Dr- Shaimaa Mohamed Eltayb - د.شيماء الطيب

04/03/2025

فطار الطفل الصايم في رمضان 🌙💙

عشان يفطر صح بعد يوم الصيام جهزي له فطار خفيف ومتوازن:

🧆 قبل الأكل: بلح مع كباية لبن أو عصير فريش عشان يعوض الطاقة.
🍲 شوربة خفيفة: زي شوربة لسان العصفور أو شوربة خضار.
🍗 بروتين صحي: قطعة فراخ مشوية، كفتة، أو بيضة مسلوقة لو بيحب البيض كا بروتين

🥖 نشويات: عيش بلدي، بطاطس مسلوقة، أو شوية مكرونة.
🥒 خضار وفاكهة: خيار، طماطم، أو فاكهة مقطعة عشان الفيتامينات.

🚫 ابعدي عن المقليات والأكلات الدسمة عشان معدته ما تتعبش.
💦 خلي المياه بالتدريج، مش مرة واحدة.

رمضان كريم على البطل الصغير اللي حابب يصوم ولسه بيتعود ❤️🌙

01/03/2025

تحياتي ♥️

الاستاذ ( يوسف صابر )
٤٥ سنه مدرس دراسات
نظرا لضيـ..ق ظروفه الماديه .
اشتغل في مطعم فتره مسائيه .
احدي السيدات التقطت صوره له أثناء عمله ونشرتها علي الفيس وعملت اشاره له ولطلابه وأصدقاءه وسخـ..رت منه ووصلتة لحاله نفسـ..يه صعبه جدا وحاليا بيتعـ..الج ،
- هي الناس ليه بتعمل كدا ؟ احنا وصلنا للمرحله دي ازاي ؟!

أستاذ الفاضل انا لا اعرفك ولكن احترم حضرتك لاانك قبل ما تكون مدرس فانت انسان محترم و زوج مخلص و أب جدير بكلمه أب لما تفعله من أجل أسرتك
- طبعا الشغل مش عيب بغض النظر عن نوع الشغل
- مش عيب أنه يعمل عمل شريف العيب أنه يعيش من متاجرة علمة على الطلاب مثل كثير من المدرسين

تحيه وتقدير للاستاذ الفاضل
الذي فضل العمل الشريف المحترم ليوفر احتياجات وطلبات بيته واولاده ♥️

28/02/2025

كل عام وانتم بخير اللهم اهله علينا بالخير واليمن والبركات رمضان كريم ❤️

27/02/2025

احدي اسالتكم

الفرق بين التهاب الحلق و التهاب اللوز الفرق بينهم
وانتي تروحي لدكتور بالضروره
🌸
بصي ي مامي الموضوع بسيط جدا عشان تعرفي الفرق بين التهاب الحلق والتهاب اللوز ركزي معايا لو ابنك بيشتكي ان حلقه بيوجعه بس مفيش حراره عاليه او معاه كحه ورشح يبقى ده ((( التهاب حلق عادي وده بيكون بسبب دور برد ومش محتاج مضاد حيوي هيخف بالسوايل الدافيه والعسل وخافض الحراره لو فيه سخونيه)) تمام كده ؟!

لكن لو ابنك عنده حراره عاليه جدا وصعوبة بلع وصوته متغير
ممكن يكون بسبب فيروس وده هيروح لوحده بالمشروبات الدافيه والراحه
في امهات شديدة الملاحظه بتفتح بوق الطفل و بتلاقي نقط بيضه او صديد على اللوز يبقى ده التهاب لوز
وساعتها لازم تروحي للدكتور

لو الدكتور شاف ان فيه التهاب بكتيري غالبا هيكتب له مضاد حيوي وده بيحصل لما يكون فيه حراره عاليه جدا من غير كحه او رشح

(( روحي للدكتور )) لو الحراره مش بتنزل بالادويه او لو ابنك مش قادر يبلع خالص او لو فيه ورم في رقبته او لو بقاله اكتر من تلات ايام ومفيش تحسن لحد ما تروحي خلي ابنك يشرب مشروبات دافيه ولو اكبر من سنه خليه ياخد عسل ولو اكبر من خمس سنين خليه يغرغر بمياه وملح واديه خافض حراره ورايحوه في البيت

