26/06/2025
راكي زعفانة، متقلقة، حسيتي روحك مخنوقة، تبغي تبلعي ما تقدريش، وصوتك يخرج كي المخنوق؟
هاد الإحساس ماشي تهيؤات، وماشي حاجة تافهة، بالعكس، راهو موثّق طبيًا ويسموه Globus pharyngé، معناها شعور بوجود كتلة واقفة في الحلق، بصح كي تفحصي ما تلقاي لا ورم تماك، لا التهاب، لا حتى حاجة واضحة > تسما معندهاش تفسير عضوي
و باش نفهمو علاه تحسي هكا، لازم نرجعو نفهمو شحال جسمك حساس للتوتر
كي تتعرضي لغضب شديد ولا قلق، المخ تاعك يترجم الوضعية هادي على أنها تهديد، حتى لو كان مجرد موقف محرج، نقاش حاد، ولا ضغط نفسي
تسما في لحظات الغضب الشديد أو التوتر، الجسم ما يفرقش بين خطر حقيقي (واحد جا يهاجمك) وخطر نفسي > ملخر الزعاف تاعك بالنسبة ليه خطر
هنا، المخ يعطي أوامر للجسم يدخل في حالة طوارئ، يسموها العلماء: حالة الدفاع أو الهروب (Fight or Flight) > نفس الحالة لي تتفعل كون يجري وراك أسد
وش معناها هاد الحالة؟
ببساطة، الجسم كامل يتحضر باه يرد الفعل على الخطر: إما "يدافع" يعني يهاجم، وإما "يهرب" > الهدف في الحالتين هو : يحميك و ينجو بحياتك (لانو بالنسبة لدماغك راكي في خطر)
و باه يقدر يدير هاد الشي، يفعل حاجة يسموها الجهاز العصبي الودي (Système nerveux sympathique)، هذا جهاز موجود داخل الجهاز العصبي خاصّ بتنظيم استجابات الجسم وقت التوتر و الخوف
كي يتفعل، يطلق سلسلة تغييرات:
– أولًا، يسرّع دقات القلب باه يضخ الدم بسرعة للعضلات
– ثانيًا، يسرّع التنفس باه يدخل أكسجين أكثر
– ثالثًا، يطلق هرمونات التوتر كيما الأدرينالين (Adrénaline) والـكُورتيزول (Cortisol)، هاد الهرمونات يزيدو النشاط ويخليوك تحسي بالتيقظ و بلي تقدري تبذلي جهد
– وأهم حاجة: يشدّ العضلات، حتى العضلات الصغيرة (يعني يخليها تتقلص باه تقدري تواجهي الخطر ولا تهربي منو) وهاد الشي هو لب المشكل
في الحلق تاعك، كاين عضلات صغيرة بزاف محيطة بالبلعوم والحنجرة، هوما يتحكمو في البلع والصوت
هاد العضلات يخدمو تحت إشراف العصب الحائر (Nerf vague)، وهو عصب رئيسي يخرج من الدماغ ويمد فروع لعدة أعضاء: القلب، الرئة، المعدة، والحلق
كي الجسم يدخل في حالة الدفاع أو الهروب، العصب الحائر يتأثر، ويتحفز، ويبدا يبعث إشارات بزاااف متشابكة، مشوشة، مش منظمة
هاد الإشارات تخلي عضلات الحلق والحنجرة تتقلص وتتشدّ، حتى لو ماكان لا خطر حقيقي ولا مشكل عضوي
وهنا تحسي بلي عندك "كتلة" عالقة في النص
نزيدك حاجة: الأحبال الصوتية حتى هي عضلات دقيقة، وكي تتأثر بهاذ الانقباض، يولي صوتك خارج كي المخنوق، ولا متذبذب، ولا حتى ما يخرجش قع
كامل هاد الشي راهو غير نتيجة التوتر ماشي مرض ولا عطب حقيقي
وفي الغالب، منين تهدئي، وتهبط نسبة الأدرينالين والكورتيزول، يرجع الجسم يخدم كي العادة، العصب الحائر يهدى، العضلات ترتخي، والإحساس يروح وحدو
✳️ واش تديري كي تحسي بيه؟
1. تنفسي ببطء
2. اشربي حاجة دافئة
3. حاولي تهدئي الأفكار في مخك
4. متحاوليش تهدري لأنو صوتك رح يخرج مخنوق + متحاوليش تبلعي بالقوة
#بناكيا
