د.أمنية أشرف - إستشاري الطب النفسي

13/10/2022

قواعد في الحياة مريحة نفسيا، وبتهون من مشاكل وضغوطات كتير :
-مفيش حد بياخد كل المميزات في حاجة معينة، ومفيش حد بياخد كل حاجة..
-حياتك عمرها ما حاتكون Perfect في كل شيء..
-احنا في دار اختبار مش في الجنة، عشان كدة لازم دايما فيه حتة ناقصة...
-كان نفسك الحتة الناقصة دي تكمل؟ يبقى فيه حتة غيرها كانت حاتنقص..
-"التسليم لله" قيمة مهمة حاول تستحضرها لما تتحط في أي ظروف خارجة عن ارادتك وملكش يد فيها، بعد ماتكون عملت اللي عليك طبعا على قدر طاقتك (لا يكلف الله نفسا إلا وسعها)..
-لما الدنيا تتلخبط وتتوه في النص، افصل الجهاز واعمل restart ، وهات مالأول : "انت أصلا ايه بوصلتك في الحياة وايه الهدف من انك تتخلق وايه المطلوب منك؟"..
امسك طرف الخيط مالأول واوصل بيه لحد مكان العقدة، وقتها حاتقدر تفكها بسهولة..

لو المعاني دي مش موجودة في منظومة القيم والأفكار بتاعتك، للأسف حاتفضل تايه وحاتعاني من مشاكل في حياتك كتير لأنك ماشي على كتالوج غلط..

22/09/2022

هل تعلم أن الإدمان لا يقتصر فقط على إدمان المواد المخدرة، وإنما قد يشتمل أيضا على إدمان سلوكيات أخرى، كإدمان الإباحية والعادة السرية والعلاقات الجنسية؟ ...
وإدمان تلك السلوكيات لا يختلف كثيرا عن إدمان المواد المخدرة- كالحشيش، والكوكايين، والترامادول، و...، إلخ- بكل ما يترتب عليه من أضرار نفسية كزيادة الاكتئاب، وأضرار عضوية كالإجهاد والاضطرابات الجنسية، وأضرار اجتماعية كالانعزال وتأثر العلاقة الزوجية، وأضرار وظيفية كالتأخر الدراسي وقلة الانتاجية وفقدان الدافعية للعمل ... فسواء كان الإدمان إدمان لتعاطي مواد مخدرة ، أو إدمان لسلوك كالإباحية ومشتقاتها ، فكلاهما يتشابه في تأثيره على الدوائر العصبية بالدماغ، وذلك من خلال زيادة إفراز مادة الدوبامين Dopamine في المخ التي تسبب الشعور المؤقت بالنشوة والسعادة، يتبعه بعد ذلك خلل على المدى الطويل بالدوائر العصبية الموصلة من وإلى مركز المكافأة بالمخ Reward center ، وهذا الخلل هو ما يظهر على هيئة الأعراض والسلوكيات الإدمانية أيا كان المسبب لها..

وأما عن امكانية العلاج فهو متاح لكليهما، ولا يوجد اختلاف كبير بينهما من حيث وجود أعراض انسحابية جسدية ونفسية يجب التعامل معها، ومن حيث الحاجة لوضع خطة للتأهيل والتعافي من الأفكار الإدمانية لمنع الانتكاسات في المستقبل ...

أما الأهم من كل ذلك هو الإعتراف بوجود مشكلة، ثم الرغبة في التعافي منها، ثم اتخاذ قرار العلاج، وأخيرا البدء في تنفيذ القرار حالا، ودون أي تسويف ..

وللبدء في التنفيذ ينصح بالانضمام فورا لمبادرة واعي ومتابعتها، حيث تشتمل على نخبة من المختصين في مجال مكافحة الإباحية ومشتقاتها ومجموعات دعم للراغبين في التعافي من هذا الداء الخبيث، والذي أرى من واقع خبرتي العملية أنه بات ينتشر بشدة بين الكثيرين.. ❤️

وأخيرا ...لنقل جميعا " "
فلربما تصل الرسالة إلى صاحبها 🌹🌹

د.أمنية أشرف

22/07/2022

سلسلة التوعية ضد التطبيقات الاستشفائية لحركة العصر الجديد ( )

(1)

