Riad’s Corner

Riad’s Corner ستجد نفسك هنا ❤️

16/11/2024

عام ديجا محطيت والو هنا ياه

10/11/2023

"وَعَصَيْتُم مِّن بَعْدِ مَا أَرَاكُم مَّا تُحِبُّونَ"

الآية هاذي من سورة آل عمران ، كل ما نقراها نحس بالذنب على كل حاجة مش مليحة درتها في حياتي هذا انا لي ربي رازقني بآلاف النعم ، هذا أنا لي شحال من مرة نفرح بسبة حوايج كنت نقول مستحيل يتحققولي ، فعلا تحسها نوع من العتب ، النوع لي يخلي ضميرك يأنبك بشدَّة ..

27/10/2023

ليلة الأحزاب انقطعت الأخبار فأرسل النّبي صلى الله عليه وسلم حذيفة ليأتيه بالخبر .. تلك اللّيلة كانت الفارقة في نصر المؤمنين

فاللهم خبر حذيفة..

27/10/2023

How is it im supposed to treat people’s pain while i can’t treat my own !

20/10/2023

سقساني بنادم وحد النهار قالي كيفاه نقدر ننسى ذكريات أليمة صراتلي ، جيت نجاوبو بالجواب لي حافظو ولي أي واحد يقدر يقولولك .. مبعد قلت نقولو الحقيقة البشعة .

Eventually u will have much worse memories and you will forget about the old onces

وفالنهاية رح يولي عندك ذكريات أكثر سوءًا من هذوك لي راهم عندك ديجا هكاك رح تنسا الذكريات لقديمة هذيك .

01/10/2023

مكانش انسان اجتماعي ويقدر يخالط الناس كامل كيفي انا ، ومكانش واحد معندوش صحاب ووحيد و وين يروح يقعد وحدو كيفي انا .. خليط عجيب بصح عاجبني ❤️

29/09/2023

ولابُوبال علاه داروها ؟

Use it .

26/09/2023

المشكل تع الاكتئاب أنو كي تبدا تمشي بالدوا ماكش رح تقدر تحبس بسهولة ، يكذب عليك أنك تحبس الدوا هذاك أصعب حاجة فالدنيا ككل ..ربي يعفو عليكم يا لي مش معنيين بالمنشور ، واحمدو ربي صباح وعشية على أنو نجَّاكم من الابتلاء هذا ..

11/09/2023

صدقني راني عارف بلي راهي داخلك حرب مكانش لي راهو شايفها من غيرك.. بصح ربي و ربك راهو شايفها و شايفها أحسن مني و منك وحيصلحلك امورك كامل، من غير ما تهدر حتى ❤

11/09/2023

نحب الناس اللي حبهم ساهل..
هذوك الناس لي ميعقدوش لحوايج وميسمطوهالكش و مش اي حاجة تزعفهم، الناس السهلة، اللي بيحبوا يمدو احسن وش عندهم للناس، مايبخلوش بمشاعرهم و ديما يعبروا عليها بكافة الطرق، نحب الناس اللي نيتهم ينشرو الايجابية ، لي الهدرة تاهم تكوراجيك مش تزيد عليك، و اللي أول ما تشوف فيهم يتبسموا و يحسسوك بلي راهم فرحانين بوجودك.

والله يا خاوتي محتاجين نسهلوها على بعضانا، الحياة راهي أسهل من كل العقد لي رانا نعقدو فيهم ❤

11/09/2023

" كيف أتعافى بعد الانفصال؟ "

الافتراق ولا الانفصال على الانسان لي بغاه قلبك، راهو من أقسى التجارب لي بزاف عباد فاتو عليها فحياتهم العاطفية، و تخطي الفشل تع العلاقات هاذو مهوش حاجة ساهلة مهما وش كانت تكون السبة نتاع فشلها.. كيما كاين بزاف عباد يقدرو يفوتو التجربة هاذي بسلام، كاين عباد ميقدروش يتجاوزوها و يبقا الالم هذاك عايش معاهم و ياكل فيهم من الداخل، وشنو السبة تاع الشي هذا كامل؟

هي شوف وين تروح رح تلقا مجموعة تع نصائح يتعاودو كيما مثلا اتعلم من الغلطة تاعك، عمر وقتك، مد شونس لكاش بنادم جديد و و.. لالا منيش رح نضعلكم وقتكم فمعاودة تع هدرة شبعتو منها.. خاطر كي تفوت منك و تكون مرتبط بعنق بالبنادم هذاك، المعاناة هذيك تقدر تكون مدمرة لحياتك.. بصح قبل ما نكملو المقالة هاذي.. اذا مكانتش عندك النية باه تنسا غير مكالاه تكمل الستاتي، هاني قلتلك اذا معندكش النية حا تضيع وقتك برك في باطل ومش حا تستفاد..

