https://www.facebook.com/689767074460866/

الطبيب الليبي, Sechelt, BC (2025)

08/29/2023

**الطنين - Tinnitus**

🔸**أسباب الطنين**:
مشاكل في الجهاز السمعي، وغالبًا مافيش تفسير للطنين ومرات يكون مرتبط بفقدان السمع الحسي العصبي، أو نتيجة لبعض الأدوية السامة للجهاز السمعي، أو نتيجة العدوى، أو انسداد في الأوعية الدموية، أو نتيجة لورم في العصب السمعي (acoustic neuroma).

🔸**تشخيص الطنين**:
اول حاجة كطبيب تبي تعرف هل الطنين هذا نابض (يعني الطنين بيجي زي النبض متع القلب)، أو غير نابض.

- **الطنين النابض**: في العادة بيكون سببه مشكلة في الأوعية الدموية ويحتاج كشف سريري تام.

- الطنين النابض يمكن أن يحدث في جهة واحدة أو جهتين، ولو كان نابض ومن الجهتين، في العادة بيكون أعلى في الجهة التي فيها المرض. ومن الأسباب: تشوه في الشريان والوريد الدماغي (AVM)، أو وجود فتحة بين الشريان والوريد (AVF)، ضيق في الشرايين، وورم حول الغدد.

- وربما يصاحب الطنين النابض صوت كالنقر أو الطقطقة نتيجة لاضطراب عصبي يسبب تشنج العضلات داخل الحنك أو العضلات داخل الأذن.

🔸**التشخيص**:
الطبيب يجب عليه الاستفسار عن كافة التفاصيل ويقوم بفحص كامل خاصة للرأس والرقبة. قد يحتاج الطبيب إلى كمبيوتر بالصبغة (CT)، أو فحص المغناطيسي بالصبغة (MR)، و/أو صورة أشعة للأوعية الدموية. ولا تنسى إجراء اختبارات سمعية.

🔸**العلاج**:
- هدف العلاج هو تقليل الوعي بالطنين وتأثيره على جودة الحياة.

- لازم تكون العلاجات مستندة على سبب الطنين.

- إذا كانت الأسباب وعائية، يمكن لأخصائي الأوعية الدموية تقديم العلاج، سواء كان جراحيًا أو دوائيًا.

- إذا كان لدى المريض اكتئاب أو قلة نوم، فهو بحاجة لعلاج هذه الحالات.

- زراعة القوقعة للمرضى الذين يعانون من فقدان حاسة السمع الحسي العصبي.

- إعادة تدريب الطنين (TRT) والبيوفيدباك أو العلاج السلوكي المعرفي (CBT)، كمكمل لـ TRT.

- الأدوية لها فعالية محدودة.

- العلاجات الطبية الأخرى، ليست بفعالية كبيرة.

الموضوع كبير وما قدرتش نختصر أكثر من هكي.

تفضلو لو عندكم اي أسئلة

08/24/2023

Giant cell arteritis - (التهاب الشريان العملاقي - GCA)

، ويُعرف أيضًا بمرض هورتون، التهاب الشريان الجمجمي، والتهاب الشريان الصدغي

هذا التهاب يصير في الشرايين الكبيرة والمتوسطة - المرض هذا ما يبصرش عافاكم الله - ومن الامراض الساهل علاجها لو الطبيب اكتشفها واعطي العلاج في الوقت المناسب.

- العامل الرئيسي لتطور هو التقدم في العمر.
- الحالة نادرة قبل عمر 50 سنة وتزداد بعد ذلك.

الالتهاب هذا مرتبط بالتهاب اخر يسمي بالتهاب العضلات الروماتيزمي (polymyalgia rheumatica - PMR )

- بداية الأعراض في GCA قد تكون متدرجة، ولكن في بعض الحالات قد تظهر فجأة.
- الأعراض: الحرارة، التعب، فقدان الوزن، والصداع في الغالب في جهة واحدة
- أحد أبرز الأعراض هو الألم عند فتح الفك والأعراض البصرية زي فقدان الرؤية المؤقت في عين واحدة (TMVL). ومرات يحس بزي الحبل مابين العين والودن ومرات لما يمس المنطقة هاذي يصير الم.

- الحالة لو ماتعالجتش في وقتها توصل نسبة العمى الكلي من 25% إلى 50% من المرضى اللي ماتعالجوش.

الدكتور لما بتجيه الاعراض هاذي بيكشف عالمريض

- ويفحص الشرايين الصدغية كويس (مابين الودن والعين) وماينساش يقيس ضغط الدم من الجيهتين. لو فيه فرق كبير في الضغط مابين اليمين واليسار ، معناها في احتمال انه صاير حتى التهاب في الاورطا ومرات حتى متنفخ ويتفجر في اي لحظة ولو تفجر ، شن مازال يلمه.

حتى لو الطبيب مش متأكد من الفحص وما لقي شي ، لكن غير حسيت انه ممكن يكون ال GCA اول حاجة تقوله يمشي جري للاسعاف و تكتبله تقرير يوضح الشك متعك انه ممكن يكون GCA وان المفروض ندير تحليل (ESR) او (CRP) ولو طلع عالي طول ابدى في العلاج او تقدر تاخد عينة من الشريان باش تتأكد من التشخص أو التصوير بالموجات فوق الصوتية الملونة (CDUS) للشريان الصدغي.

ملاحظة لو ان الاعراض كلاسيكية والتحليل CRP او ESR طلع عالى ، المفروض ما تأخرش العلاج على خاطر بتاخد عينة من الشريان او بتدير الصورة الملونة

والعلاج طبعًا يكون بجرعة عالبة من الجلوكوكورتيكويدات. لان التأخير يمكن يعرض المريض لخطر الإصابة بمضاعفات، خاصة فقدان البصر. عفانا واياكم الله.

