07/10/2017
الحمى الروماتيزمية
مشكلتنا مع الحمى الروماتيزمية بتتلخص فى حاجتين:
الحاجه الأولى--- ودى الأطباء للأسف هم اللى مسؤلين عنها وهى المبالغه فى تشخيص الحمى الروماتيزمية 😰 وبالتالى إعطاء البنسيلين طويل المفعول بدون داعى والحكم على الشخص بإنه مريض قلب وأعيشه هو وأسرته فى حاله نفسيه زى الزفت, وياما فى مشاكل اجتاعيه كتييير حصلت زى جوازات باظت عشان أهل العريس رافضين يجوزو ابنهم لمريضة قلب 😱 وللأسف هى أصلا متشخصه غلط وماعندهاش أى مشاكل فى القلب😭.
الحاجه التانيه--- ودى مسؤلية الأسره وهى اهمال تشخيص الحمى الروماتيزمية ويجيلنا بعد كده المريض يعانى من مضاعفتها ويدخل فى دوامة ضيق أو ارتجاع فى الصمامات أو ضعف فى عضلة القلب أو أو أو......😪
طيب نعمل ايه يادكتور انت حيرتنا معاك 😂
معلش استحملونى هرغى شويه معاكوا عشان نبسط لكم قصة الحمى الروماتيزمية
المتهم الرئيسى في الحمى الروماتيزمية هو الميكروب السبحى اللى بيصيب الأطفال فى الحلق واللوزتين،، الميكروب ده بيجى للأطفال غالبا من سن خمس سنين لعشرين سنه.
بيبدأ السيناريو بالتهابات فى اللوزتين أو الحلق مع ارتفاع فى درجة الحراره ،، إذا الطفل ما أخدش المضاد الحيوى المناسب بالجرعات الكافية لمدة محددة ينتج عنه بعض التفاعلات التى تؤدى إلى التهاب فى الصمامات مسببا ضيق أو ارتجاع فى صمامات القلب اللى أكثرها تأثرا الصمام الميترالى. وممكن يصيب المفاصل والجهاز العصبى والجلد.
يعنى يادكتور لو الولد سخن ورجليه وجعاه وعملنا سرعة ترسيب كده يكون عنده حمى روماتيزمية لا والله مش شرط 😎
طب حتى لو عملناله تحليل لقينا عنده زياده فى معدل الميكروب السبحى لا برده مش كفايه😎
يعنى مش كل سرعة ترسيب عاليه هممم ولا زياده فى معدل الميكروب السبحى بس نقول ان فيه حمى روماتيزمية
طيب نتأكد من التشخيص إزاى : والله هو فى خصائص لابد من توافرها بحيث يكون فيه تأثير فى أكتر عضو من أعضاء الجسم مع وجود دلالات الإصابه بالميكروب السبحى.
يعنى حضرتك امتى اقلق 😪 بص يا سيدى لما طفلك يجيله التهاب فى اللوز أو الحلق بعده بحوالى اسبوعين أو تلاته اشوف الطفل مش عارف يتنى مفصل كوعه أو الركبه وتبص على المفصل تلاقيه وارم ومحمر وسخن وبعد كده الاقى الالتهاب خف ومسك مفصل تانى الوصف ده مع وجود دلالات الحمى الروماتيزمية أقدر أقول دا روماتيزم .
طيب إزاى نتغلب على الحمى الروماتيزمية
*من رخامة الحمى الروماتيزمية😭 انها متكرره مش زى الحصبه بتيجى مرة واحده فلازم امنع تكرار التهاب الحلق واللوزتين بإعطاء المريض المضاد الحيوى المناسب بجرعته الكافيه لمددة محدده.
طيب يادكتور نشيل اللوز ونخلص من الفيلم ده هو للإسف استأصال اللوز وإن كان بيقلل فرصة تكرار الإصابة با الحمى الروماتيزمية إلا انه لا يمنع الاصابه نهائيا عشان ممكن الإصابه تحصل فى الحلق فاستأصال اللوز مش حل جذرى،، تانى حاجه ان اللوز من وسائل الدفاع المهمة جدا فلا يتم استأصلها الا إذا تكرر الإلتهاب الصديدى أكتر من تلت أربع مرات فى السنه على الرغم من العلاج المناسب وطبعا القرار بيرجع لأخصائى الأنف والأذن
*تحسين التهويه و الحث على التغذيه التى تساعد المناعة
*بمجرد اصابة المريض بالحمى الروماتيزمية لازم يمشى على بنسيلين طويل المفعول كل حوالى 3 أسابيع وتختلف المده بحسب درجة تأثير الحمى الروماتيزمية فى الجسم
طيب ممكن أخد أقراص مكان الحقن عشان مابحبهاش؟ بنعطيه فى حالات الحساسية للبنسلين بس طبعا احتمالية تكرار الحمى الروماتيزمية مع الأقراص أكتر من حقن البنسيلين عشان كده مابنسمحش بيها إلا مضطرين
طيب سؤال أخير ياطبيب 😕 لو الأم أو الأب مصابين ممكن الأولاد يجيلهم حمى روماتيزميه !!!! الحقيقة إن الأصابه بالحمى الروماتيزميه مالوش عامل وراثى بس ممكن أكتر من فرد فى نفس الأسره يتصاب عشان الظروف المعيشية المشتركة للأسره من حيث عدم التهويه وسؤ التغذيه والرعاية الصحيه لأفراد الأسرة. فيكون السبب نقل العدوى مش مشكله وراثيه.
