طبيب الأطفال د. مزوار عبد الرحيم مستغانم dr. mezouar Pédiatre mostaganem

طبيب الأطفال د. مزوار عبد الرحيم مستغانم dr. mezouar Pédiatre mostaganem صفحة طبية نقدم فيها نصائح و توجيهات حول كل ما يخص صحة الطفل 👶👨‍👩‍👧‍👧
(4)

قصيدة كتبتها 😅 اليوم جيت نحكيلكم على لاڨريب🔹🔸 راهي تدور و الناس ڨاع تعبانة بزاف أطفال راهم في حالة🔹🔸بالكحة لي تطُول فو...
14/05/2026

قصيدة كتبتها 😅

اليوم جيت نحكيلكم على لاڨريب🔹🔸 راهي تدور و الناس ڨاع تعبانة
بزاف أطفال راهم في حالة🔹🔸بالكحة لي تطُول فوق سيمانة
لولبارح مين خرجتو في الليل🔹🔸وقاتلك البنت راني بردانة
بدات تكح مرة على مرة🔹🔸وتلعب عادي مش زعفانة
ثم الأنف مغلوق وشوية حمى🔸🔹 والخدود حمارو تقول رمانة
بصح يلا بدات تزراق من شواربها🔹🔸و مين تتنفس تبانلك عيانة
تسمعي صدرها ديما يصفر 🔸🔹و ماترقدش فالليل مالڨري نعسانة
وزيد حبست رضاعة الحليب🔹🔸و بالكشايف تفوّت نص بنانة
هنا الحالة ولّات خطيرة🔸🔹 اجري للسبيطار ولو في خميس مليانة
بعدما ترتاح أكدي على الرضاعة🔹🔸 تعطيها المناعة و زيد فوقها الحنانة
ودايما السيروم في دارك🔸🔹خويله نيفه ماتكونيش فنيانة
حافظي على رضيعك من العدوى🔹🔸سيرتو يلا كنتي في عرس ولا ختانة
والأكل الصحي بكل أنواعه 🔸🔹البيض و اللحم وزيد الجلبانة
أخيرا نصيحة للزوج الكريم🔹🔸تهلا في الزوجة وخليها فرحانة
والزوجة الكريمة نفس الكلام🔹🔸لازمك الصبر وفوقه الرزانة
اذا قالك يا مرا واش كاين فطور🔸🔹ماتقوليش طيب وحدك أنا مثلك جيعانة
هنا النهاية ماتكونش سعيدة🔹🔸راح تكمليها في السبيطار سخفانة

المرة الجاية نديرلكم قصيدة على دياري 🤣🤣

كتبه

عندنا مين يزيد مولود جديد ويخافو عليه من العين :🔸1-مين يجو الضياف يباركو، يقلبولهم الأحذية عند الباب🙃🔹2-يلبسو الولد اللو...
13/05/2026

عندنا مين يزيد مولود جديد ويخافو عليه من العين :
🔸1-مين يجو الضياف يباركو، يقلبولهم الأحذية عند الباب🙃
🔹2-يلبسو الولد اللون الوردي ولبسة البنات👗.
🔸3-يحطو مرآة🪞 عند راس الرضيع باش مين يبغو يعينوه 👁️، العين تنعكس في المراية وترجع على صاحبها تقضي عليه ( هذا راه علم كبير و فيزياء و أشعة 🥸).
🔹4-يحطو الملح بين القش تاع الرضيع🧂.
🔸5-الخامسة🪬 والخرزة الزرقاء🧿 🤦.
🔹6-الأم ترفد رضيعها 🤱وتحركه فوق شمعة 🕯️ أو جمر خفيف 3 مرات 🤔.
🔸7-يخيطو حجاب في اللباس تاعه أو يعلقوه على رقبته.
🔹8- يخزنوه 40 يوم الأولى ماكانش لي يشوفه🥷.
🔸9- يعلقوله ربطة ثوم على رقبته 🧄🧄 .
🔹10- وإذا تقدرت عليه ومرض شوية يا ويله ..يبداو 👈الكحل، الحنى، الحنتيت ،العرعار،ترغودة،الفيجل،الزيت،القطران ،مليلس،الكمون، الكروية ،الخل ،الشب،ماء زهر،الطالك،الڨطيع،العسل،الصابون وزيد 7 تريكوات و3 سراويل و ممنوع الدوش... المهم كشفة وخلاص .