وطبعاً زي اي دواء ديما فيه مشاكل واضرار جانبية وماتقدرش توقف الدواء فجأة لازم ياخده فترة وتقعد تنقص فيه الدواء بالشوية.

انحدار مفاجئ

اني اغلب البوستات ندير فيهم ممولات بالفلوس - مع الوقت والجهد اللي ياخد فيه كل بوست باش نجهز المادة وان شاء الله تكون مفيدة وتساعد حتى شخص واحد واكون صدقة بالغة - اني لاحظت لو مانديرش تمويل للبوست مايشوفه حد لان اغلبكم تديرو لايك وتنسو تديرو متابعة - ولو مانلقاش متابعات وتعليقات هلبة و لو مانشوفش تفاعلات في البوستات اللي مش ممولة معناها اني بنعتبر ان المحتوى فارغ ونضيع في وقتكم ووقتي

فضلاً و ليس امرا الرجاء متابعة ومشاركة الصفحة و كثرو من الكومنتات خلي توصل لاكبر قدر من الناس.

والله ولي التوفيق

08/24/2023

موضوع اليوم العلاج الدوائي للسمنة:

امته نستخدمو الادوية متع السمنة؟

- للناس اللي عندهم مؤشر كتلة الجسم أكبر من 30 كجم/م2،

- أو مؤشر كتلة الجسم من 27 لـ 29.9 كجم/م2 وعندهم مشاكل صحية تانية زي السكرى ، وحاولو بالرياضة والنظام الغدائي لمدة تلاتة الى ستة شهور ووزنهم مانزل على الاقل خمسة في المية.

كيف تحسب كتلة الجسم ؟

- تقسم وزنك بالكيلو على مربع طولك بالمتر

شن هي الأدوية اللي توا موصى بيها في علاج السمنة:

- الاوزيمبيك (Ozempic) الغني عن التعريف - بيبرة اسبوعية تحت الجلد. هذا يعتبر أول خيار لأغلب الناس.
- خلطة الفينتيرمين مع التوبيرامات (phentermine-topiramate)
- الأورليستات (orlistat)
- خلطة البوبروبيون مع النالتريكسون (bupropion-naltrexone)
- الفينتيرمين بروحه (phentermine)

قبل ما نبدأ أي علاج دوائي، لازم نشوف المخاطر والفوائد متع كل دواء، وكل واحد ياخد القرار الأنسب ليه.

ولو مانفعش حتى الدواء مازال فيه اجهزة وجراحات تساعد على علاج السمنة.

واللي عنده اسئلة يتفضل في خصوص هالموضوع خلى نغطوه حتى هوا

08/20/2023

ردا على احد التعليقات - مريض ياخد في PPIs لمدة عشرين سنة - ماهي المضاعفات

مشاكل دواء الحموضة ال PPIs :

يزيد من خطر الإصابة بى C. difficile - جرثومة في الامعاء - في حالة الاسهال ، الطبيب يطلب تحليل الجرثومة.

يقلل من امتصاص بعض للمعادن والفيتامينات زي المغنيسيوم و فيتامين B12. (لازم مراقبة المغنيسيوم وفيتامين B12 لأي مريض ياخد في ال PPIs لفترة طويلة).

‏PPIs يسبب هشاشة في العظام، الـ PPIs تقلل من امتصاص الكالسيوم غير الذائب في الماء زي كربونات الكالسيوم . يحتاج المرضى اللي فوق الخمسة وستين وخصوصًا النساء الى كالسيوم للحماية من هشاشة العظام ، اذا كان المريض ياخد في الـ PPIs ، فمن الافضل اخد الكالسيوم التي لا تحتاج إلى حمض لامتصاصها ، زي كالسيوم السترات.

يزيد من خطر الاصابة بمرض الكلى المزمن (CKD). مازال نحتاجو دراسات لتحديد العلاقة السببية بين استخدام PPI وتطور وتدهور مرض الكلى المزمن.

08/19/2023

رداً على احد التعليقات - حسيت انه ينطرح عالطاولة حتى هو -

هذا هو التعليق : "مره امشيت نعالج عند دكتورة أورام فتحت التليفون وقعدت تتطلع على حالتي من الفيس."

خلي نفصصو الموضوع كويس :

اولا الارجح والله اعلم ان الاخت متع التعليق ممكن تقصد ان الدكتورة فتحت التليفون و قعدت تقرى على حالتها من النت مش من الفيس تحديدًا - الاطباء عندهم مصادر يقرو منها ما اعتقدش انها من الفيس او حتى من القوقل.

مش شرط يكون الطبيب حافظ كل شي - لكن المهم ان الطبيب لازم يعرف من وين يجيب المعلومة لو المعلومة مش حاضرة في الذاكرة في وقت الاستشارة - او مرات الطبيب ماشافش حالة زي حالتها من فترة وحب يراجع عليها والا بيشوف لو فيه اي حاجة جديدة بخصوص المرض - الطبيب يبي يتأكد انه يدير الاصح ويتأكد انه ما يديرش حاجة تضر مريضه. المهم سلامة المريض وان الطبيب ما يفتيش من راسه لما مش متأكد.

