23/04/2026
Qalxanabənzər vəzin funksiyasının yoxlanılması üçün göstərişlər müxtəlif hallarda ortaya çıxır. Tireotoksikoz və ya hipotireoz əlamətləri müşahidə edildikdə müayinənin aparılması tövsiyə olunur.
Qəbələ Rayon Mərkəzi Xəstəxanasının həkim-endokrinoloqu Gülnar Qədirli bildirir ki, tireotoksikoz titrəmə, əsəbilik, ürəkdöyünmə, tərləmə və çəki itkisi fonunda artmış iştaha daha aydın klinik əlamətlərlə özünü göstərir:
“Hipotireoz isə daha qeyri-spesifik simptomlarla xarakterizə olunur və yorğunluq, yuxululuq, saç tökülməsi, dəri quruluğu, yaddaş zəifliyi, qəbizlik və ödem kimi əlamətlərlə özünü göstərə bilər. Risk qrupuna 40 yaşdan yuxarı şəxslər (xüsusilə qadınlar), hamilə və doğuşdan sonrakı dövrdə olan qadınlar, qalxanabənzər vəz xəstəliyi olan şəxslər, baş-boyun nahiyəsinə şüa terapiyası almış insanlar, bəzi dərman preparatlarını qəbul edənlər, autoimmun xəstəlikləri olanlar və ailə anamnezində bu xəstəlik olan şəxslər daxildir”.
Həkim vurğulayıb ki, qalxanabənzər vəz pozğunluqları reproduktiv sağlamlığa da təsir göstərə bilər və sonsuzluq riskini artıra bilər.
