17/09/2022
بمناسبة أنو إبنتي كبرت ربي يحفظها ويبارك فيها،وراهي رايحة تنتقل من مرحلة الحضانة إلى مرحلة الروضة.
(الحضانة من 0إلى 3 والروضة من 3 إلى 6سنوات)
وبمناسبة أنو لنحكيلو نقلو بنتي رايحة لروضة،يقلي خلات عليك وجدي روحك للقمل..😁
وبما أنو في الجزائر أيضا،راه قريب الدخول المدرسي..قلت لما لا منحكيوش اليوم على القميميل و زيد راكم طلبتوه مني .
واشيهوا هذا لقميميل يا ترى🤔 القمل هو نوع من الطفيلات يعيش فقط في شعر الإنسان،
خارج شعر الإنسان يعيش كأقصى حد 3 أيام ويموت.
القمل ميهموش الشعر نظيف أو متسخ،ومعندو حتى علاقة بنظافة..هو فقط حيوان يلصق في الشعر لأنه جو ملائم ليه، ويتغذى من الدم تاعنا..باه يتغذى يعض عضات صغيرة في فروة الرأس ولعابوهو لي يسببلنا الإحساس بالحكة..كاين ناس عندهم قمل بدون حكة..لأنو ميتحسسوش من اللعاب تاعو..لذلك لا سمعتوا بحالة قمل لشخص قريب..لازم تفليو ولادكم لتأكد..متنتاظروش الحكة فقط.مع العلم أنو المكان المفضل للقمل هو ماوراء الأذنين و فوق الرقبة
👈القملة لا تعيش أكثر من شهر،،بعد 10أيام تقريبا فقط من اليوم لي خرجت فيه من البيضة تاعها(السيبانة)
تبدا تدير في البيض..علابالكم شحال تقدر دير بيض؟
كل يوم 10 بيضات حتى تموت😓.
معناها لا عاشت 10أبام فقط تقدر ديرلنا 100 بيضةوبالتالي 100 قملة جديدة. وكل قملة ب 100 وحسبو..
أول ما تلاحظو قمل فوق رأس أولادكم أو رأس أي إنسان..لازم بسرعة تبداو العلاج..قد مطولو..قد ميصعب العلاج..
العلاج الوحيد الفعال 100% وعند الناس كامل هو حلق الرأس كليا..لأنو القمل يعيش ويبيض فوق الشعرة..إذا نحيتيهالو معندوش وين يعيش.
عند الذكور هذا الحل سهل..لكن عند الإناث صعب...مع العلم أنو أغلب حالات القمل هي عند الإناث،لأنو إنتقالو من شخص لشخص يكون أسهل إن كان الشعر طويل..(تنقيص طول الشعر وحده غير فعال ضد القمل)
إذا كان حل حلق الشعر غير وارد يحب القيام بالتالي
👈نشريو هذاك المشط الخاص بالقمل..المشط هذاك يستعمل على شعر مبلل ..نقسمو الشعر ونمشطو بيه على الأقل مرتين في الأسبوع حتى إختفاء القمل كليا(المشط يساعد على التخلص من البيض لي هو السيبان وليس القملة..يعني التمشيط وحدو عمرو ليكون كافي)
👈غسل جميع الملابس في غسالة الملابس درجة حرارة 60
وإن كان يوجد ملابس لا تغسل نحطوها في كيس ومن بعد في الثلاجة على الأقل مدة 24ساعة.
باانسبة للأشياء التي لاتوضع لا في الثلاجة ومتقدروش تغسلوها..حطوها في كيس وغلقو عليها لمدة لا تقل على 3أيام.كما هدرنا من قبل القملة متقدرش تعيش خارج شعر الإنسان)
👈زيارة الطبيب..الذي غالبا يعطيكم دواء يحتوي على قاتل للفطريات..إذا كانت المصابة حامل أو طفل أقل من ثلاث سنوات،لازم تخبرو الطبيب لأنو هذه الأدوية تقدر تكون سامة.الدواء ليعطيهلكم الطبيب لازم تعاودو بعد ثمانية أيام،لأنو الدواء يقتل القمل وليس البيض. ..وإن ماعاودتوش تقريبا 100% يرجع لقمل.
👈للأسف حاليا القمل والف هذو الأدوية وأصبح مقاوم لأغلبيتها..لذلك نعطيكم طريقة طبيعية ديروها لمساعدة الدواء،أو للعلاج في حال الدواء منفعناش..(العلاج الطبيعي ميغنيش على زيارة الطبيب)
🔴 زيت جوز الهند، أو زيت الطعام..
المادة الزيتية تغلف ااقملة ومتخليهاش تتنفس وتقتلها.مخنوقة..
لكن بشرط،تغليف الشعر جيدا جيدا جيدا بالزيت
ومن بعد وضع سيلوفان أو كيس فوق الرأس وتركه على الأقل 3ساعات..ومن بعد غسل الشعر..تقدرو تكرو المرحلة يوميا.للعلم هذه العملية تقتل القمل فقط وليس السيبان(بيض القملة)
حتى الدواء ليعطيوه للحوامل و الأطفال هو عبارة عن مادة زيتية (من مشتقات البترول لكن في حالة القمل منخموش بزاف )
هذي المادة الزيتية تستعمل نفس طريقة الخنق التي يستعملوها الزيوت ليهدرنا عليهم.
🔅بإستعمال التمشيط لي يقضي على البيض و العلاج أو الزيت ليقضي على القمل الحي..نكونو متأكدين تقريبا 100% أننا نقضيو عليه.
⬅️لكي نتجنب الإصابة بالقمل..نقدرو
نتفاداو ااشعر المطلوق بالنسبة للفتيات (وااذكور أيضا)
نتفاداو تبادل القبعات بين الأطفال..بالرغم من أنو العدوى بهذه الطريقة ضعيفة جدا.
ااعدوى في المسبح ضئيلة جدا،لاداعي لتخاذ إجراء خاص..
ولأنو الأشياء الجميلة لازم دائما نخليوها للأخير:الحنة تقدر تكون طريقة رائعة جدا للوقاية من التقمل. ..لأنها تغلف الشعرة ومتخليش القملة تلسق فيها بسهولة(منعناتوش الطريقة (ناجحة 100%..لكن نصعبو عملية التقمل)
⬅️الشومبوان والماء والغسيل اليومي والخل
كلها طرق معندها حتى معنى،ولن تساعد في التخلص من القمل،تقدر فقط تهيج فروة الرأس تاع المصاب وتعقد إصابتو.
أهم نقطة حبيت نذكرها اايوم
سيداتي سادتي القمل معندو حتى علاقة بالنظافة الشخصية للمصاب..كلها أفكار خاطئة ومكتسبة..لذلك لا داعي لرمق الأمهات لولادهم عندهم قمل بنظرات إستهزاء و إشمئزازفهذا يدل فقط على قلة فهمكم للمرض لي يقدر الغدوة يجي في ولادنا كااااامل..وواحد ماهو محمي منو حتى لو كان يدوش بجافيل😊😊
#الطبيية
تم اعادة النشر تحت الطلب