في ظل انتشار New Age Movement (حركة العصر الجديد) التي تحمل صفة الباطنية (Esoteric Sciences) باعتراف روادها الأوائل من السحرة والكُهّان - والتي تخفي عقائد منحرفة خلف مسميات براقة، - في ظل ذلك لابد للفرد من الانتباه قبل الانضمام إلى أي مجموعة لتلقي منهج معين في الحياة أو طريقة في التشافي - أو أساليب في التفكير وفهم الأمور وتفسيرها، أو… أو…، من خلال دورات أو رحلات أو معسكرات أو جلسات نفسية أو غيرها…
مهم جدا قبل ذلك أن يتعرف على المصادر التي استند عليها قائد المجموعة في تكوين هذا المنهج أو ذاك الفكر، والبحث في سيرته الذاتية، ودوراته التي انضم إليها والتي يدرب عليها، والأشخاص الذين تأثر بهم والذين اعتمدوا شهاداته، دون الحكم على نوايا هذا الشخص ودينه، فذلك ليس من شأننا، فالذي يهم بالدرجة الأولى هو الفكر الذي يتبناه هذا القائد، فربما يكون المدرب هو نفسه مخدوع بهذا الزيف الذي يدرب عليه!
فإن ظهر لي أنه يتبنى واحدًا أو أكثر من تطبيقات وأفكار ذلك الفكر الباطني الذي يدس السم بالعسل، فلا ينبغي أن السير في رَكبِه، أو الانضمام إلى فريقه، أو متابعة حساباته ومقاطعه، أو قراءة كتبه، وذلك حفاظًا على عقلي وديني وصحتي النفسية والجسدية من التأثر بهذه الفتنة الآخِذة في الانتشار والتي تختبئ في معظم الأحيان تحت عباءة العلم المثبت- تدليسا- وهي لا تعدو كونها ضربا من ضروب الشعوذة والسحر ..

(مرفق صورة من محتويات احدى الدورات الأساسية لدى الكثير من المدربين العرب والناقلين لتلك التطبيقات العلاجية لهذا الفكر الباطني، من موقع أحد المؤسسين لإحدى التطبيقات في العصر الحديث)

وسنورد قائمة بأسماء مجموعة من التطبيقات والمفاهيم التي تندرج تحت حركة العصر الجديد الباطنية للتحذير منها:











#ماكروبيتويك


#اليوجا
#الشاكرات



#الامتنان



#الوعي


#التوكيدات
#التخاطر

#الاستحقاق




...
#إلخ...

نحيلكم على مزيد من المصادر العلمية او الشرعية من خلال صندوق رسائل الصفحة 🌷🌷

____________________________
نقلا عن صفحة: فلسفات شرقية (بتصرف)

▫️

20/06/2022

يعتبر المرض النفسي أحد الابتلاءات شأنه شأن المرض العضوي.. يصيب قوي الايمان وضعيف الايمان على حد سواء ... والإيمان بالله يعتبر من العوامل الحامية (protective factors) من الاضطرابات النفسية، مثله مثل توافر الدعم الأسري والمستوى التعليمي الجيد والمستوى الاقتصادي الميسور والبيئة الاجتماعية المستقرة، كلها صمامات أمان ضد الاضطرابات النفسية، ولكن وجود تلك العوامل الحامية لا يعني بالضرورة منع الاصابة بالاضطراب النفسي.. ، فالاضطراب النفسي له أسبابه المجتمعة من اعتلال في الجينات وتراكم لتجارب حياتية سلبية مؤثرة في الشخصية ... ولكن تلك العوامل الحامية تعتبر بمثابة الدرع الذي يجعل الاضطراب النفسي - إن أتى - يأت بدرجة أهون وأقل حدة وأكثر استجابة للعلاج عن نفس الاضطراب النفسي لو كان أصاب ذات الشخص في ذات الظروف ولكن في ظل غياب تلك العوامل الحامية ...

فالعوامل الحامية قد تؤثر في شدة الاضطرابات النفسية ودرجة استجابتها للعلاج ومآلاتها (prognosis) ، فكم من مرة-كأطباء نفسيين- صادفتنا عبارة (أنا مانعني عن الانتحار اني مش عايز أموت كافر) ، وهو ما يدل على أن المنظومة الفكرية لدى المريض قبل الاصابة بالاضطراب يكون لها تأثير على شكل الاضطراب وشدته ومآلاته ، بدليل الارتكاز على تلك المنظومة أحيانا في بعض العلاجات النفسية كالعلاج المعرفي السلوكي مما يؤكد أن مجموعة الاعتقادات الفكرية الأساسية السابقة لحدوث الاضطراب تؤثر بلا شك في بنية الاضطراب النفسي وصورته بعد الظهور ....

