Gəncə Şəhər Birləşmiş Xəstəxanası

15/02/2026

Bu gün İcbari Tibbi Sığorta üzrə Dövlət Agentliyi fəaliyyətinin 10-cu ildönümünü qeyd edir.

Bu əlamətdar gün münasibətilə Agentliyin bütün əməkdaşlarını səmimi qəlbdən təbrik edirik!

Ölkəmizdə səhiyyə sisteminin inkişafı, əhalinin keyfiyyətli və əlçatan tibbi xidmətlərlə təmin olunması istiqamətində gördüyünüz işlərdə sizə davamlı uğurlar arzulayırıq.

Sağlam və güclü gələcək naminə birlikdə!

13/02/2026

Gəncə Şəhər Birləşmiş Xəstəxanasının nəzdində olan Abbas Səhhət adına xəstəxananın Təcili tibbi yardım şöbəsinin müdiri Əfsanə Cəfərova haqqında məlumatları təqdim edirik.



Cəfərova Əfsanə Ziyad qızı 29 yanvar 1988-ci ildə Rusiya Federasiyasının Altay vilayətinin Barnaul şəhərində anadan olub. Orta məktəbi Gəncə şəhər 20 saylı tam orta məktəbdə oxuyub. Əfsanə Cəfərova 2005-2011-ci illərdə Azərbaycan Beynəlxalq Universitetinin Müalicə işi fakultəsində təhsil alıb. O, bir müddət paytaxt Bakıda özəl xəstəxanaların birində çalışıb, daha sonra fəaliyyətini Gəncə Beynəlxalq Xəstəxanasında davam etdirib.

Əfsanə Cəfərova 2016-cı ildən Abbas Səhhət adına xəstəxananın Poliklinika şöbəsində çalışmağa başlayıb. 2021-2023-cü illərdə Təcili tibbi yardım şöbəsində fəaliyyət göstərib. 2023-cü ildən isə həmin şöbəsinin müdiri vəzifəsini icra edir.

Həkimə fəaliyyətində uğurlar arzu edirik!

12/02/2026

🧼Gün ərzində əllərinizi minimum 20 saniyə sabunla yumaqla mikroblardan uzaq olun!
Bu sizi müxtəlif xəstəliklərdən qoruyacaq və onların yayılmasının qarşısını alacaq!

Təmizlik həm də sağlamlıqdır!

09/02/2026

Vəliyev Zabit Sakit oğlu – Abbas Səhhət adına xəstəxananın həkim-travmatoloq-ortopedi



Zabit Vəliyev 4 avqust 1984-cü ildə Şəmkir şəhərində anadan olub. 2002-2007-ci illərdə Azərbaycan Tibb Universitetinin Müalicə işi fakultəsində təhsil alıb. 2007-2009-cü illərdə Rusiya Federasiyasında Həştərxan Tibb Akademiyasında təhsilini davam etdirib.

2009-2011-ci illərdə Rusiya Federasiyasının Kurqan şəhərində Q.A.İlizarov adına Travmatologiya və Ortopediya Elmi Mərkəzində ordinatura üzrə təhsil alıb. 2011-2014-cü illərdə həmin mərkəzdə həkim-travmatoloq-ortoped kimi fəaliyyət göstərib. 2014-2015-ci illərdə Bakı şəhərində fəaliyyət göstərən özəl tibb müəsisəsində çalışıb.

2016-2023-cü illərdə Gəncə şəhər Birləşmiş Xəstəxanasının nəzdində olan Akademik Z.Məmmədov adına xəstəxanada fəaliyyət göstərib.

Zabit Vəliyev 2023-cü ildən Abbas Səhhət adına xəstəxanada həkim travmatoloq-ortoped kimi çalışır.

06/02/2026

06/02/2026

Gəncə Şəhər Birləşmiş Xəstəxanasında (ŞBX) çalışan bir qrup həkimə təşəkkürnamə təqdim edilib.

TƏBİB-in İcraçı direktoru Vüqar Qurbanov tərəfindən səhiyyə sahəsində uzunmüddətli və səmərəli fəaliyyəti ilə seçilən tibb işçiləri təltif olunub.

Gəncə ŞBX-nin direktoru İlkin İsmayılov tibb işçilərini təbrik edib və təşəkkürnamələri
Akademik Z.Məmmədov adına xəstəxananın Reanimasiya, intensiv terapiya və anesteziologiya şöbəsinin müdiri Suliddin Musayevə, Kardioloji xəstəxananın rəhbəri Əmiralı Yusifova, Perinatal Mərkəzin həkim-mama-ginekoloqu Sevda Buniatzadəyə, Yoluxucu xəstəliklər şöbəsinin həkim-infeksionisti Əli Quliyevə, Abbas Səhhət adına xəstəxananın həkim-uroloqu Ruhin Abuzərliyə və Kardioloji xəstəxananın Reanimasiya, intensiv terapiya və anesteziologiya şöbəsinin müdiri Nailə Zərbəliyevaya təqdim edib.

Tibb işçiləri öz növbələrində onlara göstərilən diqqətə görə TƏBİB rəhbərliyinə təşəkkür ediblər.