تصيرلي مرات ننسى جرعة مثلاً ، نقول للمريض اعطيني دقيقة خلى نتأكدلك - المريض يعطيني وقتي نخش ونفتح مصادري ونشوف من مصدر موثوق ونتأكد - خير ما ندير روحي فالح ونعطي جرعة غلط - ومرات نجيه ونتناقش معاه ونقوله اهو فيه دراسة جديدة وفيه علاج جديد افضل من العلاج اللي كنت بنكتبهولك - اغلب المرضى الكنديين يفرحو بالنقطة هاذي - ما يقولش هذا دكتور مش فاهم بالعكس يقول هذا دكتور متطلع. ونقطة ثانية يحبوها المرضى الكنديين لو فرضاً غلطت في علاج مثلاً بتعطي مضاد حيوي متع مسالك تعطيه مضاد حيوي متع لوزتين وبعد ماتكتبه والمريض يبدا في العلاج والطبيب بعدها تفكر انه عاطي دواء غلط - الطبيب يتصل بالمريض و يتأسف ويقوله اعطيتك مضاد غلط والطبيب يسأل المريض لو حصلتله اي اضرار جانبية من الدواء اللي خداه - هني المريض لما يحس الطبيب مهتم مع انه غالط في الاغلب حتكون ردت المريض هي انه يشكر الطبيب مش يطلع منه ويقول طحت في طبيب مش فاهم وغلطلي وقريب قتلني.

وعلى فكرة - اني من رأيي ان الطبيب اللي يراجع ويفتح باستمرار افضل من اللي معتمد على اللي تعلمه في السابق لان الطب متجدد باستمرار. اهم شي تكون عند الطبيب مصادر كويسة (فيه هلبة مصادر للاطباء واغلبها تحتاج اشتراك شهري). و لو الطبيب يغلط يكون شجاع ويعترف بغلطه ويعتذر ويتدارك الغلط قبل ما يزيد ، والمفروض ان المريض يتقبل الاعتذار ، لان لو ردت فعل المريض بالعصبية ، الطبيب لما يغلط يخاف يقول غلطت ، لان السائد في المجتمع انه المريض مش حيرحمه ، و حيشهر بيه ، و الطبيب بيخاف انه يواجه المريض لانه عارف ردت الفعل كيف حتكون - وهذا طبعًا غلط من الطبيب وعقلية المريض مساهمة في الغلط - المفروض مهما كانت ردت فعل المريض ، الطبيب لازم تكون عنده الجرأة وبعترف بغلطه.

و في النهاية الطبيب بشر و جلّ من لا يخطئ.

وشن رايكم ؟

08/18/2023

رداً علي احد التعليقات في احد البوستات

اخت مرة بتجربة سيئة من النظام الطبي في ليبيا ، لانه مايسمعوش كويس للمريض وحست بالغطرسة من بعض الاطباء -

اولاً نحب نوضحلك ان المشكلة هاذي مش في ليبيا بس - اهو معانا اخوة من تونس ومصر والجزائر والمغرب - اكيدة مرو بتجارب زيك - ومانبيش نقول ان المشكلة هاذي هي مشكلة في العالم العربي بس - هذا (بانديميك) متفشى في كل دول العالم واولهم كندا وامريكا وبريطانيا - واكيدة معانا اخوة من كندا ، امريكا وانجلترا واكيدة مرو بتجارب مماثلة -

الطب واحد في كل مكان الدراسة اللي درستها في ليبيا لا تختلف عن كندا - المصادر واحدة للطب - لكن الاطباء يختلفو كل واحد وحسب طموحه - فيه هلبة دكاترة مايشوفلكش حتى خمسة دقايق لانه يبي يشوف غيرك ويشوف اكثر باش يطلع فلوس اكثر - وهذا نعتبر فيه حرام لان الطبيب ماقدمش الخدمة بالوجه الصحيح ولازم يتوب الى الله - وفيه اللي مداير مهنة الطب هواية زي الكورة و يحب يتعلم كل يوم حركة جديدة - وفيه اللي يحب يحل مشاكل الناس و بحب يشوف ابتسامة على وجه المريض - وفيه اللي علمه على قده ومش مطور من نفسه ويبي مرتب وخلاص - وفيه اللي مشكلته الغرور ويحساب روحه خير من الناس. وفيه اللي يشوف في مهنة الطب كلها حسنات يبي يجمع منها على قد مايقدر وفيه دكاترة خليط من المذكور اعلاه .

اللي اخد اسم طبيب معناها طبيب - المفروض الطبيب عنده احترامه - مش تحترمه معناها هو افضل منك - لا - مافيش حد افضل من حد الا بالتقوى والعمل الصالح ، الطبيب يُحترم لانه يقدم في خدمة سامية و لكي يقدم ماعنده و يعطي العصارة متع العلم اللي تعب سنين وهو يلقط فيه - الطبيب انسان ويحس بالمريض لما يخش وهوا مش واثق فيه ومش محترمه - الطبيب مش حيقدم اللي عنده ومريضه مش واثق فيه .

اغلب الناس تحترم في المادة ولا تحترم في الشخص - تحترم في الغني ولا تحترم في المتعلم - من اهداف الطبيب اللي خلاته يخش للمهنة هاذي هي كسب احترام الناس والناس تحترم في التيكتوكير وملاعبية الكورة واللي يرقصو ويغنو - الطبيب بيعوض الاحترام بجمع المال لينال الاحترام. اللي ماحصلاش وتعب على خاطره.

اللي يمر بتجربة سيئة يلتمس للطبيب عدر لانها مرات تكون غلطة عابرة ولو المريض ما استريحش مع الطبيب المفروض معادش يرجعله ويحسن الظن بيه و بغيره وما يعممش.

والله اعلم

08/18/2023

السلام عليكم ورحمة الله

خلي نزيدوكم شوي علي الارتجاع المعدي المريئي (GERD)

هو حالة تصير لما يسبب ارتجاع محتوى المعدة أعراضًا مزعجة و/أو مضاعفات.

- الاعراض –

الأعراض الكلاسيكية متع GERD هي الحموضة والارتجاع
و احيانا معاهم أعراض الأخرى للمرض زي صعوبة البلع ، ألم الصدر ، زيادة إفراز اللعاب ، الشعور بكتلة في الحلق ، ألم عند البلع،
ومرات فيه أعراض خارج المريء زي السعال المزمن ، خشونة الصوت، الصفير) ، ونادرًا الغثيان.

