28/02/2025
كل عام و انتم بخير و صحه و سعاده يا رب
كل رمضان بتيجى لى رسايل عن الصيام اثناء الحمل .. مفهوم طبعا ان الشهر بنستناه من السنه للسنه و فرحه صيامه و العباده فيه ليها طعم و راحه بتكمل معانا بعده شهور .
الحامل اللى الدكتور بتاعها بيقول لها تفطر بتزعل و بحكم ان اللى حواليها صايمين بتتحرج تاكل و تشرب .. حتى و هى لوحدها !!!
دايما بافكر بناتى بثوابت فى دينا الجميل .. " كلكم راع و كلكم مسؤل عن رعيته " .. " ان الله يحب ان تؤتى رخصه" .. " لا ضرر و لا ضرار " حملته امه وهنا عل وهن"
يا حبيبتى .. افطرى .. كلى و اشربى . خدى نيه الحفاظ على حملك لان ابنك فى رعايتك
خدى نيه انك بتاخدى برخصه الرحمن الرحيم اللى الل بيحب يخفف عن عباده و العالم بضعفك و اللى وصف حملك من فوق سبع سموات انه " وهن" الكلمه اللى مفيش بديل ليها ممكن يوصف احساس الحامل
خدى نيه انك بتحافظى على صحتك و صحه ابنك
صومى بقلبك و بفكرك .. و افتكرى انك عندك الشهر ده 30 يوم مش ناقص منهم يوم تقدرى تقرى قران و تصليه كله
فكره هاعوض الصيام ده كله ازاى سهله ان شاء الله .. السنه فيها 52 اسبوع .. بعد اول سنه رضاعه تقدرى ان شاء الله تصومى كل اسبوع يوم هتعوضى الشهر فى اقل من سنه ان شاء الله .. اطلبى من زوجك يصوم معاك و يشجعك
الحامل اللى بتقرر انها ما تسمعش كلام الطبيب المعالج .. خلينا نفكر مع بعض .. ليه ممكن يكون طبيبك عايز يفطرك فى رمضان .. ما هو هيشيل ذنبك ! ليه هيعمل كده ! " اصل هو بيبالغ فى الاحطياط" .. ايوه ما هو صح كده .. لو فى اى شبه مضاعفات ممكن تنتج عن الصيام و معانا رخصه من ربنا ليه نعرض حملك للخطر .. هنقف قدام ربنا نقول ليه عرضناك او عرضنا ابنك لخطر – لا قدر الله .. ايوه هو وظيفته حمايتك !
مثلا مثلا .. مش منطقى تكونى على ادويه سيوله و يعدى اكتر من 12 ساعه بدون ميه – يعنى فى حاله جفاف- لمده 30 يوم ! ده مجرد مثال .. مش هاتكلم عن مريضه الضغط و السكرو الولاده المبكره و و و
لحظه ما الطبيب قال لحضرتك مفيش صيام اتنقلت مسؤليته قدام ربنا لحضرتك .. فلو سمحتى افطرى .. و افطرى بما يرضى الله .. ما تكسريش صيامك بنص كوب ميه ..
اللى الدكتور قال لها " لو قدرتى صومى " لو حسيتى بتعب او ارهاق او عطش .. خلى بالك ربنا عارف احساسك .. خدى رخصه ربنا و انتى فرحانه برحمته و حسى بحب ربنا ليكى و لابنك
و احنا صغيرين لما كنا بنشوف اساتذتنا – جزاهم الله عنا كل الخير – حرفيا بيتلككوا علشان يفطروا الحوامل كنا بنزعل منهم .. لما كبرنا و بقنا احنا المسؤليين و لقينا الحموامل فى العشره الاواخر فى المستشفيات بين ولاده مبكره( و اطفال فى حضانات) و التهاب فى الكليه و فتح كيس الميه و سكر و غده ملغبطين و و و فهمنا .. ان الجفاف اليومى فى رمضان ليه توابع
مره كنا فى سمينار قبل رمضان و البنات بتسال عن الصيام للبنات اللى بتستخدم اللولب و البنات اللى لبريود بتطول و اتفتح موضوع الحوامل .. قلت الكلمتين اللى فوق و فى بنات كان عندهم تحفظ .. وقفت بنوته فى القاعه و قالت اسمعوا الكلام .. انا كنت حامل السنه اللى فاتت و كنت مريضه سكر..ابنى توفاه الله علشان ما سمعتش الكلام .. ربنا يؤجرها خير و يصبر قلبها و يحفظ اولادنا جميعا . انا اسفه انى بانهى كلامى بالقصه دى .. بس عايزه اقول لكم .. بيكون فى بالنا كاطباء حاجات مش دايما بنحب نشاركها معاكم ..
ربنا يسعدكم و يحفظكم و يتقبل منا جميعا كل الخير فى الشهر الكريم
" ان الله يحب ان تؤتى رخصه"
صومى بقلبك
استمتعى بالصلاه طووووول الشهر
بحبكم
