16/06/2025
فيروز غنت بشكل حزين وصادق وجميل
" ما عاد يلمسنى الحنين ".
هل ينتهى الحب ؟ ويفنى الحنين ؟
علاقات كتير بيكون الطرف الأكثر تمسكاً فى العلاقة والأكثر إيماناً لما بيدى فرصة واتنين وكتير للإصلاح وتنتهى العلاقة يجى يقولى بس يادكتور أنا مستغرب نفسى مش حاسس بأى حنين مش حاسس أنى بفتكر وبتأثر أنا بزعل بس على وقتى وعليا.
لأن الطرف بيفقد حنينه واتصاله للآخر على فترات وصدمات ومواقف بتغير من فهمه للآخر وبتهدد أمانه الشخصى والشخص لما بيخاف على ذاته بيفقد اتصاله بالعالم حتى لو ملاحظش ده فى الأول احنا بنفقد الحب على فترات.
-الحب معنى جامع جداً وتراكمى وصلاحيته بتتجدد بالتواجد والرحمة والفضل والاهتمام والذكاء فى توجيه الطاقة لكل ده
الحب فى النهاية معتمدة على طباع الشخص ومهارته الشخصية ونضجه وجزء من فشل العلاقات فى الزمن الحالى هو التصور الإعلامى المتوارث إن الحب بينزل من السما وبيحولنا وبيحركنا وكأن الحب هو المسئول عن الحفاظ عننا فى العلاقة مش احنا اللى مسئولين عن تطوير الحب فى علاقتنا.
-بشوف إن مبتدأ الشعور القبول هو رزق بحت وصدفة شخصية مابين اتنين لكن كل اللى بعد كده هو نضج ومهارة من الطرفين ممكن طرف يسبق طرف لكن ضرورى استقبال الطرف الآخر ورغبته فى الحفاظ على الحب.
-مهم نفهم إن الحفاظ على الذات أهم من الحفاظ على الحب لايمكن لروح ممزقة ومشتتة وحزينة أن تحب لكن يمكن أن تتعلق كالغريق والتعلق الزائد يفسد الحب.
لأن التعلق بفقد الذات قيمتها فى عينك وعين الآخر وبيحول المشاركة لدائرة الاعتمادية والتقصير.
وده شرحه الروائى وعالم النفس إرفين يالوم
عن الفارق بين التعلق والحب
(لكي يتعلّق أحد الزوجين بالآخر، يجب أن يتعلق بنفسه أولاً، فإذا لم نتمكن من اعتناق عزلتنا، فإننا سنستخدم الشخص الآخر كدرع لحمايتنا من العزلة).
-هل العلاقات بدون مشاكل؟
مفيش علاقات بدون اختلاف وصدام لأننا نسخ مختلفة واتجاهتنا مختلفة مهما بدت متفقة كما أن الخبرات المتوارثة اجتماعياً عن العلاقات غير كافية فتنمى بالتجربة والتصادم والتعديل ولاتوجد علاقة لاتستند على الرغبة والجهد والتغافل بما لا يضر بقيمة الذات.
-ليه لازم نحافظ على الحب؟
لأن الحب أحد أهم مسببات الراحة فى الحياة الحب هو الدفء والمشاركة الأعمق فى حياة مليئة بالصخب المزيف ولأن الحب لايتكرر كثيراً والحياة مرهقة ومهم نفهم إن الإنسان ممكن يتغير جزئياً لو امتلك البصيرة فى أنه محتاج يتغير / الرغبة / الجهد/ الوسيلة
وعشان كده فى علاج نفسى للعلاقات ومن أشهرهم emotionally focused therapy.
¥ هختم بكلمات فى مشهد عظيم فى فيلم before sunrise
ليه بتمسك باللى حبتهم حتى آخر نقطة “ ممكنة"
“ I guess when you are young, you believe that you will meet many people with whom you'll connect with, but later in life you realize it only happens a few times. “
🎬 Celine, Before Sunrise (1995).