الأمر أشبه بالسقوط في البحر ولكن بدون ارتداء بدلة أمان، ارتداء بدلة الأمان لن يمنع السقوط في البحر ، ولكنه قد يقلل نسب الغرق ويوفر فرص أفضل للنجاة .... لذلك فمن العبث أن تحمل المريض مسؤولية سقوطه في البحر لأنه لم يرتد بدلة الأمان، لأنه كان مقدرا له أن يسقط في كل الأحوال ... ومن العبث أن تلومه أثناء الغرق على عدم ارتدائه بدلة الأمان ، فالمريض يصارع الموت أمامك ولا جدوى من اتهامه بالتقصير سوى أنك تزيد من احساسه بالعجز وتجعله يستسلم أكثر للغرق ... بل الصواب أن تمد يديك إليه لتنتشله أولا ومن ثم تعطيه الاسعافات الأولية وفترة النقاهة الكافية ، وبعد أن يتجاوز تلك الوعكة يمكنك حينها أن تمده بعوامل الحماية تحسبا لأي وعكات قادمة ...

مع التنويه على أن العلاقة عكسية ، فكما أن صلابة الايمان بالله قبل ظهور الاضطراب النفسي تعتبر من العوامل الحامية وتؤثر على شكله، ..كذلك بعض الاضطرابات النفسية الشديدة- عافانا الله واياكم- قد يكون من ضمن أعراضها وآثارها ضعف مستوى الايمان، أو صعوبة العبادات أو الإلحاد أو ممارسة سلوكيات منحرفة ،.. الخ... لذلك فكثيرا ما نرى الشيخ إمام المسجد يصاب بوسواس سب الذات الالهية ، أو يترك الصلاة تماما ، أو يقوم بسلوكيات منحرفة أثناء نوبة المرض أو يدعي أنه هو من ألف القرءان ، أو حتى ينكر وجود الله ..وكلها قد تكون من تأثيرات الاضطرابات النفسية وليس للمريض أي يد بها..

لمزيد من الاطلاع:
https://www.cambridge.org/core/journals/bjpsych-advances/article/religion-and-psychiatry-recent-developments-in-research/358B30940A36C1CD3AFE7991431BA1A9

د.أمنية أشرف

04/06/2022

س- تتصرف ازاي لو انت من اسكندرية ولقيت حد قريب منك عنده أفكار مقلقة أو انتحارية، أو طريقته متغيرة، أو عنده ميول عدوانية وعنف غير مبرر تجاه اللي حواليه، أو تصرفاته بقت مريبة، أو عنده اندفاعية ممكن تخليه يأذي نفسه أو يأذي حد تاني، أو سلوك غير متزن ممكن يعرضه لمشاكل أو يعرض حياته وحياة اللي حواليه لخطر... ؟

ج- تجيبه حالا يكشف في مستشفى المعمورة للصحة النفسية، في أي وقت، وهناك حاتلاقي فيه دكاترة نفسيين نواب واخصائيين حيقيموا حالته، وحيحددوا مدى خطورتها وحيكتبوا له العلاج المناسب واذا محتاج عناية نفسية حيحجزوه لحد ما حالته تستقر ..
(العنوان اخر البوست)

ناس كتير بتقول الناس مابتتعالجش عشان أهلهم مابيتحملوش تكاليف العيادات الخاصة، لكن ده مش حقيقي، في كل محافظة فيه مستشفى نفسي مجاني بيقدم خدمة نفسية ٢٤ ساعة سواء خالات طوارئ أو حالات عادية..

فيه ناس تانيين بتعتبر المستشفيات النفسية الحكومية stigmatized او (موصومة) بسبب انها بتستقبل الحالات الأصعب في المرض النفسي وبسبب تشويه الدراما ليها على مر السنين، وده بيخليهم مايحاولوش يلجأوا ليها أصلا ولو حتى في مجرد الكشف العادي، وده اعتقاد غلط لازم يتغير، لأنك لو ماخلتش المريض النفسي يكشف بدري وياخد علاجه بدري حاتخلي حالته تتدهور لحد ما تبقى مستعصية على العلاج وتبقى مماثلة للحالات اللي بتتحجز في المستشفيات اللي مش عاجباك ..

لكن فيه نقطتين مهمين وجب التنويه عليهم، أولا ان أصلا مش كل المترددين على المستشفيات النفسية زي المعمورة بتكون حالتهم متدهورة، ناس كتير بتشتكي شكوات بسيطة وبتفضل متابعة في عيادة المستشفى وبتتعالج وتتحسن بدري من غير ماتوصل للدرجات المتأخرة التانية .. والنقطة التانية والأهم، هي انه شدة المرض النفسي لا تعيب المريض النفسي في شيء، العيب الوحيد بس هو انك تشوف ان ده عيب ..

ماتفكرش كتير وهات قريبك المريض وتعالى ..

