محتوى صحي مع الدكتورة صالحي.ج إختصاصية في البيولوجيا الطبية

25/04/2026

المعلومة الصحية ليست برأي أو إجتهاد شخصي تقتنع به أم لا

25/04/2026

🚫عندك تحاليل السموم ( المخدرات )
على خدمة طلبو منكم تحاليل المخدرات و نتا خاطيك
راح يهمك المنشور

❌️تحليل الكشف يندار على عينة البول لي تقدر ديرها في أي وقت و من دون صيام
يشترط فقط انها تندار في المخبر

❌️❌️قائمة طويلة لتداخلات في هذا التحليل ‼️
القصد من التداخلات، هي مواد تخلي التحليل يخرج إيجابي و نتا لا تستهلك تلك المادة ،مثلا لتشابه ما
المؤسف ان القائمة طويلة

⛔️دكا واش لازم دير⁉️

👈 في حال تشرب أدوية من دون استشارة طبية ، يعني مراكش تبع في علاج مدهولك طبيب ، مدابيك توقفهم لأيام، أو على الاقل 24 ساعة قبل في حال مقدرتش ، و هنا نحكي على أدوية لأغراض علاجية.

👈 القهوة و الشاي أو حتى مشروبات الطاقة لي فيها نسبة كافيين عالية جدا تجنبها ساعات قبل العينة

⚠️ التحليل متوفر في مخبر صالحي للتحاليل الطبية SALHILAB فقط لطلبات التوظيف أو بوصفة طبية.

25/04/2026

الناس لي راهي دير من راسها السكر التراكمي فقط باش تشوف( تشخص) مرض السكري
راكم غالطين ‼️

23/04/2026

لما نشوفو المخبر المرجع في الجزائر
معهد باستور يخدم بنفس التقنية الجارية في مخبركم
فما علينا إلا أن نكون فخورين بإختيارنا الأفضل لمرضانا 😊

22/04/2026

الأب الحنون الذي لا يعرف شيئا

#التحفيز اليومي ...

22/04/2026

لكل من راسلنا على المسنجر هنا أو في صفحة المخبر
من فضلكم عاودو ابعثولنا على الواتساب أو الفايبر على أرقامنا
👉 0659989512
👉 0659989514

كاين un bug يتكرر منذ أيام ، و مخالاناش نردو عليكم بأريحية
عذرا عذرا

20/04/2026

03/04/2026

🚫 لما ترمب يزيد فيها 🤭 كالعادة ‼️
راح تقولولي عندك ميول سياسية ،
لما السياسة أو أجندات سياسية تتدخل في الهرم الغذائي ، فهذا يقول كل شيء 🙄

قبل منحكيو على ترمب
❌️نحكيو شوي على الأسبرين ‼️
الاسبرين من أقدم الأدوية ، عندو بزاف إستعمالات :
👈مميه للدم ، باش ميتبوشاوش الأوعية الدموية ، مفعول وقائي و هذا يمدوه بجرعة خفيفة متفوتش 100مغ
👈 يهبط السخانة ، دواء إلتهاب بجرعة أكبر

⭕️ بصح واش دخل ترمب مع الأسبرين 🤔⁉️
في جانفي الماضي ، اليد اليسرى لترمب كانت فيها زروقية ، سقساوه قالهم ضربت يدي على الطابلة برك و راني نشرب 500 مغ أسبرين يوميا، زعما برأي طبيبه( لا أعتقد طبيبه قالها )
🚫هوما واش قالو ترمب يزيد فيها ، قالولو 100 تميه الدم و تحميك من الجلطات مالا قالهم خلي نشرب 500 😅،
و دكا راهو ينصح متشربوهش 😄

❌️ و مع الحكاية هاذي ظهرت أو بالأحرى تحطت تحت الضوء دراسات حديثة، وين ملقاوش فائدة فعلية للأسبرين بجرعة خفيفة ، كمفعول وقائي ، بل فيها خطورة على فئة من المرضى.

⚠️ لا تكن مثل الرئيس و متفتيش

02/04/2026

🚫 لما الأم الحبيبة تغلطنا التحليل ...😄‼️
موقف صرالنا في المخبر
الابنة حامل عندها تحليل السكر بعد الوجبة
فهمناها
الأم الحبيبة ، قاتلها مكليتيش ساعتين زيدي كولي و زادت غداتها غداء مشبع
قاتلي الأم، في بالي هكا يتريقل السكر

⭕️ عزيزتي الأم 😊هذا تحليل هكا مراكيش تعاونيها هكا راكي تغلطي في الطبيب

❌️تحليل السكر بعد الوجبة
الوقت تبدأ تحسبو من بداية الوجبة يعني من تبدأ تاكل
مدة الأكل ملازمش تفوت 10 دقايق

متزيدش تاكل أو بالأحرى تسمع كلام أمك 🤭حتى تنحي الدم‼️

02/04/2026

تحت شعار نوع من البشر ( أنتقد كل ما هو يمشي يزحف يطير )

