02/02/2023
عندك دهون في البطن تعباك وماشي بكرش والناس مش سايباك.. 😍😍
والقولون هايج عليك مخليك حيران ... لاعارف تاكل ولاتشرب ولاحتى تنام وانتفاخات دايما وغازات.. وبتعاني من إمساك ولانافع معاك ملينات.. وساعة تقلب إسهال.. أقوى من النشا ومن القهوة والحمص كمان 😍..
احنا قلنا جهازنا الهضمي عامل زي جهاز الإرسال لغته مش كلام.. لغته دايما أعراض على هيئة إشارات تشبه الشفرات.... وبتظهر لما بيحصل خلل جواه.. كأنه جهاز إنذار.. بيناديك وبيستنجد بيك
وبحل الشفرة بيتغير الحال..الشفرة دي ساعات.. تكون على هيئة إمساك أو إسهال.. أو الأم قولون.. أو التهابات....
نتيجة حالة عدم الإتزان بين البكتريا النافعه والبكتريا الضارة اللي عايشين جواه.. وبيكون في الحالة دي البكتريا الضارة مفعولها أقوى.. وهي الكسبانه وعمله مهرجانات..
والحل في الحالة دي سهل وبسيط
اني ازود نشاط البكتريا النافعه وأقدم لها الطعام اللي بتحبه وبتتكاثر بيه.. أو اني امدها وازود عددها ببكتريا زيها موجوده في الطعام ( زبادي) أو مدعم بيها طعام لبن رايب) .
وبكدا يرجع الإتزان.. لكن طبعا مش بين يوم وليلة دا محتاج فترة زمنية أقلها ١٥ يوم
بص معايا كدا حضرتك على علبة اللبن الرايب دي.
هتلاقي مكتوب عليها معززة بثلاث خمائر حيوية.. وبلغه أخرى
3active probiotic
أهي الخماير اللي معزز بيها اللبن الرايب ده زي تمام الخمائر الحيوية النافعه اللي موجودة في جهازك الهضمي...
يعني لما اتناول لبن رايب يوميا ده معنا اني بزود.. البكتريا النافعه داخل الجسم..
البكتريا اللي موجوده داخل الأمعاء.. واللي انا دخلتها عن طريق اللبن الرايب المعزز بالخمائر ..كائن حي محتاج غذاء. علشان ينشط ويتكاثر ويقوم بالوظايف الحيوية بتاعته..
وأهم غذاء للبكتريا دي. الألياف النباتية الموجوده في الخضروات والفاكهة والبقوليات والحبوب الكاملة .. زي مثلا الشوفان
وبيسموها علماء التغذية prebiotic
والألياف دي الجسم مش بيقدر يهضمها فتصل إلى القولون فتصبح طعاما للبكتريا المعوية اللي بتمتلك انزيمات ملائمة تمكنها من تكسرها.. وعن طريق ذلك تنمو هذه البكتريا ويزيد نشاطها.
والأهم من كدا انها بتحول هذه الألياف إلى سلسلة من الأحماض الدهنية القصيرة التي تغذي خلايا القولون مما يقلل من التهاب الأمعاء ويحسن متلازمة اظطرابات الجهاز الهضمي أو مايسمى بالقولون العصبي
غير أن اللبن الرايب أو الزبادي بيتم إنتاجهم بعملية تخمر
بتحول سكر اللاكتوز الموجود في اللبن العادي واللي بيسبب حساسية لناس كثير وممكن يسبب إسهال إلى حامض اللاكتيك اللي بيسرع وبيحسن عملية الهضم
يعني لما نتناول .. سلطة الزبادي بالخيار... أو طبق زبادي بالموز.. أو علبة لبن رايب مع فاكهة أو خضار انت كدا زودت عدد البكتريا النافعه.. ودخلت الاكل اللازم ليهم كمان..
طيب ياترى اللبن الرايب بس والزبادي هما المصدر الوحيد للخمائر المشابهة للخمائر في الأمعاء.. لا طبعا
عملية التخليل بينتج عنها نفس للخمائر يعني الخيار المخلل والكرنب المخلل.. كمان صوصات الصويا.. والجبن المتعفنه بس طبعا التناول منهم بيتوقف على الحالة الصحية للشخص
طيب احيانا ناس بتاكل خضار يظهر معاه انتفاخات أو بعض الغازات.. فيخاف يقرب منه ويقول دايما بيسبب غازات
زي ماقلنا أن الخضار في حد ذاته مش بينتج غازات لكن نشاط البكتريا الضارة بيكون أقوى من النافعه فبتسبب تخمر الألياف دي داخل الأمعاء.. وتنتج الغازات
يبقى حضرتك لما تشعر بالغازات
أو الانتفاخات.. دي رسالة من جسمك بيقولك فيها انا محتاج غذاء ينشط البكتريا النافعة ويزودها كمان.. زي ماتقول كدا رسالة..( استنجاد)
خلاصة القول لمشاكل القولون
آكل زبادي أو لبن رايب كل يوم مع خضار أو فاكهة لمدة ١٥ يوم.. بإذن الله هتقل مشاكل القولون
طيب أيه قصة الدهون
حضرتك اكيد عارف ان الزبادي واللبن الرايب مصدر غني جدا بالكالسيوم.. وكمان مصدر ممتاز للبروتين
وكلنا عارفين ان الوجبة الغنية بالبروتين بتعطي شعور بالشبع... وبتساعد على تكوين الكتلة العضلية في الجسم
وكل مابتزيد الكتلة العضلية كل مابيزيد معدل الحرق في الجسم..
غير أن الكالسيوم أهم الأملاح المعدنية المسئولة عن تنشيط إنزيم ليبيز البنكرياس اللي بيساهم في هضم الدهون
وخليك دايما فاكر أن المرء نتاج مايأكله أو على نحو أكثر دقة فأنت نتاج إطعام ملايين المليارات من الكائنات الحية الدقيقة التي تعيش في أمعائك