د.أمنية أشرف
★★★★★★★★★★

عنوان مستشفى المعمورة النفسي:
ش النبوى المهندس متفرع من طريق الملاحة ... بجوار كلية الدراسات الاسلامية... المندرة - الاسكندرية
التليفون: 033256824 - 033256825
(وفي كل محافظة حاتلاقي مستشفى نفسي مركزي زي المعمورة)

01/06/2022

دايما لما بييجي ذكر مضاعفات الحمل والولادة، بييجي على بالنا مشاكل زي ارتفاع الضغط، سكر الحمل، تسمم الحمل، الولادات المبكرة، غثيان الحمل، الإجهاض، وفاة المولود أثناء الولادة، فقر الدم ...إلخ ، وكلها مشاكل عضوية وممكن بسهولة ملاحظة وقياس آثارها،
لكن قليل جدا اللي يعرفوا ان الحمل والولادة ممكن يكون ليهم مضاعفات نفسية ماتقلش خطورة عن باقي المضاعفات العضوية .. وبتتراوح درجة شدتها ما بين مشاكل نفسية بسيطة بتحصل لمعظم السيدات زي الكآبة النفاسية
(postpartum blues/Baby blues)
إلى اضطرابات خطيرة ونادرة زي ذهان ما بعد الولادة (postpartum psychosis)..
ناس كتير مستغربة ومش متخيلة ازاي مرض نفسي ممكن يخلي أم تقتل اطفالها ... هو ده ممكن يحصل فعلا، لكن نقطة النور في الموضوع هو انه مش حيحصل فجأة وحيكون له علامات منذرة من قبلها ، وعشان يوصل لمرحلة التنفيذ لازم نكون تجاهلنا كل العلامات دي بسبب عدم المعرفة ..

فخلينا ناخد نبذة عن بعض أهم أنواع الاضطرابات النفسية للحمل والولادة وعلاماتها :

(برجاء الضغط على كل صورة)

د.أمنية أشرف

08/04/2022

موضوع شائك جدا مكنتش حابة اعلق عليه من باب اعتزال الفتن ومن باب أميتوا الباطل بالسكوت عنه ...

لكن الحقيقة ماقدرتش أسكت قدام كل كمية العبث والتضليل اللي موجودين في المنشورات دي، ولقيت ان اذا مكناش احنا كمجتمع للأطباء النفسيين حانصلح معلومات الناس ونوعيهم بالمرض النفسي اومال مين اللي حيعمل كدة ...

بعيدا عن نقطة القاتل اللي ارتكب الجريمة الشنعاء مختل عقليا أم لا ، دي مش نقطتي خالص ومايهمنيش يطلع مختل أو لأ لأنه في كل الاحوال لازم تنتهي التحقيقات الاول ويتعرض على لجنة الطب النفسي الشرعي والقضاء ياخد مجراه لحماية الناس منه ولردع اي حد تاني بيفكر يعمل زيه ...

وبصفتي طبيبة نفسية مسلمة برضو لا يضيرني شيء انه يطلع المجرم سليم نفسيا لأنه ببساطة هو لا يعبر عن تعاليم ديني في شيء واللي عمله ده يعتبر كبيرة من الكبائر اللي عقابها الحرمان من الجنة :
" مَن قَتَلَ نَفْسًا مُعاهَدًا لَمْ يَرِحْ رائِحَةَ الجَنَّةِ، وإنَّ رِيحَها لَيُوجَدُ مِن مَسِيرَةِ أرْبَعِينَ عامًا."
حديث صحيح.

باعتذر عن طول المقدمة بس كانت ضرورية عشان محدش يصادر على كلامي اللي جاي، واللي حيكون عبارة عن تصحيح لمعلومات خاطئة متداولة وسط العامة من الناس من خارج التخصص، بهدف تأييد فكرة معينة سواء كانت الفكرة فيها بعض من الصحة أم لا ، أو بهدف اثارة مشاعر الناس لعمل فتن، أو حتى لو ماشيين ورا ناس تانية بجهل وبدون أي نية سيئة ..
ودلوقتي حاصحح نقطة نقطة لمعلوماتكم العامة عشان مش أي حد يستغل جهلكم بيها :

١- لا يمكن لمختل عقلي أن يسير بسكين حاد مسنون 😱 :
مش عارفة اقول لكم ايه بس دي أكتر شكوى بيتحجز بيها المختلين عقليا عندنا في المستشفى

٢- لا يمكن لمختل عقليا أن يوجه ٣ طعنات في منطقة قاتلة بالجسم 🤐:
المختل عقليا مش لازم يكون مختل على كل المستويات الوظيفية للعقل ... يعني لو هو عنده ضلالة معينة (فكرة وهمية مؤمن بها) ومصدقها وبيتصرف على أساسها مش معناها انه عنده نقص في الذكاء يعيقه عن التخطيط او انه يتصرف زي اي شخص طبيعي فيما عدا الحتة اللي فيها اختلال ... وممكن يكون المختل أذكى من اللي كاتب الجملة دي شخصيا ..

