طبيب الأطفال د. مزوار عبد الرحيم مستغانم dr. mezouar Pédiatre mostaganem

طبيب الأطفال د. مزوار عبد الرحيم مستغانم dr. mezouar Pédiatre mostaganem صفحة طبية نقدم فيها نصائح و توجيهات حول كل ما يخص صحة الطفل 👶👨‍👩‍👧‍👧
(4)

🔸 1-سي با نورمال رضيع صغير توكليه الهريسة 🌶️ لأن هذي من عاداتكم باش يكبر لسانه حار ويعرف يهدر (حالة من العيادة)🔹 2-سي با...
27/04/2026

🔸 1-سي با نورمال رضيع صغير توكليه الهريسة 🌶️ لأن هذي من عاداتكم باش يكبر لسانه حار ويعرف يهدر (حالة من العيادة)
🔹 2-سي با نورمال ابنك تطلعله الحمى شوية تروح ديراكت ليرجونص تقولهم ديرولي ابرة تاع الحمى.
🔸 3-سي با نورمال ولدك فيه بوصفير ناتج عن انسداد وتلف في الكبد وأنت تقولي نقطعله يريح!
🔹 4-سي با نورمال ولدك يرقد الليل كامل فاتح فمه و معذب في النوم بالشخير وكوابيس و التهابات الحلق و الأذن متكررة وقالك طبيب لازم إزالة لحميات الأنف و أنت تقوله لا مانحيهمش.
🔸 5-سي با نورمال تفوت السرة 15 يوم و ما تطيرش و تبقى تسيل، ممكن فيها لحمية زائدة لازم إزالتها.
🔹 6-سي با نورمال تخلي ولدك المسكين يعاني بشدة من ضيق التنفس و مغبون في حياته اليومية فقط لأنك خايف من البخاخ!
🔸 7-سي با نورمال تشربي ولدك ماء الارز أو زيت زيتون وعمره أقل من أربعة أشهر.
🔹 8-سي با نورمال ولدك فات العام و مازلتي خايفة عليه من التوابل و تميكسيله في الأكل!
🔸 9-سي بانورمال راك غافل على ولادك ومخليه بدون مراقبة ...انتبه جيدا ابنك في البيت قد يختلف كثيرا عن ابنك خارج البيت.
🔹 10-الناس راهي تسافر وتصرف أموال كبيرة باش تبدل جو...احمد ربي أنت غي قاعد في دارك و الجو هو لي يتبدل عليك ! صحا فهموني في البندير علاش يبعوه غير عند العشاب 🤔

كتبه

26/04/2026

توضيح :
لا أريد أن أنافس أحدا ، لا أتمنى أن أكون أفضل من أي أحد و لا أسعى أن أكون "نمبر وان" ...هدفي فقط نشر الوعي بين الأمهات والآباء بالطريقة التي أراها مناسبة .

26/04/2026

قصيدة في نص الليالي

هذي نصايح للأمهات🔸🔹🔸وجميع واحد عنده فضول
دايما تابعي نمو الطفل🔸🔹🔸أعني الميزان و كذلك الطول
نوعي الأكل في كل مرة 🔸🔹🔸اعطيه اللحم و زيديه الفول
ماتقوليش إذا ما كملش الصحن🔸🔹🔸غادي؛ تهبلني ها زيد كول
عليك بالنظافة في بيتك والمطبخ 🔹🔸🔹كل شي يلمع نظيف و مغسول
الولد في المرحاض لازم يقعد🔸🔹🔸والبنت دايما تتنزه مالبول
فوق ثلث سنين مازال بلاكوش🔹🔸🔹ومش مطهر راه مشي معقول
كثير العناد و يبكي بزاف 🔹🔸🔹أنت قلشته والهاتف محمول
اعطه من وقتك اهتمام الأب 🔸🔹🔸جدا مهم مش دايما مشغول
خرجه معاك يتلاقى بالناس🔹🔸🔹يشري مالسوق ويحوس في المول
تهلا في الزوجة قدام الأولاد🔹🔸🔹وفي الأوقات الخاصة ممنوع الدخول
علميهم يقولو الكلام الجميل🔸🔹🔸ويناديك ماما مش ديراكت بتول
الله يرزقكم فرحة في الحياة🔸🔹🔸وتروحو تحوسو في إسطنبول

كتبه

🔹- 5 سنوات نورمالمو راه يتعلم يلبس قشه وحده.🔸- 4 أشهر نورمالمو راه يشد راسه.🔹- 6 أشهر نورمالمو راه ياكل كل شي خضر، فواك...
25/04/2026

