22/05/2024
صباح الفل والياسمين....كلامي النهاردة للامهات اللي غرقانين في موسم الإمتحانات والمذاكرة مع اولادهم..اولا تحية وتقدير لكل ام غرقانة في مناهج الإبتدائي العقيمة واللي بتذاكر مع أولادها بكل تفاني واخلاص.....البوست دة مش بناقش فيه نقطة المفروض نذاكرلهم ولا لا😁 البوست دة علشانك انت يا مامي يا جميلة..عايزاكي تعدي الفترة دي باقل خسائر تغذوية😉واقل رقم على الميزان...تعالو نشوف اللي,بيحصل ونحط حلول..
اولا خلينا متفقين انها فترة سخيفة وبايخة مليانة stress ومناهدة ومفيش خروج ولا رياضة وطبعا مفيش حاجة تهون العصبية والضغط دة غير تلاجتنا حبيبتنا ومالذ وطاب ..وعلشان الخيبة تكمل الجو كمان تلج...يعني كل حاجة بتقولك كلي..عكي....طز في اي حاجة 😁😁 صح ?
طيب وبعدين الامتحانات تخلص..عايزين نفسح الولاد. وناكل برة ومش,عارفين نمشي على نظام ..مممممم....يبقى نعدي بس اجازة نص السنة..نيجي بقى بعد الاجازة نلاقي كدة شكل جسمنا وميزانا حاجة كارثية....واللي,يحصل حاجة من اتنين يا اما إحباط رهيب وانا كدة كدة فاشلة واكمل اكل..يا اما دايت قاسي اموت نفسي فيه و يدخلني في,سكة مجاعة و بردو مش حخس. 🙈🙈🙈🙈🙈🙈🙈 ايه السواد دة....لا لا نفوق بقى كدة من اولها علشان نعدي الفترة باقل خسائر..يلا بينا نشوف
1️⃣ خلي جنبك شوية مكسرات اد كبشة ايدك....مع قهوة او شاي...حتطلعي فيهم توترك واقل اقل خسائر مع شوية اوميجا ((حطي للولاد كمان ..مفيدة أوي اليومين دول ))
2️⃣الفشار الفشار الفشار....كليه واحدة واحدة وقللي الملح وحطي للولاد وكأنك بتكافئيهم على أي حاجة في المذاكرة (بس انت عاملاه لنفسك😉)
3️⃣خلي عندك فاكهة وخضار مقطعين جاهز في,علب تابروير..علشان لما تجوعي تبقى سهلة تاخدي منها قبل,الشيطان ما يلعب بيكي
4️⃣زي ما بتعمليلهم كيكة حلوة كدة علشان تشجعيهم..اعملي,لنفسك اي كيك الشوفان وسكر دايت تبقى جاهزة لما تحبي حاجة مسكرة مع الشاي وطبعا ناخد منها بالمعقول..فيه طرق ووصفات كتير
5️⃣الجو برد وكلنا رايحين جايين نشرب حاجات سخنه مشكلتنا في السكر بتاعها العادي او الدايت...عندي بنوتة بتابع معايا قالتلي فكرة حلوة..احمد تي بالنكهات..طعمه حلو ومن غير سكر.....دلعي نفسك وهاتي كذا نكهة
6️⃣النقطة دي بقى لاصحاب الهمم والعقول واللي,مش حيمشو ورا كلمة تعبانة او مفيش وقت.......ربع ساعة..١٥ دقيقة تعملي تمارين. walk at home قدام الtv وخلى الولاد يعملو معاكي...سيبك انت من الوزن والخسسان...حتاخدي من ال١٥ دقيقة دول شوية باور و طاقة ودفا وحتطلعي فيهم توترك وتخلصي تلاقي نفسك سعييييدة من شوية السيروتنين اللي طلعو
7️⃣شوربة العدس لو عملتيها بشوية عدس ويصل وتوم من غير دهون ولا بطاطس حتطلع تحفة بردو
8️⃣شوكلاتك الدارك المحترمة في باب تلاجتك..حمادة اتغابى معاكي في الماث سيبيه وقومي واعملي فنجان قهوة بايدك الحلوة دي مع مكعب شوكولاتة افصلي بيهم وارجعي بططيه عادي😁😁😁😁
ايوة كدة اضحكي....الدنيا مش مستاهلة......يومين وحيعدو..يعني انت فاكرة كنت جايبة كام في ماث رابعة ابتدائي ولا دراسات سادسة...يختي بلا هم😉
ودمتم بخير وصحة وسعادة ورشاقة
#ماما بتذاكر واخصائي تغذية بتعافر
