Dr-Ahmed Eed Saad د/ احمد عيد سعد

17/03/2026

البيبي ده قصته غريبة شوية الحالة دي والدة معايا قبل كده وبعتتلي يوم السبت اللي فات انه البيبي بقاله اربع ايام مبيتحركش فطبعا عنفتها جامد ازاي تهملي في حاجة زي دي وحركة الجنين من اهم الحاجات اللي الحامل لازم تاخد بالها منها المهم جتلي العيادة وبصيت علي البيبي لاقيت الدوبلر بتاعه سئ جدا والدوبلر ده بيحدد كمية الدم اللي واصلة البيبي هي كانت لسة في اول اسبوع في التاسع والخوف والقلق اننا علي ما نوصل المركز في اسماعيلية او فاقوس مكان فيه حضانة للبيبي مع حالة الضعف الشديد في الدم الواصل ليه توكلنا علي الله واتحركنا بسرعة علي المركز وجهزنا حضانة وكان في انتظارنا دكتور التخدير ودكتور الاطفال والحمد لله في خلال ساعة من طلوعنا من العيادة الحمد لله ولدت وربنا كرمنا ولحقنا البيبي والحمد لله محتاجش حضانة انهارده بننوه علي حاجة مهمة حركة الجنين من اهم علامات انه البيبي كويس ولو قلت لازم تستشير الطبيب المعالج وفي الاخر الحمد لله انه ربنا قدرنا وانقذنا البيبي ده والحمد لله الام كويسة بعد التوبيخ الشديد مننا علي عدم تركيزها في حركة الجنين والحمد لله الامور عدت كويس وربنا يكملها علي خير هي والمولود بتاعها
دمتم في رعاية الله وامنه

15/03/2026

ميعاد عيادة الصالحية غدا الاثنين من ١ الي ٤ قبل الافطار والثلاثاء نعود لميعادنا المعتاد بعد الافطار وكل عام وحضراتكم بخير

11/03/2026

السلام عليكم ورحمه الله وبركاته احنا انهارده هنتكلم عن حالة من حالات اللي بتمثل خطر كبير جدا علي حياة الام وهي المشيمة الملتصقة مشكلة الحالة دي انها ولدت قبل كده خمس قيصريات مش دي المشكلة المشكلة الاكبر انهم من اقرب الناس بالنسبالي في الصالحية ومعايا من اول ما فتحت العيادة وثقتهم فيا عالية جدا والصراحة الحالة دي بتحتاج مجهود كبير في التحضيرات والتجهيزات لفريق جراحي متكامل تأمينا لحياة المريضة وفيه حالات بتتوفي بسبب النزيف او تتحجز في العناية او تستأصل الرحم ودي اقل مضاعفات الحمد لله جهزنا الدم وحضرنا المريضة كويس واستدعينا فريقنا الطبي وحددنا ميعاد الولادة وتوكلنا علي الله والحمد لله ربنا قدرنا وحافظنا علي الرحم ونقلنا كيسين دم فقط والحمد لله الحالة بقت كويسة لكن لازم يحصل حاجة صغيرة كده حصلها سخونية ومكنتش عاوزة تيجي تكشف عندي قولتلهم يا جماعة الخير دي حالتي ومش بس حالتي دول يعتبرو عيلتي المهم عملنا تحليل بول طلع التهاب مكان القسطرة والحمد لله اتشخص واتعالج وهي بقت زي الفل
الحمد لله علي نعمه وفضله وبارك الله لهم في المولود ورزقهم بره

06/03/2026

السلام عليكم ورحمة الله وبركاته ده يونس الحمد لله ربنا كرمنا بيه بعد قصة كفاح طويلة وصبر كتير من الاهل الناس الطيبين الفكرة مش بس في انه جه بعد معاناة ولف كتير عند زملاء كتير وممتازين الفكرة في كمية الرضا اللي عند الناس دي وعاشن كده رينا اكرمهم وفي صورة من صور الوفاء والعرفان لاقيتهم جايين العيادة وجايبنلي الهدية دي الصراحة فعلا الواحد اتأثر جدا بان فيه ناس لسة بيقدرو المعروف والمجهود المبذول معاهم ربنا يباركلهم في الاستاذ يونس وبسرعة ان شاء الله نخاويه علي طول من غير وسايل ربنا يبارك فيه ويحفظه