- التشخيص –

يمكن أن يعتمد تشخيص GERD على الأعراض بروحها في المرضى اللي عندهم أعراض كلاسيكية. في المرضى اللي ماعندهمش أعراض كلاسيكية ، لازم استبعاد المشاكل الأخرى قبل ما نقولو انه هذا GERD.

امته الطبيب يطلب منظار علوي مع أخذ عينة ؟

1- لما الطبيب مش متأكد من التشخيص
2- لما المريض ما يستجيبش لمحاولة علاجية باستخدام مثبط مضخة البروتونات PPI مرتين يوميًا.
3- لما يبدا فيه اعراض تشير إلى احتمالية وجود سرطان في الجهاز الهضمي زي واحد عمره فوق الستين و صارله عسر هضم لاول مرة في حياته والا عنده مؤشرات نزيف في الجهاز الهضمي زي قيء دموي ، براز أسود مخاطي ، دم في البراز ، دم خفي في البراز ، فقر الدم نتيجة نقص الحديد ، فقدان الشهية ، فقدان الوزن بدون سبب واضح ، صعوبة في البلع. ، ألم عند البلع ، قيء مستمر.

لما يكون فيه سرطان في الجهاز الهضمي عند أحد الأقارب اللي من الدرجة الأولى.

امته نديرو رصد الحموضة متع الاربعة وعشرين ساعة؟ - مايديروش فيه بكل - من النادر انه يندار - لكن مرات يندار

1- لو نبو نتأكدو من التشخيص للناس اللى قاعدة عندها اعراض مستمرة رغم العلاج بـ PPI مرتين يوميًا)

2- لمراقبة فعالية العلاج في الناس اللي عندهم أعراض مستمرة.

امته نديرو جهاز ضغط عضلات المرئ (مانومتري)؟

1- لاستبعاد اضطراب في حركية المريء لدى المرضى اللي يعانو من ألم في الصدر والمنظار العلوي طبيعي.
2- لتقييم وظيفة الانقباض في المريء قبل الجراحة لو استدعى الامر لجراحة.

08/17/2023

حالة ارتجاع مريئ

قصة حقيقية غير الاسامي واللهجة وشوية تغيرات خفيفة.

المريض (خالد) -
الموعدالساعة عشرة الى عشرة وربع :

خالد، عمره 40 عامًا، يشعر بحرقة في المعدة وتقلصات في منطقة الصدر بشكل متكرر. يعاني أيضًا من سوء هضم وانتفاخ في البطن بعد ما ياكل.

هذه هي الخطوات التي قد يقوم بها طبيب الأسرة لمعالجة حالة ارتجاع مريئ

1. **جمع المعلومات الطبية:**
‏ نسمع لشكوى خالد ونسأله على أعراضه بالتفصيل.

انا خالد نعرفه كويس ونعرف تاريخه المرضى وكل الادوية اللي ياخد فيها - وقداش مرة خش للمستشفى وقداش مداير صورة وجميع تحاليله موجودة قدامي في ملفه في المنظومة.

2. **التقييم الجسدي:**
بعد اذنك ياخالد بنديرلك كشف عالسريع بنقيسلك الضغط والنبض وبنسمع الصدر وبنكشف عالبطن.

3. **التشخيص:**
استنادًا إلى الأعراض والتقييم، نشخص خالد بأنه يعاني من ارتجاع مريئ (GERD).

ماتحتاجش تدير جهاز للتشخيص - لو بدي المريض يتحسن بتواصل العلاج

هني ماتحتاجش انك تدير شي الا اذا كنت ماتعرفش خالد وان خالد عنده مشاكل ثانية او عنده اعراض تشير لتشخيص اخر - وبعدين عينك ميزانك - هني يجي الكلينيكال سينس

4. **شرح التشخيص والخطوات التالية:**
يا خلودة الارجح ان عندك ارتجاع مريئ - شن تعرف على ارتجاع المريء - لو عنده معلومة غلط عالمرض نصلحهاله ونخليه طالع فاهم الحالة متعه نجبله ورقة وبيرو ونرسمله المرئ ونرسمله ڤالڤلى مابينه وبين المعدة ونرسم الخلايا الجدارية متع المعدة كيف تطلع في الحمض وكيف يمشي الحمض مع الجاذبية . نحس المريض يشوفلى وفرحان مع انه جاي متضايق.

5. **توجيهات حول التغييرات في الحياة والنظام الغذائي:**
يا خالد توا عندك فيه شوية حاجات في نمط حياتك انت المفروض بتغيرها وانا عارفك بإذن الله حتقدر تديرها الحاجات هاذي:
- تناول وجبات صغيرة بدلاً من وجبات كبيرة.
- تجنب تناول الوجبات قبل النوم بمدة 2-3 ساعات.
- تجنب الأطعمة التي تسبب ارتجاع المريء مثل القهوة والشوكولاتة.
- ممارسة التمارين الرياضية بانتظام.
- رفع راس السرير
- نقص وزنك

6. **وصف العلاج:**
يا خالد عندك تلاتة انواع اساسية اتخفيف الحموضة
إذا لزم الأمر، مثل المضادات الحموضة او مثبطات الهيستامين أو مثبطات مضخة البروتون (PPIs).

7. **متابعة المريض:**
وخليني نشوفك بعد اسبوعين او قبل في اي وقت لو صار اي سوء في حالتك او عندك اي اعراض اخرى ، للتأكد من تحسن حالته ومتابعة تطبيق التغييرات وتأثيرها.

