02/05/2020
MANEHO DI OUMENTO DI PESO DURANTE KARENTENA
Biba den karentena, ta pone nos konfrontá diferente reto mental, emoshonal i fisiko, debi prinsipalmente na un malesa asina peligroso komo ta COVID-19. Si bo tin problema pa mantene bo peso, ta mas fásil pa oumenta di peso durante e periodo aki. Pero presis subi di peso ta e situashon ku ta perhudiká nos mas. Den hospital ta opservá ku un gran porsentahe di pashèntnan ku ta lucha kontra COVID-19 den Unidat di Kuido Intensivo den hospital ta obeso. Hende ku obesidat ta spesialmente difisil pa kuida, pasobra su tratamentu pa optimalisa e funshon pulmonar ta eksigi hopi moveshon den k**a. Ademas, otro estudio resien a mustra ku pashènt ku un edat abou di 60 aña, ku obesidat a duplika e riesgo di hospitalisashon dor di COVID-19. Si adishonalmente nan tin problema di diabetes i/òf problema di kurason, e ta kompliká su maneho mas tantu.
1. Kumpra bo kuminda di forma inteligente
Durante temporada di karentena, ta importante pa bo ta organisá, spesialmente den e konsumo di fruta i bèrdura. Por hasi kompra di produkto fresku i dipfris i den okashon bèrdura den bòter di kristal pa tin mas durashon.
Prome usa e alimentonan fresku, despues esnan di dipfris i delaster esnan den bòter. Si bo a kumpra alimento den bòter, mester labe prome pa redusi e kantidat di salu. Bo tin ku tuma fruta fresku òf dipfris tur dia pa sigurá sufisiente kantidat di Vitamina C. Pero kòrda ku bèrdura den bleki tin menos kantidat di dje, ku ta importante pa nos sistema imunologiko.
Ta importante pa evitá pone suku den preparashon ku fruta, pasobra fruta mes tin suku kaba. Bo por traha un salada di bèrdura, pa ora bo tin antoho. Buska reseta na diferente website pasobra nan tin tiki kaloria pero ta dunabo sensashon di sasiedat. Nan ta karga di mineral i variedat di nutriente pa oumenta bo sistema imunologiko. Prepara delantá sierto kantidat di bèrdura kla pa konsumi. Ora e hamber i kualke antoho ta presentá, bo por tin akseso na nan. Evitá tin alimento ku ta duna nos problema ku nos peso òf mantené nan na distansia pa otro miembro di famia, por ehèmpel den e parti mas ariba di bo kashi òf den e parti mas patras òf abou di bo frishidèr. Ora nan ta fuera di bo visibilidat, ta mas fásil pa evitá nan.
2. Maneho di Strès
Durante karentena ta importante pa haña diferente forma pa vense strès i kontrolá ansiedat. No ta fásil ekilibrá edukashon den kas, konfrontá diferente problema di finansa, manehá aislamentu sosial. Situashon di strès por kontribuí na un mal alimentashon i si bo ta sinta henter dia na kas bo vèt den barika ta oumentá. Rekomendashon: trata di biba e dia pa dia sin pensa hopi den bo futuro. Konsentrá mas tantu den kosnan simpel manera e kariño ku bo ta sinti den kas, paga tinu na bo yunan, distraé ku algun kos di hunga, etc. Tin sierto rekursonan gratuito den kòmpiuter pa manehá bo ansiedat i kontrolá bo strès dor di COVID-19. Otro rekurso ta buska un lugá trankilo na kas, lesa un buki i bebe te (sin suku). Yama un amigu ku bo tin tempu sin sa nada di dje. Tambe bo por yuda otro hende ku ta duna bo un sentido di felisidat i alegria.
3. Mantené un orario di soño
Ekseso di ora di soño ta relashoná ku oumento di peso, gana di kome mas i afektashon den e kontrol di suku den sanger. Trata di mantené un órden di orario di soño pa evitá keda lanta te mardugá, òf ku bo ta drumi te mèrdia, òf permanesé lanta henter anochi pa wak televishon. Rekomendashon: Evitá ekseso di alkohòl promé ku bai drumi, mantené e kamber mas skur posibel i mantené un temperatura agradabel pa drumi, i hasi ehersisio regularmente. Preferibel no wak notisia i laga bo telefòn, e oranan promé ku bai drumi.
4. Ban Move!
Keda henter dia na kas ta tin otro konsekuensia; bo ta kima ménos kaloria pa dia kompará ku e tempu ántes di karentena, independiente di si bo tabata tin kustumber di hasi ehersisio. Sinta dilanti di kòmpiuter durante hopi ora, hasiendo yamada di trabou òf ora bo ta den redanan sosial, keda wak televishon oranan largu anochi i hopi oranan tur fin di siman, ta agregá fásilmente mas kaloria ku ta wòrdu kima pa dia. Si bo no ta hasi ehersisio, esaki ta produsí mas oumento di peso. Rekomendashon: ta importante pa agregá mas moveshon i evitá pa ta muchu tempu sinta den un dia. Tambe ta un bon idea pa kada pelíkula ku bo ta mira por ehèmpel, agregá 20 minüt di un sorto di aktividat manera limpia, realisá un aktividat físiko ku bo famia, programa un aktividat diario di ehersisio, purba di kana den kas òf realisá ehersisio di estrechá promé ku sinta di nobo.
Delaster, kòrda ku bo serebro ta siña dor di ripitishon. Pa esei tin efekto no lubidá 3 konseho ku bo mester sigui pa tin éksito ku bo alimentashon: Konstansia, Pasenshi i Firmesa. Ademas bo semper por bini di nobo na konsulta ku bo dietista, pa ponebo den kondishon bèk.
