17/04/2026
امتى تعرفي إن ابنك او بنتك مش مرتاحين في الحضانة
لو حاجة من الحاجات دي بتحصل أو كذا حاجة منهم:
-فيه اهمال للطفل؛ لما بيعيط محدش بيهتم بيه، لما بيبقى محتاج حاجة مايلاقيش حد يساعده، الميس بتتجاهله كتير
-لو مافيش حاجة بتملى وقت الطفل هناك كويس، مافيش انشطة ولا اكاديمية و بيفضل قاعد زهقان معظم الوقت
حتى لو بيروح يلعب بس باللعب هناك طول الوقت، هيزهق .. لازم اليوم يبقى متنظم و فيه تنوع في الأنشطة
-لو فيه طفل تاني بيضايقه دايما و محدش بيمنع المضايقة
-لو الطفل وقت تغيير الدايبر، التعامل فيه شدة او الناني بتربط الدايبر جامد على رجل الطفل و بيفضل مضايقه و بيتعور منه
-لو وقت البوتي ترينينج فيه عدم احتواء و توتر و انفعال وزعيق من الكبار بيخلي الطفل مش مرتاح
-لو الطفل بيخاف من حد هناك بيزعق له جامد في التوجيهات و دايما بيتعامل بطريقة حادة معاه
-لو أي حد بيع.نف الطفل أو بيتعرض له بالض.رب
طب ايه العلامات اللي تبين الكلام ده؟
الطبيعي لو الطفل مرتاح و الإنفصال اتعمل صح و مافيش حاجة مضيقاه هيبقى نازل الحضانة و هو مبسوط اكنه خارج ..
ده بعد ما يكون فترة الإنفصال خلصت و العياط بتاعها اللي بياخد من اسبوع لإسبوعين خلص و الطفل بقى مستقر جوة الحضانة خلاص بقاله فترة و اتعود على الروتين الجديد بتاع صحيان بدري و نزول الحضانة
بس لو العلامات اللي تحت دي ظهرت على الطفل يبقى فيه مشكلة محتاجة منك متابعة للكاميرات و تحددي سبب عدم الإرتياح و تبلغي الإدارة بيه و هتلاحظي فرق في السلوك للأحسن علطول لما يتم علاج المشكلة
-لو النزول الصبح فيه مقاوحة و قريفة أو عند في كل خطوة
-لو دخول الحضانة مصحوب بقريفة و رفض او عياط عادي أو عياط هستيري و صويت
-لو وقت تسليمه بيجري من التيتشر بتاعته بعياط هيستيري و بيرفص جامد مش عاوزها تشيله
-لو الطفل بيتكلم و بيقول مش بحب الحضانة أو مش بحب الميس
-في الحالة الزعيق و الخوف من شخص
لو الطفل ماتعلمش الزعيق من البيت او مكان تاني هتلاقيه ابتدى يزعق في كلامه
هتلاقي الطفل ممكن يقلد موقف زعيق حصل معاه، كلام مش لايق انه يطلع من طفل، او اسلوب توجيه انت مش بتستخدميه في البيت
او اكتسب سلوك عدواني بيتعامل بغل و بيوجعك ( بيفرغ طاقة سلبية اتشحنها في الحضانة)
-في حالة الضر.ب
هتلاقي الطفل اكتسب سلوك عدواني شدته بتزيد بالتدريج مع الوقت لإن مصدر الضر.ب مش بيقف، و الطفل طبيعته البراءة، يعني لو شاف مشهد ضر.ب في التلفزيون ممكن يتخض منه و ممكن يجرب يعمل زيه بس لو لقى توجيه كدة غلط بيبتدي السلوك ده يقل و يقف في خلال مدة قصيرة ممكن توصل لإسبوع لو الموضوع علق قوي معاه
لكن طول ما هو بيتعرض للضر.ب باستمرار او شايف حد قدامه بيضرب باستمرار ده بيخلي السلوك بيتصاعد و مش بيقف بتوجيه طبيعي و الغضب يزيد و النظرة اللي في العين بتختلف من براءة و مجرد طفل بيجرب حاجة جديدة لنظرة مخيفة و مليانة غضب
ممكن قوي تلاقيه بيضر.ب بأسلوب معين لا يليق بطفل، هو انعكاس للقدامه و بيقلد اللي بيتعمل معاه
-ممكن الطفل يتكلم و يقول أنه خايف من حد بيزعق أو انه اتضر.ب .. بس أعتقد دي مرحلة بتبقى متأخرة شوية يعني الطفل اتعرض لده كذا مرة و بان في سلوكه بعد كدة اتكلم و عبر
في جميع الأحوال لازم تبصي في الكاميرات تحددي سبب الضيق مهما كان صغير عشان يا تعالجيه مع الإدارة ( في حالة خطأ طبيعي قابل للعلاج )، يا تاخدي طفلك و تمشي (في حالة خطأ غير مقبول red flag)
لو طفلك رجع يوم قالك انه اتضر.ب روحي الحضانة فجأة بدون مقدمات دوري في كل كاميرات اليوم ده حتى لو طفلك وجهك لشخص معين او مكان معين .. بصي في مكان توجيهه ليكي و بصي في باقي اليوم كله برده
ليه؟
لإن هم مش شرط يقولوا الشخص اللي ضر.بهم صح ساعات بيبقوا خايفين من المواجهة و يقولوا اسم حد تاني ممكن يكون ضايقهم برده بس مش زي اللي خايفين منه
هتقولي طب اعرف اليوم اللي اتضرب فيه ازاي؟
هو لو قالك اول ما طلع من الحضانة او في باقي اليوم بعد الحضانة يبقى نفس اليوم
لكن لو قالك و هو داخل الحضانة يبقى حاجة حصلت قديمة ( انت بقى عرفتي تربطي يوم كان مقريف فيه بزيادة و كان مش على طبيعته يبقى هو ده)
ودمتم دايما امهات اوعي ❤️