🔹- 5 سنوات نورمالمو راه يتعلم يلبس قشه وحده.
🔸- 4 أشهر نورمالمو راه يشد راسه.
🔹- 6 أشهر نورمالمو راه ياكل كل شي خضر، فواكه، سمك، دجاج، لحم، بيض...
🔹- 6 سنوات نورمالمو راه بدا يتعلم يدوش🚿 وحده تحت المراقبة طبعا .
🔸- 10 أشهر نورمالمو راه يجمّع وحده.
🔹-بين 18-24شهر نورمالمو راه يمشي وحده.
🔸- 3 سنوات نورمالمو يقول جملة قصيرة.
🔹- 5 سنوات نورمالمو مايبولش على روحه.
🔸- 7 سنوات نورمالمو راه بدا يتعلم يصلي 🕌😍.
🔹- منطقيا الكلاكصون تاع السيارة لواش ينفع؟ يحذرك من الخطر صح ؟ في عرسك أكثر من 30 سيارة تكلاكصوني عليك وأنت لا خبر قاعد تضحك و ترقص ..ها بصحتك

كتبه

قصيدة في خاطر ڨاع لي نوفو ني و الرضع و الأطفال 😅 ‎بعدما عجبتكم قصيدة الأكل 🔹🔸🔹و قلتولي زيدلنا إثنانهذي نصايح لكل طفل 🔹🔸...
23/04/2026

قصيدة في خاطر ڨاع لي نوفو ني و الرضع و الأطفال 😅

‎بعدما عجبتكم قصيدة الأكل 🔹🔸🔹و قلتولي زيدلنا إثنان
هذي نصايح لكل طفل 🔹🔸🔹ضعيف الشهية و ديما شبعان
ماتوكليهش بين وجبة ووجبة🔹🔸🔹اصبري عليه حتى يولي جيعان
لا للخبز والسقايط بلا وقت🔹🔸🔹و الفريجيدار يفتحله البيبان
في بلاصة الشيبس مديله الفشار 🔹🔸🔹وبدلي الحلوى بالزبيب و الرمّان
وليموناد راهي تهلك الواحد 🔹🔸🔹 مع العصير الطبيعي ياحسراه وين تبان
احرصي على البروتين في السمك و اللحوم 🔹🔸🔹 و قبلهم الدجاج و بيض السمّان
الحلبة مليحة مع العسل الحرة 🔹🔸🔹ترفع الشهية و صحة الابدان
وزيت زيتون مع البيض في الصباح 🔹🔸🔹 مش خير من القهوة والنهار كامل عيان
زوقيله الماكلة بطريقة تعجبه🔹🔸🔹وديري المكسرات بالفاكية و الشوفان
إذا عنده مشاكل في جهازه الهضمي 🔹🔸🔹كإسهال مزمن أو مصرانه فنيان
ومدة طويلة وهو فاقد للشهية 🔹🔸🔹وجهه يبان مصفار و تعبان
هنا لازم نديرو تحليل الدم 🔹🔸🔹ماتديرهش تندم و أنت لي خسران
أهم حاجة إذن في هذه الحالة🔹🔸🔹نتابعوله الطول و كذلك الميزان
ونعالجو كل مشكل من جذوره 🔸🔹🔸سواء فقر دم أو حساسية المصران
أخيرا نصيحة لكل من يتابعني🔹🔸🔹وكل من قالي كلامك
راه إدمان
ماتكونش كي الطبسي يطيح يتكسر🔹🔸🔹كون كي الكوكوط تنفجر من الغليان
وطبعا الصبر مفتاح السعادة🔹🔸🔹مش صباح ربي تصبح زعفان
و تحية ليك أينما كنت 🔹🔸🔹من شرق تبسة لغرب تلمسان

كتبه

يومياتي في العيادة🔹 1-رضيع يبكي قاتلهم الجدة غي الاسنان اكتشفت بعد الفحص أن عنده كسر في الجمجمة و نزيف داخلي (جده طيحه و...
23/04/2026

