07/01/2024
و يجى بقى السر الخفى ورا كل حاجه و هى (البركه )
اللى ممكن تختفى مع الكتير و تزيد اوى مع القليل او مع الكتير و البركه تطمنك و تحسسك بالامان و ان رزقك فى السماء موجود بس بمعاده حيوصلك اطمن .
البركه تأكل ٥٠ نفر من حاجه تكفى ١٠ و متعرفش ازاى
البركه تخلى محفظتك مليانه مع انك فاكرها فضيت
البركه ان بيتك مفتوح مع ان الحسبه بتقول ازاى
البركه ان صحتك بتتحسن مع ان الدكاتره مقالوش كده
البركه ان يطلعلك شخص متعرفوش يقولك روح يا شيخ ربنا يفتحها فى وشك مع انك كنت لسه فاكرها قفلت.
البركه ان لبسك اللى بقالوا ميت سنه يبقى احلى لبس و انت فرحان بنفسك فيه.
البركه انك تلاقى ١٠٠ جنيه فى جيب الجاكت و تفرح بيهم فرحه ال ١٠٠ الف.
البركه انك اما تدخل سريرك تقول الحمد لله ايه الكرم ده يارب مع انه عادى سريرك اللى بتنام فيه كل يوم قلقان من بكره.
البركه ان كل الحسابات بتقول حكمل الشهر ازاى و …بتكمل الشهر .
بتضيق و تخلص كل اللى معاك و تفضل تفكر فى الف فكره حعمل ايه
و تفرج لوحدها بالقليل بس يبقى ساعتها كتير و لما يبقى معاك الكتير تحس انه قليل .
و تطلع اخر ما عندك و تفرج كرب حد و تحتار ده كان صح و لا غلط و تفرج و بسرعه ربنا يقولك كان صح عشان متلحقش تندم.
البركه موجوده بس احنا اوقات مش بناخد بالنا.