26/02/2026

السلام عليكم ورحمة الله وبركاته الحكاية انهارده طويلة شويتين عشان بدأت من تلت سنين من اول ما الناس دي اتجوزت طبعا اول الجواز سألو عن دكتور حبايبنا دلوهم علينا مع ان الحالة دي اختها والده معانا مرة قبل كده المهم جاتلي هي وزوجها والصراحة ناس تتحب فعلا وطلع زوجها قريب حد غالي عليا اوي اوي الصراحة جت وكشفت وعملنا تحاليل شاملة واكتشفنا مشكلة في الغدة وراحت المريضة لدكتور غدد وتابعت مع دكتور غدة ورجعتلنا تاني والمهم بدأنا رحلتنا مف فحص الزوج وجدنا مشكلة بسيطة وتم بفضل الله حل المشكلة والتحليل اتحسن وبعد كده كملنا رحلتنا مع الزوجة وبدأنا بروتوكول العلاج وصلنا لنقطة اشعة بالصبغة المريضه قلقت وخافت فراحت لحد من اساتذتنا اللي أيد تشخيصنا وكلامنا وبالفعل عملتها معاه وطبعا الناس دي عشمهم معايا كبير فبعتولي الاشعة بالصبغة وقولتلهم انها محتاجة تدخل طبعا الواحد بينه وبين نفسه بيزعل من المريض اللي بيشكك فيك وفي تشخيصك بس برضه بيعذره وبالفعل عملو التدخل عند استاذنا وفضلت فترة محصلش حمل مع ان كل الامور اتظبطت من تحليل الزوج لتحليل الغدة للتبويض
وانا نسيتهم الصراحة في الوقت ده اختها كانت حامل وعلي وش ولادة وربنا كرمها الحمد لله وولدت الحمد لله بخير لاقيتهم جاينلي بعدها بفترة يقولولي احنا هنعمل حقن مجهرى معاك يا دكتور الصراحة استغربت جدا من الموقف انت لفيت كتير وشفت ناس في اماكن اكبر من الصالحية بكتير ايه اللي خلاك تيجي انا اعملك الحقن بالذات لاقيته رد عليا وقالي يا دكتور انا مفيش دكتور شاطر واسمه كبير الا وقال نفس كلامك في كل خطوة بنخطيها فانا قولت مدام التشخيص واحد وحضرتك اول واحد تابعنا معاه فانا هعمل معاك الحقن المجهرى الصراحة انا فرحت جدا جدا عشان ربنا اراد انه يظهر توفيقه ليا في التشخيصات من الاول والحمد لله بدانا نجمع حقن التنشيط وبدأنا بعدها بشهر وبعد كده ربنا وفقنا اختارنا بروتوكول مناسب وطلعنا عدد كويس من البويضات صالحة للتلقيح وعملنا عملية سحب للمريضة وبعدها زرعنا الاجنية والحمد لله نتيجة الحمل ايجابية ونزل عليها دم في اول الحمل وحصل قلق وفضلنا متابعين كويس لحد ما ربنا كرم والنبض ظهر والامور استقرت
وبقول الحمد لله انه بقي فيه حالات من الصالحية بدأت تصدق وتقتنع انه فيه اطباء في الصالحية بتعمل حقن مجهرى وبدأت قصة الحقن في الصالحية واتعلمته كويس علي قد ما ربنا يقدرنا ابتغاء وجه الله ونحاول نقدم الخدمة دي لأهالينا في الصالحية عشان ميفضلوش يتحملو مشقة السفر للقاهرة او الزقازيق والمتابعة هناك المتابعة بقت هنا واقرب وتوفيرا للوقت والمجهود
نسأل الله العلي العظيم ان يبارك لنا في ما علمنا ويجعله خالصا لوجهه الكريم
وان يرزق كل مشتاق بالذرية الصالحة
عيادة الاسماعيلية :عيادات كوينز التخصصية اما سوبر ماركت العمدة شارع شبين تليفون عيادة اسماعيلية ٠١٠٧٠٥٧٤٥٥٥

عيادة الصالحية القديمة شارع الترعة المردومة برج الجوهرة الدور الرابع تليفون ٠١٠٩٨٠٨٨٩٩٣

