Qobustan Rayon Mərkəzi Xəstəxanası

13/04/2026

Şamaxıda minimal invaziv cərrahiyyəyə həsr olunan XII regional konfrans keçirilib

Şamaxı rayonunda TƏBİB-in dəstəyi, Azərbaycan Minimal İnvaziv Cərrahlar Cəmiyyəti və Şamaxı Rayon Mərkəzi Xəstəxanasının birgə təşkilatçılığı ilə minimal invaziv cərrahiyyəyə həsr olunan XII regional konfrans keçirilib.

Konfransda Şamaxı Rayon İcra Hakimiyyəti başçısının müavini, Ərazi-təşkilat və ictimai-siyasi məsələlər şöbəsinin müdiri Mehriban Eyubova, TƏBİB-in Təlim və tədqiqatlar departamentinin rəhbəri Teymur Mirzəbəyli, Azərbaycan Minimal İnvaziv Cərrahlar Cəmiyyətinin prezidenti, professor Qurbanxan Müslümov, Şamaxı Rayon Mərkəzi Xəstəxanasının direktoru Natiq Əliyev, Qobustan Rayon Mərkəzi Xəstəxanasının direktoru Günay Muradova, eləcə də müxtəlif regionlardan olan həkim-mütəxəssislər iştirak ediblər.

Tədbir çərçivəsində minimal invaziv cərrahiyyənin müasir yanaşmaları, tətbiq imkanları və bu sahədə əldə olunan yeniliklər müzakirə olunub, həkimlər arasında geniş təcrübə mübadiləsi aparılıb.

Qobustan Rayon Mərkəzi Xəstəxanasının direktoru Günay Muradova çıxışı zamanı regionlararası əməkdaşlığın əhəmiyyətini xüsusi vurğulayıb. O qeyd edib ki, regionlarda keyfiyyətli tibbi xidmətin əlçatanlığının təmin olunması məqsədilə səhiyyə xidmətlərinin çeşidinin artırılması və kadr potensialının gücləndirilməsi olduqca vacibdir. Onun sözlərinə görə, belə elmi-praktik konfranslar bu istiqamətdə mühüm rol oynayır və region xəstəxanaları üçün böyük əhəmiyyət kəsb edir. Bu kimi tədbirlər həkimlərin peşəkar bilik və bacarıqlarının inkişafına şərait yaradır, müasir tibbi yanaşmaların tətbiqini sürətləndirir və nəticə etibarilə regionlardan şəhər mərkəzlərinə xəstə axınının qarşısının alınmasına töhfə verir.

10/04/2026

Qobustan Rayon Mərkəzi Xəstəxanasında Avastin inyeksiyası uğurla davam etdirilir

Qobustan Rayon Mərkəzi Xəstəxanasında oftalmoloji xidmətlərin keyfiyyətinin artırılması istiqamətində həyata keçirilən tədbirlər çərçivəsində Avastin inyeksiyalarının tətbiqi uğurla davam etdirilir.

Belə ki, bu gün həkim-cərrah, oftalmoloq Aysel Nağızadə tərəfindən 12 nəfər pasiyentə müasir tibbi standartlara uyğun olaraq Avastin inyeksiyası icra olunub.

Prosedurlar peşəkar şəkildə həyata keçirilib və pasiyentlərin vəziyyəti nəzarətə götürülüb.

Qeyd edək ki, bu cür müalicə üsullarının tətbiqi görmə qabiliyyətinin qorunması və oftalmoloji xəstəliklərin vaxtında qarşısının alınması baxımından mühüm əhəmiyyət kəsb edir.

Qobustan Rayon Mərkəzi Xəstəxanasında əhaliyə göstərilən tibbi xidmətlərin keyfiyyətinin yüksəldilməsi istiqamətində işlər davam etdirilir.

09/04/2026

09/04/2026

“ŞƏKƏRsiz” rubrikası təqdim edir: Hestasion şəkərli diabetə diqqət!

Hamiləlik dövründə bəzi hallarda qadınlarda ilk dəfə olaraq şəkərli diabet müşahidə olunur. Bu vəziyyət tibbdə hestasion şəkərli diabet (HŞD) adlanır və adətən hamiləliyin 24–28-ci həftələrində aşkarlanır. Erkən diaqnoz və düzgün nəzarət həm ana, həm də körpə üçün risklərin qarşısını almaqda mühüm rol oynayır.

Hestasion diabetin yaranma ehtimalını artıran əsas amillər sırasında artıq çəki, piylənmə, ailədə şəkərli diabetin olması, 30 yaşdan sonra hamiləlik, polikistik yumurtalıq sindromu və əvvəldən qanda qlükoza səviyyəsinin yüksək olması yer alır. Bu səbəbdən risk qrupuna daxil olan qadınlara hamiləlik planlanarkən qlükoza tolerantlıq testindən keçmək tövsiyə edilir.