27/02/2025

زي الايام دي وتحديدا في اواخر الشتا وتغيير الفصول
و مع تقلب الجو بين البرد والحر، مناعة الأطفال بتضعف وده بيخليهم عرضة لأمراض كتير مقسمهالكم علي حسب اجهزة الجسم

🦠 أمراض تصيب الجهاز التنفسي:

🤧 نزلات البرد والإنفلونزا – رشح، كحة، حرارة، واحتقان في الزور.
😷 التهابات الحلق واللوز – ألم في الزور، صعوبة في البلع، وحرارة عالية.
💨 التهابات الشعب الهوائية والرئة – كحة مستمرة، نهجان، وصوت تزييق في النفس.
👂 التهابات الأذن الوسطى – ألم شديد في الودن، بكاء مستمر، وصعوبة في النوم.
🌼 حساسية الربيع – عطس، انسداد في الأنف، حكة في العين، وكحة ناشفة بسبب حبوب اللقاح.

🤢 أمراض الجهاز الهضمي:

🦠 فيروس الروتا (النزلة المعوية الفيروسية) – إسهال مائي شديد، ترجيع، سخونية، وجفاف، وبينتشر بسرعة في الحضانات. الحل؟ تطعيم الروتا مهم جدًا لتقليل شدته وحمايه من .

🦠 أمراض الجلد:

🫧 الجديري المائي – حبوب مائية على الجسم مع حرارة وحكة شديدة، وبينتشر بسرعة بين الأطفال. مهم جدًا عزل الطفل المصاب علشان ما يعديش غيره.

🦠 أمراض بكتيرية منتشرة:

🔴 الحمى القرمزية – حرارة عالية، طفح جلدي أحمر، والتهاب في الحلق، ودي محتاجة مضاد حيوي.
👀 التهاب العين الفيروسي (الرمد) – احمرار العين، إفرازات، وحكة، وده بيزيد مع الجو المترب.

إزاي تحمي طفلك؟

✔ غسل الإيدين باستمرار يقلل العدوى.
✔ تهوية البيت كويس بدون تعرض مباشر للهواء البارد.
✔ أكل صحي مليان فيتامينات لتقوية المناعة.
✔ تجنب الخروج وقت العواصف الترابية لو عنده حساسية.
✔ لو تعب، يفضل يريح في البيت وما يختلطش بأطفال تانيين.
✔ لو الحرارة عالية أو الأعراض زادت، لازم دكتور فورًا.

حافظي على صحة صغيرك، ولو عندك أي سؤال اكتبيه في التعليقات وأنا هجاوبك! ❤️👶

21/02/2025

وحشتوني جدًا! بعد فترة انشغال طويلة، راجعة تاني معاكم بنفس الحماس وأقوى! الفترة الجاية هنتكلم عن كل حاجة تخص صحة أطفالكم، وهاجاوب على أسئلتكم زي زمان! قولولي إيه أكتر موضوع محتاجين نبدأ بيه؟”

19/05/2024

بالمناسبه في قاعده ف النمو عندنا
أنا مسمياها قاعده ٣-٦
يعني عند
-تلات اسابيع
-ست اسابيع
-تلات شهور
-ست شهور
ايه اللي بيحصل؟؟
الطفل بيحصله طفره في النمو و طبيعته ف الرضاعه بتتغير واحتياجه بيعلي
زودي عليهم اليوم العاشر مرضتشي اكتبها عشان مكسرشي القاعده
لو انتي ام مركزه كويس ومتابعه هتلاحظي طفرات ف طريقه الرضاعه ..دمتم سالمين 💟
د شيماء محمد الطيب
#النمو #طفلي #الرضاعة

10/04/2024

وصلني عدة اسئله عن امكانية اكل الطفل الرنجه و الفسيخ

ممنوع الأطفال تاكل الفسيخ و الملوحة لتجنب التعرض للتسمم الغذائي ولاحتوائه على نسبة عالية من الملح
طب بالنسبه للرنجه …ممكن لكن للأطفال أكبر من ٦ سنين

لكن لازم نشرب كميه كبيره من الميه
وياكل معها الخضراوات الطازجة
تكون الكمیة قلیلة
شراء الرنجة من مصدر موثوق

بالمره بقي هل ينفع الحامل والمرضع تاكل رنجه او فسيخ
ممنوع تماماً أكل الفسیخ وده علشان:
خطر التسمم الغذائي
احتباس السوائل وارتفاع ضغط الدم ولو بتتلكك ممكن تجيلها ازمة ربو وكحه ومشاكل هي في غني عنها