مزالك تقرا؟ سما ناوي صح تنسى و تسترجع حياتك؟ ،، مالا ركز و تبع معايا مليح مليح..

" راندي غونثر " هاذي طبيبة نفسية و مستشارة زواج، تخدم فجنوب كاليفورنيا فالماريكان، فالمسيرة تاعها لي دامت 40 سنة، خدمت كتر من 130 الف ساعة وجه لوجه مع الأفراد و الأزواج.. تقول غانثر بلي التخلي على الناس اذا تكرر فالعلاقات، فالغالب الناس رح يحكمو عليهم بلي راهو هوما مسؤولين على عدم النجاح تع علاقاتهم، بمعنى اذا كنت تحس بلي معندكش زهر فالعلاقات وجامي كملتلك كاش وحدة منهن، الناس يمسحو المو.س فيك نتا، وهاذ الشي راهو غالط في حالات بزاف، هذوك الناس هوما لي تلقاهم يحاولو بكامل الطرق باه ينجو علاقاتهم، وكي يسمحو فيهم يطيحو فحالة تع ارتباك و تتخلطلهم و يدخلو فحزن شديد..

1- كاين مقال لموقع " سيكولوجي توداي " ( psychology today)، حطو فيه أكثر الخصائص و السلوكات تع العباد لي ميقدروش يتجاوزو فقدان للشريك تاعهم:
( بمعنى اذا راك في علاقة و لقيت في روحك وحدة ولا كامل هاذ الخصائص، اك حا تسوفري كون تتفارق مع لبنادم لي راك معاه.)

- الشعور بانعدام الامان: حاجة طبيعية أنو بنادم ميحسش بالامان كي يحس بالتهديد تع أنو يخسر حاجة ولا بنادم عزيز عليهم ويحبوه، و لازم وقت باه تقدر تتجاوز المحنة هذيك، بصح كاين عباد ميقدروش يرجعو التوازن كي يسمح فيهم الشريك تاعهم، يحسو بعجز و يأس باينين خلاه، و مش حيكونو قادرين يعاودو يديرو كونفيونس فالحب مرة خلاف.

- الشك والخوف: اذا حسو الناس بلي سيبون لقاو العلاقة المثالية، مبعد البنادم المثالي هذيك يجبد روحو، أيا يروحلهم الامل أنهم يعاودو يلقاو نفس الحب الهايل هذاك، العباد لي يصرالهم هك و يصرا التخلي من جهة وحدة ممبعد كون يلقاو عبد خلاف يستاهل انو يتحب صح، يخافو انو تتعاودلهم التجربة لولة.

-الخوف من الوحدة: اذا واحد من الطرفين خايف انو مش حا يلقا بنادم كيما لي راهو معاه، تلقاه يسمح في حقو و يتساهل مع الاهمال و الاساءة و الخديعة، غير باه ميتفارقوش مع هذاك لبنادم... و اذا البنادم لي راهم معاه قعد يستثمر فالمخاوف هذيك، رح تصرا حاجة من بين زوج: يا اما رح يحس الذنب تع وش راهو مداير فيك هايا يجبد روحو، يا اما يبقا معاك و في نفس الوقت رح يخدعك.

- الاعتماد فقط على الشريك لتقدير الذات: راك فالدونجي كي تولي تهتم غير فالراي تع لبنادم هذاك فيك، اذا قالك راك شباب سما شباب و اذا قالك جيت تعيي تعا.ف روحك.. هكذا راك درتو المحدد الوحيد للقيمة تاعك، و اذا اختار البنادم هذاك ممبعد يسمح فيك، رح تولي عند صورة ذاتية على روحك بلي نتا لي فيك النقص و نتا لي مش مليح، وقادر حتى ديرلو اعذار و تحصل كلش في روحك..

