23/08/2025
كل ما تحتاج معرفته عن الدواء الجديد Brinsupri 🌹👌
ده دواء Novel يعنى جديد لا مثيل له من قبل .. اتوافق عليه يوم 12 أغسطس بيعالج مرض Bronchiectasis .. عايزين نقسم البوست بتاعنا لـــ 3 عناوين يفهموك كل شىء:
1. نعرف الأول إيه هو المرض ده
2. نعرف زمان كان بيتعالج إزاى
3. نعرف الدواء الجديد قدم إيه مختلف
-----------------------------------
1. إيه هو توسع الشعب الهوائية (Bronchiectasis)؟
ببساطة الشعب الهوائية اللى جوا الرئة بتكون مرنة وبتوسع وبتضيق عشان تتحكم فى دخول وخروج الهوا وتطرد أى بلغم بسهولة 👍.
فى مرض توسع الشعب الهوائية .. للأسف الشعب الهوائية بتفقد مرونتها وبتفضل واسعة ومترهلة على طول .. زى الأستك اللى اتمط جدا وباظ.
لما الشعب الهوائية تبقى واسعة ومترهلة .. قدرتها على تنظيف نفسها وطرد المخاط (Mucus) بتقل جدا 👎.
فيبدأ المخاط ده يتراكم ويتجمع جوه الرئة .. ويبقى عامل زى مستنقع راكد 💧 .. المستنقع ده بيكون أحسن مكان لنمو البكتيريا وتكاثرها .. ومن هنا تبدأ مشاكل العدوات المتكررة مع المريض🦠 .. شوف الآن الصورة المرفقة فى البوست هتفهمها كويس جدا.
اللى بيحصل للمريض ده بيكون عبارة عن حلقة مفرغة مبتنتهيش بسهولة 🔄.
المخاط بيتجمع .. فالبكتيريا تنمو وتعمل عدوى 👿 .. جسمنا عشان يدافع عن نفسه بيبعت جيش من الخلايا المناعية عشان تحارب البكتيريا دى .. المشكلة إن جيش المناعة ده وهو بيحارب البكتيريا بأسلحته القوية (الإنزيمات) .. بسبب مشكلتين كبار:
الأول بيسبب إلتهاب فى الشعب الهوائية.
الثانى: بيدمر البكتيريا وكمان بالغلط بيدمر جزء من جدار الشعب الهوائية.
فلما جدار الشعب الهوائية بيتدمر أكتر، بيوسع ويترهل أكتر .. فيجمع مخاط أكتر .. فتنمو بكتيريا أكتر .. فيحصل التهاب أكتر .. وهكذا حتى نهاية عمر المريض🔄.
-----------------------------------
2. قبل الدواء الجديد اللى هنشرحه فى البوست ده .. كنا بنعالج إزاى؟
كان كل تركيزنا على التعامل مع نتائج الحلقة المفرغة دى .. مش الحلقة نفسها 🤔.
يعنى كنا بندى المريض مضادات حيوية لما تجيله عدوى عشان نقتل البكتيريا 💊 .. وكنا بنديله أدوية تساعده يطرد البلغم المتراكم ده 😮💨.
العلاج ده كان زى بالظبط ما تكون بتمسح الماية من على الأرض، والحنفية اللى بتنزل الماية لسه مفتوحة 🌊 .. كنا بنعالج العدوى، لكن سبب المشكلة الرئيسى .. وهو الإلتهاب العنيف اللى بيدمر الرئة .. كان لسه شغال ومستمر 💔.
-----------------------------------
3. الدواء البطل الجديد - برينسوبرى (Brinsupri)
فى يوم 12 أغسطس 2025 .. الـــ FDA وافقت على هذا الدواء الجديد
العلماء فكروا وقالوا .. بدل ما نفضل نحارب العدوى .. طيب إيه رأيك نروح على الحلقة المفرغة دى ونكسرها.
وجدوا إن الـ (Neutrophils) هى أهم نوع من "الجنود" فى جيش المناعة بتاعنا اللى بيسبب الإلتهاب ده 🤺.
المشكلة إن الجنود دى بتكون متحمسة زيادة عن اللزوم .. وأسلحتها (الإنزيمات) قوية جدا لدرجة إنها بتعمل تلف فى أنسجة الرئة وهى بتحارب 💥.
الدواء الجديد ده بقه فكرته عبقرية جدا وذكية ✨ .. بيروح لمصنع إنتاج الجنود ده اللى هو "نخاع العظم" .. وقبل ما الجنود (Neutrophils) تطلع منه وتروح للرئة .. الدواء ده بياخد منها الأسلحة الثقيلة والمدمرة بتاعتها disarmament ✔️ .. نزع السلاح 😅 .. ينزع الإنزيمات منها.
النتيجة إن الجنود دى بتروح الرئة عشان تحارب .. لكنها بتكون "منزوعة السلاح" تقريبا .. فبتقدر تؤدى دورها المناعى من غير ما تسبب الدمار الجانبى الكبير فى الرئة 🛡️.
-----------------------------------
💡الخلاصه فى جملتين:
برينسوبرى (Brinsupri) هو أول دواء فى التاريخ بيستهدف سبب الالتهاب الجذرى فى المرض ده .. مش مجرد الأعراض أو العدوى الناتجة عنه 💪.
مهم جدا تعرف إن الدواء ده بيتاخد كل يوم عشان "يمنع" حدوث النوبات الحادة (Exacerbations) .. يعنى دوره وقائى طويل الأمد .. مش علاج طارئ 🗓️.
-----------------------------------
منقول من صفحة الدكتور ابراهيم جمعة عبد القادر