وان شاء الله تو نزيد معلومات ادق على ارتجاع المريئي في البوستات الجاية

08/16/2023

بنعطي مثال ليوم عمل -

نمشي للمستشفي الساعة سبعة او الثمانية على عدد الحالات اللي عندي

وبعدها نمشي للعيادة ، الساعة تسعة نكون في مكتبي - المكتب فيه ثلاتة ابواب باب رئيسي وبابين فرعيين واحد يمين وواحد يسار وكل باب فرعي يفتح على حجرة كشف.

نخش للمكتب ، نلقى الممرضة حاطتلي زوز مرضى واحد يمين وواحد يسار - وحاطتلي طاسة قهوة وفيها زوز كريمة ومن غير سكرو نقعمز نشرب شفطة واحدة من القهوة وبعدها معادش نمسها لين تصقع و تتلوح .

نفتح الكمبيوتر - نشوف اسم المريض الاول - ناخد نفس عميق ونشد اللابتوب متعي ونمشى نفتح الباب الفرعي نلقى المريض مقعمز يستنى - نجي طول ناخد الكرسي الدوار الصغير ونجيبه بحداه بالزبط ونقعمز قدامة ونعطيه ابتسامة عريضة ونقوله صباح الخير - كيف حالك اليوم - وكيف نقدر نساعدك - وعيني في عينه ونعطي فيه في وقته - ونخليه يحكي لين يسكت وكل مايسكت نزيد نشجعه عالكلام ياما نديرله حركة متع هزة الراس متع انك مركز معاه وعاطيه قيمة و وياما تسأله سؤال وكون اجابته مفتوحة مش اجابته بنعم او لا و خليه لين يفضى اللي في جعبته وتفهم كل الابعاد - علاش جي - شن يبي بالزبط - شن يحس - نسمع للمريض ونسأله حتى لو انه شن يعتقد في التشخيص متعه و من شن خايف وشن انت تتوقع من الزيارة -

كل مانكمل نشوف حالة - نلخص الكلام اللي صار عالسريع و نقول للمريض خلاص معادش تبي شي و هوا طول بعدها يشكرني و بعدها نقوله عفواً و نشكره عالزيارة - وبعدها نمشي للمكتب اللي في النص و نكتب الكلام اللي صار في الكمبيوتر ولو نبي نبعتله دواء للصيدلية او نديرله تحويل اواي شي في الدقايق اللي نحصلهم وبعدها نطير للحجرة الثانية وهكذا لغاية الساعة واحد بعدها خلاص معادش نشوف حالات من الساعة واحد الى الساعة اتنين - الوقت هذا نصلى وبعدها تجيني رسالة على تليفوني مكتوب فيها اطلع خود غداك - ونتغدى في المكتب واني نكمل نكتب في الحاجات الناقصة.

نعلق ورقة عالباب مكتوب عليها ممنوع الدخول - لان الممرضات كل شوية تجيك واحدة ياما تدخلك ورقة بتوقعها يا تقولك في مريض اتصل ونسي يقوللك حاجة وفي اي وقت يتصلو بيك المستشفى او يتصلو بيك دار العجزة لو اي مريض من المسجلين عندي تصيرله حاجة الممرضة تتصل بيا وتحكيلي شن صار وتقوللي شن ندير ومرات نضطر نطلع من مكتبي ونسيب المرضى يستنو ونمشي نشوف الحالة لو استدعى الامر وفي الغالب نعطي في التعليمات بالتليفون وخلاص -

وان شاء الله البوست الجاي بنختار حالة من اللي شفتهم وبنعطيكم تفاصيلها باللهجة الليبية وبنغير الاسم بنديره بالعربي لكن بنخلي تقريباً كل شي زي ماهو.

08/15/2023

دراسة جديدة على دواء الاوزمبيك Ozempic (يوليو 2023)

هذا الدواء خدي شهرة واسعة في تنزيل الوزن وتنظيم السكر. هو دواء ممتاز الصراحة لكن غالي - حقنة اسبوعية تحت الجلد.

خلينا في الدراسة:
المرضى اللي ياخذو في الاوزمبيك عندهم خطر الاصابة بالتهابات الاستنشاق Aspiration pneumonia أثناء التخدير بسبب تأخير تفريغ المعدة.

توا من شهر في عام 2023، اقترحت الجمعية الأمريكية لأطباء التخدير - ماتخدش الجرعة الأسبوعية على الاقل باسبوع قبل الجراحة الاختيارية لو الجراحة كانت عاجلة ، يمكن استخدام الموجات فوق الصوتية المعدية لتقييم محتوى المعدة .

08/15/2023

السلام عليكم

خلي بنعرف بنفسي اكثر -

اسمي أحمد بزع ، عمري 42 سنة ، طبيب اسرة ، متزوج وعندي اربعة بنات ومقيم حاليا في مقاطعة بريتش كولومبيا في كندا على المحيط الهادي في اخر بقعة في الارض من الناحية الغربية ، الاصل من جنزور غرب طرابلس - ليبيا ، هواري - وافتخر بديانة الاسلام

هاذي الصفحات متعي -

🔹 **فيسبوك**:

https://www.facebook.com/Ahmedbazza?mibextid=LQQJ4d

هذه الصفحة الخاصة مخصصة للعائلة ، و الأصدقاء والجيران، والزملاء . لذلك بتلاقوا فيها المحتوى الشخصي، وشكرًا لكل واحد بيتفهم وبيحترم المحتوى.

🔸 **انستاقرام**:

https://instagram.com/ahmedbazza?igshid=NTc4MTIwNjQ2YQ==

تابعوا صور الطبيعة والقرآن - لما نشوف منظر يعجبني نصوره ونحط عليه تلاوة من التلاوات اللي نحبها.

