22/04/2025
أول شيء راح نتكلم من ناحية علم الأمراض و التغذية على آلية لي يأثر بها السحر المأكول على الجسم ، من بعد أتطرق للموضوع من ناحية اجتماعية.
علميا كيفاش يقدر السحر المأكول يسببلك المرض ، مرض السرطان مثلا ولي الاغلبية تاع الجزائريين نسمعوهم يقولك جاني سرطان بسبب السحر.
نتكلم على الآلية المرضية تاع سرطان : مرض السرطان هو عبارة عن انتشار خلايا سرطانية في جسم ، واش هوما هذوا خلايا و كيفاش يجو
جسم تاعنا فيه خلايا بزاف تشكل جسم تاعنا و تقوم بعمليات حيوية تاعو ، جسم تاعنا كيما المصنع في عمال، مراقبين...الخ.... خلايا هذه كي تموت الجسم يصنع خلايا اخرى تخلفها ، بصح مصنع هذا كيما قلت يعمل بصرامة و تحت رقابة ، يعني عندو عدد تاع خلايا معين يصنعه مالازمش يفوت هذا العدد
في حالة السرطان ، يولي جسم يصنع خلايا بكثرة فوق لازم علاه! لانو كيما قلتلكم في اول عملية تخليق خلايا هذه تكون مراقبة من خلال مثبطات.... و مثبطات هذه شكون مسؤول على انتاجها ؟ مسؤول على انتاجها جينات كاينة في حمض نووي تاعنا ، خطرات جينات هذه تاعنا تتعرض لعوامل خارجية كيما أشعة ، ماكلة كيما كحول مثلا بعض سموم ... أيا هذه عوامل تخسرلنا جينات هذو أيا يولو يخرجولنا عمال لي قلت هوما مسؤولين على عملية تثبيط و مراقبة انتاج خلايا ، تخرجهملنا مش نورمال مايخدموش مليح يولو يشوفو خلايا تنقسم بدون توقف بصح مايهدروش معاها للأسف
خلايا هذيك تكثر في منطقة ما تولينا ورم ، من بعد خلايا تاع ورم هذيك تنتقل عبر دم و تروح اماكن اخرى و تزيد تتكاثر و هكا يلقى جسم روحو عندو فائض خلايا مش قادر يتحكم فيها ، و هذاا شيء ينهك الاجهزة المسؤولة عن الوظائف الحيوية في الجسم
هذا هو الشرح المبسط تاع سرطان .
دوك نحاولو نفهمو علاه سحر يقدر يدير سرطان ، مش قلتلكم بلي عوامل خارجية كي تاثر على حمض نووي ثم يولي عنا مرض سرطان؟
إذا المشعوذين هذه هي طريقتهم في افساد حياة الناس ، حقيقة ماعندهم لا علاقة مع عالم سفلي لا قوة ميتافيزيقية لا والو ، يستخدمو مواد سامة يصنعو بها خلطات ، مواد سامة هذيك كي تدخل جسم الانسان تسببلو أمراض ، و شخص هذا كي يمشي الأطباء ربما يمشيلهم في وقت متأخر وين مايقدروش يعاونوه ولا تشخيص يكون صعيب لانو معطيات ناقصة .
مثال كاين وحد صخرة كلسية يستخدموها مشعوذين بزاف يسموها #هبالة هي عبارة عن (كوبالت كيلسيت ) و كوبالت هذا إذا تناولناه ولا تم استنشاق تاعو بكميات كبيرة يقدر يدير لنا تسمم و أمراض وخيمة كيما اعتلال عضلة القلب الأمراض التنفسية ....
و هذه معادن بحد ذاتها تقدر تكون مسبب لمرض السرطان.
فهمتو كيفاش حتى السحر المأكول يمرض الانسان ؟!
تخيل معايا نجي أنا شخص عادي مانيش مشعوذ نديرلك خليط فيه بعض المعادن السامة على الجسم ، نزيدلو رأس أفعى مع شوية دم حيوانات و ذيل فأر و القليل من شعر و عظام مطحونة تعود لجثة ! و نديرلك خليط هذا يوميا في الاكل ؟ تمرض ولا ماتمرضش أكيد صحتك تهلك لاني عطيتلك مزيج من سموم و ميكروبات !
