycanda Ermənistan silahlı qüvvələri tərəfindən törədildi. 1992-ci il fevralın 25-dən 26-na keçən gecə Xocalıya bir neçə istiqamətdən hücum edən erməni silahlı birləşmələri öz qəddar əməllərini və insanlığa sığmayan vəhşiliklərini şəhərdə köməksiz qalmış uşaqlar, qadınlar və ahıl qocaların üzərində nümayiş etdirdilər.

Faciənin baş verməsindən yalnız iki il sonra bu bəşəri cinayət öz qiymətini aldı. Azərbaycan xalqının xilaskarı ulu öndər Heydər Əliyevin təşəbbüsü ilə Milli Məclis 1994-cü il fevralın 24-də “Xocalı soyqırımı günü haqqında” xüsusi qərar qəbul etdi. Sənəddə faciənin başvermə səbəbləri, günahkarların adları təfsilatı ilə açıqlandı. Ümummilli liderin Xocalı soyqırımı qurbanlarının xatirəsinə sükut dəqiqəsi elan edilməsi haqqında 1997-ci il fevralın 25-də imzaladığı sərəncamla hər il fevral ayının 26-sı saat 17:00-da ölkəmizdə Xocalı soyqırımı qurbanlarının xatirəsi bir dəqiqəlik sükutla yad olunur. Azərbaycan xalqı torpaqlarımızın ərazi bütövlüyü uğrunda canlarından keçən qəhrəmanların, Xocalıda qətlə yetirilmiş yüzlərlə həmvətənimizin xatirəsini daim əziz tutur, onları ehtiramla yad edir.

Xocalı faciəsi qurbanlarının əziz xatirəsi hər il olduğu kimi, bu il də fevralın 26-da saat 17:00-da ölkə ərazisində və eləcə də dünyanın bir sıra dövlətlərində bir dəqiqəlik sükutla yad olundu. Yaşından, cinsindən, milliyətindən asılı olmayaraq bütün ölkə vətəndaşları Xocalı qurbanlarının xatirəsini ehtiramla andılar. Xalqımız şəhid olmuş soydaşlarımızı daim yad edəcək, onların xatirəsini həmişə əziz tutacaq.

26/02/2026

Bərdə Rayon Mərkəzi Xəstəxanası və nəzdindəki tibb müəssisələrində 26 Fevral Xocalı Soyqırımı Günü ilə əlaqədar tədbir keçirilib

Tədbirdə tibb müəssisəsinin direktoru, müavinlər, şöbə müdirləri və müxtəlif ixtisasdan olan həkimlər iştirak edib.

Tədbirin açılışı zamanı Azərbaycan Respublikasının Dövlət Himni səsləndirilib, torpaqlarımızın ərazi bütövlüyü uğrunda canlarından keçmiş şəhidlərimizin və Xocalı Soyqırımı zamanı həlak olmuş şəxslərin ruhu bir dəqiqəlik sükutla yad edilib.

Tədbir zamanı Vüsal Məmmədov, Ramiz Əhmədov, Yamən Cəfərov və Xalid Məmmədov çıxış edərək 1992-ci il fevralın 25-dan 26-na keçən gecə Xocalıda törədilən faciədə Azərbaycan xalqının başına gətirilən müsibətlərdən, bu kütləvi qırğında yüzlərlə insanın vəhçicəsinə qətlə yetirilməsindən, yandırılmasından və girov götürülməsindən danışıb. Xocalı soyqırımının dünya ictimaiyyətinə çatdırılması istiqamətində dövlət tərəfindən həyata keçirilən tədbirlər barədə söhbət açıb. Qeyd edilib ki, faciə ilə bağlı həqiqətlərin dünya ictimaiyyətinə çatdırılması, Xocalı soyqırımının dünyaya tanıdılması istiqamətində Ulu Öndər Heydər Əliyevin yürütdüyü siyasət bu gün dövlət başçısı Cənab İlham Əliyev tərəfindən layiqincə davam etdirilir. Çıxış edənlər vurğulayıb ki, Müzəffər Ali Baş Komandan Cənab İlham Əliyevin rəhbərliyi ilə 44 günlük Vətən müharibəsində qazanılan Böyük Zəfər nəticəsində Xocalı soyqırımı qurbanlarının, eləcə digər şəhidlərimizin qanı yerdə qalmadı. 2023-cü il sentyabrın 19-da Azərbaycan Ordusunun Qarabağda keçirdiyi lokal xarakterli antiterror tədbirləri nəticəsində Xocalı şəhəri separatçılardan tamamilə təmizləndi. Dövlət başçısı İlham Əliyev 2023-cü il oktyabrın 15-də Xocalı şəhərində Azərbaycanın Dövlət Bayrağını ucaltmaqla soyqırımı qurbanlarının qanının yerdə qalmadığını, onların qisasının alındığını bir daha sübuta yetirdi.

Tədbirin sonunda vido-çarx nümayiş olunub.