22/10/2023
كتير مننا بيشتكي أن أولاده خاصة اللي عندهم اضطراب فرط الحركة ونقص الانتباه ADHD، عندهم مشاكل في الدراسة مع انهم اذكياء جدا أو عندهم صعوبات في تنفيذ أو إنجاز مهام مطلوبة منهم وممكن كمان مشاكل مع اصحابهم أو مالهمش أصحاب 🤦♀️
لما بنبدا ناخد بالنا من تفاصيل الشكوى بنلاقي أن الطفل ممكن يبقى عنده مشكلة واحدة أو اكتر من الوظائف التنفيذية للمخ .
طيب ايه هي الوظائف التنفيذية للمخ ❓
نقدر نقول انها بمثابة النظام الاداري للمخ بتاعنا المخ المسئول عن أداء الوظائف دي هو الفص الامامي للمخ.🧠
الوظائف التنفيذية تشمل :
1⃣التنظيم ،ترتيب الاولويات،البدء في اداء المهام:
الطفل اللي عنده مشكلة في الوظيفة دي بيواجه صعوبة في
* أنه مثلا يرتب جدوله أو ينظم غرفته .
*مش بسهولة يقدر يفرق ما بين ايه اللي مهم وايه اللي أقل اهمية .
*غير أنه مش بيبقى عنده وعي كافي بالوقت اللي محتاجه لأداء واجب مثلا او نشاط بيعمله.
*وممكن جدا يبقى صعب أنه يبدأ النشاط ده من الأساس.
2⃣التركيز والاستمرار في التركيز من غير تشتت والقدرة على نقل الانتباه إلى شيء آخر :🧐
*الطفل ده بيبقى سهل جدا أنه يتشتت بالناس أو الأشياء اللي حواليه.
*ومش بس كدة لكن ممكن أفكاره نفسها تشتته.
*كمان مش بسهولة نقدر نخليه ينقل تركيزه إلى شيء تاني غير اللي بيعمله، وبيحتاجوا وقت أطول في الانسجام مع المهمة الجديدة.
3⃣الذاكرة العاملة والقدرة على التذكر والاسترجاع:🤔
*الذاكرة العاملة هي المسئولة عن أن اطفالنا يقدروا يحتفظوا بالمعلومة لفترة قصيرة عشان يقدروا يستخدموا المعلومة دي في النشاط الحالي اللي بيعملوه.
*لو طفل عنده مشكلة في الذاكرة العاملة هيلاقي صعوبة: *أنه يتذكر التعليمات اللي طلبتها منه مدرسته.
* أو الطلبات اللي بنطلبها منه يشتريها .
*أو حتى خطوات المسألة الحسابية أو في حفظ الكلمات .
4⃣ الوعي بالمشاعر والقدرة على تنظيمها
*الاطفال اللي عندهم مشكلة في الوظيفة دي بنلاقيهم بيحبطوا من اقل حاجة .
*حساسين جدا ومش بيقدروا يتعاملوا ويعبروا بشكل سليم لما يكونوا غضبانين.
*كمان مش عندهم وعي كافي بمشاعرهم وازاي يعبروا عنها بشكل صحي.يعني ممكن ما يبقاش واخد باله أو ملاحظ أنه زعلان أو غضبان أو محبط ومش عارف الفرق بينهم.
5⃣ التحكم في الذات :💪
لو في قصور في الوظيفة دي الطفل بيكون مندفع .
*مثلا ما يقدرش يستنى دوره وقت اللعب .
* بيلعب بعنف.
* أو بياخد رد فعل عنيف من اقل حاجة ومش بيفكر كفاية قبل ما يتصرف.
وده بيعرضه لمشاكل وخطورة عليه وعلى اللي حواليه.
6⃣التخطيط وحل المشكلات:
أنه يكون عنده القدرة أنه يحط خطة بخطوات ويقدر يقيم الخطوات أو الحلول دي ويشوفها مناسبة ولا لا.
*لو طفل عنده مشكلة في الوظيفة دي بيدينا انطباع أنه تايه ومش بيعرف يفكر ولا يتصرف.
* مثلا مش عارف يبدأ يحل أي واجب أو يحط خطة مذاكرة لامتحان أو يفكر في حلول بديلة لما تحصل مشكلة في المدرسة أو مع اصحابه .
*وبيبقى بيطلب نوجهه في كل خطوة يعمل ايه .
أخصائية التخاطب /شروق جمال