لو كان الأمر بيدي ويجيبولي رضيع تدهورت صحته أو مات بسبب كاش خلطة...لي دارها النهار لي يخرج من الحبس يلقى الدلاع يتفتح ببصمة الإصبع 🍉

كتبه #مزوارعبدالرحيم

🔸1-ماتخليهش حتى يتعرض للتنمر عالجيله التأتأة. 🔹2-ماتخليهش حتى تضعف شخصيته علميه يسترجع حقه من أصدقائه. 🔸3-ماتخليهش حتى ش...
12/05/2026

🔸1-ماتخليهش حتى يتعرض للتنمر عالجيله التأتأة.
🔹2-ماتخليهش حتى تضعف شخصيته علميه يسترجع حقه من أصدقائه.
🔸3-ماتخليهش حتى شواربه ينشفو ديريله فازلين الشفتين.
🔸4-ماتخليهش حتى يدير فقر الدم اعطه دواء الحديد في حال نقص الشهية أو الرضاعة الطبيعية بترخيص الطبيب طبعا.
🔹5-ماتخليهش حتى يتأثر نفسيا عالجي له التبول اللارادي.
🔸6-ماتخليهش حتى ينشف من الماء بلادياري اعطه الأملاح.
🔹7-ماتخليهش حتى يتمكن منه مرض الربو عالجي له أعراض الحساسية و الكحة المزمنة بالبخاخ.
🔸8-ماتخليهش حتى تتأثر المناعة نتاعه اجتنبي له كثرة الأدوية.
🔹9-ماتخليهش حتى يطيب من لاكوش دايما ديريله كريمة الحفاظ للحماية
🔸10-ما تقارعيش للزوج الكريم حتى تطيح بيه ويبقى يشكي...غي تشوفيه تشومر شوية قوليله هاك ذهبي راجلي العزيز بيعه واصرف كيما تحب😜

كتبه #مزوارعبدالرحيم

راني حاب نعرف الصفحة تاعي حتى لوين راهي واصلة 🤔 رجاءً الكل يشارك... من أي ولاية أو بلد تتابعني؟ ❤️وإذا لم تعلق فاعلم أن...
09/05/2026

راني حاب نعرف الصفحة تاعي حتى لوين راهي واصلة 🤔 رجاءً الكل يشارك... من أي ولاية أو بلد تتابعني؟ ❤️
وإذا لم تعلق فاعلم أن الحنتيت منعك 😒

🔹1-كيفاش تطيبي لرضيعك؟ 👈التبخير: يحافظ على الفيتامينات والمعادن أكثر من الغلي، 👈السلق: مناسب للخضروات القاسية مثل الجزر🥕...
08/05/2026

🔹1-كيفاش تطيبي لرضيعك؟ 👈التبخير: يحافظ على الفيتامينات والمعادن أكثر من الغلي، 👈السلق: مناسب للخضروات القاسية مثل الجزر🥕 والبطاطا🥔، 👈الشوي بالفرن: يمنح نكهة طبيعية للخضار مثل القرع والبطاطا الحلوة🍠.
🔸2- ممكن تخففي قوام وجبة الرضيع بالماء لي طيبتي فيه أو بحليبك أو الحليب الاصطناعي ..مش عنده 5 اشهر ديري الشوربة بالحليب تاع الشكارة 🤦.
🔹3-في تحضير البيبرون 🍼لازم كل 30 مل ملعقة 🥄ممسوحة ماتنقصي في الامساك ماتزيدي في الاسهال.
🔸4-يا جماعة ماكانش حاجة سموها الطفل راه يوسّع..شفتوه يرد الحليب بزاف فوتو عليه عند الطبيب.
🔹5-الأملاح في النزلة المعوية نحضروها بالماء مش بالحليب 😒ولازم تقدم بالملعقة 🥄باش يقبلها و مايردهاش.
🔸6-الكحة المزمنة لي ماتتحسن بحتى دواء حتى البخاخ هنا لازم نراجعو التشخيص الأولي ونتعمق في البحث عن السبب.
🔹7-لازم تهوية البيت يوميا و ماتطبقيش الفراش حتى تعرضيه لأشعة الشمس خاصة إذا اولادك يمرضو بزاف بالكحة.
🔸8-من المفروض خلاص مانبقاوش نهدرو على النظافة الشخصية علمي ولدك غسل اليدين بانتظام🧼، خاصة قبل الأكل وبعد اللعب أو استخدام الحمام وكذلك نظافة الألعاب 🧸والأدوات التي يستخدمها لمنع العدوى..
🔹9-دايما حطي قطعة من لباسك🧣عند رأس رضيعك 👶 يشم ريحتك و يحس بالطمأنينة.
🔸10-نصيحة، علمو ولادكم اللباقة و الظرافة في الكلام و التعامل مع الغير مش قدام الضياف أنت أمه يقولك فتيحة باغي نبول ! أو مايعجبهش كاش ضيف يتفل عليه أنا بعدا يديرهالي نعطيه طريحة قدام باباه قال قال أنا طبيب و هذا علاج جديد كيما نظام الطيبات سموه نظام الصفعات.