أما بالنسبة للرنجة:
ممكن للحامل والمرضعة أكل الرنجة
بس بشروط:
ضغطها يكون كويس ف الاساس
والرنجه تكون من مصدر موثوق منه
ناكل معها الخضراوات لمعادلة الصوديوم بالبوتاسيوم
شرب ميه كتير
كميه صغيره
وتابعي ضغط الدم وراقبي علامات الخطر من اهمها الصداع و الرغبه

شاركوا البوست ده مع كل أم حامل أو مرضعة أو عندھا أطفال، عشان نحافظ على صحتها
د شيماء محمد الطيب 🌹

11/03/2024

17/01/2024

بقي كل سنه من شهر نوفمبر حتي آخر فبراير
لحذر كل الحذر الطواريء مليانه كلها اطفال ناخد بالنا

الفيروس التنفسي المخلوى
دور البرد اللي ماشي دلوقتي … يمكن بقالي فتره يمكن مختفيه عن الصفحه
ومش طالعه عشان ترند اغلبكم عارف تخصصي الدقيق وهو الاطفال حالات الحرجه
الوضع الحالي لارتفاع نسبة امراض الجهاز التنفسي
والالتهابات الرئوية معدلاته اصبحت تستدعي التحذير
وتستدعي احد الاحتياطات
وتستدعي عدم الهلع ايضا فلا تهوين ولا تهويل ((لانه فيروس طول عمره موجود والعمر الذهبي للاصابه طول عمره كان من سن ٩شهور الي سنة ونصف ولكن بقاله فتره كنا بنشوفه بيصيب الاطفال حديثي الولاده وده كان لافت انتباهنا انتشاره ف العمر الصغير ده وحاليا اصبح بيصيب الاطفال اللي عمرهم اكتر من عامين
(الفيروس الخليوى التنفسي)
Respiratory syncytial virus
واللي بيضرب الجهاز التنفسي علي مستوى الخليه يعمل التهاب رئوى
ويضرب الشعب الهوائيه الصغيره فابيسبب ضيق ف الشعب
التهاب شعيبي broniolitis
الدور بيبتدى زى اي دور برد عادى جدا
انسداد انف وخنفره افرازات سخونيه بسيطه اوقات تكون غير ملحوظه و احتقان
وبعد يومين من البرد الخفيف تبتدى الاعراض تشتد
كحه ونفسه يزيد ويعلي يبقي سريع بينهج
وصوت تزييق الصدر الامهات يجو يقولو سامعه صوت صدره سامعه الخروشه سامعه الصفاره
وقد يصل الامر لصعوبه ف التنفس من الدرجه التالته والام تشتكى انه بيجد(grunt) صدره بيطلع وينزل ويدخل لجوه
تشخيصه مش صعب ابدا
المشكله ان هذا المرض طول عمره متواجد لكن مضاعفات الامر بحيث ان الطفل علاجه يتعدى جلسات بخار ودكاتره يوصفوله دوا او حجز ف عنبر عادى اعمل جلسات ومتابعه
الي حجز داخل رعايات
اهم ما يميز الطفل المصاب ب الفيروس الالتهاب الخديوى بالاضافه لما تم عرضه هو انك تلاقي الطفل مخنوق متضايق مزمزق ومتنرفز اغلبهم اول ما تلاقيه متدهور اعرف انك دخلت ف قصه التهاب رئوى ع الاغلب ربنا يستر علي اكمل اولادنا

تاخد بالنا ومنستهترشي باي دور برد الايام دى
طفلك حاله دور برد مينزلشي المدرسه ويعدى الاطفال
نحاول نلبس ولادنا ماسكات وهما رايحين المدرسه وتوصيهم بغسل الايدى وعدم التقبيل والسلام باليد واخذ مسافات امنه بينه وبين زمايله
نبتدى نقوى المناعه
سلفوزنك
فيتامين سي
اكل متوازن
سوايل دافيه
طول عمره فيروس مش قوى انتهازى بيستقوى ع الضعيف عارفين اقلق امتى؟ لما ابتدى اشوفه كتير ف الكبار
وقتها ..يبقي شكرا ..

د شيماء محمد الطيب

05/12/2023

من أعمال الأطفال الفنانين بالعياده حسن مش حسين ☺️❤️

19/10/2023

اقل واجب