26/12/2025
Biləsuvar Rayon Mərkəzi Xəstəxanasında 2025-ci ilin yekunlarına dair geniştərkibli iclas keçirilib.
Biləsuvar Rayon Mərkəzi Xəstəxanasında 2025-ci ilin yekunlarına dair geniştərkibli iclas keçirilib. İclasın keçirilməsində əsas məqsəd xəstəxananın il ərzində fəaliyyəti üzrə görülmüş işlərin yekunlaşdırılması, əldə olunmuş nəticələrin təhlili və qiymətləndirilməsi, mövcud çatışmazlıqların müəyyən edilməsi, habelə qarşıdakı dövr üçün prioritet fəaliyyət istiqamətlərinin müəyyən olunmasından ibarət olub.
İclas başlamazdan əvvəl Azərbaycan xalqının Ümummilli Lideri Heydər Əliyevin əziz xatirəsi, Vətənimizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla yad edilib.
İclasda Biləsuvar Rayon Mərkəzi Xəstəxanasının rəhbər heyəti, struktur bölmə rəhbərləri, həkim heyəti, orta və kiçik tibb işçiləri iştirak edib. İclas zamanı hesabat dövrü ərzində əhaliyə göstərilmiş tibbi xidmətlərin həcmi və keyfiyyəti, icbari tibbi sığorta çərçivəsində həyata keçirilmiş tədbirlər, profilaktik və maarifləndirici fəaliyyətlər, sanitariya-epidemioloji rejimin təmin olunması, kadr təminatı və daxili nəzarət mexanizmlərinin icrası məsələləri üzrə geniş müzakirələr aparılıb.
Məruzə və çıxışlarda qeyd edilib ki, 2025-ci il ərzində Biləsuvar Rayon Mərkəzi Xəstəxanasının kollektivi üzərinə düşən vəzifələrin icrasında normativ-hüquqi aktların tələblərinə uyğun olaraq məqsədyönlü və ardıcıl fəaliyyət göstərib, əhalinin sağlamlığının qorunması və tibbi xidmətlərin keyfiyyətinin yüksəldilməsi istiqamətində müsbət nəticələr əldə edilib. Tibbi personalın peşəkarlıq səviyyəsi, əmək intizamına riayət etməsi və xidməti vəzifələrinə məsuliyyətli yanaşması xüsusi olaraq vurğulanıb.
İclasın yekun hissəsində hesabat dövrü ərzində xidməti vəzifələrini nümunəvi şəkildə yerinə yetirən, işində fərqlənən bir qrup əməkdaşa təşəkkürnamələr təqdim edilib. Rəhbərlik tərəfindən əməkdaşların səmərəli fəaliyyəti yüksək qiymətləndirilib, gələcək dövrdə səhiyyə xidmətlərinin keyfiyyətinin daha da artırılması istiqamətində fəaliyyətin davam etdirilməsinin vacibliyi qeyd edilib.
İclasın sonunda bildirilib ki, Biləsuvar Rayon Mərkəzi Xəstəxanası qarşıdakı dövrdə də səhiyyə sahəsində dövlət siyasətinin icrasını təmin etmək, əhalinin sağlamlığının qorunması, tibbi xidmətlərin əlçatanlığının və keyfiyyətinin yüksəldilməsi istiqamətində fəaliyyətini qanunvericiliyin tələblərinə uyğun olaraq ardıcıl şəkildə davam etdirəcək.