٣- المختل لا يمكن ان يقتل على الهوية ؟!!
لأ يا فندم مريض الذهان لو جت له ضلالات فيما يخص الهوية حيعتبر كل من خالف هويته اعداء بيتربصوا له وممكن يبقى عايز يدافع عن نفسه منهم عادي ، ومفيش تفرقة بين الديانات في الموضوع ده شفت المسلم اللي عنده ضلالة ضد الجيران المسيحيين وشفت المسيحي اللي عنده ضلالة ضد جيرانه المسلمين ، والنسبة الاكبر من الضلالات بتيجي في صورة ضلالات اضطهاد ...

٤- المختل الذي يصل به الخلل للقتل يكون من الخطورة للبقاء على قيد الحياة:
ده كلام خطير جدا والاستاذ اللي كاتبه بيطلب اعدام المريض النفسي الذي ليس له ذنب في ضلالاته بدل من معالجته وايداعه في المكان المخصص لتلقي العقوبة على قدر جرمه حسب القانون !!

٥- التعصب ليس من انواع الخلل العقلي :
خطأ التعصب قد يكون مبني على خلل عقلي وضلالات مرضية وقد يكون موجود في انسان سليم ...الفيصل في كدة هو طبيب نفسي مختص فقط

٦- التعليقات المهللة للقتل دليل على أن كل هؤلاء مختلين :
لأ راجع النقطة الخامسة ، اي انسان سليم ممكن يبقى متعصب أيا كانت ديانته ، اللي بيهللوا للقتل دول متعصبين ، واللي بيكتبوا منشورات زي حضرتك هدفها اثارة الفتن والكراهية بمعلومات خاطئة برضو متعصبين ... وعلى الوجه المقابل ليس كل مختل عقليا متعصب لأن الضلالات ممكن تيجي في اي صورة تانية غير صورة التعصب ..
وبرضو عشان مانوصمش المريض النفسي ، النسبة الأقل جدا من المرضى النفسيين اللي ممكن يتم اهمالهم لحد مايوصلوا للمراحل دي ...وغالبية المرضى النفسيين مش بيكونوا مرضى ذهان

٧-ليه مختل عقليا عالمسيحيين بس ماراحش قتل أي حد تاني ؟
الضلالات انواع بتختلف من مريض لمريض ، ضمن الانواع فيه ضلالات الاضطهاد، ودي ممكن تيجي في صورة ضلالات اضطهاد ضد أهله وبيعتقد خطأا انهم بيكرهوه وعايزين يأذوه، فيه مريض تاني بيجي له ضلالة اضطهاد ضد زمايله في الشغل فيبدأ يعتقد انهم بيدبروا ضده مؤامرات .. وفيه مريض بيجي له ضلالات اضطهاد ضد كائنات من المريخ ويبقى معتقد ان فيه كائنات بتراقبه وعايزة تأذيه، وزيهم برضو فيه مرضى بيجي لهم ضلالات ضد الناس اللي على غير دينه ويبقى معتقد انهم اعداء له وعايزين يأذوه ... فالمريض اللي بيجي له ضلالات ضد ناس معينين بيكون متحفز ضد اي حاجة تخصهم ، وبيتصرف طبيعي تماما مع اي حد تاني غيرهم... وللأسف ضلالات الاضطهاد هي اكتر نوع منتشر من الضلالات وسط المرضى.

٨- عارف ليه المختل عقليا لما بيشوف جلبية سودة وعمة وصليب بيتجن ويروح يقتله ؟ عشان ماليه الكراهية والحقد....مش عشان ماليه الكراهية والحقد لأ، لكن عشان الاعلام وانت واحد منهم مش بينقل ويركز وينشر غير النوع ده من الحوادث ، ومش بيشوف في المقابل مئات من المرضى النفسيين سواء في دول عربية او اجنبية بترتكب جرايم نتيجة للضلالات بتاعتهم بدءا من جرايم ضد أهلهم لحد جرايم عنصرية ... وكلامي عاللي تشخيصهم مرض نفسي اللي تشهد عليهم وعلى تاريخهم المرضي المستشفيات النفسية ، مش على الانسان السليم عقليا لكن منحرف فكريا واخلاقيا ..
لكن ببساطة اللي كاتب البوست عمل كشف نفسي على كل اللي اتقال عليهم مختلين عقليا وقرر بنفسه انهم كانوا عاقلين ، بينما تجاهل كل الحوادث اللي صدر فيها حكم اعدام ضد ارهابيين عاقلين من اللي ارتكبوا جرايم طائفية

