09/03/2026
Ishim pjesëmarrës në Panairin e Shëndetësisë (Thüringer Gesundheitsmesse) në qytetin e Erfurtit, ku pata kënaqësinë dhe nderin të përfaqësoj Qendrën Endoprotetike të spitalit St. Georg Klinikum, institucion në të cilin punoj dhe që çdo ditë i shërben pacientëve me përkushtim të madh profesional dhe njerëzor.
Gjatë këtij organizimi patëm mundësinë të takojmë dhe të bashkëbisedojmë me shumë qytetarë të interesuar për fushën e ortopedisë. Vizitorë të shumtë ndaluan për të diskutuar rreth problemeve ortopedike, shqetësimeve që lidhen me nyjet, dhimbjet në lëvizje, si dhe për të marrë informacione mbi mundësitë moderne të trajtimit dhe ndërhyrjeve endoprotetike. Pyetjet, interesimi dhe diskutimet e hapura krijuan një atmosferë shumë pozitive dhe treguan edhe një herë sa e rëndësishme është që mjekësia të jetë sa më pranë njerëzve.
Panaire të tilla janë një mundësi e vyer për të ndërtuar ura komunikimi mes profesionistëve të shëndetësisë dhe komunitetit. Ato u japin qytetarëve mundësinë të informohen më shumë për shëndetin e tyre, të marrin këshilla të drejtpërdrejta profesionale dhe të kuptojnë më mirë rëndësinë e kujdesit të hershëm ndaj problemeve ortopedike.
Për mua, si udhëheqës i Qendrës së Kirurgjisë Artroskopike, mbetet gjithmonë një kënaqësi e veçantë të jem pranë pacientëve dhe qytetarëve, të ndaj përvojën dhe njohuritë profesionale, si dhe të ofroj jo vetëm këshilla mjekësore, por edhe afërsinë dhe mbështetjen njerëzore që shpesh është po aq e rëndësishme sa vetë trajtimi. Sepse mjekësia, përveçse profesion, është mbi të gjitha një shërbim ndaj njerëzve.