05/02/2026

Hepatit B (HepB) peyvəndi - Hepatit B xəstəliyinə qarşı tətbiq olunan peyvənddir, doğum evində ilk 12 saat ərzində körpələrə vurulur.

Hepatit B qaraciyərin həm kəskin, həm də xroniki xəstəliklərinin inkişafına səbəb olan virus infeksiyasıdır. Hepatit B kəskin xəstəlik formasında iştaha itkisi, hərarət, ishal, qusma, idrarın tündləşməsi, yorğunluq, dəridə və gözlərdə sarılıq, əzələ, oynaqlar və mədədə ağrılarla müşahidə oluna bilər. Kəskin xəstəlik əlamətlərinə daha çox yetkinlərdə rast gəlinir. Xəstəliyə yoluxmuş uşaqlarda bu simptomlar aşkarlanmır. İnfeksiya orqanizmdə çox ciddi fəsadlara - qaraciyər serrozu, qaraciyər xərçənginə səbəb ola, hətta ölümlə nəticələnə bilər.

Xronik infeksiyaya böyüklərdən fərqli olaraq azyaşlılarda daha çox rast gəlinir. Hepatit B virusu yoluxucudur.

Qeyd edək ki, Hepatit B virusu əşyalar üzərində 7 günə qədər yaşaya bilər. Bu virus onun daşıyıcısı olan anadan körpəyə doğum əsnasında keçir. Bundan əlavə, dəridə yara olduqda qan və bədən mayelərinin təması, diş fırçası, ülgüc, şəkər xəstəliyinin müayinə və müalicəsində istifadə olunan alətlər və s. yolla yoluxma mümkündür.
Virus infeksiyasından qorunmanın ən effektiv yolu Hepatit B peyvəndidir. Peyvənd tək və ya digər peyvəndlərlə birlikdə vurula bilər.

1991-ci ildən ölkəmizdə bütün uşaqların peyvəndlənməsi həyata keçirilir. Hepatit B peyvəndi uşaqlarımızı ciddi qaraciyər xəstəliklərindən və onun törədə biləcəyi qaraciyər xərçəngindən qoruyur.

04/02/2026

Bu gün Ümumdünya Xərçənglə Mübarizə Günüdür

2005-ci ildən başlayaraq hər il fevralın 4-ü Beynəlxalq Xərçəng Əleyhinə İttifaq tərəfindən Ümumdünya Xərçənglə Mübarizə Günü kimi qeyd edilir. Həmin günün təsis edilməsinin başlıca məqsədi diqqəti bu qlobal problemə yönəltmək, eləcə də xərçəng xəstəliyinin təhlükəlilik dərəcəsi və onun yeni müalicə üsullarını dünya ictimaiyyətinə çatdırmaqdır.

02/02/2026

Quliyev Bəxtiyar Sahib oğlu – Uşaq xəstəxanasının Təcili tibbi yardım şöbəsinin müdiri, həkim-pediatr



Bəxtiyar Quliyev 28 dekabr 1982-ci ildə Gədəbəy rayonunda anadan olub. 2001-2007-ci illərdə Azərbaycan Tibb Universitetinin Pediatriya fakültəsində təhsil alıb. 2007-2008-ci illərdə Gədəbəy Rayon Mərkəzi Xəstəxanasında internatura kursu keçib.

2017-ci ildən Gəncə Şəhər Birləşmiş Xəstəxanasının nəzdində olan Uşaq xəstəxanasında həkim-pediatr kimi fəaliyyət göstərməyə başlayıb. O, 2021-ci ildən isə xəstəxananın Təcili tibbi yardım şöbəsinin müdiri vəzifəsində çalışır.

02/02/2026

2 Fevral – Azərbaycan Gəncləri Günü

30/01/2026

2 Fevral – Gənclər Günü münasibətilə Azərbaycan Dövlət Aqrar Universitetində (ADAU) “Gənclik enerjisinin və ağsaqqal müdrikliyinin vəhdəti güclü dövlətin və sağlam cəmiyyətin təminatıdır” mövzusunda regional konfrans keçirilib.

Gəncə Şəhər Birləşmiş Xəstəxanasının hüquqşünası Hadı Hüseynov keçirilən tədbirdə gənclərin sağlam həyat tərzi, zərərli vərdişlərdən uzaq durmalarının hüquqi və tibbi aspektləri, həmçinin dövlətin gənclərə göstərdiyi səhiyyə qayğısı barədə geniş məruzə ilə çıxış edərək onları bu əlamətdar gün münasibətilə təbrik edib.

Çıxış zamanı o, gənc nəslin fiziki və mənəvi sağlamlığının qorunmasının ölkənin gələcək inkişafı üçün strateji əhəmiyyət kəsb etdiyini vurğulayaraq, xəstəxananın bu istiqamətdə həyata keçirdiyi maarifləndirmə tədbirlərindən bəhs edib.

Sonda iştirakçıları tibbi müayinələrdən vaxtında keçərək öz sağlamlıqlarına qarşı məsuliyyətli davranmağa çağırıb.

30/01/2026

2025-ci il ərzində 94 milyona yaxın tibbi xidmət göstərilib