- الخوف من الاخفاق: كاين عباد تع الصح يخافو انهم يخسرو في اي حاجة، هايا تلقاهم يديرو كامل وش يقدرو في كل حاجة يدخلو فيها، وميقدروش يتقبلو انو الجهود نتاعهم قادر ميكونش هي كلش باه تنجح علاقة كيما الحب، و عاجال الخوف تاعهم هذاك تلقاهم ديما يبالغو فرد الفعل تاعهم كي يحسو بلي كاين حاجة مهيش قدقد، وكي يسمحو فيهمو، تلقاهم يمسحو اللوم في رواحهم يرجعو يقولو كان لازمني ندير كتر.. ( هنا كون يفيقلك العبد هذاك بلي نتي هك قادر يبتزك بعبارات كيما اذا تحبيني ديري هاذي و هاذي.. ).

- ايذاء النفس: كاين اسباب بزاف تخلي العبد يؤذيو رواحهم، قادر يحسو بلي معندهمشبلاصة خلاف يروحولها، ولا يحسو بلي مش حا يقدرو يلقاو عبد خلاف يوالهم.. تلقاهم يختارو عباد عبالهم بلي مش حا يقدرو يحبوهم بنفس الطريقة لي هوما يحبوهم بيها، وهكاك تلقاهم ميقدروش يتقبلو النتيجة النهائية، يقدرو يكونو كانو عايشين فعايلة وين واحد من الوالدين يضل يضحي بلا ما يتعامل بالمثل، ايا يحسبو بلي هي جاية هكاك.. بصح فالحقيقية مكان حتى أذى ولا تحقير ذاتي لرواحهم حا ينفعهم باه يخففو الألم هذاك، ولا يمنعهم انهم يحاولو يعكس المصير تاعهم.

2- التعافي من الانفصال:
فالمقال تع الطبيبة النفسية جين كيم لي نشراتو هو تاني ف " سيكولوجي توداي " ( psychology today)، مدت مجموعة تع نصائح باه تتعافى من الانفصال، تبع معايا:

- خذ بعض الوقت: جامي تقمع المشاعر تاعك ولا تكبحها، سيرتو مور الانفصال ديراكت، مي مالڨري تو تقدر المشاعر هذيك تكون قاوية و توجع بزاف، مالا ادي وقت طويل، ريح وحدك ابكي عيط، اهدر مع روحك المهم تكون بعيد عالضغوط تع الناس لخرين.

- الاستماع للموسيقى الحزينة: النقطة هاذيمنيش نفتي فيها اني حطيتلكم وش قالت الطبيبة هاذي برك، المهم فالمدى القصير، انك تسمع للموسيقى الحزينة يقدر يعزز المشاعر لي توجع هذيك، بصح في نفس الوقت رح تفيدك انك ممبعد تولي تحس روحك مش وحدك و واش راك تحس حاحة طبيعية..

- تحدث للاشخاص الداعمين: يقدرو صحابك ولا عايلتك اذا كنت مداسرهم يعاونوك، بصح اذا لقيت للحكاية تاعك متقدرش تشاركها معاهم، روح لبسيكولوق، وفرغ قلبك عندو حا يسمعلك و مش حا يحط احكام عليك حتى لو تكون درت وش درت..

- اقرا كتب عالانفصال: كي تقرا كتاب ولا رواية يكون فيها وصف دقيق للحالة لي راك عايشها، شغل يعبرو على وش حاب تقول وملقيتش الكلمات، و يقدرو لكتابات تان يعاودو يشغلو المراكز المنطقية في دماغك، لي يقدرو يكونو حبسو بسبة الحالة العاطفية تاعك..

- النوم و الأكل و التمارين الرياضية: متفسدوش بروقرام رقادكم لي كنتو موالفينو واذا كنت اطفل ادخل دير ميسكيلاصيون، حتر لبنات كيفكيف بصح اذا مكنتش تقدري تدخليها، ديري صبور فالدار، الشي هذا يقدر يفرغ الغضب هذاك لي داخلك..