Nəzarətsiz qalan hallarda HŞD ciddi fəsadlara səbəb ola bilər. Anada gələcəkdə 2-ci tip diabetin inkişaf riski artır, yüksək qan təzyiqi və qeysəriyyə əməliyyatına ehtiyac yarana bilər. Körpələrdə isə doğuşdan sonra qanda şəkərin sürətlə aşağı düşməsi (hipoqlikemiya), eləcə də gələcəkdə piylənmə və diabet riski müşahidə oluna bilər. Erkən və düzgün əmizdirmə bu risklərin azaldılmasında mühüm rol oynayır.

Hestasion diabetin idarə olunmasında əsas yanaşma sağlam qidalanma və həyat tərzinin tənzimlənməsidir. Həkim məsləhəti ilə uyğun fiziki aktivlik, xüsusilə gündəlik piyada gəzintilər, qan şəkərinin nəzarətdə saxlanmasına kömək edir. Əgər bu tədbirlər kifayət etməzsə, həkim tərəfindən fərdi şəkildə insulin müalicəsi təyin oluna bilər.

Unutmayaq ki, hamiləlik dövründə düzgün nəzarət və vaxtında müdaxilə sağlam ana və sağlam gələcək deməkdir.

08/04/2026

TƏBİB-in Müşahidə Şurasının tərkibi təsdiqlənib

"Tibbi Ərazi Bölmələrini İdarəetmə Birliyi" publik hüquqi şəxsin (TƏBİB) Müşahidə Şurasının tərkibi təsdiqlənib.

Prezident İlham Əliyev bununla bağlı Sərəncam imzalayıb.

🔗 https://president.az/az/articles/view/72061

07/04/2026

7 Aprel – Ümumdünya Sağlamlıq Günü

Sağlamlıq həyatımızın ən dəyərli sərvətidir. Bu gün hər birimizə öz sağlamlığımıza daha çox diqqət ayırmağı xatırladır. Düzgün qidalanma, müntəzəm fiziki aktivlik və sağlam həyat tərzi uzun və keyfiyyətli ömrün əsasını təşkil edir.

Unutmayaq: kiçik dəyişikliklər böyük nəticələr yaradır.
Sağlam gələcək üçün bu gündən başlayın!

06/04/2026

Fiziki aktivlik sadəcə bədəni formada saxlamaq deyil – bu, sağlam və balanslı həyatın əsas açarıdır. Hər bir hərəkət ürəyin daha güclü döyünməsinə, ağciyərlərin daha səmərəli işləməsinə və sümüklərin möhkəmlənməsinə töhfə verir. Aktiv həyat tərzi həm də gündəlik yorğunluğu azaldır, zehni aydınlaşdırır və insanın özünü daha enerjili hiss etməsinə şərait yaradır.

Müasir həyatın sürətli ritmində stress və gərginlik qaçılmazdır. Lakin müntəzəm fiziki aktivlik bu yükü azaltmağın ən sadə və effektiv yollarından biridir. Hərəkət etdikcə bədəndə “xoşbəxtlik hormonları” ifraz olunur, bu da əhval-ruhiyyəni yüksəldir və psixoloji sağlamlığı gücləndirir.

Sağlam qalmaq üçün böyük dəyişikliklərə ehtiyac yoxdur. Sadəcə gündəlik həyatınıza kiçik hərəkətlər əlavə edin: piyada gəzin, pilləkənlərdən istifadə edin, açıq havada vaxt keçirin və ya sevdiyiniz idman növü ilə məşğul olun. Həftədə ən azı 3 gün, gündə 60 dəqiqə aktiv olmaq belə uzunmüddətli sağlamlığınız üçün əhəmiyyətli nəticələr verə bilər.

Unutmayaq:
Hərəkət etdikcə həyat canlanır, enerji artır və sağlam gələcəyə doğru addımlar möhkəmlənir.

Hərəkət et – sağlam yaşa!

03/04/2026

Qobustan rayonunda məktəblilərin icbari dispanserizasiyası davam etdirilir

Uşaqların icbari dispanserizasiyası çərçivəsində Qobustan rayonunun Sündü kənd Ailə Sağlamlıq Mərkəzində və Cəngi kənd tam orta məktəbində 200-dən çox şagird 500-dən artıq tibbi xidmət göstərilməklə ilkin tibbi müayinələrə cəlb olunub.

Müayinələr Qobustan Rayon Mərkəzi Xəstəxanasının və Qobustan Ailə Sağlamlıq Mərkəzinin tibb heyəti tərəfindən “Uşaqların icbari dispanserizasiyadan keçirilməsinə dair Dövlət Proqramı”na uyğun olaraq həyata keçirilir və proses mərhələli şəkildə davam etdirilir.

