دكتور باسم خلف

04/12/2025

خميس لطيف عليكم يا حضرات!!!
لما تكشف مع طبيب إخترته بعد سؤال وإطمأن قلبك إليه!!!
لا تقرأ ما هو داخل العبوة مادمت غير متخصص!!
ولا تسأل العاملين بالصيدلية عن جدوى العلاج
وهل هو مناسب أم لا ؟؟؟
وإذا كان لديك أى تساؤل فلتتواصل مع طبيبك مباشرة!!
ولتسأله عن مخاوفك!!!
ولا تسأل شات جى بى تى أو جيمنى عشان هيوديك ورا الشلالات!!!!
ومتسأليش حماتك أو والدتك أو سلفتك ولا تآخدى علاج بتديه لعيالها وتقولك ده حلو وريحهم عشان ممكن يتعب ولادك أكتر !!!
ولو مصاحبة دكتورة ولا قريبك دكتور فى السعودية متصوريش الروشتة وتآخدى رأيه فى علاج لطفل مشافش حالته أصلا أو فى تخصص غير تخصصه!!
يا ريت محدش يشغل دماغه معانا فى الطب خالص !!!!
بكلمك بأمانة
كل الحب

03/12/2025

كح كده يا بودى ورى الدكتور يا حبيبى !!!
خلاص يا أم بودى أنا هسمع صدره بالسماعة!!
لأ يا دكتور لازم تسمعه وهو بيكح !!!!
قرب كده وكح فى وش الدكتور يا بودى عشان يسمع الكحة!
هو وش الدكتور ده ملوش أهل يسألوا عليه يا ست أم بودى!!
مش ناقص غير تقوليله بوس الدكتور فى بؤه عشان نتأكد إنه لبس الدور كويس !!!!
كل الحب لبودى وذكاء أم بودى ......

02/12/2025

طيب مش محتاج مضاد حيوى يا دكتور؟؟؟
خلاص نديله مضاد حيوى مفيش مشكلة!!!
طيب كتر المضادات مش بيضعف المناعة يا دكتور؟؟
فعلا بيدمر المناعة خلاص بلاش مضادات!!!!
نكتبله مضاد شراب ولا حقن أفضل يا دكتور؟؟؟
شراب طبعا أفضل من الحقن والشكشكة!!!
ما هو بيرجع أى دواء يا دكتور؟؟؟
خلاص يبقى نآخد ٦ حقن !!!!
طب ما الحقن بتعمل حساسية يا دكتور؟؟؟
بتعمل صحيح حساسية فعلا!!!
طب وبعدين يا دكتور هنعمل إيه؟؟؟
لا يا فندم إنتوا مش محتاجين دكتور!!!!
إنتوا محتاجين الشيخة خديجة المغربية لرد المطلقة وجلب الحبيب!!!
لكن أنا معنديش مضاد حيوى لبوس !!!
ولا عندى فيتامينات حقن تنفخ العيل وتلظلظه!!
بكلمك بأمانة
كل الحب

02/12/2025

إحمينا يا رب من شر الفجأة!!!!!

01/12/2025

التشخيص ايه يا دكتور

الدور اللي ماشي 😅
بجد والله 😅

01/12/2025

لما يجيلك رسالة وإنت فى البيت إن المرتب نزل!!!

30/11/2025

30/11/2025

يا مساء العناب!!
الحاجات دي بقيت بشوفها كتير في العيادة ؟؟؟
أنا ماليش اني احكم على حضرتك تحطي حلق او متحطيش
بس ارجوكي افهمي ان مكان الحلق الطبيعي هو في شحمة الأذن لأن فيها دهون فقط وعشان كده آخر مشاكلها مجرد التهاب في فتحة الحلق او احمرار او حساسية؟؟؟
الجزء الباقي دا غضروف ولو حصل فيه التهاب يموت الغضروف دا ويتكلكع ودا غير العقد والتشوهات اللي في الصورة التانية!!
بلاش المخاطرة العنيفة دي لأنها بصراحة عواقبها صعبة جدًا وممكن لو متعالجتش تسيب اثر مستمر ومحزن!!!!
كل الحب

29/11/2025

الدور الجديد ما شاء الله كامل متكامل اللهم إحفظنا ;
ترجيع موجود!!!
إسهال شغااااااال!!!!
كحة وماله!!!
رشح وجيوب أنفية وإلتهاب أذن وسطى موجود!!!
حموضة وحرقان فى فم المعدة ده أكيد!!!
والغريب والمميز معانا ؟؟؟؟
نوم وهمدان كتييييير!!
إزدياد معدلات نزيف الأنف!!!

29/11/2025

السؤال ده بيلخبط الأبهات جامد!!
والأم بالعكس تقولك خمس سنين و٣ شهور ويومين!!!

