29/06/2025
الرضاعة الليلية الطبيعية ولا الصناعية تسبب حاجة نسميوها "تسوس الرضاعة" أو "تسوس الطفولة المبكرة" (Caries de la petite enfance / caries de biberon)
علاه؟ لأنو فالليل يرضع الرضيع ويبقى الحليب يتجمع في الفم بيسك الحليب فيه اللاكتوز وهو نوع من السكر هاد السكر تتغذى عليه البكتيريا لي كاينة طبيعيا في فم الطفل وتنتج أحماض تسبب تآكل المينا (l'émail لي هي الطبقة الخارجية تاع السن) يعني بداية التسوس
دركا وش الحل؟
1.قبل ما يخرجو الأسنان:
مشي كي يكون بيبي خلاص غير كي يكون حيبدا ينبت سنيه نمسحو اللثة مرة وحدة فاليوم بقطعة قماش مبلولة تكون نظيييفة ولا كومبراس مبلولة ونركز على كلمة نظيفة
الما غليوه وخليوه يبرد شوية وبللو بيه الكومبراس هكا تظمنو أنو يكون معقم
2.بعد ما يخرجو الأسنان:
نمسحو الأسنان بعد كل رضاعة بقطعة قماش مبلولة نظيفة (ولا كومبراس مبلولة)
بعد عامين: نوليو نغسلولهم سنيهم بفرشاة أسنان صغييرة ورطبة بمعجون أسنان تاع لولاد بحجم حبة تاع أرز
💡 نصيحة إضافية: ما نعطيوش البيبرون تاع الحليب ولا عصير للطفل يرقد بيه وخلي الما هو السائل الوحيد لي يشربو بعد ما تنظفيلو سنيه فالليل
لأنو السنيه اللبنية مشي غير مؤقتين برك عندهم دور مهم في المضغ، النطق، وحتى الحفاظ على أماكن الأسنان الدائمة
