12/02/2026
أكتر حاجة بتتعب القلب الحاجات اللي ملهاش كتالوج واضح
لا هي علاقة مفهومة
ولا نهاية محترمة
ولا وجود مريح
دايما تايه حيران مش فاهم
دماغك شغالة مش بتفصل عاوز تفهم ليه وامتى وازاي؟
صداقة تقلل منك شوية شوية
مكان تكون فيه وجسمك حاضر وقلبك مُنقبض
علاقة غامضة ملهاش اساس واضح بترجع وتختفي وتسيبك في أسئلة وحيرة
علاقة النهاردة حبيبي وبكرة عدوي ومش طايقك
علاقة النهاردة بشاركك وبتكلم معاك وبكرة صامت ومُتجنبك
وتفضل سايب الباب موارب لَيكون المشكلة فيك وفي قيمك او تُشك في تربيتك وثقافتك او انك حساس أوفر او بتحسبها اكتر من اللازم🤕
مربوط متعلق مش عارف تمشي ولا قادر تكمل😪
هنا محتاج تسأل نفسك أسئلة👇
هل وجودك في العلاقة دي بيزيدك ولا بيستهلكك؟
هل بعد اللقاء بتحس بخفة ولا بثقل؟
هل بتكون على طبيعتك ولا طول الوقت بتتجمّل علشان ترضي؟
هل في أمان ولا في قلق؟
هل في وضوح ولا في توهان؟
وهنا نقطة مهمة👇
مش كل باب يتقفل يبقى قطيعة
ومش كل انسحاب يبقى قسوة
وهنا مش دعوة لقطع العلاقات هي دعوة لحماية الروح من الاستنزاف والأمراض
مش معنى إنك طيب تفضل في مكان بيكسر طاقتك وبيستغلك أسوء استغلال
ومش معنى إنك بتحب الناس ومعطاء تنسى نفسك
في علاقات مهما حاولت تصلحها وتستحمل وتصبر بتفضل تستنزف وتدمرك أكتر ما تبني
وفي ناس نيتهم كويسة بس أسلوبهم مؤذي لقلبك
في علاقات تطورك وتطلعك للنور فعلًا وفي علاقات تحتاج إحسان وصبر ومحاولة للإصلاح
وفي علاقات الإحسان فيها إنك تبعد بهدوء او تعمل حدود او تسيب مسافات او تعمل بلوك من غير دوشة
حسب تراكمات المواقف وطبيعة الاشخاص اللى فيها
حافظوا على قلوبكم عشان تفضلوا قادرين تحبوا ومتوصلوش لمرحلة التعميم (كل الناس غدارة كل الناس استغلالية كله بتاع مصلحته)
اقفل الباب الموارب اللي يوجعك ويتَوهك لانك تستحق لروحك الهدوء ويكون عندك مساحة للي جاي يبقى واضح مريح إنساني متفاهم 🤍🌿
ويبقى الاثر🤍🌿