كتبه

🔹سامحني أبي ماعندي حتى ذنب مين جيتك أنا البنت الثالثة وأنت باغي الولد..🔸سامحني أبي مين تجي تعبان من الخدمة وأنا نبقى نبك...
06/05/2026

🔹سامحني أبي ماعندي حتى ذنب مين جيتك أنا البنت الثالثة وأنت باغي الولد..🔸سامحني أبي مين تجي تعبان من الخدمة وأنا نبقى نبكي لساعات مانخليكش تريّح و ترقد...🔹 سامحني أبي راك تظل تتعب في الخدمة باش توفّر شوية دراهم مبعد تصرف نصهم عليا ليكوش و الحليب...🔸سامحني أبي درتلك الضغط و القلق مين كل مرة نمرض و تتهوّل عليا...🔹 سامحيني أمي ماخليتكش تفرحي بزهرة شبابك سمحتي في روحك شعرك مالحقتيش تمشطيه على جالي ترضعيني و النهار كامل مقابلتني...🔸 سامحيني أمي على كل مرة نوضتك من الرقاد في الليل باش ترضعيني وترفديني وتغنيلي... 🔹 سامحيني أمي على تعبك مين تديني عند الطبيب رافدتني تمشي بيا و تقارعي لساعات باش تفوتي عليا...
🔸 سامحيني أمي على هدرة الناس لي عقدوك بها على جالي وقالولك ماتعرفيش تربي و راكي سامحة في ولدك...🔹 سامحيني أمي على الفراش و اللباس لي تظلي تغسلي فيه بسبب التبول اللا إرادي...🔸 سامحيني أمي على ألم الحمل والولادة و بكاء المغص و التسنين...🔹 سامحيني أمي..سامحني أبي...كل يوم ندعيلكم ربي يعطيكم صحتكم، يخليكم ليا وتكونو من أهل الفردوس الأعلى يا رب 🤲.

واش قلتو على الدراما 💔🥹 أيا نبكو ڨاع

كتبه

🔹1-يا أمي مين تجيني الحمى ماديريليش الخل و مازهر مارانيش سلاطة 🥬 🔸2-يا أمي مين تجيني لاكريز ماديريليش مفتاح في يدي ماران...
06/05/2026

🔹1-يا أمي مين تجيني الحمى ماديريليش الخل و مازهر مارانيش سلاطة 🥬
🔸2-يا أمي مين تجيني لاكريز ماديريليش مفتاح في يدي مارانيش باب🚪.
🔹3-يا أمي مين تجيني الشهاقة ماديريليش خيط أحمر في جبهتي 🔴 مارانيش هندي🇮🇳 .
🔸4-يا أمي علاش تقارنيني مع ولد خالتي إلياس لي بدا يمشي قبلي.. ديجا أنا شباب عليه 😎.
🔹5-يا أمي بغيت نقولك حاجة و حشمت.. راني كبرت في عمري 7 أشهر راكي ڨاهمتني بالجزر والكابوية الحمرا كل يوم حتى وجهي أصبح برتقالي. . ها شوية بيض🥚 شوية دجاج🐔 شوية سمك🐟 شوية فيونداشي😅.
🔸6-يا أمي راني في شهرين مادوشتش 🛀 ها نعلي الشيطان راني عايف روحي🤢 😆.
🔹7- يا أمي علابالك بلي مارانيش نشوف مليح وأنت مش فايقة بيا.. جامي ديتوني عند طبيب العيون للفحص الروتيني 👓.
🔸8- يا أمي راني ندير القباحة في الدار و قطعت الماكلة و نبول على روحي غي باش تهتمو بيا خاطر راكم لاهيين غي بخويا الصغير و أنا نسيتوني 🥺.
🔹9-يا أمي شحال تغيضني مين نكون نرضع و نشوفك لاهية في التيليفون 🤳 و كأني غير موجود أو كأني عقوبة 😔.
🔸 10-القناعة مليحة، واش فيها سيدتي إذا عشتي مع راجلك في ڨيطون ⛺ على الأقل إذا ضرب زلزال يطيح عليكم غي الباش 🤣