لما نوجهلك الحديث و نكلمك بلغة متفهمهاش باش تقول عليا مثقفة هذا هو الكبر ،
لما توجه الحديث لعدد كبير من الناس فيهم لي مش متعلم فيه لي متعلم شوي راح تختار الصياغة لي تقدر توصل لأكبر عدد ، ممكن الطرح يكون ركيك، و هذا نلاحظو انا قبل كل شيء.
الصفحة مش لعرض مستوايا اللغوي، و لا باش تصفق عليا و تقولي تعرفي
التصفيق لي نحسو فعلا لما نلمس في الميدان ناس إستفادت من المعلومة

31/03/2026

⛔️ المرض الذي أصاب كل سكان العالم... فقدان الشعر ‼️

يقولو ان أي شخص على الكوكب حكمو على الاقل مرة في حياتو فقدان الشعر.

🚫 فقدان الشعر مشكلة صحية عندها آثار نفسية و جمالية بصح المشكل انو قادر يكون عرض صحي لمشكلة ما أكبر .

قبل منكمل في الموضوع نتفاهمو على المسميات
❌️ تساقط الشعر و فقدان الشعر ( الثعلبة ) مش نفس الشيء
اي تساقط شعر هو فقدان شعر بصح مش أي فقدان شعر هو تساقط
دوختكم 😅، نكملو

🔴 نحكيو شوي على الشعر ‼️

👈حنا عندنا في راسنا قرابة 100 ألف شعرة كاين أقل كاين أكثر
👈 في العادي نخسرو 100 شعرة في اليوم
👈 إذا زادت على 150 شعرة هنا نقولو عندي مشكل
👈الشعر لي يطيح قادر يزيد على حسب الفصول كيما في الخريف

👈كل شعرة جاية من بصيلة الشعر
👈 مخزون البصيلات ثابت ميزيدش
👈كل بصيلة دير دورة حياة تكررها تقريبا 20 مرة

❌️في هاذي الدورة
الشعرة تمر بثلاثة مراحل:
🔸️مرحلة النمو لمدة سنوات
🔸️مرحلة التوقف و التراجع لمدة أسابيع
🔸️مرحلة التساقط لمدة أشهر

و مش كل البصيلات يكونو في نفس المرحلة ، يعني تلقى وحدة في النمو ، وحدة في التساقط.

🟠 أشكال فقدان الشعر ⁉️
عندنا شكلين
الشكل الاول cicatricielle ندبات ، بصيلة الشعر دمرت تماما
خسرناها
الشكل الثاني non cicatricielle ، مكاش ندبات ، البصيلة مزالها بصح كاين فقدان للشعر

🟡 بصح واش هوما الأسباب ⁉️
⭕️الشكل الأول: منهدرش فيه بزاف
تشخيص طبي بحت
معتمد على بزاف معطيات مثل المكان و الشكل ، الحكة ....
هاذي نفوتوها

⭕️الشكل الثاني: لي فيه تساقط الشعر و يعتبر الأكثر انتشارا نذكركم البصيلة مزالها مدمرتش
كاين لي يقيس بزاف الشعر، و كاين لي غير شوي و فيها المزمن و فيها الحاد
في هاذ الشكل قادر ميكونش لسبب واحد ، قادر يكونو شحال من سبب مع بعض ،

🔴 بلا منكثر عليكم🙄 هاذو الأسباب ‼️
❌️النفسية
القلقة ، صدمة نفسية
حالة ما بعد الولادة ( مهيش نفسية 100%)
نتف الشعر

❌️إلتهاب و ميكروبات
السخانة
فطريات
مرض الزهري

❌️نقص في المعادن و الفيتامينات

❌️مشاكل هرمونات
مثل الغدة الدرقية

❌️علاجية
أدوية : مثل ادوية الشحوم
العلاج الكيماوي أو الإشعاعي

❌️مناعية
مثل: الذئبة ، مرض السيلياك

❌️ عادات و نظام حياة
تغيير البلد ، وين تتغير ساعات النوم
طريقة تصفيف الشعر
كيما هاذوك لي يجبدو بزاف شعرهم باش يحكموه بالشوشو و ما أكثرهم

❌️ وراثية

⚠️ بزاف بعثولنا على تحاليل فقدان الشعر
كاين لي حوسو بالذكاء الاصطناعي و بعثولنا، و في بالهم انو فقط جاي من نقص فيتامينات أو مخزون الحديد
بالرغم من التلخيص الموضوع واسع جدا كيما شفتو

⛔️ بسبب الطلب الكبير وإنزعاجنا من إعتمادكم الأعمى على الذكاء الاصطناعي لأن كل حالة وحدها ، راح نقترحو عليكم مجموعة تحاليل ثابتة و تحاليل متغيرة على حسب ملاحظاتنا

🚫 يبقى أهل الإختصاص( أطباء أمراض الجلد ) هم الأكثر دراية

31/03/2026

واش رأيكم في موضوع تساقط الشعر ❓️

قوليلو تساؤلاتكم في التعليقات👇