يومياتي في العيادة

🔹 1-رضيع يبكي قاتلهم الجدة غي الاسنان اكتشفت بعد الفحص أن عنده كسر في الجمجمة و نزيف داخلي (جده طيحه و خاف يهدر)
🔸 2-طفل في 3 أيام يتقيأ ووجع في البطن و فاشل قالوله ميكروب و شرب مضادات حيوية بعد الفحص اكتشفنا أن السبب بداية مرض السكرى (السكر في الدم أكثر من 4 غرامات)
🔹 3-رضيع كالي شارب نظيف ،و يبكي قريب يهبل و السبب شعرة ملتفة حول عضوه .
🔸 4-رضيع يبكي بدون توقف قاتلهم الجدة غي لي غاز و الليل السبب كسر في عظم الفخذ.
🔹 5-رضيع في 10 أيام يتقيأ جربوله 5 أنواع حليب بدون جدوى المشكل" تضيق البواب" ارتاح نهائيا بعد عملية جراحية .
🔸 6-طفل تنبعث رائحة كريهة مين تقرب لوجهه ،الأم قالت هذو الحلاقك مابغاش يريحلي في 15 يوم ،بعد الفحص لقيت نيبلية صغيرة متعفنة في أنفه.
🔹 7-رضيع جاني من لندن عنده حساسية جلدية قوية في معظم جسمه ويتابع عليها منذ عدة أشهر ياخذ فقط كريمات قالوله لكزيما وخلاص، بعد الفحص تبين أنها حساسية بروتين حليب البقر غيرت له الحليب بضعة أيام ارتاح بصفة كاملة ولا يشعل 😍
🔸 8-طفل عنده تأخر ذهني قالولها خلقة ربي وقاعد هكاك بعد التحليل ظهر خمول في الغدة الدرقية بعد العلاج بدأ يتحسن تدريجيا
🔹 9-رضيع منذ الولادة وهو يدير حركات غير طبيعية بعينيه و يديه والناس لي كبار لي عندهم حكمة وقاريين الدنيا قالولها هذو غي خوته يلعبو معه وهو يظل يردح قدامهم بعد الفحص وطلب تخطيط الدماغ تبين أنه يعاني من متلازمة واست نوع خطير من الصرع الذي يسبب تأخر ذهني و حركي للأسف حتى تطفرت.
🔸 10-نهار عرسك إذا طاح المطر يقولو العريس يبنقب من الكوكوت (البرمة) وهي تطيب ، هذي معلومة خاطئة بدليل أنا عندي هواية نظل في الكوزينة مدخل راسي في هذيك الطنجرة نذوق ونمد رايي 😅 وفي عرسي الشمس كانت 45 درجة.

كتبه

23/04/2026

منشور عاجل مؤقت
جماعة المتابعين لي كنتو في المطعم اليوم و شفتوني كومونديت 13 حبة محاجب حاميين حارين استرو ما ستر الله ...غي البارح كنت في لابيشري الله الله علاش ماشفتونيش علاش! تتلاقوني غير مين نسخف على كاران و لا سفنج 😡

🔹1-خفتي يمرضلك بميكروب تاع البول؟ ختنيه بكري وعلميه مايشدش البول مين تجيه الرغبة يروح المرحاض ولازم يقعد مايديرش واقف.🔸2...
22/04/2026

🔹1-خفتي يمرضلك بميكروب تاع البول؟ ختنيه بكري وعلميه مايشدش البول مين تجيه الرغبة يروح المرحاض ولازم يقعد مايديرش واقف.
🔸2-خفتي ينشف من الماء💦؟ شربيه الأملاح
🔹3-خفتيه يطيب من تحت؟ حبسي لانجات🙅 و اغسليله بالماء وصابون الطرف🧼 ونشفي ملييح🧻.
🔹4-خفتي يعواجو أسنانه و يمرض بالحُر كل مرة؟ اقلعيله السوسات ابتداء من الشهر الخامس ودايما حكيله لسانه بالكومبراس0.
🔸5-بغيت ولادك يخرجو صالحين؟ كن أنت صالحا🕌.
🔹6-بغيت ولادك يكبرو بصحة جيدة؟ دير متابعة دورية عند الطبيب 🧑‍⚕️حتى لو ما مرضوش.
🔸7-بغيت ولادك يريحو من كحة الحساسية حتى وراهم بالدوا؟ حبس الدخان 🚬.
🔹8- إذا تعرف وحدين متزوجين و مازال ماعندهمش الأطفال ماتبقاش في كل دورة تسقسي فيهم ها وينتا تجيبولنا البزوز..خليك في حالك من فضلك.
🔸9-بغيتي ولدك يكبر طبيعي وبصحة نفسية و جسدية جيدة؟ احرصي عليه وكوني صارمة..مشي يضرب 4 فيطاجو في النهار 🥤، يرقد على الواحدة تاع الصباح ويتفرج التليفون ب 4 سوايع مبعد تقولي ماله خرجلي مسخوط 😒.
🔹10-بغيت تدي المنشور و تنشره لتنفع الناس شكرا لك بارطاجيه كما هو لماذا تحذف إمضائي في الأسفل و تنسبه لنفسك؟
مرة شفت صفحة أخذ صاحبها أحد قصائدي ونسبها لنفسه دخلت للتعليقات من باب الفضول كاتبينله الله يبارك شاعر كبير و عليه الكلام..جاوبه هو قاله هذا من فضل ربي!
آه يا وحد الباندي