كتبه

05/05/2026

إنا لله وإنا إليه راجعون.
رحم الله زميلتنا الدكتورة منصوري خديجة، 31 سنة.
طبيبة مقيمة في أمراض النساء والتوليد بمستشفى باينام بالجزائر، توفيت إثر سكتة قلبية أثناء أداء مهامها، في سياق مناوبة مرهقة وضغط متواصل.
كانت أمًا، وتركت رضيعًا صغيرًا… وهذه الحقيقة تختصر حجم الفاجعة.
ما حدث ليس حالة معزولة، نظام المناوبات الحالي يفرض ساعات عمل طويلة، إرهاقًا شديدًا، ونقصًا في الراحة دون حماية حقيقية للأطباء.
إصلاح نظام المناوبات أصبح ضرورة عاجلة.
رحمها الله و أسكنها جنة الفردوس الأعلى وألهم أهلها الصبر.

🔹 1-في بلاصة الشاي يوميا ممكن نمدوه فقط بين الفينة و الأخرى (يادرا الفينة 😎 )🔸 2-في بلاصة السيرو تاع الرقاد ولفيه روتين...
05/05/2026

🔹 1-في بلاصة الشاي يوميا ممكن نمدوه فقط بين الفينة و الأخرى (يادرا الفينة 😎 )
🔸 2-في بلاصة السيرو تاع الرقاد ولفيه روتين النوم.
🔹 3-في بلاصة الطالك ديري كريمة الحفاظ الخاصة ببشرة طفلك.
🔸 4-في بلاصة اللانجات ديري ماء دافي و صابون طرف(على حسب البشرة) و نشفيله مليح بمنشفة قطنية ناعمة.
🔹 5-في بلاصة الشاشات شريله ألعاب تنمية الذكاء مونتيسوري و غيرها ،رسم ،رياضة ،تعلم مهارات...
🔸 6-في بلاصة المشاية خليه يحبي ويتعلم يوقف و يرمي الخطوة ويطور عضلاته بصفة طبيعية .
🔹 7-في بلاصة قلادة العنبر و الجال المخدر دلكيله اللثة بكدادات باردة أو ورقة نعناع خضراء أو أدوية خالية من المخدر يكتبهالك طبيبك
🔸 8-في بلاصة الكونونتيج نظفيله أذنه بقطعة قماش ناعمة مع سيروم سالي مسحي فقط من الخارج و خلف الأذن
🔹 9-في بلاصة الشيبس اعطيه الفشار (فوق 4 سنوات)
🔸 10-في بلاصة البوس في الفم راه عندك كيلو تاع خدود و بوس على روحك
🔹 11-في بلاصة البسكويت اخدميله فينڨر فود بالفواكه
🔸 12-في بلاصة التدخين دير السواك خير لك
🔹 13-في بلاصة الحنة في السرة نقيها بالسيروم أو دوا لحمر وخلاص
🔸 14-في بلاصة الضرب على الوجه اضرب في الكرش 👊 (راني نضحك طبعا نعرفكم ڨاع تولولي مايك طايزون،الضرب ممنوع)
🔹 15-في بلاصة هز الرضيع بشدة إذا هبلك بالبكاء بسبب المغص اقلبه وحط يدك على كرشه وأنت رافده.
🔸 16-في بلاصة تغطيه بدرا أو كوفيرطة لبسيه gigoteuse .
🔹 17-في بلاصة الدوتنيغريس على الحروق بمجرد ينحرق حط المكان تخت السبالة و الماء بارد لمدة 10 دقائق ودير بومادة الحروق كامل تعرفوها و ديه للسبيطار.
🔸 18-في بلاصة القهوة على الجرح لازم تعقيم و خياطة و مراهم.
🔹 19-في بلاصة أنك تقييه إذا شرب جافيل اديه للسبيطار ما دير والو في الدار لازم نديرو التيو و نشوفو الحروق الداخلية
🔸 20- أصعب موقف ممكن تطيح فيه هو تكون ضيف عند الناس وتتودرلهم حاجة غالية وتسمعهم يقولو "هذي جامي صراتلنا!" تحس كي شغل قالولك يا واحد السراق بطريقة مؤدبة!

