Mingəçevir Şəhər Mərkəzi Xəstəxanası

30/03/2026

Sağlamlığa bir addım: Aktiv həyat

Mart ayında bayram və istirahət günlərinin çox olması adətən daha az hərəkətlə yadda qalır. Bu isə bədəndə halsızlıq, enerjinin azalması və motivasiya düşkünlüyünə səbəb ola bilər. Amma narahat olmağa dəyməz — bayramdan sonra düzgün fiziki aktivliklə bədəni yenidən balans vəziyyətinə qaytarmaq mümkündür.

Fiziki aktivliyə qayıdış yüngül və tədricən olmalıdır. İlk günlərdə özünüzü yormadan açıq havada gəzintilər etmək, yavaş tempdə yürüşlərə çıxmaq həm bədəni oyadır, həm də enerjini bərpa edir. Növbəti mərhələdə isə tempi bir qədər artıraraq yüngül qaçış, sadə məşqlər və ya ev şəraitində edilə bilən idman hərəkətlərini gündəlik rejimə əlavə etmək olar.

Bu dövrdə əsas məqsəd bədəni cəzalandırmaq deyil, ona qayğı göstərməkdir. Ani və ağır məşqlər əvəzinə, davamlı və balanslı fiziki aktivlik daha effektiv nəticə verir. Eyni zamanda, kifayət qədər su qəbul etmək və yüngül, sağlam qidalanma ilə fiziki aktivliyi birləşdirmək bərpa prosesini sürətləndirir.

Unutmayaq ki, bayram sadəcə bir neçə gündür, amma sağlamlıq uzunmüddətli həyat tərzidir. Özünüzü çox yormadan, amma hərəkətsiz də qalmadan, kiçik addımlarla yenidən ritmə qayıdın və bədəninizə yaxşılıq edin. 🌿💪

26/03/2026

Epilepsiya qədim tarixə malik və indiyə qədər tam müalicəsi tapılmayan xəstəliklərdən biridir.

Yeganə və əsas əlaməti təkrarlanan epileptik tutmalardır.

Hər il martın 26-sı Beynəlxalq Epilepsiya Maarifləndirmə Günü kimi qeyd olunur.

25/03/2026

Bayram günlərində yemək çeşidinin bolluğu qidalanma rejiminin pozulmasına və nəticədə orqanizmin yüklənməsinə səbəb olur.

• Bayram günlərində istehlak edilən qidaların uyğunluğuna diqqət yetirilməli,

• Süfrədə həddən artıq yağlı, şirin və ağır qidaların miqdarı nəzarətdə saxlanılmalı,

• Qızartma əvəzinə sobada və ya buxarda bişirilmiş balıq və ət yeməklərinin seçilməli,

• Kalorili sousların, xüsusilə mayonezin əvəzinə qatıq, kefir və ya xamadan hazırlanmış daha yüngül və faydalı souslardan istifadə edilməli,

• Qazlı və şəkərli içkilərdən mümkün qədər uzaq durmalı, onların əvəzinə su, ayran və ya təbii meyvə içkilərinə üstünlük verilməli,

• Yeməklər sakit, tələsmədən yeyilməli və yaxşı çeynənilməlidir.

Bayram günlərində qidalanma rejiminə diqqət yetirin ki, bayram günlərində sağlam qalasınız!

20/03/2026

Milli-mənəvi həmrəyliyin, humanizmin, şəfqət və mərhəmətin təcəssümü olan Ramazan bayramı münasibətilə hər kəsi səmimi-qəlbdən təbrik edirik!

Allah Ramazan ayı boyunca tutduğunuz orucları və etdiyiniz duaları qəbul etsin!🤲

20/03/2026

Novruz bayramınız mübarək!

Təbiətin oyanması və yenilənməsinin rəmzi olan Novruz bayramı hər kəsə sağlıq, qarşılıqlı anlaşma və əmin-amanlıq gətirsin!

19/03/2026

Prezident İlham Əliyev “Əhalinin icbari tibbi sığortası sahəsində idarəetmənin təkmilləşdirilməsi ilə bağlı bir sıra tədbirlər haqqında” Fərman imzalayıb.

https://president.az/az/articles/view/71960

Prezident İlham Əliyev “Əhalinin icbari tibbi sığortası sahəsində idarəetmənin təkmilləşdirilməsi ilə bağlı bir sıra tədbirlər haqqında” Fərman imzalayıb.