كتبه #مزوارعبدالرحيم

🔹1-بعض الجدات 🧓 لو تسقسيها على راجلها تقولها ماله الحاج راه فيه الحمى ولادياري ؟ كابابل تقولك راه يسنّن 🤦 يهديكم ربي يا...
21/04/2026

🔹1-بعض الجدات 🧓 لو تسقسيها على راجلها تقولها ماله الحاج راه فيه الحمى ولادياري ؟ كابابل تقولك راه يسنّن 🤦 يهديكم ربي يا جماعة مش كلش نحصلوه في الأسنان حتى يفوت الأوان.
🔸2-إذا قتلك ديري الدوا لمدة 7 أيام ما تحبسيهش بعد 3 أيام لأنه ريح غاية وراحتله الحمى! مبعد ترجعيلي على 7 أيام تقوليلي عاود سخن.
🔹3-حليب الأم فيه هرموناتك ،حليب الأم فيه المناعة، حليب الأم يتغير؛ اللي يرضعه في الصباح مش نفسه لي في الليل ولي يرضعه وأنت فرحانة مش نفسه وأنت زعفانه.. فيها عدة عوامل تساعد في تكوين الطفل جسديا و نفسيا، هاد الأمور ماتلقاهمش في بيبرون تاع بلاستيك.
🔸4-إذا رضيعك مرض بنزلة معوية و يتقيأ بزاف ماتعطيهش الماء راح يزيد يقييه كثريله الرضاعة الطبيعية بأوقات متقاربة و الأملاح بجرعة قليلة لكن متكررة .
🔹5-حذار بعد ما تسلكي من مرحلة المغص و التسنين وتفوت بسلام ،بعدها يبدا يمشي 👶 هنا تدخلي في مرحلة إبقائه على قيد الحياة🤦 (دروج، بالكون ،كهرباء...) .
🔸6-أنا تحيرني هذيك الأم لي قارية و حتى جامعية تخلي الطبيب وتسمع نصائح كارثية من واحد عنده مستوى سنة ثالثة وثلاثين إبتدائي.
🔹7-وإياك تعمر راسك بانتقادات الناس بخصوص أطفالك بزاف يقولولك نتمناولك الخير بصح مين يجيك يحسدوك عليه 😊.
🔸8-ماتحبسوش ولادكم في البيت بحجة خايفين عليهم شفتو الأطفال الأفارقة في الشوارع مايمرضوش بزاف مالڨري يظل بالحفى ومش لابس مليح لو ياكل خفاش مايصراله والو 🦇 لأن حياته في الزنقى يربي مناعة.
🔹9-هذيك الكياسة لي راكي مسكين تقلعيله الجلد بها في الدوش راه مشي وسخ ودود هذاك و إنما طبقة جلدية خارجية فقط، حكيله بكياسة ناعمة و غي بالشوية .
🔸10-يحيرني هذاك لي يسبك و مين تردله الكلام يقولك والله ماحسبتك هكذا !
علاش حسبتني راح نغنيلك النشيد الوطني مثلا 😏

كتبه

19/04/2026

إلى اللقاء 😔
ظروف خاصة دفعتني أن أكتب كلماتي الأخيرة هنا اليوم
أعلن رحيلي عنكم وكلي ألم و حسرة على فراقكم ولكنني وصلت إلى نقطة النهاية.
رسالتي الأخيرة أوجهها الى كل أصدقائي الذين لهم مكانة غالية في قلبي أشخاص لم أرهم ولكن تركوا أثرآ كبيرآ في نفسي وهناك أشخاص رائعون أحببتهم دون أن أراهم كانوا لي إخوة ولكن هي مراحل بحياتنا نرحل ونودع من نحب أتمنى أن أكون قد تركت بصمة طيبة لدى البعض منكم.
انتهت لحظاتي الجميلة بينكم كما ينتهي كل شيء جميل
في هذه الحياة بسرعة، أحببتكم أحببت تواجدي معكم أرجو أن تذكروني بالخير وإن كنت أسأت لأحد فليسامحني .
👇
👇
👇
👇
👇

