03/06/2025
Aspiration
ابني شرق مني. اتصرف ازاي
الطفل الجميل ده اسمه محمود
يوم ١٥ رمضان ٢٠٢٥ زي اي يوم عادي في رمضان محمود بيتسحر زبادي
لكن اللي محمود ميعرفوش ان اليوم ده حرفيا هيقلب حياته،
محمود بيقطع ورقة الزبادي ببقه حد بيهزر معاه راح شِرِق وبلع ورقة الزبادي اللي في المنديل دي.
لوهلة الموضوع يبدو عادي الاطفال بتبلع جنيهات وزراير كل يوم وبعد يومين بنلاقيها في البراز وشكرا
صباح يوم ١٦ رمضان، فجاة وبدون مقدمات
ابتدت رحلة معاناه مع كحة عنيفة لا تتوقف ليلا او نهارا لدرجة ان محمود وأخواته وامه حرفيا مبيناموش
المعاناه بدات تتضاعف لما محمود بدأ يلف على الدكاتره
وكل دكتور بعلاج مختلف
مرة على انه التهاب شعب هوائية او لوز او احيانا جيوب انفية
لو العلاج قوي جدا الكحة بتهدأ قليلا
وبمجرد توقف العلاج الكحة بترجع تاني واعنف من الاول
لحد ما دكتور صيدلي وصفله عيادتي وجه سمعت منه كويس اوي وكعادتي اول كلمة باقولها للام (احكي بالتفصيل من اول ما بدأ التعب)
القاعدة الذهبية: خد هيستوري كويس توصل لتشخيص كويس
سمعت صدره وكشفت عليه كويس ووزنته لقيته خس كيلو ونص عن اخر وزن الام وزنته من شهرين
قولتلها الولد مبلعش ورقة الزبادي
الورقة دي دخلت الرئة ولن تتوقف الكحة أبدا إلا بعد خروج الورقة بالمنظار لانها غير قابلة للتحلل ولا بعد ٢٠ سنة
كتبتلها تحويل محترم بتفاصيل التفاصيل (ومعاه اشعة عادية على الصدر) عشان محدش يتحجج وميسمعش الام كويس (في ورقتين كاملين) وبعتتها بالتحويل لابو الريش الياباني
هناك في ابو الريش قابلها دكتوره صغيرة في السن قالتلها بالنص مفيش منه الكلام ده. شوية حساسية هياخد علاج وهيبقى كويس
طلعت على الشيخ زايد التخصصي نفس الكلام
طلعت على الشيخ زايد العام نفس الكلام
من مستشفى للتانية محدش راضي يعملها منظار
وآلام مش معاها تكلفة للخاص
لحد ما الكحة بقت اعنف من ان قلبها يتحملها والنوم بقى شبه مستحيل وبدأوا الجيران والمارة في الشارع يتواصلوا معاها لو نقدر نعملك حاجة، صوت كحة ابنك وجعلنا قلبنا
قررت تروح ابو الريش وتفضل قاعدة لحد ما يتحركوا وهناك انهارت من البكاء
وسمعها احد الدكاترة الاكفاء اللي قرر حالا يدخلها منظار رئة عاجل
وفعلا طلعوا ورقة الزبادي 💃🏻💃🏻🕺🕺واتحط تحت الملاحظة شوية وخرج، وانتهت المأساة في لحظتها ومشي من غير ما يحتاج حتى علاج بعد المنظار
قصة طويلة بائسة
من ٦ سنين حصلت نفس المشكلة مع طفل اسمه حمزة استمرت معاناته لمدة عام ونصف
والهيستوري كان خالي تمام
الحيرة سيطرت على عيلة حمزة كلها محدش مرتاح والولد لا يتوقف عن السعال ليلا ونهارا
لحد ما في يوم جالي مع والده ووالدته وعمه وأخواته وجدته معاه
جدته مصحصحة كده فوجهتلها كلامي، وباسالها عن طبيعة الاكل وباقولها بياكل كذا (لا) طب بيأكل كذا (لا)
طب بياكل لبان،جدته قالتلي لا من يوم ما شرق في لبانه من سنه ونص واحنا منعنااطفال العيلة كلهم من اللبان
ده كان هيفطس يومها
طب واحنا بقالنا اد ايه بنكح. قالتلي سنه ونص
قولتلها اطلعي على مستشفى الزهراء الجامعي قرب العباسية واعمل منظار رئة هتلاقي اللبانه، وقد كان بفضل الله وشطارة اطباء الزهراء الجامعي اللبانه طلعت وكان عليها فطر 😏😔
وبدا علاج فترة قليلة واتحسن جدا في ظرف ايام🕺🕺💃🏻💃🏻
🌹🌹🌹🌹🌹🌹🌹
الزتونة؛ خلوا بالكم من الهزار مع الاطفال وخاصة وهما بياكلوا
حط الهيستوري ده في دماغك
صورة محمود نشرتها بعد استئذان الأهل
احكي حكايتك كاملة للدكتور
ولو انت دكتور ومعندكش وقت اعتذر للعيان لحد ما تلاقي وقت
احترم شكوة الام وخليك وراها لحد ما تمسك طرف الخيط
المتابعين؛ شير للتوعية
