03/08/2024
"العشم والخذلان"
كل ما العشم يزيد كل ما الخذلان بيزيد هو كمان والعكس صحيح
يعني دا معناه ان حجم الخذلان اللي بنحس بيه بيتأثر علي حسب حجم العشم في الشخص اللي خذلك؟
مظبوط طبعا وعشان كدا لما بيحصل موقف من حد قريب مننا أول حاجة بنقولها بكل تلقائية "مكنش العشم"برضو .
من فترة حصل معايا موقف مش لطيف خالص من شخص اعرفه لما عرفت اللي حصل مازعلتش ولا اتأثرت نهائي صحبتي اللي كانت موجودة وحضرت الموقف بالكامل سألتني انتي ليه مازعلتيش لما دا حصل من الشخصية دي؟
قلتلها بكل بساطة اني ماكنتش متوقعة منها احسن من كدا يعني مفيش سقف عشم في علاقتنا عشان يتهد فوقي مش موجود اساسا فابناء علي كدا تصرفها ماضايقنيش لإنه صدر من شخصية مفيش توقعات بيننا.
يبقي عشان تحافظ علي نفسك من مشاعر الخذلان اللي في الواقع بتكون مؤلمة لازم تعرف حاجة مهمة جدا ان مش كل الناس ينفع تدخل دايرة العشم والتوقعات بتاعتك لإن مش كل الناس هتتصرف زي مانت مستني او بمعني اصح زي مانت متعشم ❤️