14/02/2026

السلام عليكم ورحمة الله وبركاته تهل علينا نفحات شهر رمضان الكريم بحالتين انهارده في العيادة كل حالة منهم ليها قصة حالة متجوزة بقالها سنه وجتلي بعد ما اخدت منشطات كتير قولتلها كفاية منشطات انت مش محتاجاها وان شاء الله يحصل حمل ومكتبتلهاش حاجة في الروشتة وجت بفضل الله حامل
الحالة التانية متجوزة بقالها ٤ سنين ولفت كتير برضه وحملت مرة وربنا ما ارادش انه الحمل يكمل ولفت بقالها سنتين وكان عندها مشكلة وربنا نور بصيرتنا الشهر اللي فات لتشخيصها وبفضل الله سبحانه وتعالي جت حامل
انا عادة مبحبش اكتب اي حاجة تخص الحالات الا بعد ما اطمن علي ان الحمل استقر والحمد لله بس انا حكيتلكم عن الحالات دي عشان احنا في رمضان وايام مفترجة ونتمني منك تدعولهم ربنا يكرمهم ويكملهم علي خير بفضل بركات الشهر الكريم

27/01/2026

ولادة طبيعية بكرية لام صبورة جدا بعد ما خلصت الشهر التاسع باسبوع الحمد لله الام والجنين بصحة جيدة بفضل الله وكرمه

23/01/2026

22/01/2026

السلام عليكم ورحمة الله وبركاته الحالة دي انا حكيت قصتنا معاها قبل كده وانها اول حالة حقن مجهرى من عيادة الصالحية دي كانت قصة ما قبل الحمل والحقن نيجي بقي لأخطر لقطة ومشهد في القصة كلها توقيت الولادة وظروف الولادة زاثناء متابعة الحمل وبنقيس الضغط عادي في الشهر السابع اكتشفنا ارتفاع في ضغط الدم وبدأنا علاج واخدنا حقن اكتمال الرئة وتابعنا الضغط وعملنا التحاليل وقربنا مواعيد المتابعة والضغط مبيستجبش واخر التامن لقينا التحاليل بدأت تسوء قررنا نولد اول يوم في التاسع طبعا قرار الولادة بدرى بس استمرار الحمل خطر عالام توكلنا علي الله واختارنا مستشفي مجهزة بعناية مركزة تحسبا لاي مضاعفات للام ومجهزة كمان بقسم حضانات عشان خطورة الحالة للام والجنين وتوكلنا علي الله دخلنا عمليات والفضل كله لله سبحانه وتعالي عدت الام والجنين بافضل حال والناس الطيبة دي قولت خلاص ربنا كرمها و حملت وربنا كمل فضله علينا وولدت الحمد لله بدون مضاعفات لا عليها ولا عالبيبي بعد ما اتحجزت في المستشفي يومين كاملين تحت المتابعة لاقيتهم جاينلي الاسبوع اللي فات بزيارة كبيرة جدا عالعيادة وبيعبرو عن شكرهم لربنا سبحانه وتعالي وشكرهم ليا علي المجهود الفكرة مبتبقاش في الهدية الفكرة فانه المريض بيقدر تعبك ومجهودك معاه وبتشكر ربنا علي انه نور بصيرتك ووفقك انك تدخل الفرحة علي الناس بارك الله فيه وجعله من حفظة كتاب الله وبرا بوالديه

15/01/2026

السلام عليكم ورحمة الله وبركاته انهارده هنتكلم عن حالة لم يسبق لها الزواج وسنها فوق ال ٤٥ سنة وتعاني من ورم ليفي كبير متغلل داخل انسجة الرحم ولفت علي اماكن كتير كله خايف ياخد قرار استئصال الرحم وجتلنا الحالة تعاني من تضخم بالبطن وبدأت تستشعر الخطر وهنا جه دورنا اننا نطمنها ونقولها انها عمليه سهلة وحضرنا المريضة كويس ودخلناها العمليات وكان القرار استئصال كل للرحم وعنق الرحم حفاظا علي عدم تكرار تكون الاورام
وقرار الاسئصال له عوامل كتير زي الحالة الصحية للمريضة و ورغبتها في الانجاب او رغبتها في الاحتفاظ بالرحم و سنها وكل دي عوامل تتدخل في القرار هل الحفاظ علي الرحم واستئصال الورم فقط ام الافضل اسئصال الرحم
دمتم في رعاية الله وحفظه

29/12/2025

البيبي ده وصل بعد ١٠ سنين جواز وباباه من اول ما شافني وهو ليقولي يا دكتور انا قلقان منك بس الحمد لله ربنا وفقنا ووصلنا البيبي ده بالسلامة لباباه اللي كام قلقان مننا بس الحمد لله قام بالسلامة ومحتاجش حضانة بفضل ربنا ثم تواجد الدكتور الخلوق د ابراهيم ابو الخير اخصائي الاطفال وحديثي الولادة