نشارجي الهاتف برك راه قريب يطفى ونرجعلكم غدوا ان شاء الله

ليلة سعيدة

🔹1-الأم لي تصرخ على كل صغيرة و كبيرة تفقد مصداقيتها أمام أطفالها مع الوقت...خلي غضبك عزيز🔸2-الوحمة الدموية عادة تكون بد...
19/04/2026

🔹1-الأم لي تصرخ على كل صغيرة و كبيرة تفقد مصداقيتها أمام أطفالها مع الوقت...خلي غضبك عزيز
🔸2-الوحمة الدموية عادة تكون بدون خطورة (حسب موقعها) ويفضل بدء العلاج بين سن 5 أسابيع و 5 أشهر و قد تطول مدة العلاج ل 6 أشهر ومعظم الحالات تزول عند الكبر.
🔹3-عضة الفأر لا تحتاج لقاح داء الكلَب لأن الفأر لا ينقل هذا المرض(طبعا ينقل أمراض أخرى).
🔸4-وإياك تخلي ابنك يعاودلك واش شاف في دار الجيران👀 أو ينقلك أسرارهم.. من هنا تبدا التربية.
🔹5- الكثير من الأفعال تقوم بها الأمهات لأطفالها فقط على خاطر " واش يقولو علينا الناس" و هي أصلا ليست مقتنعة بها.. هذي ڨراف شوية.
🔸6-الصدمة النفسية للطفل قد تسبب له صداع، آلام المعدة، تعب مستمر، قضم الأظافر، تبول لا إرادي، اضطراب نوم..
🔹 7-لا تبرمج طفلك أنه لا يوجد إلا الدراسة في هذه الحياة! زيره باش يجتهد قدر استطاعته إذا ما قدرش لا يكلف الله نفسا إلا وسعها يدير تجارة و مين يكبر يولو يخدمو عنده لي عندهم ديبلوم 😅
🔸8- البيض🥚 نيء (اخضر) ممنوع حتى يبلغ 6 سنوات.
🔹9-إذا انتفخ موضع التلقيح ديريله كمادات باردة لمدة عشر دقائق عدة مرات في اليوم وماندلكوش المكان ممكن تمدي براسيتامول على الألم.
🔸10-مين تحب تحكيلي قصة وتقولي بدون ذكر الأسماء غير خلي حكايتك عندك أنا الأسماء يهموني أكثر من القصة 👀 .

كتبه

صباح الخير الدنيا ماتستاهلش أنك تصبح زعفان وفاقد الأمل، صح أحيانا تعطيك ضربات موجعة لكن في طياتها الفرج و الفرح، عندما ت...
17/04/2026

صباح الخير
الدنيا ماتستاهلش أنك تصبح زعفان وفاقد الأمل، صح أحيانا تعطيك ضربات موجعة لكن في طياتها الفرج و الفرح، عندما ترتكب خطأ ستتعلم و العلم مليح لذلك زيد ارتكب الأخطاء باش تتعلم أكثر وأكثر 😅 المهم والأهم لا تبتعد عن دينك و تهلا في عائلتك و المخلوقة لي عندك 👰 ودير مجهودك في تربية أولادك وخطيك من التربية الحديثة و الكلام الفارغ هذاك، اعطيهم كل الحب لي يحتاجوه و في نفس الوقت لازم الصرامة و الاحترام نظرة ثم كلمة ثم طريحة 😅
هذي رسالة تفاؤل بانتلي صباح لله وراني نشوف في روحي وليت تاني دكتور في الحياة ياو 😎😂
بالمناسبة حبيت نقولكم أني شفت عدة صفحات ومتابعيها استنتجت أن عندي أفضل متابعين على الإطلاق أذكياء،🌹محترمين وراقيين ❤️ربي يخليكم ليا ، من كثرة محبتي لكم لو تقولولي ارمي روحك من الريدشوصي نرمي روحي 🔥🙃


كتبه

Adresse

X465+43M
Mostaganem
27000

Heures d'ouverture

Lundi 08:30 - 16:00
19:00 - 22:00
Mardi 08:30 - 16:00
19:00 - 22:00
Mercredi 08:30 - 16:00
19:00 - 22:00
Jeudi 08:30 - 16:00
19:00 - 22:00
Vendredi 10:00 - 12:00
Samedi 08:30 - 16:00
19:00 - 22:00
Dimanche 08:30 - 16:00
19:00 - 22:00

Téléphone

+213697272128

Site Web

Notifications

Soyez le premier à savoir et laissez-nous vous envoyer un courriel lorsque طبيب الأطفال د. مزوار عبد الرحيم مستغانم dr. mezouar Pédiatre mostaganem publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager

Type