🔹 **موقعي الشخصي**:

http://ahmedbazza.com

خاص بالمرضى متعي

🔸 **جمعية طب الطوارئ**:

أسست هذه الجمعية مع صديقي د. محمد ابوكليش.

وهذا موقع الجمعية (الجمعية الليبية لطب الطوارئ)

http://lema.org.ly

وهذا الفيسبوك متع الجمعية

‏https://www.facebook.com/lemaorg?mibextid=LQQJ4d

وفيها العديد من الكورسات ومدايرة شغل كويس وجمعية غير ربحية. الصفحة للأطباء وخاصة طب الطوارئ.

هذه الصفحة "الطبيب الليبي" تهتم بكل ما يخص الطب والمريض والطبيب، بالإضافة إلى تجاربي في الحياة.

أتمنى التفاعل الإيجابي، وأي نقد بناء بنستقبله بسعة صدر. واللي عنده تعليق سلبي يخليه عنده و نشكره على تقدير مشاعرنا.

وأخيرًا، نبي نشارككم في أشياء أخرى نحب نديرها من غير الطب، زي السفر والقراءة و الكورة بشاكليط جبلية و كايكنق و المشي بين الشجر و البحر - القراية - الكودينق - كمبيوتري - تليفوني - والزرادي و الماكلة الحارة (مبكبكة بالقرنينط) والهريسة عربية .

بارك الله فيكم وجزاكم الله خيرًا! ✨

08/13/2023

استجابة لسؤال احد المتابعين افضل دواء ضغط لمرضى الكلى - طبعاً باعتبار مافيش اجابة محددة لان في مرضى الكلي فيه اقسام فالموضوع يحتاج شوية شرح - فقلت الاجابة نحطها بوست للاستفادة افضل ماتكون رد على التعليق -

هذا السؤال:
(هل ممكن أعرف اسم الدواء الأفضل المخفض لضغط الدم لمن لديهم مشكلات فى الكلى)

اولا نعطي نبدة عن انواع علاجات الضغط

1. **مثبطات الإنزيم المحوّل للأنجيوتنسين (ACE inhibitors)**:- أمثلة: الكابتوبريل، الإينالابريل، الليسينوبريل.

2. **مانعات مستقبلات الأنجيوتنسين (ARBs)**:- أمثلة: اللوسارتان، الفالسارتان، الإيربيسارتان.

3. **البيتا بلوكرز (Beta-blockers)**:- أمثلة: الأتينولول، الميتوبرولول، البروبرانولول.

4. **مدرات البول (Diuretics)**:- أمثلة: الهيدروكلوروثيازيد، الفوروسيميد.

5. **مانعات قنوات الكالسيوم (Calcium channel blockers)**:- أمثلة: الأملوديبين، النيفيديبين، الدلتيازيم.

6. **مانعات ألفا (Alpha blockers)**:- أمثلة: الدوكسازوسين، البرازوسين.

7. **مدرات بول موفرة للبوتاسيوم (Potassium-sparing diuretics)**:- أمثلة: السبيرونولاكتون، الأميلوريد، التريامتيرين.

8. **مانعات الرينين (Renin inhibitors)**:- أمثلة: الأليسكيرين.

العلاج على حسب نوع الفشل الكلوي

امته نقول انه المريض عنده مرض كلى - لما تحليل gfr تحت 60 في اكثر من قراءة في ضرف ثلاتة اشهر.

المفروض مريض الكلى يدير تحليل الوضائف كل تلاتة الى ستة اشهر

اول شي بتشوف انه حاد او مزمن بتشوف GFR وتقارنه بالتحاليل السابقة لو نازل هلبة مقارنة بالتحاليل السابقة معناها حاد - ولو نازل ولكن مش متغير هلبة معناها مزمن . ودير تحليل بول تشوف البروتين وتشوف ACR في البول. تشوف لو المريض عنده نفاخ في رجليه. وتشوف لو عنده اي امراض اخري ممكن تمنعك من اعطاء بعض الادوية. و شن المرحلة متع الفشل الكلوي وهاذي على حسب تحليل GFR.

- اللي عندهم فشل كلوي حاد ومعاها ايديما (نفاخ في الرجلين)، ارتفاع ضغط الدم يتحسن بعد التخلص من السوائل باستخدام مدرات البول.

- اللي عندهم فشل كلوي المزمن، ومعاها فرز بروتيني مرتفع في البول (أكثر من 500 إلى 1000 ملغ/يوم)، ننصح بمثبط الإنزيم المحوّل للأنجيوتنسين أو مانع مستقبلات الأنجيوتنسين كأول خط علاج.

- إذا كان لدى المرضى الذين يعانون من فرز بروتيني مرتفع في البول ومعاها ايديما (نفاخ في الرجلين)، وما تحسنش مع مثبط الأنجيوتنسين ، نقترح استخدام ومدر للبول للتخلص من الايديما كعلاج ثاني.

- للمرضى الذين يعانون من فرز بروتيني مرتفع وماعندهمش ايديما ( نفاخ في الرجلين)، وما تحسنش مع مثبط الأنجيوتنسين ، نقترح استخدام مانعات قنوات الكالسيوم كعلاج ثاني.

- بالنسبة لمرضى الكلى المزمن الذين ليس لديهم فرز بروتيني مرتفع في البول، نبدأ بمدر للبول كأول خط علاج إذا كانت هناك وذمة، وإضافة مثبط الإنزيم المحوّل للأنجيوتنسين أو دواء آخر إذا استمر ارتفاع ضغط الدم مع شرط GFR فوق 30.

ملاحظة لو تحليل GFR تحت 30 ماتعطيش مثبط الأنجيوتنسين او مانعات مستقبلات الأنجيوتنسين. لو ياخد فيهم وقفهم الى ان يعود التحليل فوق التلاتين.

