16/01/2023
مع دخول الشتا بيبدأ الموسم الرسمي لأمراض كتير خاصة الأطفال، علشان كدا قررنا نعمل توعية من نوع خاص هدفها الأساسي هو صحة الأطفال ونشر طرق الوقاية وأساليب العلاج و المتابعة مع الاطفال علشان نقلل من انتشار الأمراض بين الأطفال...😊
🎯والبداية هتكون مع اشهر الأمراض المنتشرة بين الأطفال خاصة فى الشتا ده وهو الفيروس المخلوى التنفسي(RSV)..
- ويعتبر الRSV السبب الرئيسي في التهاب الرئة والمجرى التنفسي.
▫️طيب الأعراض بتاعته عبارة عن ايه؟!
الحقيقة أن الأعراض متفاوته حسب مناعة الطفل وعمره؛ بمعنى أن الأطفال الأكبر سناً والاصحاء الأعراض بتكون خفيفة جداً زي أعراض البرد العادي، لكن حديثي الولادة و اللي مناعتهم ضعيفة بيكون عندهم أعراض البرد لكن بصورة شديدة زي الحمى، السعال، الخمول، صعوبة التنفس، وازرقاق الجلد.
- وعادة الأعراض بتبدأ تظهر خلال ٤ الى٦ ايام من وقت الإصابة بالفيروس
🛑لازم نهتم جداً عند ظهور أي عرض لان إهمال الفيروس مع الأعراض الخفيفة قد يؤدي لحدوث مضاعفات منها الربو و التهاب الاذن الوسطى و الالتهاب الرئوي.
▫️و علشان كده لازم نعرف طرق الإصابة بالفيروس و إزاي نتجنبها!
- في كذا طريقة ممكن يتنقل بيها زي ملامسة الأماكن اللي الفيروس متواجد عليها، الاتصال المباشر للاطفال، و أشهرهم الانتقال من شخص مصاب أثناء العطس.
- ودول ممكن نتجنبهم بشوية عادات بسيطة هي موجودة في حياتنا لكن محتاجة تتبروز أكتر بسبب أهميتهم زي غسل الأيد بشكل متكرر والاهتمام بنظافة البيئة المحيطة وتجنب التعامل مع الأشخاص المصابة والامتناع عن التدخين.
- مع الأخذ في الاعتبار أن مفيش لقاح للفيروس لكن من خلال العادات ديه نقدر نتجنب الفيروس بشكل كبير...
▫️امتى يكون ضروري زيارة الدكتور؟!
في حالات العدوى الشديدة زي الحمى أو صعوبة التنفس أو ازرقاق الجلد خاصة الشفتين و قواعد الاظافر.
قولولنا أكتر العادات اللي بتحافظوا عليها علشان تتجنبوا الإصابة بالفيروس.👇