3- نصائح من عندي انا:

يقلك سقسي محرب ومتسقسيش طبيب، هي يعني الهدرة هاذي مكانش منها مي المهم نقلكم انا وش درت باه نتجاوز علاقة دامت 5 سنين و استنزفتني حرفيا:

- كل مرة تحكي فيها حكايتك و وش صرالك ، رح تلقا انو كاين حوايج و أجزاء في قصتك تتغير.. بحيث كل مرة تلقا روحك تحكي فيها بوجهة نظر مختلفة و جديدة ..و مع الوقت تلاحظ انو الوجع ينقص و الفهم يزيد ..و شوية شوية تبدا تحكيها كأنك ماكنتش بطل فيها .. مبعد تلحق لدرجة وين تولي تحكيها من مقعد المشاهدين لي دايمن يخرجوا العبرة من القصة .. و بالتالي كالعادة تكون تعلمت درس جديد رح يفيدك في حياتك و يخليك ماتلدغش من نفس الجحر مرتين .

- بلاك اصعب نوع تع انفصال لي تقدر تتخطاه انك تفيق بلي راك تحب لبنادم هذاك حتى نهار تخسرو، عني الغلكة تجي منك و العبد هذاك كان يحاول و يحاول باه ينجح علاقتكم، النوع هذا هو الاصعب، وهو لي يدي وقت بزاف، مي باه تتقدر تتجاوز اهم حاجة انك تتسامح مع نفسك، اطلب السماح من البنادم هذاك متكونش اناني ادعيلو بالخير ، و ادعي ربي يجبر بخاطرو لي نتا كسرتو، صدقني نهار لي تلقا العبد هذاك بدا من جديد حياتو، رح توجعك هيه بما انك تحبو، بصح رح تقدر تدي شوي راحة بال باه ممبعد تقدر حتى نتا متحسش بتأنيب الضمير، حتى هك منيش نقولك العبد هذاك رح يرجع مليح، خاطر كسر الخاطر أصعب حاجة تديرها لبنادم.

- اتقبل وش صرا، اتقبل انو علاقتكم خلاصت، انا جبتها قريب عام ولا كتر ونا حاط في بالي راني نحلم و ضك نفطن، مي نهار لي صح تقبلت الفكرة بلي خلاص، يلي الحب هذاك راح، مع لوقت بديت شويا شويا نتناسى.

- جامي تخمم بلي نتا متستاهلش الحب، جامي تخمم هك، صدقني العبارة تع الف بنادم يتمناك راهي صح، و ربي محال لكان يسمح فيك، رح تتلاقا بما خير و رح تتعوض.

- اطونسيون تدخل فعلاقة ونتا مزالك مكسور القلب، لي راهو صاري فيك نتا يكفي و زيادة مكالاه ممبعد تربط قلب بنادم بيك مبعد تكسرو خاطر مقدرتش تحبو، مبعد تلقا روحك زدت تأنيب الضمير لروحك.

- قوي الثقة تاعك في روحك، و اذا ماكش عارف الطريقة، ادخل للصور تع الصفحة حوس على مقالة " كيف ابني ثقتي بنفسي ".. بجزئيها.. و طبق النصائح لي فيها.

- عقلك الباطن يخدم عكس وش راك حاسب نتا، وحساب ما شفت اغلب التعليقات فالمنشور لي درتو قبل المقالة هاذي، انو اغلبكم قلتو " متقدرش تنسا، الحب يجي مرة برك، و و و "،، صديقي و صدقيتي اي حاجة تبقاو تعاودو فيها هك عقلكم راح تتزرع داخلو مليح وتولي مآمن بيها و تمشي عحسابها حياتك كامل و قادر صح انك مش حتلقا الحب صح.. مالا شوف كل مرة قول لروحك بلي يجي نهار و نلقا العبد لي يستاهلني، ابقا تعاودوها ديما في كل بلاصة، خممو غير من الناحية الايجابية، راهي اي حاجة تخمم فيها بزاف تولي بذرة و تكبر داخلك.

