08/07/2025
💭 لو طفلك بيتكلم.. كان هيقولك إيه وهو تعبان؟
لما البيبي يعيط كتير وإنتِي مش عارفة هو مالُه، بيكون السؤال:
"يا تري ايه واجعه ؟!"
تعالي نفهم لغة البيبي 💬👇
🔹 "عندي سخونية ومش مرتاح"
↪️ لو جسمه دافي، وكسل مفاجئ؟ افحصي حرارته فورًا.
🔹 "بطني بتوجعني ومش عارف أشرحلك!"
↪️ بيشد رجليه، بيصرخ بعد الرضاعة، بيرفض الأكل؟ ممكن يكون مغص أو غازات.
🔹 "نفسي مكتوم.. ومش قادر أنام"
↪️ انسداد أنف، صوت نفس غريب، بيصحى كل شوية؟ خلي بالك من علامات البرد أو حساسية الأنف.او حتي خنفرة الرضع الطبيعية.
🔹 "أنا زهقان وعايز أخرج!"
↪️ مش كل عياط معناه مرض، ساعات بيكون محتاج حضن، تفاعل أو مجرد خروج من البيت شوية.
🔹 "حلقى بيوجعني ومش قادر أرضع"
↪️ ممكن يكون التهاب حلق أو لوز، خاصة لو بيرفض الأكل وفاتح بقه كتير.
🔹 "جلدي بيهرشني.. ومش عارف أوصلك"
↪️ طفح جلدي؟ احمرار؟ ممكن تكون حساسية جلد أو أكزيما.
🔹 "في حاجة بتضايقني في الحفاظ"
↪️ تسلخات، التهابات أو حتى حجم الحفاظ مش مناسب.
🔹 "عندي ألم فالأذن"
↪️ بيشد ودنه؟ بيعيط أكتر وهو نايم على جنب؟ بيحرك راسه يمين وشمال بسرعة ومش مرتاح ؟ممكن التهاب أذن.
🔹 "أنا جعان بس مش قادر أكل!"
↪️ تقرحات فم، تسنين، أو انسداد أنف بيخلوا الطفل يرفض الرضاعة أو الأكل.
---
⭕مش كل بكاء يعني حالة طارئة، بس "إحساسك كأم" أهم أداة تشخيص.
لو شكّيتي، اسألي، واطمني
📌 شاركي البوست ده لو عندك صديقة لسة أم جديدة
#نصائح للأمهات
