20/04/2024
أيها السادة: اسمى الهيروين وشهرتى البودرة وساعات يدلعونى البيسة وساعات يقولوا عليا الحلوة.
أنا بدمر البيوت، بدمر العائلات، باخد منك الأطفال. هذه هى البداية. أنا أغلى من الذهب والألماس. ولو عايزنى سهل تلاقينى لأنى عايشة جمبك. عايشة فى مناطق الأغنياء ومناطق الفقراء، هتلاقينى فى المدرسة فى الشارع على القهوة. قوتى جبارة جربنى وهتشوف. فإذا جربتنى مرة واحدة ممكن أسيبك تمشى لكن لو جربتنى مرتين همتلك روحك. وعندما أملك روحك هتكون عبدى هتسرق، هتكذب، هتنصب، هتخون أقرب الناس لك. هخليك تعمل أى حاجة عشان تجيبنى. الجرائم اللى هتعملها تستحق المتعة اللى هتاخدها فى ذراعك. هخليك تسرق أبوك وأخوك وأختك هخليك تسرق أمك حتى وانت شايف دموعها وحسرتها عليك. هنسيك انك بنى أدم أصلا هنسيك دينك هخليك تنسى حتى الأخلاق اللى اتربيت عليها وهديك المبرر لكل شىء. هعلمك إزاى تشتغل نفسك. أنا باخد الشاب يا على السجن يا على القبر. أنا أدمر البيوت و العائلات وبفرق الأصدقاء. حرفيًا هاخد كل شىء منك. هخليك تبيع اللاب توب بتاعك، هخليك تبيع عفشك، تبيع ساعتك. هخليك تبيع موبايلك بتراب الفلوس، هخليك تبيع حتى هدومك. هفضل اخد واخد واخد وبعدين هسيبك لوحدك لما متلاقيش حاجة تديهالى. و إذا كنت محظوظ ولسه عايش أو مش مجنون أو مش مسجون. هخليك تندم ندم شديد بس خليك فاكر انت اللى جيتلى مش انا اللى جيتلك وأنا عارفة انك عارف ده لكن انت اللى تحديت قوتى تعالى خد بايدى هاخدك للجحيم.
