09/07/2025
لو إبنك أقل من 5 سنوات… لازم تعلمه الحاجات دي ضروري جداً قبل ما يكبر
السن الصغير ده مش وقت تعليم القراءة والكتابة…
ولا وقت نحفظه الحروف والأرقام بالإنجليزي!
السن ده هو "بداية التربية الحقيقية" اللي بتزرع فيها الأساس اللي هيكمل عليه طول عمره.
لو إبنك أقل من ٥ سنين، علمه:
1️⃣. يعرف يقول لأ ، لما حاجة تضايقه أو حد يلمسه بطريقة مش مريحة له.
علمه إن جسمه ملكه، وإنه له الحق يقول لأ لأي حد، حتى لو كان قريب.
2️⃣. يعبر عن مشاعره بالكلام
"أنا زعلان، أنا خايف، أنا فرحان، أنا مش بحب كده"
ما تستهونش بالكلام البسيط ده، هو اللي بيحميه من الكبت والتوتر بعدين.
3️⃣. يطلب المساعدة
ما تضحكش لما تلاقيه مش قادر يلبس لوحده أو يقع ويعيط، علمه يقول: "ساعدني"، مش "أنت غبي".
4️⃣. يكون مستقل شوية بشوية
علمه يلم لعبه، يلبس شرابه، يشرب من الكوباية لوحده.
الاعتماد على النفس بيبدأ من دلوقتي.
5️⃣. يفهم يعني إيه "لأ" من غير صريخ
اوعى تعوده إنك ما بتسمعوش غير لما يعلي صوته.
علمه يسمع الكلمة ويتقبل الرفض من غير ما ينهار.
6️⃣. يعرف يتواصل بالعين والكلام
لما يتكلم معاك، بص في عينه واسمعه كويس.
ده بيعلمه إن صوته مسموع، وإنه مهم.
7️⃣. يحترم غيره من خلال معاملتك ليه
ما تضربوش وتطلب منه ما يضربش!
ما تعنفوش وتقول له "اتكلم بأدب"!
هو بيقلدك، مش بيسمعك.
8️⃣. يعرف يحب نفسه
امدحه لما يعمل حاجة حلوة، وقوله "أنا فخور بيك".
الكلمة دي بتبني ثقته بنفسه أكتر من أي حاجه تاني.
9️⃣. يتعلم يعتذر ويتسامح
لما يغلط، علمه يقول "أنا آسف".
ولما حد يغلط في حقه، علمه يقول "أنا مسامحك" لو اعتذرله بجد.
🔟. يعرف إنك بتحبه دايمًا، مش حسب سلوكه
ما تخليش حبك مشروط…
حتى لو غلط، احضنه وقوله: "أنا زعلان من تصرفك، بس بحبك أنت".
السن ده هو وقت الزرع…
وكل كلمة، وكل رد فعل، وكل حضن بتديهوله
بيفضل محفور في قلبه لسنين قدّام.
ربّوا أولادكم على الحب، مش الخوف
على الحوار، مش القمع
على الأمان، مش الرعب.
لأن الطفل اللي اتربى صح من أول ٥ سنين…
هو اللي هيكبر ويكون "إنسان سوي" في كل حاجة ❤️
(منقول للنشر للإفادة)
