24/12/2024
العيوب الخلقية بالقلب لدى الاطفال
الموضوع منتشر جداا خلال الفترة الأخيرة وعامل قلق للأمهات وخصوصا الى اطفالهم عندهم عيب خلقي فى القلب
طيب اى هو الموضوع واى ابعاده ..
الدورة الدموية داخل قلب الجنين مختلفة تماما عن الطفل بعد الولادة ولدلك فى حاجات بتكون موجوده عند الجنين لازمه لإكمال تبادل الغازات لكن بعد الولادة ملهاش لازمه واقصد ما يسمى بالوصلة الشريانية PDA ودى مفروض بتقفل مباشره بعد الولادة بمجرد ان الطفل يتنفس او يتعرض لضغط الولادة الطبيعي ..
حاجات تانيه زى الى بسمعها كتير من الامهات ان ابنها عنده ثقب وده بيحصل نتيجة فشل نمو الحاجز الى بين غرف القلب الأربعة اثناء تكوين الجنين وبناء عليه بيتولد عنده فتحه بين الجهة اليسرى واليمنى للقلب..
اى بقا السبب ..
فى اسباب مرتبطة بالأم زى الام الى عندها سكر او عندها مرض مناعي او بتاخد ادويه تشنجات او سيوله او بتتعرض للتدخين او تشرب كحوليات اثناء فتره الحمل .
لو الطفل مولود قبل معاده .
لو الام بتتعرض للإشعاع وما نقدرش نهمل طبعا الموبيلات .
لو فى طفل اتولد عنده عيب خلقي احتمال ان اخواته بعده يكون عندهم عيوب خلقيه بيزيد.
فى حاجات بتحصل بسبب خلل كروموزومى او طفره اثناء تكوين الجنين.
وفى طبعا حاجات بتحصل بدون سبب.
طيب امتى افكر ان الطفل عنده عيب خلقي فى القلب:
لو الام بتشتكى ان الطفل بينهج مع الرضاعه وما بيكملش رضعته للأخر او بينهج مع العياط او طفل بيزرق مع العياط .
ملحوظه : الطفل ممكن وهو نايم هادى فجاه يكون فى نهجان لمده ثوان بعدها يهدى ده طبيعى المقصود هنا نهجان مع المجهود وهو الرضاعه او العياط.
وقتها نكشف عند دكتور الاطفال واثناء الفحص بنحدد الطفل محتاج ايكو او لا والى يعمله متخصص فى قلب الاطفال وبناء عليه نحدد الخطوة الى بعدها لان مش كل الحالات محتاجه علاج .
بنسبه كبيره جداا بيكون الثقب صغير وما بيحتجش لعلاج وبيقفل خلال السنه الاولى بنعمل ايكو مره تانيه علشان نتأكد انه قفل وكل الى هيقابل الام خلال الفترة دى ان الطفل بينهج والى بيتحسن مع الوقت لحد ما بيختفى تماما.
اما لو الثقب كبير ومزود ضغط الشريان الرؤى وده بيحدده الايكو او الطفل بيجيله عدوى تنفسيه كتير او فى نهجان باستمرار فوقتها بيحتاج علاج عباره عن ادويه بتخف الضغط عن القلب وتقلل مقاومه الشرايين علشان ندى فرصه للثقب يقفل وبنسبه كبيره جداا بيقل تدريجي وبيقفل فى المتابعات
نسبه قليله جداا من الحالات بتكمل السنه الاولى بدون اكتمال قفل الثقب ووقتها بنتابع مع تخصص قلب اطفال لحين اخد قرار بالتدخل الجراحي الى غالبا عند ال3 سنين فى بعض الحالات .
الاطفال الى عندهم وصله شريانيه مفتوحه PDA بنديهم ادويه كمحاوله انها تقفل ولو ماقفلتش ومفيش تأثير على الطفل بننساها نهائيا اما لو مأثره على الطفل بيحتاج لتدخل جراحي.
وللعلم حالات كتير جداا بيكتشف ان عندهم عيوب خلقيه وخصوصا PDA وهما كبار يعنى كبروا طبيعى جداا بدون اى مشاكل لحد ما اكتشف الموضوع بالصدفة .
فى جزء من العيوب الخلقية لم اتطرق ليه وده معاه الطفل بيكون عنده مشاكل كبيره وده بيكون فيه تدخل جراحي بدرى ,بيكون الطفل غالبا ازرق ومابيزدش فى الوزن وبيتشخص بدرى غالبا وقت الولادة فده موضوع تانى خالص ..
الخلاصة..
لو اكتشفتى ابنك عنده ثقب او PDA مفيش قلق الطفل بنعامله طبيعى جداا.
مش كل الحالات محتاجه علاج .. حالات بسيطة جداا بتحتاج علاج .
نسبه بسيطة جداا الى بتحتاج تدخل جراحي.
اتعاملى مع الطفل عادى يعنى مفيش اى احتياطات زياده عن العادى ..
@الجميع
