12/12/2023
كتير من الناس أكتر حاجة بتكون مسببة لهم قلق من تجربة العلاج النفسي هي إنه يتم إستغلالهم أو الإساءة ليهم وانتهاك حدودهم بشكل او بآخر. وأحيانا أوقات كتير كمان بيكون المرض النفسي أو المشكلة النفسية الموجودة في الأساس هي العائق إن المريض يقدر يحمي نفسه. علشان كده مهم جدا اننا دايماً نتكلم و نوعي بحقوق المريض طوال رحلة العلاج، و مهم جداً اننا نتأكد إنه عارفها كويس و نأكد عليها.
طب إيه هي حقوقك أثناء رحلة العلاج ؟
1- السرية
السرية تعتبر أكتر نقطة بتقلق ناس كتير، و لكن مهم تعرف إن في غرفة العلاج بنكون عارفين مدى خصوصية وحساسية كل حاجة بيتم مشاركتها، وإن كل حد بيدخل العيادة محتاج يطمن إن كل حاجة هيتكلم عنها هتفضل بينه وبين المعالج الخاص بيه فقط، وإن مفيش استثناء لده إلا في نقاط محددة بيكون المريض عارفها كويس جداً، زي وجود خطر على حياته.
2- الأمانة
تاني حاجة من حقوقك هي إن المعالج الخاص بيك يكون أمين معاك، من أول اختياره الدواء المناسب ومدرسة العلاج المناسبة، وأثناء ممارسته بإنه دايما تكون أولويته مصلحة المريض وسلامته مش أي شيء آخر، فمثلا من الأمانة إن المعالج لو شاف إن من مصلحتك تتحول لمعالج آخر متخصص في نوع مشكلتك أكتر يقوم بده، وبيساعدنا على ده وجود فريق متكامل بمدارس علاجية وتخصصات مختلفة، كمان من الأمانة إن المعالج يفضل محافظ على العلاقة العلاجية في صورتها وما تتحولش العلاقة لصورة أخرى لأن ده بيضر بالمريض وبتكون استفادته من العلاج صعبة بعدها.
3- الاحترام
من أساسيات حقوق المريض إنه يحس بالاحترام من المعالج
- احترام الحدود وخصوصية، فمش من حق المعالج يسأل عن تفاصيلك الشخصية اللي لا تتعلق برحلتك العلاجية، ومن أهم صور احترام الحدود هي احترام الحدود الجسدية، بإنه ما يكونش فيه أي تلامس جسدي أثناء العلاج .
- إحترام المعالج لتجربة المريض، أول حاجة بيكون منتظرها المريض من المعالج الخاص بيه هي التصديق، إنه يصدق على تجربته وألمه ويحترم مشاعره ويصدق عليها، والحقيقة إن ده بيكون أحيانا هو جوهر العلاقة العلاجية وأساس في التعافي.
-إحترام قيم المريض: فالمعالج مش من حقه إنه يتدخل في قيم المريض اللي هو مختارها لنفسه ولا من حقه محاولة تغييرها، وبيكون ملتزم باحترامها طول فترة العلاج.
4- معرفتك بخطتك العلاجية
ومن حقوقك إنك تكون على دراية بتفاصيل العلاج: زي التشخيص، والمعلومات الأساسية عن الدوا بتاعك، والبرنامج العلاجي اللي المعالج حيتبعه معاك ومدة العلاج ولو بصورة تقريبية.
5- الأمان
وأخيرا محتاجين نفهم أنه حق للمريض على المعالج أن يشعر بالأمان، والمعالج علشان يقدر يساعد غيره محتاج يستحضر إنسانيته ويكون دائما ملتزم بأخلاقيات المهنة، يقدر شجاعة المريض اللي ساعدته إنه ييجي ويطلب المساعدة. محتاج إنه يستشعر قدسية الحوار اللي بينهم ويحافظ على أمانته، ويعرف إن أهم جزء في دوره في رحلة العلاج هو تخفيف معاناة الشخص كأنسان أولاً و مريض ثانياً.
بقلم د/ نادرة رياض
طبيبة نفسية