Məktəblilər pediatr, oftalmoloq, otorinolarinqoloq və digər ixtisaslı mütəxəssislər tərəfindən ilkin tibbi müayinədən keçirilib.
Tədbirlər çərçivəsində hər hansı xəstəlik aşkarlanan uşaqlarla bağlı məlumatlar valideynlərə təqdim olunur. Həmin uşaqlara qısa müddətdə Qobustan Rayon Mərkəzi Xəstəxanasına müraciət edərək geniştərkibli müayinələrdən keçmək və müalicəyə başlamaq tövsiyə edilir.

Qeyd edək ki, uşaqların icbari dispanserizasiyası Azərbaycan Respublikası Prezidentinin 5 mart 2013-cü il tarixli Fərmanına əsasən həyata keçirilir. Prosesin əsas məqsədi uşaqlar, o cümlədən məktəblilər arasında xəstələnmə hallarının, sağlamlıq imkanlarının məhdudluğunun və ölüm səviyyəsinin azaldılmasına nail olmaqdır.

02/04/2026

2 Aprel – Ümumdünya Autizm Məlumatlandırma Günüdür

Autizm uşaqlarda erkən yaşlarda müşahidə olunan, onların sosial davranışlarına, ünsiyyət qabiliyyətinə və gündəlik fəaliyyətlərinə təsir edən inkişaf fərqliliyidir. Əlamətləri adətən 1,5–2 yaşdan sonra üzə çıxır: uşaq göz kontaktından çəkinə, adına cavab verməyə bilər, yaşıdları ilə əlaqədə çətinlik çəkə, nitqi gecikmiş və ya fərqli inkişaf edə bilər. Həmçinin özünə qapanma, təkrarlanan hərəkətlər və dəyişikliklərə qarşı həssaslıq da müşahidə oluna bilər.

Belə əlamətlər görsənərsə, vaxtında psixoloq və ya ixtisaslı mütəxəssisə müraciət etmək vacibdir. Erkən müdaxilə uşağın inkişafında mühüm rol oynayır və onun həyat keyfiyyətini yüksəldə bilər.

Müasir tədqiqatlar autizmin mərkəzi sinir sisteminin fərqli inkişaf xüsusiyyətləri ilə bağlı olduğunu göstərir. Onun yaranmasına genetik faktorlar, hamiləlik və doğuş zamanı baş verən çətinliklər, bəzi infeksiyalar və nevroloji problemlər təsir göstərə bilər. Autizm fərqli formalarda özünü göstərir və düzgün dəstək ilə uşağın sosial və fərdi bacarıqlarını artırmaq mümkündür.

02/04/2026

Aprel döyüşlərinin iştirakçısı, qazi əməkdaşımız Cavid Ağalıyev xüsusi təyinatlı qüvvələrin tibb personalı kimi xidmət edib. Hazırda isə o, tibb müəssisəmizdə Şüa diaqnostika şöbəsində rentgen texniki kimi fəaliyyət göstərir.

Qəhrəman əməkdaşımızla qürur duyuruq.

02/04/2026

Azərbaycanın bütövlüyü uğrunda canını qurban verən şəhidlərimizin xatirəsini dərin ehtiramla yad edirik.

01/04/2026

Bayramlarla əlaqədar qeyri-iş günlərində təcili tibbi yardım xidmətinə 50 minə yaxın müraciət daxil olub

20-30 mart tarixlərində Respublika Təcili və Təxirəsalınmaz Tibbi Yardım Mərkəzi gücləndirilmiş iş rejimində fəaliyyət göstərib.

Bakı şəhəri üzrə təcili tibbi yardım xidmətinə bu tarixlərdə 22 922 çağırış daxil olub. Çağırışlardan 2 107 nəfər müxtəlif tibb müəssisələrinə hospitalizasiya olunub, digərlərinə isə yerində zəruri yardım göstərilib.

59 region üzrə isə bayram günlərində təcili tibbi yardım xidmətinə 24 129 çağırış daxil olub. 2 059 nəfər müxtəlif tibb müəssisələrinə hospitalizasiya olunub, digərlərinə isə yerində zəruri yardım göstərilib.

Bakı şəhəri üzrə ən çox müraciət 21.03.2026-cı il tarixində qeydə alınıb.

Belə ki, müraciət sayı 2 255, hospitalizasiya olunanların sayı 243 nəfər təşkil edib.

Çağırış səbəbləri, əsasən, arterial təzyiqin yüksəlməsi, müxtəlif növ travmalar, dispeptik əlamətlər, kardioloji, respirator və digər xəstəliklərlə bağlı olub.