06/05/2026
واضح أن نظام الطيبات ده سمع جدا وبصراحة مكنتش عايزة اتكلم فيه قلت كده كده الناس مش هتصدق الكلام ده ولكن لقيت ناس فى الواقع بدأوا يقتنعوا بالكلام بس الاول هرد على بعض الحاجات نفطر لحمة وارز ؟
طبعا الناس بتبقى صاحية مالهاش نفس ومش بتفطر اصلا وده فى حد ذاته غلط
فيه ناس بتصحى تصلى الفجر ومش بتنام بعد كده فبتشرب كوب لبن او كوب زبادى
وبعد كده تفطر فطار محترم على الساعة ٩-١٠ ص والصح أن احنا لو هناكل وجبة دسمة أو حلويات بنفضل ناخدها فى وجبة الإفطار علشان ده اكتر وقت فى اليوم بيكون الحرق كويس ( يعنى لو تقدر فعلا تفطر اللحمة الصبح اعمل كده ومتخليهاش فى وجبة الغذاء أو العشاء )
- بالنسبة للبيض ( البيض من انظف واحسن مصادر البروتين وبياضه من احسن البروتين لمرضى الكبد ) فكرة الهجوم على. اللبن والبيض راجعة أن الدجاج او البقر بيتغذوا على أكل فيه هرمونات فبينزل فى تكوين البيضة واللبن ده اللى جاب الهجوم عليهم , مش لأنهم فى حد ذاتهم فيهم ضرر ،
أو أن فيه أشخاص بالفعل جسمهم عنده حساسية منهم فبيحصل ردود عكسية من الجسم .
أما لو انت واثق من مصدر البيض واللبن فتمام . كل ما نبعد عن اى حاجة معدلة أو مصنعة داخلة فى الاكل او مفيهاش مواد حافظة هيكون افضل .
نظام الطيبات ده داخله ٢٪ صح والباقى غلط علشان كده الناس صدقته ( يعنى مثلا البطاطس ، البطاطس من المصادر الغنية جدا بالبوتاسيوم ومليانة ألياف سهلة الهضم
بس نأكلها بطريقة صحية ومعتدلة ).
أما فكرة أننا نشرب عصائر ( وانا بتكلم هنا عن العصائر المصنعة أو (الطبيعية المحلاة بالسكر )كتير وناكل مربى ( اه احنا مش هنمنع نفسنا من أننا ندوق كل فترة بس ما يبقاش ده نظامنا الغذائى .
بالنسبة للجبنة الشيدر والمطبوخة
بيكون فيها نسبة بروتين أعلى بس
فيها دسم اكتر ( يعنى ما ينفعش تتاكل كل يوم ، أو مريض كوليسترول أو ضغط عالى يبقى ده نظام اكله ؟
_ لو مريض عنده مرض مناعى أو التهابات فى الجسم واعتماده كان على أكل فيه سكريات ودقيق ابيض حدة المرض بتزيد ولما بيقلل الحاجات دى الدنيا بتتحسن عندهم ، مريض عنده حساسية من اللاكتوز لما بيوقف منتجات الألبان الدنيا بتتحسن معاه ( بكلمكوا من واقع حالات شفتها عمليا ده غير الأبحاث
اللى اتعملت على ناس كتير وبتقول نفس الكلام )
أجسامنا مش زى بعضها وفيه ناس
عندها حالات مرضية .
فمينفعش نطلع ونعمم وتخليها قاعدة ، وما ينفعش حد يقوم يوقف علاجه ، اه فعلا فيه ناس بيكون عندها سكر نوع تانى أو ضغط عالى ولما بتظبط اكلها وتنزل الوزن وتزود الحركة كل حاجة بتتظبط وفيه ناس بتوقف العلاج ليه ؟ لأنها ظبطت اكلها ، نزلت وزنها ، زودت الحركة
انما لسه بياكلوا غلط ويروحوا يزودا الغلط ده ويقفوا كمان العلاج
ساعتها ماينفعش .
الفكرة عاملة زى اللى بيحط السم فى العسل .
وربنا قال فى سورة الأعراف أية رقم ٣١(وَكُلُوا وَاشْرَبُوا وَلَا تُسْرِفُوا)
دمتم بصحة وجمال / #دمروةالقزاز
#تغذية
#صحة