اللي عنده فكرة وعايز يثبتها يا ريت يستدل بمعلومات صحيحة مش عشان الناس مش فاهمة حاجة نستغل جهلهم عشان نثبت حجتنا .. استنادك لمعلومات خاطئة دليل على ضعف حجتك ودليل انك عندك انحياز تجاه فكرة معينة بطريقة غير ناضجة ...
التفكير الناضج يخليك عادل ومتزن في حكمك على الأمور ، ولو شايف ان لجان الطب الشرعي والتحقيقات والقضاء حيطلعوه مريض نفسي بالتزوير - وان كان ده شيء أظنه مستبعد لأن القضايا الطائفية بتكون قضايا أمن وطني ومابيتأخروش فيها في تنفيذ احكام الاعدام متى ثبت الجرم - لكن على أي حال وقتها مشكلتك تبقى معاهم مش مع جيرانك المسلمين اللي ماحدش فيهم أذاك ولا حد منهم أيد أي اعتداء عليك واللي معاك في نفس المركب .. ماتكونوش أداة للشحن من ناس ليها أغراض تانية وهدفها اشعال الفتن وخليكم أذكى من كدة ... واللي ميعرفش حاجة عن المرض النفسي يا ريت مايتكلمش فيه بجهل ... واللي ميعرفش أي حاجة عامة يا ريت برضو مايفتيش فيها ولا ينقلها ...طبعا كلامي مش حيعجب ناس كتير لأنهم منحازين لمشاعر الاحساس بالظلم ..لكن انا مش كاتبة كلام عشان يعجب حد او يثير تعاطف حد زي البوستات التانية ...

بالمناسبة المختل العقلي بيحاسب زي الانسان السليم عادي لو ثبت ان الجرم اللي ارتكبه مش متأثر بالجزء اللي فيه اختلال عقلي عنده ... ولو ثبت انه بسبب اختلال عقلي فبرضو بياخد عقوبة وبيتحجز في مستشفى الخانكة يقضي عقوبته بالسنين ..
وحتى لو ثبت انه مريض نفسي ده لا ينفي احتمالية انه يكون حد استغل مرضه النفسي واستعمله كأداة لاثارة فتنة ، ساعتها هو ده اللي حيكون المجرم اللي مطلوب اعدامه ..وفي كل الاحوال احنا مع أي اجراء يكفل الحقوق لاصحابها ويردع كل النفوس الخبيثة (اذا ثبت ان فيه أي مؤامرة في الموضوع مش مجرد حادث عشوائي... ).

وخالص العزاء لأسرة الفقيد وان شاء الله ربنا يظهر الحق والمجرم ياخد جزاؤه وربنا يجنبنا جميعا شر الفتن ويحفظ الجميع من كل سوء.. 🌸🌸

د.أمنية اشرف

12/12/2021

تعتزم إدارة موقع المحاورون بالتعاون مع الدكتور خالد بن حمد الجابر - إستشاري طب الأسرة والعلاج النفسي - إقامة برنامج علاج جماعي للمصابين باضطراب الوسواس القهري (نوع العقيدة أو نوع العبادات).

نبذة تعريفية:
سيكون البرنامج بنظام الجلسات النفسية الجماعية غير الدوائية، بواقع أربع جلسات، كل أسبوع جلسة واحدة، مدة الجلسة من ساعة إلى ساعتين بشكل جماعي.
وستكون هناك تمارين وتكليفات مُلزِمة.
للتأكيد: (لن يكون هناك جلسات فردية)

- من أراد الانضمام فليُسجِّل معلوماته بشكل صحيح في الاستمارة المرفقة، علمًا بأن المقاعد محدودة.

البرنامج عن بُعد بالتعاون مع موقع المحاورون والمقاعد محدودة.

30/10/2021

عمرك اتحطيت في موقف انك تكون بتكلم حد في موضوع مهم، وهو يبقى ماسك الموبايل بيبص فيه وهو بيكلمك ؟
يا ترى بيكون ايه احساسك ؟ وهل انت كمان ممكن تكون بتعمل كدة مع غيرك؟

الPhubbing هو مصطلح مستحدث ظهر في 2012 ، بيوصف انشغالنا بالموبايلات أثناء لقاءاتنا المباشرة بأهلنا وأصدقائنا وزملائنا وعدم تفاعلنا معاهم وتجاهلنا ليهم نتيجة اننا بنscroll عالموبايل طول الوقت ، والمصطلح مشتق من (snubbing) بمعنى الازدراء و (Phone) ..

