العصب الخامس بالعربي

08/03/2026

Celebrating my 8th year on Facebook. Thank you for your continuing support. I could never have made it without you. 🙏🤗🎉

24/08/2025

السلام عليكم
كيف حالكم ..

#العصب #الخامس #بالعربي
💜🎶🌼

07/01/2025

السلام عليكم ورحمة الله وبركاته
كيف حالكم جميعآ بالآجواء الشتويھ و البرد
و العصب الخامس .

#العصب #الخامس #بالعربي

10/11/2023

الناس دول بينشروا اعلانات عندنا في الجروب..احب اقول لكم ان مفيش علاج اسمه تدليك المسارات العصبية و الكلام ده كله نصب.
اللهم بلغت.

25/10/2023

يا مساء الفل..
اسف يا جماعة على البوست التافه اللي اتنشر هنا بالغلط.
انا كنت بشيره على حسابي الخاص بس جه هنا بالغلط.

03/10/2023

يا مساء الفل ..
بخصوص موضوع قناة اليوتيوب.
انا متعود منكم على التفاعل القليل لكن تقريبا التفاعل على البوست كان منعدم و كل التفاعلات من تعليقات و ريأكشنز كانت من ناس تعرفني معرفة شخصية من خلال الصفحة و مع ذلك ححاول ابدأ على سبيل التجربة.

طبعا بسبب ضعف الامكانيات فالقناة حتبدأ ببث صوتي بدون فيديو و حيكون الكلام اللي في البث مكتوب (و ده حيكون خصيصا استجابة لطلب الاخت العزيزة Lamia E. Hassan) و باذن الله مع الوقت نحاول نطور القناة بالسلوب احترافي.

رجاء الدعم و الاشتراك على القناة حتى لو مش حتتابعها عشان تساعدوني في نشر القناة.

لينك القناة على يوتيوب :

https://www.facebook.com/citizen.3freet2/

Trigeminal Neuralgia الصفحة دي معمولة للدعم و
التوعية بخصوص مرض التهاب العصب الخامس

07/09/2023

مساء الفل عليكم.
النهارده حابب استشيركم في فكرة جديدة و اشوف هل حتكون مفيدة ليكم و تلاقي منكم دعم ولا أتراجع عنها و اوفر الوقت و المجهود.

الفكرة هي عمل قناة على يوتيوب تكون تابعة للصفحة و ننشر عليها فيديوهات تخص المرض و العلاجات و الدعم النفسي.

ياريت اللي شايف ان الفكرة ممكن تكون مفيدة يعلق على البوست او على الاقل يعمل لايك و لو لقيت عدد تعليقات و لايكات مناسب حبدأ التنفيذ في أقرب وقت.

04/08/2023

بشرى سارة لاهالي الاسكندرية..
بلدياتي و اجدع ناس..
لو حد حابب يتنصب عليه و يتقلب في مبلغ محترم يكلم الرقم اللي في الاعلان ده و يروح (يتعالج) عندهم.

النصباية دي انا كنت كتبت عنها بوستين 💋💋 قبل كده و الشخص اللي اسمه ابراهيم الحضري ده و اللي كاتبين في البوست انه دكتور لا دكتور ولا نيلة لكن نصاب رخيص و مالوش اي علاقة بالطب.

الظريف بقى انهم جايين يعلنوا لنفسهم عندنا في الجروب فحبيت ارحب بيهم بطريقتي.

حتلاقوا لينكات ال💋💋 في التعليقات.

29/06/2023

الفيديو ده بيوضح جراحة ازالة الضغط (عزل الشريان عن العصب) التقليدية MVD.
في الدقيقة 2:50 الجراح بيوصل لمكان العصب و بيظهر بوضوح ايه هي المشكلة اللي بنتكلم فيها.

مع كل دقة قلب الشريان بيحتك بالعصب احتكاك واضح جدا لدرجة ان الدقات بتسمع في العصب و بتسبب احتكاك بينه و بين الشريان.

الفكرة عاملة زي لما بتلبس جزمة جديدة و تكتشف ان فيها جزء بارز بيوجعك لما يحتك بجلد رجلك و انت ماشي بس الفرق انك بتقدر تعزل الاحتكاك ده بمجرد ما تقلع الجزمة 😂 و ده اصل المشكلة.

حضرتك تقدر تقلع الجزمة اللي تحت بينما متقدرش تقلع الجزمة اللي فوق 😂😂😂.
الفيديو بيوضح ليه النوع الاول من التهاب العصب الخامس صعب و مؤلم و بيزيد مع الوقت..
طول ما انت لابس الجزمة و بتتحرك بيفضل الاحتاك قائم و يفضل سبب الالتهاب في رجلك قائم و نفس الفكرة في دماغك.

مجرد كونك حي و قلبك بيدق فده خبر وحش بالنسبة لالتهاب العصب الخامس من النوع الاول.
الصورة المرفقة في التعليقات بتوضحلك اماكن الشريان و العصب عشان تكون مجمع اللي بيحصل.

John Y.K. Lee, MD, a neurosurgeon at Penn Medicine, is a leading expert in the treatment of trigeminal neuralgia, a cranial nerve disorder characterized by s...

