26/10/2024
Fact
-إنتي إزاي تزعقيله بالشكل العنيف دا !!
-علشان أنا إبني ما ينفعش ينطق كلمة خايف دي..أنا لا يمكن أسمح لإبني إنه يطلع جبان
-و إنتي فاكرة إن اللي عملتيه دا هيخليه شجاع!! دا هيخليه مهزوز و خايف أكتر و معندوش شخصية
-يا سلااام…بلاش بقي فلسفتك الفارغة اللي هتخسر العيال دي
-فلسفة فارغة!!
طيب…إيه رأيك ننسي الخناق و لو لخمس دقايق و نتناقش نقاش حضاري علشان مصلحة الولد
-موافقة ، أولاً علشان مصلحة الولد ، ثانياً علشان ما تبقاش إنت الحضاري و أنا الست الرجعية المتخلفة ، إتفضل إتناقش
-شوفتي قبل كدا مريض عنده رهبة من العمليات أو بيخاف علي نفسه بزيادة ؟!
-محصليش الشرف
-أنا أقولك…بيبقي عنده كل شئ مضروب في عشرة و تصوره للأشياء بيبقي أكبر من حجمها بكتير
يعني اللي عنده رهبة من العمليات دا بيقي متصور إنه هيموت و إنه داخل مش طالع فبالتالي ضربات قلبه بتزيد و ممكن هو اللي يموت نفسه من خوفه
و اللي بيخاف علي نفسه بزيادة لو الألم عنده قوته ١٠٪ يحس به كإنه ١٠٠٪ ، يعني من شئ لا يذكر لشئ في قمة الألم و اللي نفسه بتصورله إنه حقيقي فبيحس بالألم القوي فعلاً علي الرغم إنه وهم ليس له أي وجود
، فتفتكري بقي إيه العلاج الفعلي و الحل القاطع للمسألة دي؟!
-إيه؟!
-الطمأنينة…الطبطبة…الكلام الحلو
بذل قصاري الجهد لتخفيف الخوف و التشجيع علي تجاوز المحنة ، لكن تأنيب الخايف في لحظات خوفه دا يعتبر خذلان له ، سائل جه يسألك عن الأمان علشان تتصدقي عليه به و نهرتيه أكيد هيخاف أكتر ، فقيسي دا علي كل أنواع الخوف و مهما كان حجم الشئ اللي بيَرهَبه اللي قدامك صغير في نظرك فهو كبير في نظره و يجب التعامل معاه علي هذا الأساس
-للدرجادي
-و أكتر
الخوف دا مرض لازم يتم بتره من الروح علشان الإنسان يقدر يعيش و يكمل و يواجه ، و من الأفضل إن العملية دي تتم من الصغر قبل ما يكبر و يبقي مهزوز و معندوش ثقة في نفسه ولا في اللي حواليه و يبقي خايف لا يفشل و خوفه يسيطر عليه فيفشل فعلياً ، يفشل في دراسته و في شغله و يفشل حتي في تكوين علاقاته
-بس إحنا إتربينا علي كدا يا صلاح ، إتربينا علي إن فكرة خايف دي دلع فارغ
-و إنتي شايفة إن إحنا أسويا !! يا مديحة إحنا كل واحد مننا ناقصه حتة ، اللي ما طلعش مهزوز طلع عدائي و عنيف و اللي ما طلعش عدائي و عنيف طلع سلبي و اللي ما طلعش سلبي طلع متحكم و أحسن ما فينا بقي طلع فاقد للغة الحوار و النقاش زينا و أسهل حاجة عنده بتبقي كلمة "هو كدا"
اوعي تخاف ..طاب مخافش ليه ؟! علشان هو كدا ..علشان اتربينا علي كدا
يا مديحة أنا ياما كتمت العياط جوايا لا أبويا يشوفني فيضربني علشان مفيش راجل بيعيط
ياما كتمت في قلبي حاجات كتير كان نفسي أعبر عن رهبتي منها و ما كنتش عايز بس غير كلمة تطمنني بس كنت بخاف بتقالي إنت جبان أو ضعيف أو علي رأيك كدا ..بتدلع ، و للأسف بقي دا اللي وصلني إني أفشل طول سنين حياتنا الزوجية فإني أتناقش معاكي زي دلوقتي لا تقوليلي بتفلسف فلسفة فارغة زي ما قولتي
-أنا ما أقصدش يا صلاح صدقني ، و عالعموم إنت معاك حق في كل كلمة ، أنا مش هكابر ، مش هكابر علشان مصلحة ولادنا
-أيواااة، كدا إنتي حطيتي رجلك و رجلي علي الطريق الصح ، الطريق اللي آخره هنشوف فيه ولادنا و هما ناجحين و أسويا و قادرين يتعاملوا في الحياة سواء كنا فيها أو مكناش ، الطريق اللي هنمشيه سوا و نطبق فيه عليهم المنهج السليم اللي ما اتطبقش علينا ، و دا مش لإن أهالينا مكانوش بيحبونا ..بالعكس ، إحنا مفيش حد حبنا قدهم ، بس كل الحكاية إنهم كانوا فاهمين الحب غلط و دلوقتي جه دورنا علشان نصحح .
الصورة من الفيلم التلفزيوني الرائع : محاكمة علي بابا ♥️
الخلاصه بقى من واقع اللى قريته فى علم النفس واللى بشوفه كل يوم من الأجيال اللى بتكبر وتيجى الكليه
فهو أن كل ما زادت قسوة الاب والام فى اذيه أطفالهم وعقابهم المستمر بالضرب علشان يقرو باخطاءهم فالنتيجه للاسف بتبقى عكسيه الاطفال بتعلم وتزود الكذب وبالنسبه للاطفال الى اصلا لسه مش فاهمين ولا مستوعبين المصلحه والصح والخطأ زى ما احنا شايفينه بيقولوا لنفسهم ...ديتها ايه علقه سخنه ...
(علقه تفوت ولا حد يموت)
سيبو اطفالكم تغلط واتناقشو معاهم بالعقل والدين مش بالضرب الاطفال لما مبتغلطش وتتعلم بالعقل وهيا صغيره بتعمل كوارث لما تكبر وربنا يسامح كل أب وأم فاهمين التربيه بالضرب.