- فيه أدوية أخرى لارتفاع ضغط الدم يمكن استخدامها في المرضى الذين لا يستجيبون للعلاجات الأولية، مثل سبيرونولاكتون أو إيبليرينون، ولكن يجب الحذر من زيادة البوتاسيوم في الدم.

- ننصح المرضى الذين يعانون من مرض الكلى المزمن ويحتاجون إلى علاج لارتفاع ضغط الدم بتناول دواء واحد على الأقل قبل النوم بدلاً من تناول جميع الأدوية في الصباح. تجنب مدرات البول في الليل.

سامحوني ماقدرتش نكتب اقل من هكي

08/13/2023

السلام عليكم -

الغرض من انشاء الصفحة مش للاستشارات الطبية - اني مانقدرش نعطي استشارة من غير ماناخد وقت مع المريض فالرجاء معادش تحطو معلوماتكم الصحية على العلن - علاش الناس تعرف شن عندكم - اللي يحس بأنه الموضوع اللي نحطه ينطبق عليه ، يغير طريقة الاسئلة لان الاجابة تفرق - لما مريض يقوللي اني عندي مشكلة ونحتاج استشارة فاي حاجة بنكتبها بنكون مسؤول عليها وهذا مايصيرش هكي فخلي السؤال يكون بطريقة انك تبي تفهم الموضوع ، مثلا اني نحكي على موضوع ارتفاع ضغط الدم - مثلا انت قلتلي اني ضغطي عالى ونبي دواء واني قلتلك خود مثلا دواء اسمه ليزينوبريل مع انه دواء كويس لكن لاني ماسألتش على حاجات معينة صارتلك مشكلة و بعدها بأيامات مشيت للمستشفى ولقو عندك فشل كلوي حاد - اني بنكون هلكتك مش نفعتك . فالسؤال يكون مثلا شن انواع الادوية اللى تنعطى لمريض ضغط الدم وعنده نقص في وضائف الكلي -

يعلم الله اني نحاول نوصل رسالة قبل ما ربي ياخد امانته فلعل احد الدعوات او الحسنات تدخلني الجنة وتبعدني عن النار.

نعرف ان اغلب الناس ماتحبش تقرا حاجات طويلة - البوست الجاي نزيد نوضح اكثر كيفية عمل الصفحة ونحاول نتختصر ان شاء الله.

ولو تبو نستمرو اكتبو تعليقات واكتبو رأيكم ونشطو الصفحة خلى الناس كلها تستفيد.

لو حسيت ان الصفحة مش ناجحة ومافيهاش فايدة حنسكرها على طول وحندور حاجة تانية تفيدني يوم غدوة.

08/12/2023

لاحظت من التعليقات السابقة فيه ناس مش فاهمين طب الاسرة:

طبيب الأسرة هو الشخص الأول اللي بيمشيله المريض قبل أي حاجة. هو اللي بيدير أول فحص وبيقرر إذا كان المريض يحتاج لطبيب تخصصي أو لا. في كندا ومعظم الدول ، المريض مايقدرش ياخد موعد مع اخصائي بروحه ، فلازم يمشي لطبي الاسرة متعه ويحكيله على مشكلته وبعدين طبيب الاسرة يقرر اذا كان يعالجه هو او يحوله لاختصاص معين.

مثلاً كل طبيب اسرة يكون عنده عدد من المرضى مسجلين في العادة مابين الالف والثلاتة الاف مريض تحت اسمه - طبيب الاسرة بيعتبرهم كأنهم صغاره اي حاجة بتصير فيهم تحت مسؤلية طبيب الاسرة متعهم.

انه يكون عندك طبيب اسرة هذا يعتبر جزء اساسي لانه زي ماقلت ، يعتبر طبيب الاسرة هو بوابة المريض للنظام الصحي.

لو واحد من المرضى طلب فحص عادي. طبيب الأسرة بيفحصه، يشوف تاريخه الصحي، ويديرله تحليل ليتأكد أن كل شيء تمام.

واحد جاء وهو يشكي من ألم في حلقه. بعد ما طبيب الأسرة فحصه، قرر أن الألم من فيروس، فكتبله دواء ويشرحاه كيف يهتم بنفسه.

واحد بتشتكي من ألم في المفاصل. طبيب الأسرة بعد ما شافه ، حس أنها يحتاج رأي طبيب متخصص في العظام أو الروماتيزم، طبيب الاسرة يكتب تقرير بالحالة ويبعته للاخصائي وبعدين الاخصائي يتواصل مع المريض ويشوفه وبعد يشوفه ، الاخصائي يبعت تقرير بالحالة والعلاج و بعدين الحالة تقعد تتابع عند طبيب الاسرة وعند الاخصائي.

شخص كان عنده عملية في القلب. هذا الشخص يحتاج متابعة مع طبيب الأسرة باستمرار، ليتأكد إنه متبع التعليمات وياخذ الأدوية كويس.

طبيب الأسرة بيقدم نصائح على التغذية, الرياضة وكيفية الوقاية من الأمراض زي ارتفاع ضغط الدم والسكر.

لو فيه واحد يشعر بالحزن أو القلق، طبيب الأسرة بيقدر يشوفه ويقرر إذا كان يحتاج لطبيب نفسي أو يقدر يعالجه هو.

طبيب الاسرة يقدر يمشي يخش للحياش ، لو المريض مايقدرش يتحرك او صاعب انه يطلع من الحوش والطبيب يقدر حتى يشوف لو انه الحوش في مخاطر على المريض - فمثلاً مريض كبير في السن عرضة انه يطيح فيقدر طبيب الاسرة يتأكد انه مافيش عوائق في الحوش ممكن المريض ييعتر فيها ويطيح.

في النهاية، طبيب الأسرة هو الشخص الأساسي اللي بتكون عنده الثقة والمريض بيمشيله في أي مشكلة صحية قبل أي حاجة.