طيب وايه علاقة ال Phubbing بالاحساس بالازدراء ؟
ده لان تعرضنا للphubbing بيمثل تهديد ل ٤ احتياجات اساسية عندنا وهي :
الانتماء Belongingness
الثقة بالنفس Self-Esteem
الوجود ذو المعنى Meaningful existence
التحكم Control

لما حد ينشغل عنك بالموبايل ، ممكن تحس بالرفض وعدم الأهمية ... وده بالتأكيد له تأثير سلبي على صحتك النفسية وعلى علاقتك مع الشخص ده ، خاصة لو شخص قريب.. وكمان ده ممكن يدفعك ان انت كمان تمارس نفس السلوك معاه ومع غيره عشان تملا الفراغ اللي عندك، وندخل في الحلقة المفرغة دي وتضعف بسببها كل علاقاتنا الاجتماعية ، وفيه دراسة أثبتت ان مجرد وجود الموبايل في مكان ما بيقلل التواصل ما بين الناس نتيجة لتشتتهم، ودراسة تانية اثبتت انه بيأثر سلبا على الشعور بالرضا ما بين الأزواج وبيزود الصراعات ما بينهم بسبب التجاهل ... نضيف على كدة انخراطنا داخل السوشيال ميديا في حد ذاته الدراسات اثبتت انه بيسوء الاكتئاب وبيزود الاحساس بالوحدة والقلق ..

لو انت متعود تكلم شخصين في نفس الوقت واحد عالحقيقة وواحد عالموبايل، او بتاخد الموبايل على السفرة وانت بتاكل، او كل شوية لازم تعمل check عليه اثناء المحاضرة سواء منتظر حاجة مهمة او بتscroll بلا هدف..
فانت كدة بقيت Phubber وعندك مشكلة محتاج تعالجها لأن حياتك الاجتماعية وصحتك النفسية بقت في خطر :

١- امنع الموبايلات على الأكل، وحطها بعيد وخليها على الوضع الصامت عشان ماتنشغلش بالاشعارات، وادي نفسك فرصة تتواصل بصدق مع الناس اللي معاك.
٢- سيب الموبايل بعيد عن عينك، في عربيتك او درج مكتبك او شنطتك ، ماتقلقش مفيش حاجة حاتفوتك وكل التنبيهات تقدر تشوفها بعدين.
٣-اتحدى نفسك، وكافئ نفسك كل ما تنجح في عدد الساعات والوجبات واللقاءات اللي بتحضرها من غير لمس الموبايل.
٤- الPhubbing هو سلوك اندفاعي مكتسب، وزي ماتعلمته تقدر تعلم نفسك ازاي توقفه، بس محتاج صبر ووعي بالمشكلة.

ولو انت تعرف حد Phubber، ممكن تساعده يتغير بالطريقة دي:
١- خليك نموذج كويس وسيب الموبايل بعيد وانت بتكلمه، ماتشجعهوش يوريك حاجة عالموبايل وانت معاه، وركز عليه بثبات وهو حيفهم التلميح..
٢-كلمه بطريقة مباشرة وقول له ان دي حاجة انت مش بتحبها وفهمه انها بتضر بالعلاقات وساعده يتغير..
٣- خليك متعاطف معاه، عشان السلوكيات المكتسبة بتاخد وقت عشان تقف ..

د.أمنية أشرف
-------------------------------
المصادر:

1-مقال مختصر ومترجم من : https://www.healthline.com/health/phubbing

22/10/2021

تعرف ان الفيسبوك عنده لوغاريتمات بتحلل شخصيتك من خلال بوستاتك واهتماماتك وتعليقاتك والفترة اللي بتقعدها على الصفحات المختلفة؟

طيب تعرف ان الرسالة دي متوجهة بالظبط ليك وظهرت لك عالهوم دلوقتي لأنها بتحلل شخصيتك اللي مش كل الناس تعرفها؟

اعرف شخصيتك من خلال تحليل لوجاريتمات الفيسبوك:
⬇️⬇️⬇️⬇️⬇️⬇️⬇️⬇️⬇️

" أنت بحاجة لأن يحبك الآخرون ويعجبون بك.. ومع ذلك فأنت تميل إلى انتقاد نفسك...

في حين أن لديك بعض نقاط الضعف في الشخصية ، يمكنك بشكل عام تعويضها...
لديك سعة كبيرة غير مستخدمة لم تستغلها لصالحك...

في بعض الأحيان تكون لديك شكوك حقيقية فيما إذا كنت قد اتخذت القرار الصحيح أو فعلت الشيء الصحيح...

في بعض الأحيان تكون منفتحًا ، ولطيفًا ، ومؤنسًا ، بينما في أوقات أخرى تكون انطوائيًا ، وحذرًا ، ومتحفظًا...

تميل بعض تطلعاتك إلى أن تكون غير واقعية إلى حد ما...

الأمن هو أحد أهدافك الرئيسية في الحياة...
"

ودلوقتي ايه تقييمك لدقة التحليل السابق ليك ، تدي له كام في المية ؟
_____________________

أكاد أجزم ان تقريبا كل اللي وقع قدامه البوست شايف ان تحليل الشخصية اللي فوق يتوافق معاه بنسبة تتخطى ال 80% ...