فهمتو دوكا الآلية لي يأثر بها السحر على الصحة ! من ناحية العلمية
نزيدلكم مثال آخر ، في احدى الولايات لقاو مشعوذ عندو كمية تاع أدوية مهلوسة (بريڨابالين ، و ادوية الاجهاض ).
نقولو ادوية مهلوسة يبيعها مثلا بطريقة غير شرعية و ادوية الاجهاض ؟! واش يدير بيها!؟
الحقيقة الأدوية هذه هو يستعملها باش يمرض الناس ، لما يجو عندو مرضى نفوس باش يسحرو اشخاص و ياذوهم بدون رحمة هو أكيد يصنعلهم خليط من هذه ادوية و يعطيهالهم و هوما أكيد يديروها في الاكل لشخص لي حابين ياذوه ، و هكا قادر وحدة تكون حامل و يبداو يصراولها مشاكل في حمل تاعها بسبب ادوية الاجهاض ، و كي تروح دير فحص طبيب مايلقاش تشخيص مناسب لانو حتى واحد معلابالو انو ضحية هذه راهي تناولت ادوية اجهاض
و ضحية اخرى يهبل و يمرض بسبب ادوية الاعصاب... و كذلك الأطباء مايلقاوش تشخيص لانو حتى واحد معلابالو بلي شخص هذا واش تناول .
و يبقاو ضحايا هذوا مساكين لعبة بين دجال المشعوذ لي عطالهم أكل سام ، فيه مواد سامة مما سبق تكلمت عليه و دجال آخر يوهمهم انو الحل عندو ولازم يفك سحرهم باش يبراو.
خلاصة : مشعوذين هذوا ماعندهم لا قدرة ميتافيزيقية لا يتحكموا في جن لا والوا ! ولو قلنا العكس هنا رانا نقولو المشعوذ و شياطين راهم اقوى من ربي سبحانو!؟
ربي قال لن يصيبكم الا ما كتب الله لكم !
كيفاش نقتنع انو ربي كلي القوة و القدرة يشوف في شخص مشعوذ يسحر و يمرض في شخص بريء ، و مايديرلو والو و مايمنعش هذا الشيء رغم انو هو الوحيد القادر على ذلك مدام الامر هذا روحي و غيبي أكيد الله وحدو لي يقدر يتحكم فيه؟!
هذه هي حقيقة السحر يا خاوتي ، السحر المأكول ما هو الا عبارة عن سموم مختلطة لا هو عمل من جن ولا شيطان .
كونو واعيين ماتكلوش من عند أي شخص ، اي أعراض غريبة ظهرت عليكم لازم تبعو عند الطبيب و تعالجو.
ماتدوش بانفسكم الى التهلكة ، و تصدقو خرافات ، لانو المشعوذ هذا هو عمل تاعو يهلك صحة جسدية تاع انسان بسموم و يهلكلو صحتو نفسية بالخرافات
ديرو ثقة في ربي اول شيء هو قادر على كل شيء و كفى تصديقا للخرافات ، كل شيء ليه تفسير علمي و شيء لي مافسروش العلم اليوم راح يجي نهار و يتفسر.
عادت الناس تهلك صحتها النفسية بموضوع السحر هذا و تلقى ناس تخلي طبيب و علم و تجري من مشعوذ الى دجال باش ينحيلها شيء وهمي مكانش منو حتى يوصلو لمرحلة الجنون
اي انسان راهو حاس انو عندو هذا الفكر ولا عندو شخص من عائلة عندو هذا الفكر أخي ننصحك في وجه الله روح لطبيب الامراض العقلية و العصبية في اقرب وقت ، قبل ما تتازم الحالة تاعك.
و أي شخص مزال عندو ايمان بسحر هذا !
انا طرحت عليك سؤال هل الله ظالم حتى يسمح للشياطين و جن تآذي انسان بريء و هو قادر يوقفهم لكنه يبقى يتفرج و يخلي انسان هذاك يموت بسحر هذا؟!