كتبه

اليوم نبرّد قلبي في هذا المنشور 😃 🔹1-ممنوع السيرو تاع الرڨاد. 🔸2-ممنوع الطالك. 🔹3-ممنوع اللانجات. 🔸4-ممنوع الشاشات. 🔹5-م...
04/05/2026

اليوم نبرّد قلبي في هذا المنشور 😃

🔹1-ممنوع السيرو تاع الرڨاد.
🔸2-ممنوع الطالك.
🔹3-ممنوع اللانجات.
🔸4-ممنوع الشاشات.
🔹5-ممنوع المشاية.
🔸6-ممنوع قلادة العنبر📿.
🔹7-ممنوع كتونتيج في الاذن أو السرة أو فتحة الشرج 😒
🔸8-ممنوع الشيبس ومشتقاته.
🔹9-ممنوع البوس في الفم😗 .
🔸10-ممنوع الشاي🫖 لاصحاب فقر الدم بنقص الحديد.
🔹11-ممنوع العسل🍯 قبل عام.
🔸12-ممنوع البسكويت🍪 قبل عام.
🔹13-ممنوع تدخن 🚬 بجنب أولادك.
🔸14-ممنوع الحنة في السرة.
🔹15-ممنوع الضرب في الوجه👊 .
🔸16-ممنوع الجال المخدر للتسنين.
🔹17-ممنوع توقيف البخاخ بدون طبيب.
🔸18-ممنوع تغيير الحليب بدون طبيب.
🔹19-ممنوع فقد الأمل والله موجود ❤️.
🔸20- ممنوع هز الرضيع بشدة باش يسكت من البكاء تسببله نريف في المخ.
🔹 21-ممنوع وضع ألعاب أو مخدة أو غطاء بجانبه على السرير وعدم تثبيت اللحاف لي يرقد عليه جيدا لخطر الإختناق بها ليلا.
🔸 22- ممنوع الأم ترضع وهي مستلقية خاصة إذا كان مولود جديد و الأم كانت مرهقة .
🔹 23-ممنوع نوم الرضيع غي الاشهر الأولى على بطنه.
🔸 24-ممنوع الدونتيفريس على الحروق.
🔹 25- ممنوع القهوة على الجرح باش يبرا لازم بالدوا كما قال الشاعر.
🔸 26-ممنوع دخل صباعك في فم الطفل إذا شرق بكاش حاجة صلبة .
🔹 27- ممنوع تقيي الطفل أو تشربه حليب أو أي شي إذا شرب جافيل مركز أو مادة أخرى حارقة.
🔸 28- ممنوع تمد الجيفان و كل مضادات الالتهاب إذا ولدك عنده بوشوكة
🔹 29-ممنوع تمد الخبز للرضيع قبل سنة يقدر يشرق به .
🔸 30-بعض الناس لي تعلق بالسب و أمور سلبية واحد يقولي ماراكش شباب ولآخر يقولي لحيتك طويلة تقول راني جاي نخطب ! هو أصلا الشيء الوحيد لي عنده إيجابي في حياته هو زمرة الدم ..على كل حال تقنع دونالد ترامب يدخل للإسلام وماتقنعش هذا النوع بالمعلومة الطبية أو الأخلاق الحميدة وتصبحو بخير ❤️

كتبه #مزوارعبدالرحيم

مين تدير تحاليل بزوج ملاين وتقعد تدعي في ربي مانقولكش مافيهم والو
04/05/2026

مين تدير تحاليل بزوج ملاين وتقعد تدعي في ربي مانقولكش مافيهم والو

Adresse

X465+43M
Mostaganem
27000

Heures d'ouverture

Lundi 08:30 - 16:00
19:00 - 22:00
Mardi 08:30 - 16:00
19:00 - 22:00
Mercredi 08:30 - 16:00
19:00 - 22:00
Jeudi 08:30 - 16:00
19:00 - 22:00
Vendredi 10:00 - 12:00
Samedi 08:30 - 16:00
19:00 - 22:00
Dimanche 08:30 - 16:00
19:00 - 22:00

Téléphone

+213697272128

Site Web

Notifications

Soyez le premier à savoir et laissez-nous vous envoyer un courriel lorsque طبيب الأطفال د. مزوار عبد الرحيم مستغانم dr. mezouar Pédiatre mostaganem publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager

Type