- كي تلقا روحك تخمم فالبنادم هذاك، سيي خمم فحاجة خلاف فاللحظة هذيك، انا مثلا كنت ندير كاش فيلم ولا نوض نصلي ولا ندير اي حاجة، مع الوقت قدرت نتأقلم، و صدقوني رياض لي كان يقول محال نعاود نحب، كي طبقت الهدرة هاذي كامل، لقيت بلي قدرت و نسيت صح، مش نقول نسيت الوجود تع البنادم هذاك، خاطر اك متقدرش تلغي الجزء هذاك من حياتك، بصح وشنو؟ ، وليت كي نتفكر تجيني عادي، شغل كأي فترة من حياتي، و نهار تعاودو تلقاو الحب من جديد رح تلقاو رواحكم حبيتو أقوى و خير من لول ❤

- اذا كانت العلاقة في اطار تع " كوبل "، وفسدت معناها انو ربي مبغالكش تكمل في حاجة تؤذيك، مكاش لي حا يحبلك الخير كتر من الخالق نتاعك، اذا فات منك و صراتلك لحكاية وخلاص ارجع لربي و كثر الدعاء، قلبك راهو في يد ربي، ادعي و ادعي بزااف، من بين الادعية لي كنت ندعيهم انا:" اللّهم إنّي أسألك في صلاتي ودعائي بركةً تطهّر بها قلبي، وتكشف بها كربي، وتغفر بها ذنبي، وتُصلح بها أمري، وتُغني بها فقري، وتُذهب بها شري، وتكشف بها همي وغمي، وتشفي بها سقمي، وتقضي بها ديني، وتجلو بها حزني، وتجمع بها شملي، وتبيّض بها وجهي، يا أرحم الراحمين، يا أكرم الأكرمين.

الستاتي هذا كتبتو بقلبي مش بعقلي، مالا اذا استفدتو قولولي، و اذا تعرفو بنادم يحتاج لهاذ الهدرة طاقوه 🙏🏽❤

11/09/2023

بعض الأمور ماكش رح تقدر تنقذها ، لازم نتقبلو هاذ الفكرة يكذب عليك لي يقولك كلش يتصلح ومكاش مستحيل، بينما الحقيقة غير ذالك تماما، لكل إنسان حدود و قدرة إحتمال وين ميقدرش الإنسان يضحي كتر من هاد الحد وين يكون فأقصى مجهودو الله غالب مكاش كيفاه يزيد يضحي و يتعب باه يصلح أمر ما، كشغل تنعش فإنسان مقطوع الرأس واش الفايدة كي لڨلب يخبط؟ كاين علاقات و مشاكل لازملهم البتر الكلي مكاش أدوية تشفي، مكاش كيفاه تحيي حاجة ماتت ولا ترد حاجة ديجا صرات، كل ما تحاول تبدل كثر تلقى الجسم تاعك يعيط صاي مكاش قدرة استعاب كثر
التخلي ماش ديما حاجة ماش مليحة، لازم نتخلاو على حاجة ماتت باه نعيشو حنا ❤

11/09/2023

ومن بين الأسباب لي مخليتنا منفرحوش هو هذاك الإحساس لي نحسوه بلي راها وحد السعادة رايحة تجينيا في الغد والأيام القادمة ، أيا نقعدو نستناو في هذو الأيام القادمة وقتاش تلحق، كي يلحقو مانلقاو لا سعادة لا شكوكو ونتوحشو الأيام لي فاتو وقضيناهم نستناو في الأيام القادمة وهكذا نلقاو بلي تلعبتنا من كل جيهة وبقينا في النص ماعشنا البارح ماعشنا اليوم .
على هذا أصحيبي كل يوم تعيشو عيشو بكل تفاصيلو وعيشو شغل آخر يوم ليك . ❤

11/09/2023

ماشي بالضرورة يكونوا الآخرين دائما على خطأ
كاش نهار سقسيت روحك يوم وحاسبتها بلي راك غلطت في حق شخص ما، وآذيتو وجرحت مشاعرو وكسرت بخاطرو، علاه ديما نبداو بانفسنا ومانشوفوش عيوبنا ونحبوا نبانوا غي احنا لي مظلومين ومقيوسين ولطفاء باه نالوا تعاطف الناس.
حاسب نفسك مليح، ممكن كاين شخص كسرت بخاطرو بفعل ولا بكلمة، ممكن ظلمت شخص وافتريت عليه، ممكن تخليت على صديق كان بحاجة ليك، وممكن وممكن...
خلاصة القول الدراما تاع أنك أنت الشخص المظلوم دائما بدلها وحاسب نفسك قبل ماتحاسبك. ❤

Adresse

Sétif

Site Web

Notifications

Soyez le premier à savoir et laissez-nous vous envoyer un courriel lorsque Riad’s Corner publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager

Type