05/04/2023

يا جماعة الطب البديل ده نصب و مفيش منه اي فايدة.
الحجامة.
سم النحل.
الابر الصينية.
الطب العربي.
الطب الشرقي.
الطب الصيني.
الطب الهندي.
الطب النبوي.
طب الاعشاب.
كل دي اسماء لنصبات لها اسم فيه كلمة (طب).
الطب الوحيد اللي بجد في وسط بحر الهلس ده هو( الطب الاكاديمي اللي بيتدرس في الجامعات المعترف بيها او من في حكمها).
اي شكل للطب سواء تم ذكره او متمش مبيتدرسش في الجامعة فهو مش طب.

20/03/2023

ظبط مواعيدك صح و صوم و انت مطمن.

كل سنة و انتوا طيبين.

سي ار صديق الصائمين.
الصيام و تجريتول.

الاصدقاء و الاخوة قوات مقاومة العفريت.
يا مساء الفل.

النهارده الكلام -و كل سنة و انتوا طيبين- عن موسم نوبات الم العصب الخامس اللي بيحصل بسبب تغيير مواعيد الادوية في الصيام .

كلامنا عن تجريتول و البدايل بتاعته عموما ..اي علاج مادته الفعالة هي كاربامازيبين.

مع قرب نهاية شهر رجب و اقتراب شهر شعبان بتبدأ التساؤلات عن نوبات الالم اللي بتزيد في شهر رمضان و ازاي تقدر تتخلص منها فحبيت اكتب الموضوع بدري عشان تلحق تعدل مواعيدك قبل رمضان بفترة كفاية.

الكلام في البوست ده عن تجربتي الشخصية اللي مش لازم تتفق مع تجارب الكل لكن غالبا حتكون مفيدة للناس اللي عندهم النوع الاول من المرض و اللي الادوية مسيطرة على حالتهم و كمان مع الناس اللي من النوع التاني اللي الادوية بتجيب معاهم نتيجة معقولة..فاذا كنت نوع اول او تاني و مرضك مش بيستجيب للأدوية بشكل يرضيك فعندك الرخصة انك تفطر عشان تاخد الادوية بحيث ان الالم ميزيدش عليك لمرحلة تعطلك عن ممارسة حياتك.

طبعا انا مش من حقي افتيك في امر من امور الدين عشان انا مش متخصص لكن الاية صريحة مش محتاجة تاخد بيها فتوى " فَمَنْ كَانَ مِنْكُمْ مَرِيضًا أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ" و طبعا اللي مش بيقدر يصوم نهائيا عشان يعوض ايام الافطار فعنده كفارة الصيام و اللي هي افطار مسكين عن كل يوم فطره.

نيجي بقى لدرس اليوم :

عشان تصوم عندك حل من اتنين..

1-انك تعدل مواعيد الادوية.
التعديل يتم بالتدريج قبل رمضان بفترة كفاية و اللي هي مش اقل من اسبوعين و لو كانت اكتر يكون احسن..و عشان كده انا كاتب البوست ده بدري عشان حضرتك تلحق تظبط حالك.
لو مواعيد ادويتك 3 مرات في اليوم فحضرتك مطلوب منك توزع نفس جرعتك على مرتين في اليوم..
يعني لو بتاخد قرص تجريتول كل 8 ساعات تخليهم قرص و نصف كل 12 ساعة ده اولا..
و ثانيا تبدأ تباعد بين الجرعات تدريجي بحيث تقرب من شكل الجرعات اللي حتعمله في اوقات الصيام لحد ما توصل لمواعيد تقريبية من 7 مساء و 4 صباحا و اللي هي حتكون تقريبا مواعيدك ما بين الصوم و الافطار.

2- انك تاخد تجريتول ممتد المفعول (CR).
صديقنا ممتد المفعول له طريقة عمل مختلفة عن تجريتول العادي..
اولا السي ار دي معناها Controlled release يعني الانتشار المحكوم..يعني ان المادة الفعالة للعلاج بتنتشر في الدم بطريقة بطيئة عن النوع العادي و ده اللي بيخلي المادة الفعالة تفضل موجودة في الدم لمدة اطول.

يؤخذ على صاحبنا ممتد المفعول ان مفعوله بيكون اضعف من العادي و لذلك غالبا لو رحت للدكتور و طلبت منه يغير علاجك من العادي للممتد فحيخليك تاخد تركيز 400 لو كنت بتاخد تركيز 200 عشان يعوض فرق ضعف الاداء اللي بيحصل من ممتد المفعول..

انا عن نفسي غيرت علاجي في رمضان لممتد المفعول و جاب نتيجة معقولة معايا..
صحيح الالم كان اصعب-مع اني كنت باخد 400-و خصوصا الالم المسبب (اللي بيحصل من الكلام او لمس المناطق المصابة) لكن كان في فرق كبير بين الالم في الايام اللي باخده فيها و بين الالم لما نسيت اخده و قررت اكمل صيام و قضيت اليوم في البيت فاقد القدرة على الكلام 🤐.

*ملحوظة صغيرة : الكلام السابق لا يعني الاستغناء عن رأي الطبيب..
كل حالة لها وضع مختلف عن غيرها و لازم تستشير طبيبك قبل ما تغير نوع العلاج اللي بتاخده و الكلام السابق ما هو الا تجربة شخصية للعبد لله نجحت معايا لكن ممكن متنجحش مع غيري.

تاني ..استشير طبيبك.

اللهم بلغت.

مساء الفل.