Fərmana əsasən, İcbari Tibbi Sığorta üzrə Dövlət Agentliyi publik hüquqi şəxsin əhalinin icbari tibbi sığortası sahəsində səlahiyyətləri Əmək və Əhalinin Sosial Müdafiəsi Nazirliyinə həvalə edilib.

Eyni zamanda İcbari Tibbi Sığorta üzrə Dövlət Agentliyinin sığortaolunanların dərman və tibb vasitələri ilə təmin edilməsi ilə bağlı hüquq və öhdəlikləri Tibbi Ərazi Bölmələrini İdarəetmə Birliyinə keçib.

https://president.az/az/articles/view/71960

19/03/2026

19/03/2026

“815” Çağrı Mərkəzinə fevral ayı ərzində 12 mindən çox zəng daxil olub

TƏBİB-in “815” Çağrı Mərkəzinə fevral ayı ərzində ümumilikdə 12 118 zəng daxil olub. Müraciətlərdən 11 948 zəng müvafiq olaraq dərhal cavablandırılıb, 170 müraciət isə Çağrı xidməti şöbəsi tərəfindən araşdırılması üçün qəbul edilib. 39 müraciət ilə bağlı vətəndaşlara müvafiq izahatlar verilib, 69 müraciət ilə bağlı məsələ həll edilib, 62 müraciət isə elektron sənəd dövriyyəsi üzərindən rəsmiləşdirilərək aidiyyəti üzrə yönləndirilib.

Daxil olan müraciətlərin mövzusu, əsasən, müayinə və müalicənin təşkili, əlillik məsələləri, dərman təminatı, tibbi heyət və tibbi xidmətdən şikayət, kadr məsələləri, tibbi arayış və sənədlərin verilməsi ilə bağlı olub.

Qeyd edək ki, TƏBİB-in “815” Çağrı Mərkəzi 2022-ci ilin dekabr ayında fəaliyyətə başlayıb. Mərkəzin yaradılmasında əsas məqsəd daxil olan müraciətlərin çevik cavablandırılması, aidiyyəti üzrə yönləndirilməsi və ən əsası, vətəndaş məmnunluğunun təmin edilməsidir.

Vətəndaşlar TƏBİB-in Çağrı Mərkəzi ilə əlaqə saxlamaqla yanaşı, yazılı müraciətləri birbaşa quruma təqdim edə, qurumun rəsmi internet səhifəsi, eləcə də elektron poçt ünvanı üzərindən onlayn şəkildə müraciətlərini ünvanlaya bilərlər.

18/03/2026

Mingəçevir Şəhər Mərkəzi Xəstəxanasında müqəddəs bayramlar münasibətilə xəstəxanada çalışan şəhid ailələri ilə görüş təşkil olunub. Tədbirin əsas məqsədi şəhid ailələrinə diqqət və qayğı göstərmək, onların bayram sevincini bölüşmək olub.

Görüşdə xəstəxananın direktoru Ülfət Qurbanov və Səhiyyə İşçiləri Həmkarlar İttifaqının sədri Allahverdi Aliyev çıxış edərək şəhid ailələrini səmimi qəlbdən təbrik ediblər. Bildirilib ki, Vətən uğrunda canından keçən şəhidlərin ailələrinə qayğı göstərmək hər birimizin mənəvi borcudur.

Çıxışlar zamanı şəhidlərin xatirəsi ehtiramla yad olunub, onların qəhrəmanlığının daim xalqımızın yaddaşında yaşayacağı vurğulanıb.

Sonda şəhid ailələrinə bayram hədiyyələri təqdim olunub, onlarla səmimi söhbətlər aparılıb.

Qeyd edək ki, Mingəçevir Şəhər Mərkəzi Xəstəxanasında bu cür sosial yönümlü tədbirlərin keçirilməsi mütəmadi xarakter daşıyır.

18/03/2026

Fevral ayı ərzində 8 milyondan çox tibbi xidmət göstərilib

17/03/2026

Mingəçevir, Bərdə, İsmayıllı, Samux, Ağstafa və Xaçmazda keçirilən müayinələr zamanı ümumilikdə 18.440 uşaq ilkin müayinələrə cəlb edilib.