اهم شي هي علاقة الثقة والسرية بين المريض والطبيب لان طبيب الاسرة بالمختصر يعتبر كفرد من العائلة.

08/10/2023

نزلت زمان بوست على اعراض وتشخيص القولون العصبي وشفت تعليقات طلبو العلاج فقلت خلى نزل بوست ليستفيد الجميع -

لما حد يتشخص بمتلازمة القولون العصبي (IBS)، تكون العلاقة بين المريض والطبيب والرعاية المستمرة أمرًا أساسيًا. يعني الطبيب يدير مواعيد مسبقة مع المريض مثلاً كل اسبوعين

من المهم إنشاء علاقة طبية بين الطبيب والمريض لتأكيد أعراض المريض. لازم نوضح للمريض أن المتلازمة ماتزيدش فرصة السرطان، لكنها مرض مستمر. الطبيب لازم يوضح التوقعات الواقعية ويشارك المريض في قرارات العلاج.

اللي يعانو من أعراض خفيفة ومتقطعة:

يُفضل عدم استخدام العلاج الدوائي في البداية. بدلاً من ذلك، يبدأ العلاج بتغييرات في نمط الحياة والنظام الغذائي مثل تجنب الأطعمة التي تنتج الغازات والابتعاد عن بعض السكريات المعروفة بـ FODMAPs وتجنب اللاكتوز والجلوتين في بعض الحالات. وقد يُفضل استخدام السيليوم لمن يعانون من الإمساك بشكل رئيسي.

لو المريض ما تحسنش أو في حالة الناس اللي يعانو من أعراض متوسطة إلى شديدة:

يُستخدم العلاج الدوائي بجانب التغييرات الغذائية. هذه الأدوية تعتمد على العرض الرئيسي وتُقيم كل بضعة أسابيع ، يعني تقول للمريض يجيك كل اسبوعين باش تشوف فعالية العلاج.

- **لمن يعانون من الإمساك**: يُقترح استخدام بولي إيثيلين جليكول. وفي حال عدم الاستجابة، يُمكن استخدام lubiprostone أو linaclotide.

- **لمن يعانون من ألم البطن**: يُستخدم مضادات التقلصات زي الباسكوبان ومن على شاكلته وفي بعض الحالات يُستخدم مضادات الاكتئاب.
قوللي شن علاقة مضادات الاكتئاب.؟؟
أدوية مضادة للاكتئاب ليها خصائص مسكنة حتى لو ماتحسنش المزاج. الأدوية المضادة للاكتئاب من نوع "Tricyclic" (TCA) بتبطئ حركة الأمعاء وهذا قد يساعد في حالات الإسهال. لكن لازم نكون حذرين وقت نستخدمها للي عندهم إمساك.
لعلاج ألم البطن في حالات القولون العصبي، لازم نبدأ بجرعة صغيرة من الأدوية المضادة للاكتئاب ونعدلها حسب التحمل والاستجابة. وقت البداية, نستخدم من 10 لـ25 ملغم قبل النوم مثل الأدوية Amitriptyline و nortriptyline وغيرهم. لو فيه تأثير جانبي مع أحد الأدوية، يمكن تجربة واحدة تانية.

- **لمن يعانون من الإسهال**: يُستخدم مضادات الإسهال كعلاج أولي وتُستخدم الأدوية التي تربط الأحماض الصفراوية كعلاج ثانوي. وفي بعض الحالات الشديدة، قد يُقترح استخدام rifaximin.

أما إذا كانت الأعراض لا تستجيب لجميع هذه العلاجات، يجب إعادة تقييم المريض بعناية لتحديد الأسباب والعلاج المناسب.

واللي عنده او عندها سؤال يتفضل

08/09/2023

الطبيب الليبي

**الخلفية**: طبيب ليبي كندي، اجتاز رحلة طبية فريدة بين أروقة المستشفيات الليبية والكندية، ليُشارك تجربته ومعرفته وعلمه تحت مظلة "الطبيب الليبي".

**المؤهلات**: حاز على بكالوريوس طب وجراحة من كلية الطب البشري ، جامعة طرابلس وتخصص في جامعة UBC في كندا، واكتسب خبرة واسعة في مجال طب الاسرة.

**الرسالة**: نقل رسالة علمية موثقة وموثوقة للأطباء خاصة لينتفع بها مرضاهم ، ولعامة الناس و بلغة مبسطة، مع التركيز على تمكين الأفراد من فهم الحالات المعروضة لتمكينهم من اتخاذ قراراتهم الصحية بوعي تام.

**الرؤية**: تحقيق وصول سهل ومباشر إلى المعلومات الطبية بلغة سهلة من مصادر كندية وامريكيه من خلال منصة "الطبيب الليبي"، دعمًا لحياة صحية أفضل وعلاقة متميزة بين الطبيب والمريض.

هذه الصفحة لاتسعى لكسب المال او الشهرة وانما تسعى لكسب الحسنات ، وهذا مانفتقر اليه .

الكل مدعو الى المشاركة بأي استفسار ومن اي نوع وانا سأسعى جاهدًا لأجيب على كل التساؤلات لتوضيح كيفية واهداف هذه الصفحة والتي نسأل الله ان تكون فاتحة خير لكل المتابعين وتكون في ميزان حسناتي وحسنات كل من دعم هذه الصفحة.

الطبيب الليبي

08/29/2023

08/24/2023

08/24/2023

08/20/2023

08/19/2023

08/18/2023

08/18/2023

08/17/2023

08/16/2023

08/15/2023

08/15/2023

08/13/2023

08/13/2023

08/12/2023

08/10/2023

08/09/2023

Address

Website

Alerts

Shortcuts

Share

Category