19/07/2025
ولو سألتني:
إيه عيوب التعافي النفسي؟
أعتقد إن الكلمة اللي حتمرّ ببالي،
واللي ممكن أحس وجعها في قلبي…
الغُربة… 🌒
تعالى أشرحلك…
خلينا نتفق على قاعدة:
٩٩٪ من اللي قرروا ياخدوا مجازفة التعافي النفسي…
أخدوها مضطرين. 😔
بعد ما نفدت منهم كل الحيل الدفاعية:
الإنكار، التبرير، اتهام الذات،
الهروب من المشاعر بالأكل العاطفي،
أو الشغل والعلاقات الزيادة…
أو حتى المخدرات.
بعد كل المحاولات اللي ما نجحتش على المدى الطويل…
يكتشف فجأة إنه غرقان، منهك، مستنفذ الطاقة.
ويُفاجأ إن الاكتئاب اتمكن منه،
أو إن القلق بقى يرافقه في فراشه… 🛏️💭
مُقوضًا أمانه، وصورته الذاتية، وبيُنهش في روحه.
فـ يلاقي نفسه مضطر ياخد اتجاه التعافي…
علشان يلاقي نفسه. 🌱
لكن… وهو في الرحلة،
بيشوف حاجات… وبيغيّر حاجات…
بيكتشف إن كتير من اللي كان فاكرهم بيحبوه…
طلعوا بيحبوا نفسهم من خلاله،
أو بيحبوه بطريقتهم — اللي ما بتشبهوش.
وإن الأقرب كانوا الأبعد عن الإحساس بمشاعره،
ولا اهتمّوا فعلاً باللي بيدور في عقله.
وإنه اتأذى بالإهمال، بالحرمان العاطفي،
باللوم، وبالنقد اللي في غير محله.
وإن كلمة:
“إحنا عايزين نفتخر بيك…”
اتحوّلت لإحساس مزمن بـ الخزي والعار… 😞
ومع كل اكتشاف من دول،
حِتة من قلبه بتبعد عنهم خطوة…
ابتدى يغيّر حاجات:
اتعلم يقول “لأ”،
يرجع لكل واحد شيلته،
يختار اللي شبهه… 💫
غَيّر من سلوكه الإرضائي،
ومن التضحية اللي كانت في غير محلها، مع ناس ما تستهلش.
بقى يعبّر عن ذاته،
يمارس اختياراته،
يضُم الناس اللي شبهه،
ويهتم بنفسه، ويرعاها. 🌸
ومع كل تغيير بيحصل،
يبدأ استغراب واستنكار من البعض،
وأحيانًا كتير…
بيبعدوا خطوة.
لحد ما يبقى لوحده وسطهم. 🕊️
سامعهم، لكنه مش مهتم…
مش بيقول كل اللي جواه،
توفيرًا لطاقة الجدل.
ما بقاش بيفكر فيهم أول ما تحصل أزمة…
يمكن علشان… فيه ناس جديدة؟ 🤝
⸻
التعافي:
بيهد الرصّة، ويعيد تكوين المشهد.
التعافي غُربة فيها شيء من الألم…
داخل العالم اللي نشأت فيه، واللي بتنتمي له.
لكنه في نفس الوقت…
وَنس. ✨
ونس بالنفس الحقيقية،
بالانسجام مع الذات،
بالتخفف من الزيف اللي كنت بتحمله على كتفك علشان ترضي غيرك…
ونس و براح...
إن اللي جواك،
بقى شبه اللي براك.
ونس بحرية التحرر من توقعات الآخرين. 🕊️
ونس بالوضوح…
بالسلام…
وبحقيقة إنك مش مضطر تكون نسخة لحدّ.
التمسك بالماضي؟
اغتراب عن النفس في زحمة كذّابة.
والتعافي؟
غُربة وسط ناس…
حبيناهم أكتر، وأحسن، مما حبّونا. 💔
لكن…
معاه وَنس بالنفس.
ونس مع ناس تستاهلنا… ونستاهلها. 🤍
وده هو الونس الحقيقي.