طيب يا جماعة، مبدئيا هو البوست ظهر قدامكم لأنكم تفاعلتوا مع الصفحة قبل كدة او صفحات مشابهة بصورة او بأخرى، لكن ملوش اي علاقة بتحليل الفيسبوك لشخصيتكم، والتحليل ده منسوخ من احد مواقع الأبراج Horoscopes ...

اومال ازاي طلع مطابق لشخصيتكم ؟

فيه ظاهرة نفسية اسمها "تأثير بارنم" (او تأثير فورير)
"Barnum Effect" / "Forer Effect"
الظاهرة دي هي اللي بتفسر سبب إيمان الأفراد بأوصاف الشخصية اللي ممكن تبقى أوصاف معممة على كل الناس ، كما لو انها كانت وصف دقيق لشخصيتهم "الفريدة"...

ودي ظاهرة بتوضح ليه علم الأبراج وغيره من علوم التنجيم وقراءة هالات الطاقة وبعض اختبارات الشخصية على الفيسبوك وتحليل الشخصية من خلال خط اليد ، هي علوم زائفة وغير حقيقية بالرغم من قدرتها على التكهن بدقة في احيان كثيرة ...

الظاهرة دي لاحظها عالم نفس اسمه Bertram Forer سنة 1948
العالم ده عمل تجربة ذكية جدا، وزع أسئلة شخصية على مجموعة من طلابه ... وبعدين جمع اجاباتهم وقال لهم انه حيحلل شخصية كل واحد من خلال اجاباته على الاسئلة... وبعدين وزع على كل واحد فيهم نتيجة تحليل شخصيته بناءا على اجاباته عن الاسئلة اللي في الاول ... وطلب منهم يدوا له تقييم من 0 ل 5 على مدى دقته في التحليل ....
وكانت النتيجة الاجمالية مذهلة ، وهي ان متوسط معدل دقة تحليلات الشخصية كانوا راضيين عنها بنسبة 4.3/5 ، وبكدة معظم اللي خضعوا للتجربة شافوا ان تحليلات فورير كانت وصف دقيق لشخصياتهم الفريدة 👌🏻

المفاجأة بقى اللي فورير فاجئهم بيها في الآخر ، هي انه اصلا ماكنش قرا اجاباتهم على اختبارات الشخصية اللي وزعها عليهم في الأول ، مش بس كدة ، ده كمان كان موزع عليهم كلهم زي بعض نفس نتيجة تحليل الشخصية، اللي بالمناسبة نفس التحليل اللي انا كنت كاتباهولكم فوق 😅

-------------
طب ايه هو "تأثير بارنم" ؟؟؟ ...

"تأثير بارنم" هو مثال لتحيزاتنا العقلية "cognitive bias" نتيجة للآتي:

1-ان عقولنا دايما بتميل انها تصدق عبارات ومفردات عامة وبتخلينا نسقطها على نفسنا بصفة شخصية ....
2- ان عقولنا بتميل انها تحكم على أي معلومة انها صحيحة مدام المعلومة دي بتمثل لنا أي أهمية شخصية ...
3-ان الناس بتميل لحب وتصديق عبارات الثناء والمديح ، ومن المرجح أنهم يقبلوا التعليقات الإيجابية عن نفسهم ويعتقدوا أنها دقيقة ، حتى لو كانت عامة وغامضة، ويرفضوا العبارات النقدية.
4-ان المحلل بيستخدم المعنى وعكسه في الجملة الواحدة ، زي ( انت ذكي اجتماعيا وبتعرف تتعامل مع الناس لكن احيانا الناس مش بتفهمك بسهولة) ، بحيث ان أي حد حيقرا الجملة لازم حايحس انها منطبقة عليه..
5-انه بيستخدم أوصاف عامة موجودة بنسب مختلفة عند كل الناس ..
6- ان المختبرين عندهم ثقة في علم ومهارة الخبير اللي بيحللهم وعندهم استعداد مسبق لتصديقه.
7- الجمل بتبدأ ب (أنت) وغيرها من العبارات اللي بتوحي بالشخصنة والتفرد وده بيوهم القارئ بدقة الوصف.

أتمنى يكون المقال فادكم وتكونوا اكثر وعي بعد كدة وماتقعوش فريسة سهلة لمروجي العلوم الزائفة والمشعوذين..

بقلم: د.أمنية أشرف
****

المراجع:

1-The Barnum Effect - Why People Believe In Astrology And Psychics
https://youtu.be/NBXRzdzFnHk

2-https://www.britannica.com/science/Barnum-Effect

3-https://thedecisionlab.com/biases/barnum-effect/

4-https://en.m.wikipedia.org/wiki/Barnum_effect