28/11/2025

جمعة مباركة على حضراتكم جميعا.
الدور إللى ماشى حاليا معاه حرارة شديدة ورخمة!!!
مش مهم إيه إللى ماشى ولا إيه نوعه؟؟؟
ممكن إنفلونزا موسمية أو فيروس مخلوى أو كوفيد!!!
المهم بالنسبة للحرارة نتعامل إزاى؟؟؟
دش ماء فاتر يبرد تدريجيا ربع ساعة على الأقل!!
ممنوع الخل والكحول فى الكمادات !!!!
ممنوع لبوس دولفين ١٢.٥ قبل سن سنة!!!
ممنوع لبوس دولفين ٢٥ قبل سن ٨ سنوات!!!
مش عشان ننزل الحرارة نخرب المعدة والكلى!!!!
ممنوع الجمع بين كتافلاى ودولفين وبروفين وكونتافيفر
وإنما هتختار واحد مناسب من إلى فوق دول مع سيتال!!!
الحراة ممكن تستمر من ٣ إلى ٥ أيام مفيش مشكلة!!!
المهم نبقى متشخصين صح وبنآخد علاج مظبوط!!!
كل الحب

27/11/2025

خميس لطيف عليكم يا حلوين!!!
فيه بوست منتشر بخصوص مواعيد الأطباء
وتأخرهم بالساعات عن مواعيدهم
وطبعا صاحب البوست قافل التعليقات
ورجع نشر إعتذار فى آخر البوست ليتدارك خطأه!!!
مبدأيا أنا كطبيب قضيت وقت إنتظار كتير جدا فوق ما تتخيل فى إنتظار العيادات والمستشفيات لنفسى أو لأهل بيتى ومكنش عندى مشكلة فى ده وياما إعتذرت عن شغلى أو نزلت مجبر مثلا وأولادى محجوزين فى المستشفى!!!!
المناسبات الإجتماعية كلها فاتتنى من أفراح وخطوبات وأعياد ميلاد وخطوبات وجنائز ومعازى لدرجة إنى متأكد إن جنازتى مش هيبقى فيها حد يشيل الصندوق لحد المدافن!!!
الطبيب فى مصر بيشتغل فى ٣ أو ٤ أماكن عشان يقدر يوفر متطلبات حياته ويعيش حياة لائقة !!!
فى حمل زوجتى الأول إنتظرت أستاذة النساء إللى هنولد معاها فى العيادة من ١١ ظهرا إلى السابعة مساء وفى الولادة الثانية إنتظرت الطبيب لأكثر من ٧ ساعات فى العيادة بدون أى ضجر أو تأفف بل وألغيت مواعيد عملى بصدر رحب وذلك لتفهمى بأنهم لم يكونوا يحتسوا القهوة والأرجيلة على المقهى المجاور وإنما كانوا يكافحون لإنقاذ حياة مريضة بين الحياة والموت !!!!!
ويمر أسبوع لتظهر على زوجتى علامات ولادة مبكرة فى الشهر الثامن ونتوجه للمستشفى بدون مواعيد سابقة ويضطر الأستاذ الدكتور إلى إدخال زوجتى فورا للعمليات وترك عيادته وفيها ٤٠ مريض فى إنتظاره لأكثر من ساعتين!!!
فى كل دول العالم لا يوجد نظام صحى مثل الموجود فى مصر و لا توجد عيادات خاصة ومستشفيات حكومية تخشى الناس دخولها لتدنى مستواها ومستشفيات إستثمارية تخشى الناس دخولها نظرا لتكاليفها المرعبة !!!
وبالنسبة للأطباء فى الخارج فهم يعملون لساعات محددة فقط داخل مستشفى مجهزة وبأجر مجزى لهم يكفل لهم الحياة الكريمة!!!
وأما فى مصر فالوضع مختلف تماما حيث يعمل الطبيب فى أكثر من مكان صباحا ومساء حكومى وخاص وتأمين صحى لدرجة أن كثيرا من شباب الأطباء يصاب بسكتات قلبية فى أوقات العمل الرسمية من شدة الضغط العصبى والتوتر!!!
أنا عن نفسى وأغلب زملائى أكيد مش بنعامل العيادة كالميكروباص نتركه يمتلئ بالركاب لننطلق ولو سئلت أى طبيب سيخبرك أنه يفضل العمل فى هدوء عن العمل تحت ضغط الزحام والتوتر!!!!
التأخير أكيد بيبقى غصب عننا والله !!
إلتمسوا لينا الأعذار وبلاش تصب غضبك على الطبيب
أو على أحسن الفروض تقعد تحسب دخله بشكل لا إرادى
وتشوف عمل كام كشف ودخله كام النهاردة !!!!
خليك إنسان رحيم وعلاقتك بربنا كويسة
عشان ربنا يكرمك بدكتور رحيم يتقى الله فى مرضاه!!!
كل الحب